தாயகம் திரும்ப அழைப்பு விடுக்கப்பட்டும் தமிழ்நாட்டிலேயே இருக்க விரும்பும் இலங்கைத் தமிழர்கள் - காரணம் என்ன? பிபிசி கள ஆய்வு

"28 ஆண்டுகள் தமிழ்நாட்டில் வசித்துவிட்டு 2018-இல் இலங்கைக்குத் திரும்பினேன். ஆனால், அங்கு இருக்கின்ற சூழ்நிலையை விட, இங்கு கஷ்டமான நிலவரம் உள்ளது. நிறைய பேர் வந்துட்டு, திரும்ப போய் விட்டார்கள்."

இலங்கையில் வவுனியா பகுதியில் வசிக்கும் விஸ்வநாதன் கூறும் வார்த்தைகள் இவை.

கடந்த 2011-ஆம் ஆண்டு முதல் தற்போது வரை தமிழ்நாட்டில் இருந்து இலங்கை திரும்பிய 10,000-க்கும் அதிகமானோரில் விஸ்வநாதனும் ஒருவர்.

'எங்களுக்கு அடிப்படை வசதிகளை சரி செய்து கொடுத்தால் இலங்கையைவிட இந்தியாவிலேயே இருக்க விரும்புகிறோம். அகதிகள் என்கிற போர்வையில் தான் வைத்துள்ளீர்கள், ஆனாலும் எங்களுடைய வாழ்வாதாரத்திற்கு இந்தியாவே பரவாயில்லை."

சென்னை அருகே உள்ள கும்மிடிப்பூண்டி இலங்கைத் தமிழர் மறுவாழ்வு முகாமில் வசிக்கும் குணசேகரன் கூறும் வார்த்தைகள் இவை.

தமிழ்நாட்டிலே தொடர்ந்து வசிக்கும் சுமார் 90,000 இலங்கைத் தமிழர்களில் குணசேகரனும் ஒருவர். இந்த மக்கள் தமிழ்நாடு முழுவதும் உள்ள இலங்கைத் தமிழர் மறுவாழ்வு முகாம்களிலும் காவல்துறையில் பதிவு செய்து கொண்டு முகாம்களுக்கு வெளியேவும் வசித்து வருகின்றனர்.

இந்தியாவுக்கும் இலங்கைக்கும் இடையேயான இலங்கைத் தமிழர் விவகாரம் பல தசாப்தங்களாகத் தொடர்ந்து வரும் பிரச்னையாக உள்ளது.

2009-க்குப் பிறகு இலங்கைத் தமிழர்கள் இலங்கைக்குத் திரும்புவது தொடர்ந்து நடைபெற்று வந்தது. கடந்த ஆண்டு அவ்வாறு திரும்பிய சிலர் விசாரணைக்கு உட்படுத்தப்பட்டதாக செய்திகள் வந்ததைத் தொடர்ந்து இந்த நடவடிக்கை தற்காலிகமாக நிறுத்தி வைக்கப்பட்டது

இந்த நிலையில் இவ்விவகாரம் தொடர்பாக இலங்கை அரசு கடந்த ஆகஸ்ட் மாதம் புதிய அறிவிப்பு ஒன்றை வெளியிட்டு இந்தியாவில் வசிக்கும் இலங்கைத் தமிழர்கள் நாடு திரும்புமாறு அழைப்புவிடுத்திருந்தது.

ஆனால் இந்த ஆண்டின் செப்டம்பர் மற்றும் அக்டோபர் மாதங்களில் 8 பேர் மட்டுமே இலங்கைக்குத் திரும்பியுள்ளதாக ஐக்கிய நாடுகளின் அகதிகளுக்கான உயர் ஆணையரகம் (யு.என்.ஹச்.சி.ஆர்) தெரிவிக்கிறது.

அதோடு தற்போது சுமார் 30 பேர் இலங்கைக்குத் திரும்ப விருப்பம் தெரிவித்து அந்தப் பணிகள் வெவ்வேறு கட்டங்களில் இருப்பதாகவும் யு.என்.ஹச்.சி.ஆர் தெரிவித்துள்ளது.

இலங்கைக்குத் திரும்பும் மக்களுக்கான ஏற்பாடுகளை மேற்கொள்வதையும் அடிப்படை உதவிகளை வழங்குவதையும் யு.என்.ஹச்.சி.ஆர் அமைப்பு கவனித்து வருகிறது.

தமிழ்நாட்டில் வசிக்கும் இலங்கைத் தமிழர்களின் விருப்பம் என்ன? தமிழ்நாட்டில் இருந்து இலங்கைக்குத் திரும்பியவர்களின் தற்போதைய நிலை என்ன? என்பது போன்ற விஷயங்களைத் தெரிந்துகொள்ள பிபிசி தமிழ் தமிழ்நாட்டிலும் இலங்கையிலும் கள ஆய்வு மேற்கொண்டது.

கடந்த ஆண்டு நடந்தது என்ன?

கடந்த 2025-ஆம் ஆண்டு தமிழ்நாட்டில் இருந்து இலங்கைக்குத் திரும்பியவர்கள் கொலும்பு மற்றும் யாழ்ப்பாணத்தில் விசாரணைக்கு உட்படுத்தப்பட்டதாக செய்திகள் வெளியானது.

இந்த விவகாரம் பேசுபொருளான நிலையில் இலங்கைத் தமிழர்கள் திரும்பும் நடவடிக்கை யு.என்.ஹச்.சி.ஆர் அமைப்பால் தற்காலிகமாக நிறுத்தி வைக்கப்பட்டது.

இரண்டு சந்தர்ப்பங்கள் பதிவான நிலையில் ஒரு வழக்கில் அன்றைய தினமே பிணை கிடைத்ததாகவும் மற்றுமொரு வழக்கில் ஒருநாள் கழித்து பிணை கிடைத்ததாகவும் யு.என்.ஹச்.சி.ஆர் தரப்பில் தெரிவிக்கப்பட்டது.

இலங்கை அரசின் அறிவிப்பு என்ன?

தமிழ்நாட்டில் வசிக்கும் இலங்கை தமிழர் விடயம் தொடர்பாக இலங்கை அரசு அறிவிப்பு ஒன்றை வெளியிட்டிருந்தது.

இந்தியாவில் வசிக்கும் இலங்கைத் தமிழ் அகதிகள் தாங்களாகவே விருப்பத்துடன் தாயகம் திரும்புவதற்கான சட்ட மற்றும் நிர்வாகத் தடைகளை நீக்கி, குடியேற்ற நடைமுறைகளை எளிமைப்படுத்த இலங்கை அமைச்சரவை ஒப்புதல் அளித்துள்ளதாக இலங்கை அரசு அறிவித்திருந்தது.

ஆனால் இது தொடர்பாக மேலதிக அறிவிப்புகளோ அல்லது தகவல்களோ வெளியிடப்படவில்லை.

தமிழ்நாட்டில் முகாம்கள் தவிர்த்து காவல்துறையில் பதிவு செய்து கொண்டு முகாம்களுக்கு வெளியேவும் 33,000-க்கும் அதிகமானோர் வசித்து வருகின்றனர்.

இந்த அறிவிப்பை இந்தியா மற்றும் இதர நாடுகளில் வசிக்கும் இலங்கைத் தமிழர்கள் நம்பிக்கையுடன் பார்ப்பதில்லை என்கிறார் சென்னையில் வசித்து வரும் இலங்கைத் தமிழரும் செயற்பாட்டாளருமான சண் மாஸ்டர்.

பிபிசி தமிழிடம் பேசிய அவர், "இத்தகைய அறிவிப்பு வருவது முதல்முறையல்ல. 2015-இல் இலங்கையில் ஆட்சி மாற்றம் ஏற்பட்டபோது அப்போதைய அரசும் இதே போன்றதொரு அறிவிப்பை வெளியிட்டது. ஆனால் இத்தனை ஆண்டுகளில் பெரிதாக எதுவும் மாறிவிடவில்லை." என்றார்.

மேலும் அவர், "கடந்த ஆண்டுகளில் திரும்பிய சிலர் விசாரணை உள்ளாக்கப்பட்டு கைது செய்யப்பட்ட சம்பவம் இங்குள்ள மக்கள் மத்தியில் அச்சத்தை ஏற்படுத்தியுள்ளது." என்று தெரிவித்தார்.

கடந்த காலங்களில் சில கைது சம்பவங்கள் நடைபெற்றதை ஒப்புக்கொள்வதாக இலங்கை அமைச்சர் ராமலிங்கம் சந்திரசேகர் பிபிசி தமிழிடம் தெரிவித்தார்.

அமைச்சரவையின் முடிவு குறித்து மேலும் பேசிய அவர், "வருகின்ற மக்களை வரவேற்க வேண்டிய நிலையில் நாம் இருக்க வேண்டுமே தவிர அவர்களை தடுத்து நிறுத்தி இடையூறு ஏற்படுத்தக்கூடாது. இந்தியாவில் இருந்து வருகின்ற அகதிகளுக்கு எந்த விதமான இடையூறும் இல்லாது அவர்கள் இலங்கையை ஏற்றுக்கொள்வதற்கும் அவர்களை இலங்கை வரவேற்பதற்குமான நடவடிக்கைகளை எடுக்க வேண்டும் என்பது தான் அமைச்சரவை எடுத்த முடிவின் சாராம்சம்." என்றார்.

'தொடர்ந்து சரிந்து வரும் எண்ணிக்கை'

தமிழ்நாட்டில் இருந்து இலங்கை திரும்பியவர்களின் எண்ணிக்கை கடந்த காலங்களில் ஏற்ற இறக்கங்களைச் சந்தித்தாலும் அது படிப்படியாக குறைந்துவந்துள்ளதைப் பார்க்க முடிகிறது.

உதாரணமாக 2011-இல் அதிகபட்சமாக 1,673 பேர் இலங்கைக்குத் திரும்பியுள்ளனர். 2017-இல் இது 1,520 ஆக இருந்தது. கொரோனா காலகட்டத்தில் இந்த எண்ணிக்கை (2020-இல் 196, 2021இல் - 96) சரிந்திருந்தது. அதன்பிறகு இந்த எண்ணிக்கை சற்று அதிகரித்தாலும் முந்தைய அளவுகளில் இல்லை. 2025-ஆம் ஆண்டில் 92 பேர் மட்டுமே இலங்கைக்குத் திரும்பியிருந்தனர்.

சமீபத்திய நிகழ்வுகளில் வழக்குகள் மற்றும் விசாரணைகள் போன்றவை முக்கிய தாக்கம் செலுத்தியிருந்தாலும் வாழ்வாதாரமும் இதில் முக்கியமான ஒரு காரணியாக உள்ளது.

'25 குடும்பங்கள் இருந்த இடத்தில் 2 குடும்பங்கள் மட்டுமே உள்ளன'

இலங்கைக்குத் திரும்பியவர்கள் பல்வேறு ஊர்களில் குடியமர்த்தப்பட்டனர். அதில் ஒன்று தான் வவுனியாவில் உள்ள காஞ்சனமோட்டை எனும் பகுதி.

தொடக்கத்தில் 25 குடும்பங்கள் இந்த இடத்தில் குடியேறியதாக அந்தப் பகுதியில் வசிக்கும் விஸ்வநாதன் தெரிவிக்கிறார்.

1990-இல் தமிழ்நாட்டுக்கு வந்த இவர் 2018-இல் இலங்கைக்குத் திரும்பியிருந்தார்.

"எட்டு ஆண்டுகளில் எந்த பெரிய மாற்றமும் இல்லை. அங்கிருந்து வந்தால், ஏதோ ஒரு வசதியோடு வந்தால் தான் இங்கு வாழலாம். ஒன்றுமே இல்லாமல், ஒன்றுமே செய்ய முடியாது," என்கிறார் விஸ்வநாதன்.

இங்கு அடிப்படை வசதிகள் எதுவும் மேம்படுத்தப்படவில்லை என்றும் அவர் கூறினார்.

மேலும் அந்தப் பகுதி, யானைகள் செரிந்த வாழக்கூடியதாகவும் யானைகளின் ஊடுருவல் அதிகம் இருக்கக்கூடிய இடமாகவும் இருப்பதால் பல குடும்பங்கள் வெளியேறி வாடகை வீடுகளில் வசித்து வருவதாக மக்கள் தெரிவிக்கின்றனர்.

25 குடும்பங்கள் வசித்த அந்தப் பகுதியில் தற்போது 2 குடும்பங்கள் மட்டுமே உள்ளன.

90களில் தமிழ்நாட்டுக்கு வந்த ஜீவதயாளன் கடந்த 2022-ஆம் ஆண்டு இலங்கைக்குத் திரும்பி தற்போது முல்லைத்தீவில் வசித்து வருகிறார். இந்தியாவில் வசிப்பவர்கள் இலங்கைக்குத் திரும்ப சௌகரியமான சூழல் இல்லை என்கிறார் அவர்.

"இந்தியாவில் சம்பாதித்து 2017-இல் இலங்கையில் ரூ.27 லட்சம் மதிப்புக்கு வீட்டையும் தோட்டத்தையும் வாங்கினேன். இன்றைய தேதிக்கு இதை வாங்க 2 கோடி ரூபாய் ஆகும். இந்தியாவிலிருந்து புதிதாக வருகின்ற மக்கள் காணி வாங்குவது என்றாலே அது பெரிய கஷ்டமாக இருக்கும்," என்று அவர் பிபிசி தமிழிடம் தெரிவித்தார்.

'80 சதவீத பேர் இந்தியாவில் வசிக்கத்தான் விரும்புகின்றனர்'

90களில் இருந்து பலமுறை தமிழ்நாட்டுக்கும் இலங்கைக்கும் இடம்பெயர்ந்த நடேசலிங்கம் 2019-இல் இலங்கைக்கு நிரந்தரமாகத் திரும்பினார். தற்போது முல்லைத்தீவில் அவர் வசித்து வருகிறார்.

'நான் கதைத்த வரையில் தமிழ்நாட்டில் வசிக்கும் கிட்டத்தட்ட 80 சதவீத மக்கள் நாடு திரும்பத் தயாராக இல்லை' என்று கூறும் செயற்பாட்டாளர் நடேசலிங்கம் அவர்கள் குடியுரிமையை கேட்டுத் தான் நகர்ந்து கொண்டிருக்கின்றார்கள் என்று தெரிவிக்கிறார்.

மேலும் அவர், "மீதம் 20 சதவீத மக்களும் குழந்தைகளின் கல்வி, வேலைவாய்ப்பு போன்ற காரணங்களால் உடனடியாக நாடு திரும்புவதற்கான சாத்தியக்கூறுகள் இல்லை." என்றார்.

தொடர்ந்து பேசிய அவர், "தமிழ்நாட்டில் மக்கள் சம்பாதித்து வீட்டுக்குத் தேவையானவற்றை வாங்கியிருப்பார்கள். இங்கு வந்து மீண்டும் புதிதாக வாங்க முடியாது. அவற்றைக் கொண்டு வரவும் வழியில்லை. அதற்கு அனுமதி வழங்கப்பட வேண்டும்.

தொழில்கள் கிடைப்பதற்கான வாய்ப்புக்களை வழங்குவது. காணி, இருப்பிடம், வாழ்வாதார உதவித் திட்டம், வீட்டுத் திட்டம் வழங்கப்பட வேண்டும். குறைந்தது 6 மாதங்களுக்கான நிவாரண பொதி வழங்கப்பட வேண்டும்." என்றும் தெரிவித்தார்.

'இந்தியக் குடியுரிமை என்பது எட்டாக்கனி'

தமிழ்நாட்டில் 29 மாவட்டங்களில் உள்ள மொத்தம் 105 முகாம்களில் 56,000க்கும் அதிகமானோர் வசித்து வருகின்றனர். அதில் ராமநாதபுரம் மாவட்டத்தில் உள்ள மண்டபம் முகாமும் அடங்கும்.

மண்டபம் முகாமில் வசித்து வரும் மாசிலாதேவி பிபிசி தமிழிடம் பேசுகையில், "எங்களுடைய பிள்ளைகள் இங்கேயே பிறந்து வளர்ந்து இங்குள்ள வாழ்க்கைக்கு பழகிவிட்டதால் எங்களுக்கு இலங்கைக்குத் திரும்பி போக விருப்பமில்லை. ஒரு சிலர் போக வேண்டும் என்கிறார்கள். அவர்கள் செல்லட்டும். ஆனால் என்னைப் போல குடியுரிமை கேட்கும் பலருக்கும் குடியுரிமை வழங்க வேண்டும்." என்றார்.

ஆனால் இலங்கைக்குத் திரும்பிச் சென்றால் தாங்கள் என்ன எதிர்கொள்ள நேரிடும் என்கிற அச்சத்தில் சிலர் திரும்பிச் செல்ல தயங்குவதாக மண்டபம் முகாமைச் சேர்ந்த மோகன் பிபிசி தமிழிடம் கூறினார்.

"வழக்குகளை எதிர்கொள்வோமோ என்கிற அச்சம் மக்களிடம் இருக்கிறது. அனைவரையும் சுமூகமாக இலங்கை பிரஜை போல நடத்துவோம் என்கிற உத்தரவாதத்தை இலங்கை அரசு வழங்கினால் பலர் செல்வார்கள். ஏனெனில் இந்தியாவில் குடியுரிமை என்பது எட்டாக்கனியாக உள்ளது. எனவே சொந்த நாட்டுக்குச் சென்றால் வாழ்வாதாரம், எதிர்காலம் உள்ளிட்ட விஷயங்களுக்குப் பயனுள்ளதாக இருக்கும்," என்று அவர் தெரிவித்தார்.

'பிள்ளைகளை விட்டுச் செல்ல மனமில்லை'

90களில் தமிழ்நாட்டுக்கு வந்த பல குடும்பங்களில் இரண்டு தலைமுறையை சேர்ந்தவர்கள் இந்தியாவில் தங்களுடைய வாழ்வை கழித்துள்ளனர்.

சென்னை அருகே உள்ள கும்மிடிப்பூண்டி முகாமில் சுமார் 1000 குடும்பங்கள் வசிக்கின்றன.

இலங்கையில் நிலவும் நிச்சயமற்ற தனமை தங்களுக்கு தயக்கத்தை ஏற்படுத்துவதாக கும்மிடிப்பூண்டி முகாமில் வசிக்கும் உதயமலர் தெரிவிக்கிறார்.

"1990-இல் எங்களுடைய வீடுகள் இடிக்கப்பட்டன. நிலமும் இருக்கிறதா என்பது தெரியாது. எங்களுடைய பிள்ளைகள், பேரப்பிள்ளைகள் எல்லோரும் இங்கேயே தான் வசிக்கிறார்கள். திரும்பி அங்கு சென்று கஷ்டப்படுவதற்கு இங்கேயே இருக்க விரும்புகிறோம்," என்று அவர் தெரிவித்தார்.

'இருதரப்பிலும் வேலைவாய்ப்பு மீது எழும் கேள்விகள்'

தமிழ்நாட்டில் வசிக்கும் இலங்கைத் தமிழர்களுக்கு கல்விக்கான அரசுத் திட்டங்களும் தனியார் உதவிகளும் கிடைக்கின்றன. ஆனால் வேலைவாய்ப்பு பெறுவதில் தான் கஷ்டங்கள் இருப்பதாக கும்மிடிப்பூண்டி முகாமில் வசிக்கும் சூட்டியம்மாள் தெரிவிக்கிறார்.

பிபிசி தமிழிடம் பேசிய அவர், "என் மகன் 20 ஆண்டுகளுக்கு முன்னர் திரும்பி திரிகோணமலையில் வசித்து வருகிறார். அவருக்கே இன்னும் வீடு கட்டிக்கொடுக்கப்படவில்லை. அங்குள்ள மக்கள் நன்றாக இருந்தால் தானே எங்களுக்கு நம்பிக்கை வரும். இந்தியாவில் முந்தைய தலைமுறை கிடைத்த வேலைகளைச் செய்து கொண்டு இருக்கிறோம்.

ஆனால் எங்களுடைய பிள்ளைகள் மருத்துவர், பொறியாளர் உள்பட பட்டப்படிப்புகளை முடிக்கின்றனர். ஆனால் அவர்களுக்குப் படிப்புக்கு ஏற்ற முறையான வேலை கிடைப்பதில்லை." என்றார்.

இலங்கையிலும் இதே நிலை தொடர்வதாகக் கூறுகிறார் ஜீவதயாளன். வங்கியில் கடன் பெறுவதில் கூட சிரமங்கள் இருப்பதாக அவர் குறிப்பிடுகிறார்.

"தமிழ்நாட்டில் தான் என்னுடைய பிள்ளைகள் பிறந்தார்கள். அங்கு தான் படித்தார்கள். வங்கியில் எதுவுமே பெற முடிவதில்லை. இந்தியாவில் பார்த்தால் இலங்கைக்காரன் என்கின்றீர்கள். இலங்கையில் பார்த்தால் இந்தியக்காரன் என்று சொல்கின்றீர்கள். அப்படியென்றால் என்னுடைய பிள்ளைகள் எங்கு போறது. அப்படியொரு பிரச்னை உள்ளது. சரியான மன உளைச்சலாக உள்ளது," என்று அவர் தெரிவித்தார்.

இலங்கை திரும்பியவர்களுக்கு திட்டங்களின் பலன்கள் கிடைக்கின்றனவா?

இலங்கை திரும்பியவர்களுக்கு அரசாங்கத்தின் 'அஸ்வெசும திட்டம்' உடனடியாக வழங்கப்பட வேண்டும் என்கிறார் நடேசலிங்கம்.

ஆனால் எட்டு ஆண்டுகள் ஆகியும் இந்த அஸ்வெசும திட்டம் கிடைக்கவில்லை என்கிறார் விஸ்வநாதன்.

பிபிசி தமிழிடம் பேசிய அவர், "நான் இந்தியாவிலிருந்து வந்து 8 வருடங்கள் ஆகின்றன. இங்கு பரம்பரையாக இருப்பவர்களுக்கு அஸ்வெசும திட்டம் எல்லாம் கிடைக்கின்றது. ஆனால் நாங்கள் இவ்வளவு தூரம் கஷ்டப்பட்டு வந்து, நாங்கள் பதிந்து கொடுத்தோம். ஆனால் எங்களுக்கு உதவித் திட்டங்கள் எதுவும் வரவில்லை.

நான்கு பிள்ளைகள் படிக்கின்றார்கள். நான் ஒரு ஆள் தான் வேலை. நாங்கள் இதுக்குள்ள தோட்டங்களை செய்து, பராமரித்துக்கொண்டு வாழ்கின்றோம். நான்கு பிள்ளைகள் படிக்கின்றார்கள். அவர்களுக்கான செலவுகள். வீட்டு சாப்பாட்டுக்கு எல்லாம். சொல்ல இயலாது. இப்படியான நிலவரத்தில் தான் இருக்கின்றோம்." என்றார்.

மக்களின் எதிர்பார்ப்பு என்ன?

கும்மிடிப்பூண்டி முகாமில் வசிக்கும் குணசேகரன் ஐந்து மாத குழந்தையாக இருந்தபோது தமிழ்நாட்டுக்கு வந்தார்.

பிபிசி தமிழிடம் பேசிய அவர், "இங்கு முகாமில் கால்வாய்கள் முறையாக தூர்வாரப்படவில்லை. கால்வாய்களுக்கு மூடிகள் இல்லை, திறந்த கால்வாய்களாகவே உள்ளன. சில இடங்களில் அடைப்பு ஏற்பட்டுள்ளது. 36 ஆண்டுகளில் பெரிதாக எதுவும் மாறிவிடவில்லை. அடிப்படை வசதிகளை சரிசெய்து கொடுத்தால் எங்களுக்குப் பரவாயில்லை. அகதிகள் என்கிற போர்வையில் தான் வைத்துள்ளீர்கள், ஆனாலும் வாழ்வாதாரத்துக்கு இந்தியாவே பரவாயில்லை." என்று தெரிவித்தார்.

கடந்த 2007-ஆம் ஆண்டு தமிழ்நாட்டுக்கு வந்த பிரதீபன் தற்போது கும்மிடிப்பூண்டி முகாமில் வசித்து வருகிறார்.

பிபிசி தமிழிடம் பேசிய அவர், "மக்கள் இலங்கைக்கு வர தயாராக இருக்கிறார்கள். அவர்களுக்கு பொருளாதார உதவிகள் செய்து கொடுக்க வேண்டுன். குறைந்தபட்சம் 1 கோடி ரூபாய் இழப்பீடு கொடுக்க வேண்டும். குடும்பத்தில் பலர் உள்ளனர். அவர்கள் அனைவருக்கும் தனித்தனி வீடுகள் கட்டிக் கொடுக்க வேண்டும். விவசாயம் செய்பவர்களுக்கு காணி கொடுக்க வேண்டும். அரசாங்கம் இந்த வாக்குறுதிகளை ஏமாற்றாமல் கொடுக்க வேண்டும். அங்கு சென்ற பிறகு கைவிட்டு விடக்கூடாது. அப்படி இலங்கை சென்றவர்கள் திரும்பிய சம்பவங்களும் பதிவாகியுள்ளன." என்றார்.

அரசாங்கத்தின் பதில் என்ன?

இலங்கைக்குத் திரும்பியவர்கள் முன்வைக்கும் கோரிக்கைகள் தொடர்பாக இலங்கை அமைச்சர் ராமலிங்கம் சந்திரசேகர் பிபிசி தமிழிடம் பேசினார்.

"எங்களுக்குள்ள முதலாவது வேலை, அவர்கள் வருகின்ற போது அவர்களுக்கான காணி கொடுக்க வேண்டும். காணி உள்ள பிரதேசங்களில் விசேடமாக வீதிகள், மின்சாரம், நீர் இது முக்கியமானது. அந்த கட்டுமான வேலைகளை செய்து கொடுப்பதற்கு நாங்கள் தயாராக இருக்கின்றோம்.

அதற்கு அடுத்ததாக அவர்களுக்கான வீடுகளை அமைத்துக்கொள்வதற்கான உதவித் திட்டங்களை வழங்குவதற்கும் நாங்கள் தயாராக இருக்கின்றோம். அதற்கு அடுத்தக்கட்டமாக நாங்கள் அவர்களுக்கு விவசாயம். விவசாயத்திற்கு தேவையாக காணி, அதற்கு தேவையானவற்றை பெற்றுக்கொடுப்பதற்கும் தயராக இருக்கின்றோம்.'' என்றார்.

''மேலதிகமாக ஏனைய தொழில்துறைகளில் ஈடுபடுவார்களாக இருந்தால், நிச்சயமாக செய்து கொடுப்போம். பல்வேறு கடன் பொறிமுறைகள் இருக்கின்றன. அந்த கடனின் ஊடாக இலகுக்கடன், வட்டி குறைந்த கடனை பெற்றுக்கொடுப்பதற்கும் நாங்கள் தீர்மானித்துள்ளோம். மேலும் ஏதாவது தேவைப்படுமாக இருந்தால், இந்திய மற்றும் தமிழ் நாட்டு அரசாங்கங்களுடன் பேசி, புதிய பொறிமுறைக்கு போக வேண்டுமாக இருந்தால், அதையும் நாங்கள் செய்தவற்கும் தயாராக இருக்கின்றோம்." என்றார் ராமலிங்கம் சந்திரசேகர்.

தமிழ்நாட்டில் முகாம்களில் வசிக்கும் இலங்கைத் தமிழர்கள் நலன் தொடர்பாக வெளிநாடு வாழ் தமிழர் நலத்துறை அமைச்சர் தென்னரசு சட்டப்பேரவையில் சில அறிவிப்புகளை வெளியிட்டார்.

அதன்படி, இலங்கை தமிழர்களுக்கு வழங்கப்பட்டு வரும் மாதாந்திர பணக் கொடை மற்றும் உயர்கல்வி பயில வழங்கப்பட்டு வரும் கல்வி உதவித் தொகை உயர்த்தி வழங்கப்படும் என்று தெரிவித்தார்.

இலங்கைத் தமிழர்களுக்கு குடியுரிமை மற்றும் முகாம் பராமரிப்பு உள்ளிட்ட தொடர்பாகவும் விளக்கம் பெற பிபிசி தமிழ் தலைமைச் செயலகத்தில் அமைச்சர் தென்னரசை சந்தித்தது.

"முகாம்களில் உள்கட்டமைப்பு வசதிகளை மேம்படுத்த அனைத்து நடவடிக்கைகளும் எடுக்கப்படும். குடியுரிமை என்பது மத்திய அரசு முடிவெடுக்க வேண்டிய விஷயம். இலங்கைத் தமிழர்களுக்கு குடியுரிமை வழங்க வேண்டும் என்பதே தவெக அரசின் நிலைப்பாடு," என்றும் தெரிவித்தார்.

இலங்கைக்குத் திரும்பியவர்கள் அல்லது திரும்பும் முடிவில் இருப்பவர்களுக்கு அவர்களுடைய வாழ்வாதாரத்துக்கான சிறப்புத் திட்டத்தை அறிவிக்க வேண்டும் என்பதே பிரதான கோரிக்கையாக உள்ளது.

தமிழ்நாட்டில் வசிக்கும் இலங்கைத் தமிழர்களில் சிலர் இலங்கைக்குத் திரும்ப விருப்பம் தெரிவித்தாலும் பலரும் தமிழ்நாட்டில் வசிக்கவே விரும்புவதாக கூறுகின்றனர். அவர்களுடைய பிரதான கோரிக்கை குடியுரிமை சார்ந்ததாகவே இருக்கிறது.

கூடுதல் செய்தி சேகரிப்பு: பிரபுராவ் ஆனந்தன், பிபிசி தமிழுக்காக

- இது, பிபிசிக்காக கலெக்டிவ் நியூஸ்ரூம் வெளியீடு