சி.டி ஸ்கேன் மூலம் வெளிப்பட்ட 400 ஆண்டுகள் பழமையான பூட்டின் ரகசியம்: முடிவுக்கு வந்த 20 ஆண்டுக்கால தேடல்

வேல்ஸ் கடற்கரைக்கு அப்பால் கண்டெடுக்கப்பட்ட பழங்காலப் பூட்டில் இருந்த நான்கு எழுத்துகள் கொண்ட ரகசியக் குறியீட்டை, நிபுணர்கள் நவீன ஸ்கேனிங் தொழில்நுட்பத்தின் உதவியுடன் கண்டறிந்துள்ளனர். இதன் மூலம், கிட்டத்தட்ட 400 ஆண்டுகளாக நீடித்த மர்மத்துக்கு விடை கிடைத்துள்ளது.

உலோகங்களைக் கண்டறியும் கருவியைப் பயன்படுத்தித் தேடும் பணியில் ஈடுபட்டிருந்த பீட்டர் ஹியூஸ் என்பவர், சுமார் 400 ஆண்டுகள் பழமையான இந்தப் பித்தளைப் பூட்டை 1999ஆம் ஆண்டு போர்ட் டால்போட்டில் உள்ள மார்கம் பகுதிக்கு அருகேயுள்ள மணல் குன்றுகளில் கண்டெடுத்தார்.

ஸ்பெயினில் இருந்து திரும்பிக் கொண்டிருந்தபோது, 1583ஆம் ஆண்டு டிசம்பர் 28ஆம் தேதி வீசிய புயலில் மூழ்கிய 'ஆன் பிரான்சிஸ்' என்ற கப்பலின் சரக்குகளில் இந்தப் பூட்டும் ஒன்றாக இருந்தது.

கப்பலில் இருந்த பொருட்கள் பல நூற்றாண்டுகளாக மணலில் புதைந்து கிடந்தன. அருங்காட்சியக நிபுணர்கள் மைக்ரோ சிடி ஸ்கேனிங் தொழில்நுட்பத்தைப் பயன்படுத்தி, பூட்டின் உட்புறத்தை ஆய்வு செய்தனர். இதன் மூலம், அதைத் திறப்பதற்கான சரியான எழுத்துக் குறியீட்டைக் கண்டறிந்து மர்மத்தைத் தீர்த்தனர்.

மாஸ்டெக் பகுதியைச் சேர்ந்த 69 வயதான பீட்டர் ஹியூஸ், மோர்ஃபா கடற்கரையில் பல தசாப்தங்களாக மேற்கொண்ட தேடலின்போது கண்டெடுத்த நூற்றுக்கணக்கான பொருட்களில் இந்தப் பூட்டும் ஒன்று என்று தெரிவித்தார்.

இந்தப் பூட்டுடன் ஸ்பானிய பல வெள்ளி நாணயங்களும், நாணயங்களை எடைபோடப் பயன்படுத்தப்படும் கருவிகளும் கண்டெடுக்கப்பட்டன. மதிப்புமிக்க ஆவணங்கள் அல்லது துணிகள் வைக்கப்பட்டிருந்த பெட்டியைப் பாதுகாப்பாகப் பூட்டுவதற்கு இது பயன்படுத்தப்பட்டு இருக்கலாம் என்று கருதப்படுகிறது.

"அன்று எனக்கு விடுமுறை. உலோகங்களைக் கண்டறியும் கருவியைக் கொண்டு பொழுதுபோக்காக கடற்கரையில் தேடிக்கொண்டிருந்தபோது, தற்செயலாக ஒரு நாணயம் கிடைத்தது. அங்கிருந்துதான் இந்தத் தேடல் தொடங்கியது" என்று ஹியூஸ் கூறினார்.

வேல்ஸ் தேசிய அருங்காட்சியகம் மற்றும் கார்டிஃப் பல்கலைக்கழகத்தைச் சேர்ந்த நிபுணர்கள் குழு, இந்தப் பூட்டின் ரகசியக் குறியீட்டைக் கண்டறிந்ததில் அவர் மிகுந்த மகிழ்ச்சியடைந்தார்.

"கடந்த 20 ஆண்டுகளாகப் பூட்டின் சுழல் வளையங்களைத் திருப்பிச் சரியான குறியீட்டைக் கண்டுபிடிக்க முயன்றேன். ஆனால், என்னால் முடியவில்லை. இப்போது நவீன தொழில்நுட்பத்தின் உதவியுடன், நிபுணர்கள் 'டா வின்சி கோட்' போன்ற ஒரு புதிருக்கு விடை கண்டுபிடித்துள்ளனர். என்னைப் பொறுத்தவரை, இது வரலாற்றுப் புகழ்பெற்ற 'உடன்படிக்கைப் பெட்டியை' (Ark of the Covenant) திறப்பதற்கு இணையான சிலிர்ப்பான அனுபவம்" என்று அவர் தெரிவித்தார்.

'புதிர் போன்றதொரு சவால்'

கார்டிஃப் பல்கலைக்கழகப் பொறியியல் பள்ளியின் ஆராய்ச்சி உதவியாளரான டாக்டர் டேவிட் வில்லியம்ஸ், இந்தப் பணிக்கு ஸ்கேனிங் கருவியைப் பயன்படுத்தலாம் என்று பரிந்துரைக்கப்பட்டபோது, ஆரம்பத்தில் அதுகுறித்து தனக்குச் சந்தேகம் இருந்ததாக அவர் கூறினார்.

"எங்களிடம் உள்ள இந்த கருவி, இத்தகைய பணிக்காக வடிவமைக்கப்பட்டது அல்ல. இது மருத்துவமனைகளில் பயன்படுத்தப்படும் மைக்ரோ-சிடி ஸ்கேனிங் போன்றதுதான், ஆனால் சிறிய பொருட்களை ஆய்வு செய்ய இதைப் பயன்படுத்துகிறோம்" என்று அவர் விளக்கினார்.

"முதல் ஸ்கேனிங்கிலேயே அதற்குள் இருந்த எழுத்துகள் கண்டறியப்பட்டதைக் கண்டு நான் ஆச்சரியமடைந்தேன். இரண்டாவது முயற்சியில் பலன் கிடைக்கவில்லை என்றாலும், மூன்றாவது முயற்சியில் வேறொரு அணுகுமுறையைப் பயன்படுத்தி, அதில் இருந்த குறியீடுகளைக் கண்டறிய முடிந்தது. இதைச் சாதிக்க முடிந்ததில் எனக்கு மிகுந்த மகிழ்ச்சியாக இருக்கிறது" என வில்லியம்ஸ் கூறினார்.

ஹியூஸ், தான் கண்டெடுத்த பொருட்களை 2017ஆம் ஆண்டு அருங்காட்சியகத்திடம் ஒப்படைத்தார். இந்தப் பூட்டு, 2026 ஜூலை மாதம் ஸ்வான்சீ வாட்டர்ஃபிரண்ட் அருங்காட்சியகத்தில் முக்கியக் காட்சிப் பொருளாக இடம்பெற்றது.

இந்தப் பூட்டைத் திறப்பதற்கான ரகசியக் குறியீடு 'ஏ.என்.சி.ஈ' என்பது கண்டறியப்பட்டது வியப்பளிப்பதாக இருப்பதாக மூத்த காப்பாளர் அலஸ்டேர் வில்லிஸ் தெரிவித்தார்.

"இந்தப் பூட்டில் நான்கு சுழல் வளையங்கள் உள்ளன. ஒவ்வொரு வளையத்திலும் ஆறு எழுத்துகள் இடம்பெற்றுள்ளன. இதன் மூலம் மொத்தம் 1,296 விதமான குறியீடுகளை உருவாக்க முடியும். மேலும், பூட்டின் இரு முனைகளிலும் சுழற்ற முடியாத வகையில் நிலையான எழுத்துகள் உள்ளன. திருடர்களைக் குழப்புவதற்காகவே இவ்வாறு வடிவமைக்கப்பட்டு இருக்கலாம்" என்று அவர் விளக்கினார்.

அருங்காட்சியகத்தின் மற்றொரு மூத்த காப்பாளரான சியான் ஈல்ஸ், இந்தப் பூட்டு மிகவும் நல்ல நிலையில் இருப்பதாகவும், பல நூற்றாண்டுகளுக்கு முன்பு எப்படிச் செயல்பட்டதோ, அதேபோல் இன்றும் செயல்படுவதாகவும் தெரிவித்தார்.

இந்தப் பூட்டு ஒரு சிறிய பெட்டியைப் பூட்டுவதற்குப் பயன்படுத்தப்பட்டு இருக்கலாம் என்றும் அவர் கூறினார். ஆனால், அந்தப் பெட்டிக்குள் என்ன வைக்கப்பட்டிருந்தது என்பது இன்றும் விடை தெரியாத மர்மமாகவே உள்ளது.

வேல்ஸில் புதையல் கிடைத்தால் என்ன செய்ய வேண்டும்?

கடந்த 1996ஆம் ஆண்டின் புதையல் சட்டத்தின்படி, எத்தகைய பொருட்களைப் புதையல் என்று கருத வேண்டும் என்பதற்கு விரிவான சட்ட வரையறை உள்ளது.

வேல்ஸில் ஒருவர் புதையலைக் கண்டெடுத்தால், அதைக் கண்டறிந்த நாளில் இருந்து அல்லது அது புதையல் என்பதை உணர்ந்த நாளில் இருந்து 14 நாட்களுக்குள், 'கண்டெடுப்புகள் தொடர்பு அதிகாரி' ஒருவரிடம் தெரிவிக்க வேண்டும். சட்டப்படி புதையல் என வகைப்படுத்தப்படும் பொருளைக் கண்டெடுத்தும் அதுகுறித்துத் தெரிவிக்கத் தவறினால், அபராதம் விதிக்கப்படலாம் அல்லது மூன்று மாதங்கள் வரை சிறைத் தண்டனை வழங்கப்படலாம்.

ஸ்காட்லாந்து மற்றும் வடக்கு அயர்லாந்தில் இதற்கான சட்ட விதிகள் வேறுபடுகின்றன. பழமையான அல்லது மதிப்புமிக்க பொருள் ஒன்றைக் கண்டெடுத்ததாகத் தெரிவித்தவுடன், அருங்காட்சியகக் காப்பாளர் அல்லது சம்பந்தப்பட்ட அரசு அதிகாரி உங்களைத் தொடர்புகொள்வார். அந்தப் பொருள் எங்கே, எப்படிக் கண்டெடுக்கப்பட்டது என்பது குறித்து அவர்கள் விசாரிப்பார்கள்.

இதையடுத்து, கண்டெடுக்கப்பட்ட பொருள் குறித்த அறிக்கை தயாரிக்கப்படும். மேலும், மரண விசாரணை அதிகாரி அல்லது அவருக்கு இணையான அதிகாரி ஒருவர் இது தொடர்பாக விசாரணை நடத்துவார்.

நாணயங்கள் உள்ளிட்ட பொருட்கள் 1996ஆம் ஆண்டின் புதையல் சட்டத்தின்படி புதையல் என்ற வரையறைக்குள் வருகிறதா என்பதை நிபுணர்கள் மூலம் ஆய்வு செய்ய, கண்டெடுப்புகள் தொடர்பு அதிகாரி உதவுவார். கண்டெடுக்கப்பட்ட புதையலை ஏதேனும் ஓர் அருங்காட்சியகம் வாங்க விரும்பினால், அதன் மதிப்பைத் தீர்மானிக்க 'புதையல் மதிப்பீட்டுக் குழு' நிபுணர் ஒருவரை நியமிக்கும்.

புதையலின் மதிப்பு எவ்வளவு என்பதையும், அதைக் கண்டறிந்தவருக்கோ அல்லது வெகுமதி பெறத் தகுதியுடைய மற்றவர்களுக்கோ எவ்வளவு தொகை வழங்கலாம் என்பதையும் இந்தக் குழு மதிப்பீடு செய்து, கலாசாரம், ஊடகம் மற்றும் விளையாட்டுத் துறை அமைச்சருக்குப் பரிந்துரை செய்யும்.

- இது, பிபிசிக்காக கலெக்டிவ் நியூஸ்ரூம் வெளியீடு