நெதன்யாகுவா, ஐசென்கோட்டா? ஆட்சி அமைக்க நடக்கும் போட்டி குறித்து இஸ்ரேல் ஊடகங்கள் கூறுவது என்ன?

பெஞ்சமின் நெதன்யாகு தலைமையிலான கூட்டணி பெரும்பான்மையை பெற தவறியதைத் தொடர்ந்து, இஸ்ரேலில் புதிய அரசு அமைப்பதில் முட்டுக்கட்டை நீடிக்கிறது.

செவ்வாய்க்கிழமை இஸ்ரேல் நாடாளுமன்றத்தில், புதிய நாடாளுமன்ற உறுப்பினர்கள் பதவியேற்றனர். ஆனால் புதிய அரசு அமைப்பது குறித்த பேச்சுவார்த்தை இன்னும் தொடர்கிறது.

பொதுத் தேர்தலில் பிரதமர் பெஞ்சமின் நெதன்யாகுவால் நாடாளுமன்றத்தில் பெரும்பான்மையைப் பெற முடியவில்லை. ஆனால் அவரது முக்கிய எதிர்ப்பாளர்களுக்கும் ஆட்சிக்கு வருவதற்கான தெளிவான வழி இல்லை.

இதற்கிடையில், முன்னாள் ராணுவ ஜெனரல் காடி ஐசென்கோட் அரசு அமைப்பதற்காகக் கூட்டணியை உருவாக்க முயன்று வருகிறார்.

இஸ்ரேல் அதிபர் ஞாயிற்றுக்கிழமை காடி ஐசென்கோட்டிடம் அரசு அமைக்கும் பொறுப்பை ஒப்படைத்தார்.

இருப்பினும், ஐசென்கோட்டுக்கும் அவரது கூட்டணிக் கட்சிகளுக்கும் பெரும்பான்மை பலம் இல்லை. தங்களால் ஆட்சியமைக்கத் தேவையான ஆதரவை வழங்கக்கூடிய கட்சிகளுடன் இதுவரை அவர்களால் உடன்பாட்டுக்கு வர முடியவில்லை.

ஐசென்கோட், நெதன்யாகு ஆகிய இருவரும் கூட்டணி அரசு அமைக்கத் தவறினால், இஸ்ரேலில் மீண்டும் தேர்தல் நடத்தப்படலாம்.

இதற்கிடையில், அரசு அமைவதற்கான வாய்ப்புகள் குறித்து இஸ்ரேல் ஊடகங்களில் விவாதம் சூடுபிடித்துள்ளது.

நவம்பர் 10 அன்று புதிய நாடாளுமன்றத்தில் உறுப்பினர்கள் பதவியேற்பதற்கு முன்பு, புதிய அரசு அமைவதற்கான சாத்தியக்கூறுகளை இஸ்ரேல் ஊடகங்கள் விவாதித்தன.

நாடாளுமன்றத்தை யார் கட்டுப்படுத்துவார்கள், அடுத்த பிரதமராக யார் வருவார்கள் என்பதில் தெளிவற்ற நிலை நீடித்தபோதே உறுப்பினர்கள் பதவியேற்றுக் கொண்டனர்.

ஐசென்கோட் எதிர்கொள்ளும் சவால்கள் குறித்தும் இஸ்ரேலிய ஊடகங்கள் சுட்டிக்காட்டியுள்ளன.

மீண்டும் தேர்தல்?

நிதி விவகாரங்கள் தொடர்பான இணையதளமான தி மார்க்கர், மீண்டும் தேர்தல் நடக்கலாம் என்று கூறுகிறது.

''நாடாளுமன்ற உறுப்பினர்களின் பதவியேற்பு, மீண்டும் தேர்தல் நடத்தப்படுவதற்கான கவுண்ட்டவுனைத் தொடங்கும்" என்று அந்த இணையதளம் எழுதியுள்ளது.

மத்தியவாதக் கொள்கையைக் கொண்ட சேனல் 13, அரசியல் கட்சிகள் "கடினமான சமரசங்களை" மேற்கொள்ள மறுத்தால் மீண்டும் தேர்தல் நடத்தப்பட வாய்ப்புள்ளதாகக் கூறியுள்ளது.

மீண்டும் தேர்தல் நடத்தப்பட்டால், அது " செலவுச் சுமையை அதிகரிக்கும், மேலும் பிளவுகளையும் நிலையற்ற தன்மையையும் ஏற்படுத்தும்" என்றும் அந்தத் தொலைக்காட்சி குறிப்பிட்டுள்ளது.

நெதன்யாகுவுக்கு எதிரான அணியில் நிலவும் கருத்து வேறுபாடுகள், அந்தக் கூட்டணி ஆட்சி அமைப்பதற்கான வாய்ப்பைப் பலவீனப்படுத்தலாம் என்று 'தி மார்க்கர்' இதழின் கட்டுரையாளர் ஒருவர் சுட்டிக்காட்டியுள்ளார்.

அந்தச் செய்தியின்படி, முன்னாள் பிரதமர் நஃப்தாலி பென்னட் மற்றும் இடதுசாரி ஜனநாயகக் கட்சியினர் ஒரு பக்கத்திலும், வலதுசாரித் தலைவர் அவிக்டோர் லீபர்மேன் மற்றும் அவருடன் இணைய வாய்ப்புள்ள தீவிர பழமைவாத யூதக் கட்சிகள் மறுபக்கத்திலும் உள்ளனர்.

தேர்தலுக்குப் பிறகு, பாலஸ்தீனர்களைப் பிரதிநிதித்துவப்படுத்தும் கட்சிகளுடன் ஒத்துழைப்பதைத் தடுக்கும் நோக்கத்திலும், தீவிர பழமைவாத யூதக் கட்சிகளைத் தனது பக்கம் திரட்ட வலதுசாரித் தலைவரான லீபர்மேன் முயன்று வருகிறார்.

ஆனால், தீவிர பழமைவாத யூத ஊடகங்கள் தங்கள் அணியினர் எந்த அரசியல் அணியிலும் இடம்பெறவில்லை என்று வலியுறுத்தியுள்ளன.

"நாங்கள் இடதுசாரிகளும் அல்ல; வலதுசாரிகளும் அல்ல" என்று ஐக்கிய தோரா யூத கட்சியின் ஒரு பிரிவுடன் தொடர்புடைய 'யாதேத் நியமான்' நாளிதழ் தெரிவித்துள்ளது.

தீவிர பழமைவாத யூதச் சமூகம் "தனக்கெனத் தனி அரசியல் பிரிவாகத் திகழ்கிறது" என்றும் அந்த நாளிதழ் குறிப்பிட்டுள்ளது.

கட்சித் தலைவர்கள் பிரிவுகளாகச் சிந்திப்பதைத் தவிர்க்க வேண்டும் என்றும் அந்த நாளிதழ் எச்சரித்துள்ளது.

நாடாளுமன்றத்தைக் கட்டுப்படுத்தும் முயற்சி

நெதன்யாகுவுக்கு எதிரான அணியில் புதிய அரசை அமைப்பதற்கான முயற்சிகள் வேகமெடுத்துள்ளதாக இடதுசாரிச் சார்புடைய 'ஹாரெட்ஸ்' நாளிதழ் குறிப்பிட்டுள்ளது.

"கிட்டத்தட்ட சாத்தியமற்ற சூழலில்" ஓர் அரசை அமைக்கும் சவாலை ஐசென்கோட் எதிர்கொண்டுள்ளதாக அந்த நாளிதழ் தெரிவித்துள்ளது.

மத்தியவாதக் கொள்கைகளைக் கொண்ட 'வைநெட்' இணையதளம், ஐசென்கோட்டின் யஷார் கட்சியின் தலைமையில் புதிய நாடாளுமன்றம் விரைவாகச் சட்டங்களைக் கொண்டுவருவதற்கான நடவடிக்கைகளைத் தொடங்கத் தயாராகி வருவதாகக் கூறியுள்ளது.

நாடாளுமன்றத்தின் முக்கியப் பொறுப்பான பேரவை தலைவர் பதவியைத் தக்கவைத்துக்கொள்ள யஷார் கட்சி விரும்புவதாகவும், மற்ற நாடாளுமன்றக் குழுக்களின் தலைவர் உள்ளிட்ட பொறுப்புகளை ஐசென்கோட்டின் கூட்டணிக் கட்சிகளுக்குப் பகிர்ந்தளிக்கத் திட்டமிட்டுள்ளதாகவும் 'வைநெட்' தெரிவித்துள்ளது.

முன்னாள் மதச் சேவைகள் துறை அமைச்சர் மத்தான் கஹானா, பேரவை தலைவர் பதவிக்கான சாத்தியமான வேட்பாளராக ஊடகச் செய்திகளில் குறிப்பிடப்பட்டுள்ளார்.

நெதன்யாகுவுக்கு ஆதரவான 'சேனல் 14' தொலைக்காட்சியின் அரசியல் ஆசிரியர், நாடாளுமன்றத்தின் மீதான ஐசென்கோட்டின் கட்டுப்பாடு அவரது 'படிப்படியான' அரசியல் உத்தியின் ஒரு பகுதி என்று குறிப்பிட்டுள்ளார்.

முதலில் நெதன்யாகுவுக்கு எதிரான அணிக்குள் தனது தலைமையை வலுப்படுத்துவதும், பின்னர் பொதுமக்களிடையே தனது செல்வாக்கை அதிகரிப்பதும் இந்த உத்தியின் நோக்கம் என்று அவர் கூறியுள்ளார்.

புதிய அரசு அதிகாரப்பூர்வமாக அமைக்கப்படுவதற்கு முன்பே, அந்த அணியால் மேற்கொள்ளக்கூடிய முக்கியமான ஆரம்பகட்ட நடவடிக்கைகள் இவை என்றும் அவர் தெரிவித்துள்ளார்.

120 உறுப்பினர்களைக் கொண்ட இஸ்ரேல் நாடாளுமன்றத்தில் 19 இடங்களைக் கொண்டுள்ள, பாலத்தீன மக்களை பிரதிநிதித்துவப்படுத்தும் கட்சிகளின் ஆதரவுடன் இத்தகைய நடவடிக்கைகளை மேற்கொள்ள முடியும் என அவர் கூறினார்.

இருப்பினும், பாலத்தீன மக்களைப் பிரதிநிதித்துவப்படுத்தும் கட்சிகள் ஐசென்கோட் தலைமையிலான கூட்டணி அரசில் இடம்பெறுவதற்கான வாய்ப்பு "தற்போதைக்கு இல்லை" என்று 'வைநெட்' வலியுறுத்தியுள்ளது.

பேரவை தலைவர் மற்றும் நாடாளுமன்றக் குழுக்களின் பொறுப்புகளுக்கான நியமனங்களில் பாலஸ்தீனக் கட்சிகளின் வாக்குகளைச் சார்ந்திருப்பது, "பயங்கரவாத அமைப்புகளுடன் ஒத்துழைப்பதற்குச் சமம்" என்று சேனல் 14 விமர்சித்துள்ளது.

இதற்கிடையே, அரசு ஒளிபரப்பு நிறுவனமான 'கான்' தொலைக்காட்சியில் ஒளிபரப்பான உரையில், டெமாக்ரட்ஸ் கட்சியின் தலைவர் யாயிர் கோலன், நெதன்யாகுவுக்கு எதிரான அணியில் உள்ள தனது கூட்டாளிகள் "அரபுக் கட்சிகளையோ அரபு மக்களையோ புறக்கணிக்கக் கூடாது" என்று கேட்டுக்கொண்டார்.

மத்தியவாத நாளிதழான 'மாரிவ்', நாடாளுமன்ற தலைவரை தேர்ந்தெடுப்பது என்பது வேகமான அரசியல் மாற்றங்களின் "தொடக்கம் மட்டுமே" என்று குறிப்பிட்டுள்ளது.

அக்டோபர் 7 தாக்குதல்கள் குறித்து தேசிய அளவிலான விசாரணை நடத்துவது, நாட்டின் உச்ச நீதிமன்றத்தின் அதிகாரங்களைக் கட்டுப்படுத்தும் சட்டங்களை ரத்து செய்வது ஆகிய திட்டங்களையும் அந்த நாளிதழ் சுட்டிக்காட்டியுள்ளது.

- இது, பிபிசிக்காக கலெக்டிவ் நியூஸ்ரூம் வெளியீடு