اٹلی کے ایک چھوٹے سے قصبے سے کانگریس کی قیادت تک: سونیا گاندھی کی زندگی کے نشیب و فراز کی کہانی

31 اکتوبر 1984 کی صبح سونیا گاندھی ایک نوجوان بیوی اور ماں تھیں اور انڈیا کے دارالحکومت دہلی میں وزیرِ اعظم کی رہائش گاہ پر مقیم تھیں۔ وہ نہانے ہی والی تھیں کہ انھوں نے باغ میں فائرنگ کی آواز سنی۔

ان کی ساس اور انڈیا کی وزیرِ اعظم اندرا گاندھی کچھ ہی دیر پہلے ساتھ ہی واقع ایک عمارت میں اپنے دفتر کے لیے روانہ ہوئی تھیں۔ چند لمحوں بعد ان کے سکھ محافظوں میں سے دو نے انھیں قتل کر دیا۔ یہ قتل اسی سال امرتسر میں سکھ مذہب کے مقدس ترین مقام گولڈن ٹیمپل پر انڈین فوج کے حملے کے ردِعمل میں کیا گیا تھا۔

سونیا گاندھی کو فائرنگ کی آواز پٹاخوں جیسی لگی، لیکن اس میں کچھ فرق تھا۔ بچوں کی آیا گھبراہٹ کے عالم میں باتھ روم کے دروازے پر زور زور سے دستک دینے لگیں اور باغ کی جانب اشارہ کرنے لگیں۔

سونیا بھاگ کر راستے کی طرف گئیں۔ ایک سفید رنگ کی ایمبیسڈر گاڑی آہستہ آہستہ ان کی طرف بڑھ رہی تھی۔ گاڑی کے اندر اندرا گاندھی خون میں لت پت پڑی تھیں۔ ان کی ساڑھی پر خون کے دھبے تھے، آنکھیں کھلی ہوئی تھیں اور چہرے پر حیرت کے تاثرات تھے، جیسا کہ سونیا کو یاد تھا۔

انھوں نے ’ممی، ممی‘ کہنے کی کوشش کی، لیکن ان کے منہ سے کوئی لفظ نہ نکل سکا۔ ہسپتال میں کئی گھنٹے انتظار کے بعد ایک ڈاکٹر نے سر ہلا کر ان کے اس اندیشے کی تصدیق کر دی جس کا انھیں ڈر تھا۔

لیکن یہ آزمائش یہیں ختم نہیں ہوئی۔ سونیا کے شوہر اور اندرا گاندھی کے بڑے بیٹے راجیو گاندھی کو مغربی بنگال میں ایک انتخابی جلسے سے بلایا گیا۔ وہاں پہنچ کر انھوں نے سونیا کو بتایا کہ کانگریس پارٹی کے رہنما چاہتے ہیں کہ وہ وزیرِ اعظم کا عہدہ سنبھالیں۔

سونیا کا ردِعمل غصے اور خوف پر مبنی تھا۔ انھوں نے راجیو سے التجا کی ’وہ آپ کو قتل کر دیں گے، وہ آپ کو بھی قتل کر دیں گے!‘

راجیو نے جواب دیا ’وہ مجھے بہرحال قتل کر دیں گے۔‘

اسی شام جب اندرا گاندھی کی میت گھر میں رکھی تھی، راجیو نے وزیرِ اعظم کے عہدے کا حلف اٹھا لیا۔

یہ سونیا گاندھی کی نئی یادداشتوں پر مبنی کتاب ’بیلانگنگ: اے جرنی آف لو‘ کے سب سے دل دہلا دینے والے واقعات میں سے ایک ہے، جس میں نجی زندگی کا ایک بڑا سانحہ اور عوامی زندگی کے دباؤ ساتھ ساتھ سامنے آتے ہیں۔

وہ خاتون جو بڑی حد تک سیاست سے دور رہی تھیں، اب انڈیا کے وزیرِ اعظم کی اہلیہ بن چکی تھیں۔ بعد ازاں وہ خود کانگریس پارٹی کی سربراہ بنیں، دو عام انتخابات میں پارٹی کی کامیابی کی قیادت کی اور انڈیا کی سیاست کی اہم ترین شخصیات میں شمار ہونے لگیں۔

اس واقعے میں ایک اور بڑے سانحے کی جھلک بھی نظر آتی ہے۔ سنہ 1991 میں خود راجیو گاندھی کو بھی قتل کر دیا گیا۔

سونیا گاندھی کے لیے اس کے بعد کے برس سیاست سے دوری اختیار کرنے میں گزرے۔

وہ صرف 19 برس کی تھیں جب اٹلی کے ایک چھوٹے سے قصبے سے تعلق رکھنے والی اس نوجوان خاتون کی انگلینڈ میں راجیو گاندھی سے ملاقات ہوئی، جو وہاں تعلیم حاصل کرنے آئے تھے۔ اس تعلق نے انھیں ایک نئے ملک اور خاندان سے جوڑ دیا اور جلد ہی ان کی اندرا گاندھی سے بھی گہری قربت ہو گئی۔ اپنے شوہر اور ساس کی وجہ سے انڈیا ان کا گھر بن گیا۔

راجیو گاندھی کے قتل کے بعد ان کے زیرِ انتظام یادگاری اداروں کے لیے ضروری عوامی تقریبات میں شرکت کرنا بھی ان کے لیے ایک مشکل مرحلہ بن گیا۔ تقاریر سے پہلے انھیں خدشہ رہتا تھا کہ کہیں وہ جذبات پر قابو نہ رکھ سکیں اور ان کی آنکھوں سے آنسو نہ بہنے لگیں۔

جب دلائی لامہ نے ان سے پوچھا کہ کیا وہ اپنے شوہر کے قاتلوں سے انتقام لینا چاہتی ہیں تو انھوں نے جواب دیا، ’نہیں، میں ایسا نہیں چاہتی۔‘ اس کے بعد وہ پھوٹ پھوٹ کر رو پڑیں۔

وہ لکھتی ہیں کہ وقت کے ساتھ راجیو کی یاد ان کے لیے ایک ایسے احساس میں بدل گئی جو ان کے اندر موجود تھا، اور کسی گہری کمی کی صورت میں انھیں مسلسل تکلیف دیتا تھا۔

تاہم خاندان کی خوشی کے مواقع پر بھی غم لوٹ آتا تھا۔ سنہ 1995 میں جب ان کے بیٹے راہل نے کیمبرج یونیورسٹی سے گریجویشن کیا تو سونیا اور ان کے بچے یہ سوچ کر جذباتی ہو گئے کہ راجیو اس موقع پر کتنا فخر محسوس کرتے۔

دوسری جانب سیاست بھی آہستہ آہستہ ان کے قریب آ رہی تھی۔ کانگریس پارٹی، جو کئی نسلوں سے ان کے شوہر کے خاندان کی سیاسی پہچان رہی تھی، اپنی یکجہتی کھو رہی تھی اور انتخابی میدان میں بھی اس کی حمایت کم ہو رہی تھی۔ پارٹی کے سینئر رہنما دوسری جماعتوں میں شامل ہو رہے تھے اور سونیا سے قیادت سنبھالنے کے مطالبات زور پکڑ رہے تھے۔

ابتدا میں انھوں نے انکار کر دیا۔ وہ لکھتی ہیں کہ انھوں نے راجیو کے ذریعے سیاست کو قریب سے دیکھا تھا، اس کی کامیابیاں بھی اور اس کے ساتھ جڑی ’خواہشِ اقتدار اور لالچ، منافقت اور دھوکہ دہی‘ بھی۔ وہ لکھتی ہیں، ’مجھے ہمیشہ سیاست ناپسند رہی ہے۔‘ سیاست پہلے ان کی ساس اور پھر 'میری زندگی کی محبت، میرے بچوں کے والد' کو ان سے چھین چکی تھی۔

لیکن کانگریس کا زوال اب انھیں ذاتی نقصان محسوس ہونے لگا تھا۔ اندرا اور راجیو کی تصاویر کے سامنے سے گزرتے ہوئے وہ ’درد اور احساسِ جرم کے ملے جلے جذبات‘ میں گھر جاتیں۔

انھیں خدشہ تھا کہ جن قوتوں کے خلاف ان کے ساس اور شوہر نے انڈیا کے ’کثرت پر مبنی معاشرتی تشخص‘ کے تحفظ کے لیے جدوجہد کی تھی، وہ دوبارہ مضبوط ہو رہی ہیں۔ ان کی نظر میں بڑھتی ہوئی ہندو قوم پرستی انڈیا کے اس ’سیکولر اور کثرت پسندانہ تصور‘ کے لیے خطرہ تھی جس کا دفاع اندرا اور راجیو کرنا چاہتے تھے۔

کانگریس رہنماؤں کا مؤقف تھا کہ اگر سونیا نے قیادت نہ سنبھالی تو پارٹی تقسیم ہو سکتی ہے اور فرقہ وارانہ سیاست کے مقابلے کے لیے کوئی مضبوط سیاسی قوت باقی نہیں رہے گی۔

سونیا کا خیال تھا کہ ان کے خاندان کا نام مذہب، ذات، زبان اور علاقے کی حدود سے بالاتر ہو کر لوگوں میں مقبولیت رکھتا ہے۔ وہ لکھتی ہیں کہ یہی دلیل ان کے لیے ’سب سے زیادہ قائل کرنے والی‘ ثابت ہوئی۔

سونیا گاندھی کو اپنی اہلیت پر بھی شبہات تھے۔ وہ سوچتی تھیں کہ ایک بیرونی شخص ان دو بااثر شخصیات کی جگہ کیسے لے سکتا ہے؟ گھر میں ان کے بچوں راہل اور پریانکا کو بھی یہ خوف تھا کہ کہیں وہ اپنی ماں کو بھی اسی طرح نہ کھو دیں جیسے وہ اپنی دادی اور والد کو کھو چکے تھے۔ نئے سال کی چھٹیوں پر روانگی سے پہلے دونوں نے اپنی ماں سے وعدہ لیا ’آپ ہماری غیر موجودگی میں کوئی ایسا قدم نہیں اٹھائیں گی جس پر بعد میں پچھتانا پڑے۔‘

سونیا کے مطابق انھیں اپنے سوالوں کا ’جواب‘ بھگوت گیتا کے مطالعے سے ملا۔ اگرچہ بالغ ہونے کے بعد وہ مذہبی نہیں رہی تھیں، تاہم جنوری 1997 میں انھوں نے سنسکرت کے ایک عالم سے نجی طور پر اس کتاب کے اسباق لینا شروع کیے۔ دونوں نے اس کتاب کو ایک ایک شعر پڑھ کر سمجھا۔ وہ لکھتی ہیں کہ اس کا بنیادی پیغام، یعنی اپنے فرض (دھرم) کو اس کے نتائج کی پروا کیے بغیر ادا کرنا، بالآخر ان کے اندرونی تضاد کو ختم کرنے کا سبب بنا۔

وہ لکھتی ہیں ’مجھے اپنے شکوک اور سوالات کا جواب مل گیا تھا۔ مجھے آگے بڑھنا تھا اور وہاں جانا تھا جہاں میرا فرض مجھے بلا رہا تھا۔ اور میں نے ایسا ہی کیا۔‘

تاہم ان کی یادداشتوں میں سیاست سے متعلق سب سے ڈرامائی واقعہ سات سال بعد پیش آیا، جب کانگریس نے سنہ 2004 کے عام انتخابات میں کامیابی حاصل کی۔ اس انتخابی مہم کی قیادت سونیا گاندھی نے کی تھی۔

سونیا گاندھی، من موہن سنگھ کے ساتھ دہلی میں صدارتی محل گئیں تاکہ صدرِ انڈیا سے ملاقات کر کے کانگریس کی قیادت میں قائم اتحاد کی حکومت بنانے کا باضابطہ دعویٰ پیش کر سکیں۔ ہر کسی کا خیال تھا کہ وہ خود وزیرِ اعظم بنیں گی، لیکن انھوں نے اس بارے میں کچھ نہیں کہا۔

گھر واپس آ کر انھوں نے اپنے ایک سینئر معاون کو بتایا کہ وہ وزیرِ اعظم کا عہدہ قبول کرنے سے انکار کرنے کا ارادہ رکھتی ہیں۔ دوسری جانب پارٹی کارکن ان کی رہائش گاہ کے باہر جمع ہو گئے تھے اور سینئر رہنما ان سے ملاقات کا مطالبہ کر رہے تھے۔

ایک رہنما نے کہا ’آپ نے انتخابی مہم چلائی، ہماری قیادت کی۔ لوگوں نے آپ پر اعتماد کیا۔ آپ انھیں اس طرح مایوس کیسے کر سکتی ہیں؟ ہمارے کارکن بغاوت کر دیں گے۔ کیا آپ سمجھتی ہیں کہ وہ کسی اور رہنما کو قبول کر لیں گے؟‘

اتحادی جماعتوں کے رہنما بھی انھیں قائل کرنے کے لیے پہنچ گئے۔ سونیا لکھتی ہیں کہ ان رہنماؤں نے انھیں گھیر لیا اور ان میں سے ایک نے اصرار کیا ’ہم آپ کا انکار قبول نہیں کریں گے۔‘

اس دباؤ سے گھبرا کر سونیا نے دھیمی آواز میں کہا ’ٹھیک ہے۔‘ رہنماؤں نے اسے ان کی رضامندی سمجھا اور انھیں مبارک باد دینا شروع کر دی۔

سونیا کے مطابق ان کے بچے اس صورتِ حال پر سخت ناراض ہوئے۔ راہل نے ان کے پاس آ کر پوچھا ’آپ نے ہاں کر دی؟‘ جبکہ ان کی بیٹی پریانکا نے انھیں مشورہ دیا کہ وہ کسی کے دباؤ میں آ کر فیصلہ نہ کریں۔

سونیا لکھتی ہیں کہ اس کے بعد انھوں نے ایک طویل رات خود سے، دوستوں اور اہلِ خانہ سے بحث کرتے ہوئے گزاری۔ ان کے نزدیک یہ معاملہ صرف ان کی ذات تک محدود نہیں تھا۔ انھیں خدشہ تھا کہ انڈیا کی مرکزی اپوزیشن جماعت بھارتیہ جنتا پارٹی (بی جے پی) ان کی غیر ملکی پیدائش کے معاملے کو سیاسی فائدے کے لیے استعمال کرتی رہے گی اور وزیرِ اعظم کا عہدہ قبول کرنے سے یہ تنازع ’ملک میں شدید انتشار‘ پیدا کر سکتا ہے۔

صبح تک وہ اپنا فیصلہ کر چکی تھیں۔ انھوں نے راہل سے کہا ’میں نے اپنا ذہن بنا لیا ہے۔ میں اپنے مؤقف پر قائم رہوں گی۔‘

اس کے بجائے سونیا گاندھی نے من موہن سنگھ کو وزیرِ اعظم بنانے کا فیصلہ کیا، جو ماہرِ معاشیات اور کانگریس کے رکن تھے۔ وہ من موہن سنگھ کو ایک ایسی شخصیت قرار دیتی ہیں جن کے کردار پر کوئی انگلی نہیں اٹھا سکتا اور جنھیں حکومتی امور کی گہری اور مکمل سمجھ حاصل تھی۔

یہ کتاب اس وقت سب سے زیادہ اہم انکشافات کرتی ہے جب سونیا گاندھی خاندانی یادوں سے آگے بڑھ کر اس انڈیا کا ذکر کرتی ہیں جس کے بارے میں ان کا خیال ہے کہ وہ اب بدل چکا ہے۔

سونیا لکھتی ہیں کہ جب انھوں نے عملی سیاست میں قدم رکھا تو پارلیمانی سیاست میں ’ایک خاص تہذیب اور رکھ رکھاؤ‘ ہوا کرتا تھا۔

وہ کہتی ہیں کہ سیاسی حملے اور سخت زبان نئی بات نہیں تھی، لیکن اب اقتدار میں موجود لوگوں میں اپنے سے اختلاف کرنے والوں کو نیچا دکھانے اور اذیت پہنچانے، جبکہ مخالف سمجھنے والوں کو خوف زدہ کرنے کا رجحان زیادہ بڑھ گیا ہے۔

ان کے مطابق یہ دنیا بھر میں پھیلتے اس رجحان کا حصہ ہے جس میں ’آمرانہ حکومتوں کے ساتھ بے حسی بھی جنم لیتی ہے‘۔

ہندو قوم پرست جماعت بھارتیہ جنتا پارٹی (بی جے پی) سے تعلق رکھنے والے وزیرِ اعظم نریندر مودی کے بارے میں سونیا گاندھی کا بیان غیر معمولی طور پر براہِ راست ہے۔

وہ لکھتی ہیں کہ پارلیمانی تقریبات میں رسمی سلام دعا اور کبھی کبھار ہونے والی مختصر گفتگو کے علاوہ، دونوں کے درمیان ’عملی طور پر کبھی کوئی حقیقی رابطہ نہیں رہا‘۔

ان کے مطابق، جب وہ ہسپتال سے واپس آتی تھیں تو کبھی کبھار مودی ان سے پوچھتے، ’ٹھیک ہیں، آپ؟‘

سونیا لکھتی ہیں ’وہ عموماً دوسری طرف دیکھنے لگتے ہیں اور آنکھوں میں آنکھیں ڈال کر بات کرنے سے گریز کرتے ہیں۔‘

سونیا گاندھی لکھتی ہیں کہ نریندر مودی کے انڈیا کے تصور کی تشکیل راشٹریہ سویم سیوک سنگھ (آر ایس ایس) کے زیرِ اثر ہوئی اور اس نے ’ایسی انتہا پسندی کو تقویت دی جس میں ان کا مذہب اور ثقافت دوسروں کے مذہب اور ثقافت سے برتر سمجھے جاتے ہیں‘۔

ان کے مطابق مودی کا انڈیا ’درجہ بندی، نظم و ضبط اور کنٹرول‘ پر مبنی ہے، جبکہ ان کا اپنا تصور ’بالادستی کے خلاف انڈیا‘ کا ہے، جو ’سب کو ساتھ لے کر چلنے، سیکولرازم اور سماجی انصاف‘ کے اصولوں پر قائم ہے۔

تاہم مودی پر اس تنقید کے دوران سونیا گاندھی ایک اہم بات کا اعتراف بھی کرتی ہیں۔ وہ لکھتی ہیں کہ وہ مودی کی ’اپنے دور کے حکمران اشرافیہ سے بے اطمینانی‘ کو سمجھتی تھیں۔

سونیا کہتی ہیں کہ دہلی کے مراعات یافتہ طبقے کے ڈرائنگ رومز میں بیٹھ کر انھیں بے چینی محسوس ہوتی تھی، جہاں سیاسی گفتگو ’انڈیا کے حقیقی حالات سے بہت دور‘ دکھائی دیتی تھی۔

وہ لکھتی ہیں کہ مودی کا پس منظر شاید اتنا سادہ نہ ہو جتنا ان کی تشہیری ٹیم پیش کرتی ہے، لیکن انھوں نے ’یقیناً ایک محروم طبقے سے تعلق رکھنے کے باوجود آر ایس ایس کے اندر اپنی محنت سے اقتدار تک رسائی حاصل کی‘۔

یہ کانگریس کی قیادت اور اس ووٹر طبقے کے درمیان سماجی فاصلے کا ایک غیر معمولی اعتراف ہے جس کی نمائندگی مودی نے کی۔

سونیا گاندھی کی یادداشتوں میں عالمی رہنماؤں سے ان کی ملاقاتوں کی کچھ جھلکیاں بھی شامل ہیں۔

وہ روسی صدر ولادیمیر پوتن کو ایک ’دلچسپ شخصیت‘ کے طور پر یاد کرتی ہیں، جنھوں نے سینٹ پیٹرزبرگ میں انھیں کشتی کی سیر کرائی اور راستے میں شہر کی تاریخی عمارتیں اور یادگاریں دکھائیں۔

سونیا کہتی ہیں کہ وہ پوتن کی عالمی سیاست پر گرفت اور ’روس کو اس کی سابقہ طاقتور حیثیت واپس دلانے کے عزم‘ سے متاثر ہوئی تھیں۔ ان کے بقول یہ سب ’یوکرین جنگ سے بہت پہلے، ایک بالکل مختلف دور‘ کی بات ہے۔

ایک اور نسبتاً دلچسپ ملاقات فرانس کے سابق صدر نکولا سرکوزی سے ہوئی، جو سنہ 2008 میں اپنے اس وقت کے ساتھی کارلا برونی کے بغیر انڈیا آئے تھے، کیونکہ دونوں نے اس وقت شادی نہیں کی تھی۔

ایک سرکاری عشائیے کے دوران انڈیا کے نائب صدر کی اہلیہ نے خوش دلی سے سرکوزی سے سوالات شروع کر دیے۔ انھوں نے پوچھا کہ وہ کارلا برونی سے شادی کب کرنے کا ارادہ رکھتے ہیں، کیا انھیں ان کی کمی محسوس ہوتی ہے اور کیا شادی کی تاریخ طے ہو چکی ہے۔ سرکوزی بھی خوش دلی سے ان سوالوں کے جواب دیتے رہے اور ساتھ ہی اپنے فون پر برونی کو پیغامات بھی بھیجتے رہے۔

سونیا گاندھی کی کتاب ’بیلانگنگ‘ غیر جانب دار تاریخی بیان نہیں ہے۔ بوفورس توپوں کا سکینڈل، جس نے راجیو گاندھی کی حکومت کو شدید نقصان پہنچایا اور کئی دہائیوں تک ان کے خاندان کا پیچھا کیا، اس کتاب میں نسبتاً مختصر جگہ پاتا ہے۔

502 صفحات پر مشتمل اس یادداشت میں کانگریس کے اپنے دورِ اقتدار کے کم خوش گوار پہلوؤں کا ذکر نسبتاً کم ہے۔ سونیا اپنے سیاسی مخالفین کے دور میں بدعنوانی، منافقت اور عوامی معیار میں گراوٹ پر تو تفصیل سے بات کرتی ہیں، لیکن کانگریس کے دورِ اقتدار میں اقربا پروری، اپنے قریبی لوگوں کو نوازنے اور بدعنوانی کے کلچر کا ذکر بڑی حد تک نظر انداز کرتی ہیں۔ عوام کا سیاسی جماعتوں پر اعتماد کم ہونے میں کانگریس کی اپنی ذمہ داری کا بھی زیادہ اعتراف نہیں کیا گیا۔

سونیا گاندھی اپنے شوہر اور ساس کی سیاسی وراثت کا دفاع کرنے کی پوری کوشش کرتی ہیں، حالانکہ ان کی قائم کردہ جماعت طویل عرصے سے زوال کا شکار ہے۔ ان کی بیان کردہ کہانی صرف اس سیاسی وراثت کو سنبھالنے کی قیمت کے بارے میں نہیں، بلکہ ایک ایسی خاتون کی زندگی کے بارے میں بھی ہے جو کہتی ہیں کہ وہ کبھی اس زندگی کی خواہش مند نہیں تھیں جو بالآخر انھیں گزارنی پڑی۔

اسی لیے یادداشتوں کے آخری صفحات میں ایک واضح اداسی محسوس ہوتی ہے۔ 79 سالہ سونیا گاندھی اب بھی انڈیا کی پارلیمان کے ایوانِ بالا، راجیہ سبھا کی رکن ہیں۔ ان کے 55 سالہ بیٹے راہل چار بار رکنِ پارلیمان منتخب ہو چکے ہیں اور اپوزیشن لیڈر ہیں، جبکہ 53 سالہ بیٹی پریانکا بھی رکنِ پارلیمان ہیں۔

سونیا کہتی ہیں کہ اصل چیلنج یہ تھا کہ دکھ اور نقصان، کامیابی اور ناکامی اور سیاست کے تقاضوں کے تحت ہونے والی جوڑ توڑ کے باوجود ’ایک منصفانہ اور انسان دوست معاشرے کے تصور سے وابستہ رہا جائے۔

لیکن وہ اپنی یادداشتوں کا اختتام کسی فتح کے اعلان یا اس یقین کے ساتھ نہیں کرتیں کہ تاریخ انھیں درست ثابت کرے گی۔

وہ لکھتی ہیں ’اس وقت مجھے ایسا محسوس ہوتا ہے کہ اپنی پوری کوشش کے باوجود میں ان قوتوں کو پیچھے دھکیلنے میں کامیاب نہیں ہو سکی جن کے خلاف لڑنے کے لیے میں نے یہ راستہ اختیار کیا تھا۔‘