’عمران خان بھی ایچیسن کالج سے تھے‘: راولپنڈی کی ’مشکل وکٹ‘ پر نوجوان بیٹرز کی نصف سنچریاں اور طیب عارف کی تعریفیں
،تصویر کا ذریعہGetty Images
’ہیلو ٹو ٹیسٹ کرکٹ‘
پاکستان کرکٹ کے آفیشل ایکس ہینڈل پر نمودار ہونے والا یہ پیغام پاکستان کے لیے پہلا ٹیسٹ میچ کھیلنے والے طیب عارف کی نصف سنچری پر اُن کی تعریف پر مبنی تھا۔
لیکن اس سے پہلے ہی اذان اویس کے ہمراہ اوپننگ کے لیے آنے والے طیب عارف اپنی کور ڈرائیو اور وکٹ کے چاروں جانب کھیلے جانے والے سٹروکس کی بدولت راولپنڈی کرکٹ سٹیڈیم میں موجود شائقین سے داد سمیٹ رہے تھے۔
طیب عارف کی اننگز کی خاص بات اُن کا سٹرائیک ریٹ تھا، اُنھوں نے ایک چھکے اور نو چوکوں کی مدد سے 51 گیندوں پر 57 رنز بنائے۔
طیب عارف جب پویلین لوٹے تو اگلے بلے باز محمد طحہ تھے اور اُن کا بھی یہ پہلا ٹیسٹ میچ تھا، لیکن اُنھیں اپنے تجربہ کار کپتان بابر اعظم کا ساتھ حاصل تھا۔
محمد طحہ محتاط انداز میں اپنی اننگز آگے بڑھا رہے تھے، لیکن بابر اعظم راولپنڈی کی گرین ٹاپ وکٹ پر جارحانہ انداز میں بلے بازی کر رہے تھے۔
سری لنکن کپتان کوشال مینڈس نے یہ سوچ کر ہی پاکستان کو پہلے بیٹنگ کی دعوت دی تھی کہ فاسٹ بولرز کے لیے سازگار اور راولپنڈی کی خنک صبح میں نمی کا فائدہ اُٹھا کر پاکستان کے ابتدائی کھلاڑیوں کو جلد پویلین بھیج دیا جائے گا۔
،تصویر کا ذریعہPCB
لیکن پاکستان کی جانب سے ڈیبو کرنے والے طیب عارف اور محمد طحہ کی اننگز اور کپتان بابر اعظم کی نصف سنچری نے مہمان ٹیم کی اس خواہش پر پانی پھیر دیا۔
End of سب سے زیادہ پڑھی جانے والی
محمد طحہ سے پہلے کپتان بابر اعظم بھی نصف سنچری بنا کر پویلین لوٹ گئے تھے اور ایسے میں محمد طحہ نے سعود شکیل کے ساتھ مل کر پاکستان کی اننگز کو آگے بڑھایا۔ لیکن طحہ بھی 105 گیندوں پر 51 رنز بنا کر آؤٹ ہو گئے۔
لیکن بولرز کے لیے سازگار وکٹ پر یہ دونوں نوجوان بلے باز اپنی صلاحیتوں کا مظاہرہ کر چکے تھے۔
راولپنڈی ٹیسٹ کا پہلا روز خراب روشنی کے باعث جب ختم ہوا تو پاکستان نے 67.2 اوورز میں 281 رنز بنا لیے تھے۔ سعود شکیل 57 جبکہ وکٹ کیپر غازی غوری سات رنز کے ساتھ کریز پر موجود تھے۔
پاکستانی اننگز کی خاص بات تیز رفتاری کے ساتھ رنز بنانا بھی تھی، پاکستان نے 4.17 رنز فی اوور کی اوسط سے یہ رنز بنائے۔
سری لنکا کی جانب سے اسیتھا فرنینڈو نے دو، دلشان مدوشنکا، ملان رتنائیکا اور سونل دنوشا نے ایک، ایک وکٹ حاصل کی۔
سوشل میڈیا پر دونوں نوجوان بیٹرز کی بلے بازی کی تعریفیں ہو رہی ہیں۔
شیری نامی صارف نے ایکس پر لکھا کہ محمد طحہٰ نے ایک طویل سفر طے کیا ہے۔
اُن کا کہنا تھا کہ سنہ 2020 میں پی ایس ایل کے میچ کے دوران خراب شاٹ کھیلنے پر بابر اعظم طحہٰ سے کافی ناراض تھے۔ اس کے بعد طحہٰ منظرِ عام سے ہٹ گئے، ڈومیسٹک کرکٹ میں اپنے کھیل پر محنت کی اور مسلسل بہتری لاتے رہے۔
آج، وہ دوبارہ بابر اعظم کے ساتھ بیٹنگ کر رہے تھے، ان سے داد وصول کی اور اپنے ڈیبو میچ میں ہی نصف سنچری (ففٹی) اسکور کی۔
،تصویر کا ذریعہX/@CallMeSheri1_
بی بی سی اردو کی خبروں اور فیچرز کو اپنے فون پر حاصل کریں اور سب سے پہلے جانیں پاکستان اور دنیا بھر سے ان کہانیوں کے بارے میں جو آپ کے لیے معنی رکھتی ہیں
سبسکرائب کرنے کے لیے کلک کریں
مواد پر جائیں
سپورٹس تجزیہ کار ڈاکٹر نعمان نیاز نے ایکس پر طیب عارف کی تصاویر شیئر کرتے ہوئے لکھا کہ ایک اور ایچیسونین نے انٹرنیشنل کرکٹ میں قدم رکھا دیا۔
محمد طیب عارف خوب آگے بڑھو، نوجوان!
ڈاکٹر نعمان نیاز نے لکھا کہ ماجد خان، عمران خان، عامر حمید، رمیز راجہ، بازید خان اور وہاب ریاض بھی ایچیسن کالج سے فارغ التحصیل ہیں۔
سپورٹس جرنلسٹ شاہد ہاشمی نے لکھا کہ 20 سال کی عمر میں طیب عارف اپنا پہلا ٹیسٹ کھیل رہے ہیں، جبکہ اس سے قبل وہ ’گریڈ-II‘ اور فرسٹ کلاس ’پیٹرنز ٹرافی‘ میں حیدرآباد کنگز کی قیادت بھی کر چکے ہیں۔
کوچز حنیف ملک اور حسیب اعظم کی تربیت میں تیار ہونے والے طیب یقیناً ایک غیر معمولی صلاحیت کے مالک ہوں گے جو اتنی تیزی سے اس مقام تک پہنچے۔۔۔
عبداللہ نامی صارف نے لکھا کہ مشکل وکٹ پر 45 گیندوں پر 50 رنز۔۔ اگلے ورلڈ ٹیسٹ چیمپئن شپ سائیکل سے پہلے نوجوان کھلاڑیوں کو موقع دینے کا اقدام بہت اچھا ہے۔
ہارون نامی صارف نے لکھا کہ آپ سمجھ سکتے ہیں کہ ہر کوئی طیب عارف سے کیوں متاثر ہے۔ محض ایک گیند کا سامنا کرتے ہوئے بھی، ان کے کھیل میں ایک خاص معیار اور نفاست جھلکتی ہے۔ ان کے ’بیک فٹ پنچ‘ اور’کور ڈرائیوز‘ تو کمال کے ہیں۔ ان کے سامنے ابھی پورا کیریئر پڑا ہے۔
دائیں ہاتھ کے بلے باز طیب عارف نے ڈپارٹمنٹل فرسٹ کلاس ٹورنامنٹ میں متاثر کن کارکردگی دکھائی، جہاں اُنھوں نے کنگزمین اکیڈمی کی قیادت کرتے ہوئے سات میچوں میں 66.09 کی اوسط سے 727 رنز بنائے، جن میں اپنے پہلے سیزن میں تین سنچریاں بھی شامل تھیں۔
پاکستان کے شہر کراچی سے تعلق رکھنے والے 26 سالہ محمد طحہ بائیں ہاتھ سے بلے بازی کرتے ہیں۔
سپورٹس جرنلسٹ اور تجزیہ کار شاہد ہاشمی کے مطابق محمد طحہ کراچی اور سندھ سے کھیل چکے ہیں۔
ان کا کہنا ہے کہ اس سال طلحہ نے پریزیڈنٹ ٹرافی میں 700 رنز بنائے ہیں جس میں ایک ڈبل سنچری بھی شامل ہے۔
'BBC News اردو' ایڈیشن کا انتخاب کریں اور نیوز الرٹس، تحقیقاتی اور تفصیلی رپورٹس، سب کچھ ایک ہی جگہ پر حاصل کریں۔
نوٹ: نئی ایپ برطانیہ اور امریکہ میں دستیاب نہیں ہے اور اس کا انگریزی زبان میں ایڈیشن موجود نہیں۔
