کورونا: دنیا بھر میں متاثرین کی تعداد 89 لاکھ سے زیادہ

لائیو کوریج

1. 17 جون 2020نیوزی لینڈ میں قرنطینہ مراکز فوج کے حوالے کر دیے گئے, شائمہ خلیل بی بی سی نیوز، سڈنی

   نیوزی لینڈ میں ملک کے سرحدی آپریشنز اور قرنطینہ مراکز کا کنٹرول فوج کے حوالے کر دیا گیا ہے۔ یہ اقدام ایک ایسے وقت پر کیا گیا ہے جب دو افراد جنھیں ملک میں داخل ہونے دیا گیا تھا، ان میں بعد میں کورونا وائرس کی تشخیص ہوئی ہے۔

   وزیراعظم جیکنڈا آرڈن نے اعلان کیا ہے کہ اسسٹنٹ چیف برائے دفاع ڈیرن ویب اب فوجی وسائل اور اہلکاروں کو استعمال کر سکیں گے۔

   وزیراعظم کا کہنا تھا کہ بارڈر کنٹرول کا درست اور منظم ہونا حکومت اور عوام دونوں کے لیے اہم ہے۔ انھوں نے کہا کہ کووڈ19 کے دو نئے کیسز اس نظام کی ناکامی کی نشاندہی کرتے ہیں۔

   مذکورہ دو کیسز میں دو خواتین برطانیہ سے براستہ آسٹریلیا نیوزی لینڈ پہنچی تھیں اور حکومتی احکامات کے برعکس قرنطینہ سنٹر سے فارغ ہونے تک ان کا ٹیسٹ نہیں کیا گیا تھا۔ انھیں ہمدردی کی بنیاد پر قرنطینہ سنٹر سے جانے دیا گیا تھا کیونکہ ان کے والدین انتہائی بیمار تھے اور ان کے انتقال کا خطرہ تھا۔

2. 17 جون 2020بلوچستان میں صرف تین اضلاع کورونا وائرس سے غیر متاثر، گذشتہ 37 دنوں میں چھ ہزار سے زیادہ متاثرین

   بلوچستان میں اب صرف تین اضلاع ایسے رہ گئے ہیں جن سے تاحال کورونا کا کوئی مصدقہ کیس سامنے نہیں آیا ہے۔

   بلوچستان کے 33 اضلاع میں سے اب تک جن تین اضلاع سے کورونا کے کیسز رپورٹ نہیں ہوئے ہیں ان میں شیرانی ، بارکھان اور سوراب شامل ہیں۔

   شیرانی اور بارکھان بلوچستان کے دارالحکومت کوئٹہ سے شمال مشرق جبکہ سوراب جنوب مغرب میں واقع ہے۔

   محکمہ صحت حکومت بلوچستان کے مطابق صوبے میں وبا میں تیزی کے ساتھ اضافے کا سلسلہ دس مئی کے بعد شروع ہوا جب مکمل لاک ڈاﺅن کو ختم کرکے سمارٹ لاک ڈاﺅن شروع کیا گیا تاہم سب سے زیادہ اضافہ عید الفطر کے بعد ریکارڈ کیا گیا۔

   بلوچستان میں کورونا کا پہلا کیس 10مارچ کو رپورٹ ہوا تھا جبکہ 16جون تک ان کیسز کی تعداد 8437 تھی۔

   رپورٹس کے مطابق 10 مارچ سے 10 مئی تک 61 دنوں میں 2017 کیسز سامنے آئے جبکہ اس کے برعکس 11 مئی سے16 جون تک 37 دنوں میں 6420 کیسز رپورٹ ہوئے ۔

   محکمہ صحت کی رپورٹس میں کیسز میں اضافے کی سب بڑی وجہ لوگوں کی جانب سے احتیاطی تدابیر پر عملدرآمد نہ کرنے کو قرار دی جارہی ہے ۔

   اس صورتحال کے باعث محکمہ صحت کے حکام جولائی کے وسط سے ستمبر تک کیسز میں بہت زیادہ اضافے کے خدشے کا اظہار کررہے ہیں۔

3. 17 جون 2020برازیل میں ایک دن میں تقریباً 35 نئے متاثرین کا اضافہ

   برازیل میں یومیہ نئے متاثرین کی تعداد میں ریکارڈ اضافہ دیکھنے میں آیا جب گذشتہ 24 گھنٹوں میں ملک میں تقریباً 35000 نئے متاثرین کی تشخیص ہوئی۔

   اس سے قبل ملک میں اب تک نو لاکھ سے زیادہ متاثرین سامنے آ چکے ہیں اور وہ امریکہ کے بعد دنیا بھر میں سبسے زیادہ متاثرہ ممالک میں شامل ہے۔

   دوسری جانب یومیہ 1300 اموات کے بعد ملک میں مجموعی طور پر 45 ہزار سے زیادہ افراد کووڈ 19 کے ہاتھوں جان دے چکے ہیں۔

   حالات دیکھتے ہوئے ایسا نظر نہیں آ رہا کہ ملک میں یہ وبا کسی طرح قابو میں آجائے اور جس تیزی سے نئے متاثرین بڑھ رہے ہیں، اس سے واضح ہے کہ برازیل کورونا وائرس کے پھیلاؤ کے حوالے سے سب سے بڑا ملک ہے بہت ممکن ہے کہ اس ہفتے کے آخر تک ملک میں کُل دس لاکھ متاثرین ہو جائیں۔

   اور اہم بات یہ ہے کہ ملک میں ابھی بھی آبادی کے اعتبار سے ٹیسٹنگ زیادہ نہیں ہو رہی اور یہ بہت ممکن ہے کہ اصل تعداد سرکاری تعداد سے کہیں زیادہ ہو۔

   لیکن برازیل کے صدر جیئر بولسونارو نے مسلسل ملک کے مختلف حصوں میں کاروباری سرگرمیوں میں پابندیوں کے خلاف تنقید کی ہے جس کے نتیجے میں برازیل وبا کے عروج سے پہلے ہی کھل گیا ہے۔

4. 17 جون 2020بلوچستان میں کورونا مریضوں کے لیے پلازما بلڈ بینک قائم کرنے پر اتفاق

   بلوچستان میں کورونا سے متاثرہ ڈاکٹروں اور طبی عملے اور ان کے خاندانوں کے پلازما کے ذریعے علاج کے لیے پلازما بلڈ بینک قائم کرنے پر اتفاق ہوا ہے۔

   ینگ ڈاکٹرز ایسوسی ایشن بلوچستان کے ترجمان ڈاکٹر رحیم بابر کے ایک بیان کے مطابق اس بات پر اتفاق ینگ ڈاکٹرز ایسوسی ایشن اور ریجنل بلڈ سینٹر (آر بی سی) کوئٹہ کے ایگزیکٹو ڈائریکٹر ڈاکٹر ندیم صمد شیخ اور مینیجر ڈاکٹر حنیف مینگل کے درمیان ایک اجلاس میں ہوا ۔

   ان کا کہنا تھا کہ اس مقصد کے لیے ینگ ڈاکٹرز ایسوسی ایشن بلوچستان مہم چلائے گی ۔

   آر بی سی کے ایگزیکٹو ڈائریکٹر ڈاکٹر ندیم صمد شیخ نے کہا کہ ینگ ڈاکٹرز کا کورونا کے مریضوں کیلیے پلازما عطیہ کرنے کی مہم چلانا لائق تحسین ہے اور آر بی سی اس مقصد کے لیے ینگ ڈاکٹرز کے ساتھ ہر ممکن تعاون کے لیے تیار ہے ۔

   ان کا کہنا تھا کہ کورونا وائرس سے متاثرہ کسی بھی ڈاکٹر یا اسکے خاندان کے کسی فرد کو بلڈ پلازما کی ضرورت ہو تو متعلقہ معالج کی ہدایات کے مطابق انکو پلازما دینے کیلئے آر بی سی کی ٹیم ینگ ڈاکٹرز ایسوسی ایشن بلوچستان کی مدد کرے گی۔

   آر بی سی کے مینیجر ڈاکٹر حنیف مینگل نے کہا کہ ینگ ڈاکٹرز ایسوسی ایشن کی طرف سے بھیجے گئے تمام ڈونرز کی فہرست روزانہ کی بنیادوں پر مرتب کی جائیگی۔

5. 17 جون 2020بیجنگ میں 27 علاقوں پر ایک بار پھر پابندیاں، ایک ہفتے میں 137 نئے کیسز

   چین کے دارالحکومت بیجنگ میں کورونا وائرس متاثرین کی تعداد میں دوبارہ اضافے کے بعد لاکھوں افراد کو ایک بار پھر سماجی پابندیوں کا سامنا ہے۔

   بدھ کے روز شہر میں 31 نئے متاثرین سامنے آئے ہیں جس کے بعد گذشتہ ایک ہفتے میں کل تعداد 137 تک جا پہنچی ہے۔

   ان متاثرین کی شناخت سے قبل بیجنگ میں 57 دن تک مقامی منتقلی کا کوئی نیا مریض سامنے نہیں آیا تھا۔

   حکام کا خیال ہے کہ ژنفاندی فوڈ مارکیٹ، جہاں سے شہریوں کے گوشت اور سبزیوں کی 80 فیصد سے زیادہ طلب فراہم کی جاتی ہے، سے وائرس کا پھیلاؤ ہوا ہے۔

6. 17 جون 2020بریکنگ, تین امریکی ریاستوں میں کورونا کے ریکارڈ نئے مریض

   تین امریکی ریاستوں ایریزونا، فلوریڈا اور ٹیکساس میں کورونا کے یومیہ متاثرین میں ریکارڈ اضافہ دیکھا گیا ہے۔

   منگل کے روز فلوریڈا میں 2783 نئے کیس، ٹیکساس میں 2622 اور ایریزونا میں 2392 نئے متاثرین سامنے آئے ہیں۔

   امریکہ کی ان تینوں جنوبی ریاستوں میں ٹیسٹنگ میں اضافہ کیا گیا ہے جبکہ معیشت کی بحالی کے لیے لاک ڈاؤن کی پابندیوں میں نرمی کی گئی ہے۔

   فلوریڈا کے گورنر نے پریس کانفرنس میں ان دعووں کو مسترد کیا کہ کورونا وائرس کے کیسز میں اضافہ دوبارہ کاروبار کھلنے کی وجہ سے ہے۔ انھوں نے کہا کہ ریاست میں دوبارہ معیشت کو بند نہیں کیا جائے گا۔

   ’ہم بند نہیں کر رہے، سوسائٹی کو کام کرنے دینا چاہیے۔‘

7. 17 جون 2020کورونا کے مریضوں کی ’جان بچانے والی‘ دوا ڈیکسامیتھازون کیا ہے؟

   کورونا وائرس سے شدید بیمار مریضوں کی زندگی ایک سستی اور وسیع پیمانے پر دستیاب دوا سے بچائی جا سکتی ہے۔ برطانیہ میں ماہرین کا کہنا ہے کہ اس مہلک وائرس کے خلاف جنگ میں کم مقدار والی سٹیرائڈ دوا ڈیکسامیتھازون سے کامیاب علاج ایک ’زبردست پیش رفت‘ ہے۔

   یہ دوا عالمی پیمانے پر جاری علاج کی اس بڑی آزمائش کا حصہ ہے جس کا مقصد یہ دیکھنا ہے کہ آیا مروجہ ادویات میں سے کورونا وائرس کے خلاف کوئی کارگر دوا ہے۔

   آزمائش میں اس دوا کے استعمال سے ایسے مریضوں میں اموات کی شرح ایک تہائی کم ہوئی ہے جو مصنوعی تنفس یعنی وینٹیلیٹر پر تھے اور جو مریض آکسیجن پر تھے ان کی اموات میں 20 فیصد کے قریب کمی واقع ہوئی۔

   مکمل خبر پڑھنے کے لیے کلک کریں

8. 17 جون 2020اگر آپ کو کورونا ہے تو صحت یاب ہونے میں کتنا وقت لگے گا؟

9. 17 جون 2020جرمنی میں کورونا سے مزید 30 اموات

   جرمنی کے وبائی امراض کے ادارے رابرٹ کوچ انسٹیٹوٹ کے مطابق ملک میں کورونا وائرس کے مزید 345 کیس سامنے آنے کے بعد متاثرین کی تعداد 187184 ہو گئی ہے۔

   کورونا وائرس سے مزید 30 اموات کے بعد جرمنی میں اموات کی تعداد 8830 ہو گئی ہے۔

10. 17 جون 2020بریکنگ, لاگوس میں کورونا متاثرین میں اضافہ، عبادت گاہیں کھولنے کا منصوبہ مؤخر

    نائیجیریا کے سب سے گنجان آباد شہر لاگوس میں ریاستی حکومت نے غیر معینہ مدت کے لیے عبادت گاہوں کو بند کرنے کا اعلان کر دیا ہے۔ اس سے پہلے گرجا گھروں اور مساجد کو اس ہفتے کھولا جانا تھا۔

    نائیجیریا میں اس وقت 16600 سے زیادہ کیسز سامنے آ چکے ہیں جن میں سے تقریباً نصف لاگوس میں ہیں۔

    نائیجیریا میں مارچ کے مہینے سے لاک ڈاؤن لاگو ہے تاہم حکام نے کہا تھا کہ وہ ہوٹلوں اور عبادت گاہوں کو اس ہفتے کھول دیں گے۔

    اگرچہ ٹیسٹنگ کو ایک لاکھ تک بڑھا دیا گیا ہے تاہم حکام کو کم ٹیسٹ کرنے کے حوالے سے شدید تنقید کا سامنا رہا ہے۔

    ملک کے دیگر حصوں میں لاک ڈاؤن میں نرمی اعلان شدہ منصوبے کے مطابق ہی کی جائے گی اور اس میں کوئی تبدیلی نہیں کی جا رہی ہے۔

11. 17 جون 2020کورونا: پلازمہ عطیہ کرنے کا کیا فائدہ ہے؟

    پاکستان میں پلازمہ کے عطیے سے کورونا وائرس کے مریضوں کو خاصی مدد ملتی ہے۔ طبی ماہرین کے مطابق پلازمہ کا عطیہ دینا بے حد ضروری ہے لیکن لوگوں میں اس بارے میں اب بھی بہت سے خدشات پائے جاتے ہیں۔

    پلازمہ کا عطیہ کیا ہے، یہ کیوں ضروری ہے اور یہ ہوتا کیسے ہے، ان تمام سوالات کے جواب دے رہے ہیں ڈاکٹر طاہر شمسی اس ویڈیو میں۔۔۔

12. 17 جون 2020شہزادہ چارلس کی سونگھنے اور چکھنے کی حس مکمل طور پر بحال نہ ہو سکی

    برطانیہ کے شہزادہ چارلس نے این ایچ ایس کے ایک دورے میں اس بات کا انکشاف کیا ہے کہ مارچ میں کورونا وائرس سے متاثر ہونے کے بعد ان کی سونگھنے اور چکھنے کی حس ابھی تک مکمل طور پر بحال نہیں ہو سکی۔

    71 برس کے شہزادہ چارلس میں وبا کے آغاز میں ہی ہلکی علامات کے بعد کووڈ 19 کی تشخیص ہوئی تھی۔

    واضح رہے کہ سونگھنے کی حس سے محرومی اس مرض کی اہم علامات میں سے ایک ہے

13. 17 جون 2020بریکنگ, برازیل: ایک دن میں کورونا کے تقریباً 35 ہزار نئے کیس

    برازیل میں ایک دن میں کورونا وائرس کے 34,918 نئے کیس سامنے آئے ہیں جو اب تک یہاں سامنے آنے والے یومیہ کیسز کی سب سے بڑی تعداد ہے۔

    نئے کیس ایسے وقت میں سامنے آئے ہیں جب ایک اعلیٰ عہدیدار نے کہا تھا کہ حالات اب کنٹرول میں ہیں۔

    واضح رہے کہ امریکہ کے بعد دنیا بھر میں کورونا کے سب سے زیادہ متاثرین برازیل میں ہیں جہاں یہ تعداد 923000 سے زیادہ ہے۔

14. 17 جون 2020بریکنگ, کورونا: انڈیا میں اموات دس ہزار سے تجاوز کر گئیں

    منگل کے روز انڈیا میں کورونا وائرس سے مزید دو ہزار اموات ہوئی ہیں جس کے بعد ملک میں اس وائرس سے ہونے والی ہلاکتوں کی تعداد 11903 ہو گئی ہے۔

    واضح رہے کہ انڈیا میں کورونا وائرس کے متاثرین کی تعداد 340000 ہے۔

    اخبار ہندوستان ٹائمز کے مطابق انڈیا میں کورونا وائرس سے ہونے والی اموات کی تعداد 2.9 فیصد سے بڑھ کر 3.4 فیصد ہو گئی ہے۔

15. 17 جون 2020کورونا وائرس سے جڑی اصطلاحات کے معنی کیا ہیں؟

    کورونا وائرس کی عالمی وبا نے ہماری روزمرہ کی زندگی میں کئی نئے الفاظ اور اصطلاحات متعارف کرائی ہیں، چاہے بات قرنطینہ، وائرس، مدافعت یا سماجی فاصلے کی ہو لیکن آخر ان سب اصطلاحات کا مطلب کیا ہے؟

    ان تمام اصطلاحات کے معنی جاننے کے لیے آپ ہمارا’کورونا وائرس مترجم‘ٹول استعمال کر سکتے ہیں۔

16. 17 جون 2020بی بی سی اردو کے کورونا وائرس سے متعلق خبروں کے لائیو پیج میں ایک مرتبہ پھر خوش آمدید

    بی بی سی اردو کی پاکستان سمیت دنیا بھر سے کورونا وائرس کی وبا سے متعلق تازہ ترین خبروں کے لیے خصوصی لائیو پیج میں ایک مرتبہ پھر خوش آمدید۔ پاکستان میں اس وقت تازہ ترین اعداد و شمار کے مطابق ایک لاکھ 50 ہزار سے زیادہ افراد میں اس وائرس کی تشخیص ہو چکی ہے جبکہ اس وائرس کی وجہ سے ہلاک ہونے والوں کی تعداد تین ہزار کے قریب ہے۔

17. 24 اپريل 2020کورونا ٹیلی تھون: وزیر اعظم کی احساس ٹرانسمیشن میں مولانا طارق جمیل اور جاوید میانداد کے بیانات پر سوشل میڈیا پر بحث