کورونا: دنیا بھر میں متاثرین کی تعداد 89 لاکھ سے زیادہ

لائیو کوریج

1. 18 جون 2020ایمازون کے مقامی قبیلے کے سربراہ کورونا وائرس سے ہلاک

   مشہور ایمازون جنگلات کے مقامی محافظین میں سے ایک پالینہو پائیکان، کورونا وائرس کی وجہ سے ہلاک ہو گئے ہیں۔

   ان کی عمر 65 برس تھی۔ وہ کیاپو قبیلے کے سربراہ تھے۔

   وہ سنہ 1980 کی دہائی میں برازیل میں بننے والے دنیا کے تیسرے بڑے ڈیم کی مخالفت میں پہلی بار منظرعام پرآئے۔ انھیں سنہ 1988 میں ایک 18 برس کی لڑکی کے ریب میں سزا ملی۔ ان کی بیوی کو اس ریپ میں معاونت کرنے پر سزا سنائی گئی۔

   تاہم مقامی قبیلے کے سربراہ کے حامیوں کا کہنا ہے کہ ان کے خلاف یہ مقدمہ ان کی شہرت کو تباہ کرنے اور انھیں چپ کروانے کے لیے بنایا گیا تھا۔

2. 18 جون 2020پاک ایران سرحد تجارت کے لیے کھولنے کا حکمنامہ جاری ہونے کے بعد تاجر منتظر, محمد کاظم، بی بی سی کوئٹہ

   حکومت پاکستان صوبہ بلوچستان سے متصل پاکستان ایران سرحد، تفتان باڈر کو تجارت کے لیے کھولنے کا نوٹیفیکیشن جاری کیا ہے۔

   ابھی یہ سرحدی روٹ باضابطہ طور پر دوبارہ کھلا نہیں تاہم وہاں سے موصول ہونے والی ویڈیوز اور تصاویر میں دیکھا جا سکتا ہے کہ تاجر سامان کے ساتھ وہاں تیار کھڑے ہیں۔

   گذشتہ روز جاری ہونے والے حکمنامے میں کہا گیا تھا کہ کورونا وائرس کے پھیلاؤ کا تدارک کرنے کے لیے ضابطہ کار پر عملدرآمد کو یقینی بنایا جائے۔

   خیال رہے کہ ایران میں کورونا وائرس کے پھیلنے اور اس میں بڑی تعداد میں لوگوں کی ہلاکتوں کے بعد سے ایران کے ساتھ 900 سے زائد طویل کلومیٹر طویل سرحد کو تجارت اور آمد و رفت کے لیے بند کیا گیا تھا۔

   دو طرفہ تجارت کے لیے سرحد کی طویل بندش کے بعد سے پاکستانی تجارتوں کو مشکلات اور نقصان کا سامنا کرنا پڑ رہا تھا۔

   چند روز قبل سرحدی شہر تفتان میں پاکستان کی جانب سے ایران ایکسپورٹ ہونے والے پھل آم کی ایران جانے میں تاخیر سے آم کی ایک بڑی کھیپ خراب بھی ہوئی تھی۔

   تاہم اب وفاقی حکومت نے تجارت کے لیے تفتان سے سرحد کو ہفتے میں سات یوم کھلا رکھنے کا فیصلہ کیا ہے۔

   تفتان سے تعلق رکھنے والے مقامی تاجر اور ایکسپورٹر حاجی ضیا الرحمان نے اس فیصلے کو خوش آمدید کہا ہے۔

   ان کا کہنا ہے کہ دیر آید درست آید کے مصداق یہ اچھا فیصلہ ہے جس سے پاکستانی تجارت اور تاجروں دونوں کو فائدہ ملے گا ۔

3. 18 جون 2020اقوام متحدہ افغانستان میں کورونا وائرس کے پھیلاؤ کو روکنے میں کیسے مدد کر رہا ہے؟

   اقوام متحدہ کا کہنا ہے کہ افغانسان میں کورونا وائرس کے پھیلاؤ کو روکنے کے لیے پارٹنرز سے مل کر کام کر رہے ہیں۔

   عالمی ادارے کے انسانی حقوق پر کام کرنے والے ادارے او سی ایچ اے نے اپنے ایک ٹویٹ میں کہا ہے کہ نگرانی کے نظام سے ملک مں 512،242 افراد کو تلاش کیا گیا۔

   13 لاکھ لوگوں تک پانی کی رسائی، صفائی کے ساتھ ساتھ صحت مند اشیا تک رسائی ممکن بنائی گئی

   40 لاکھ سے زائد افراد کو کورونا وائرس سے متعلق آگاہی دی گئی، جس میں اس وائرس سے ہونے والے خطرات اور بچاؤ کے طریقوں سے متعلق بتایا گیا۔

4. 18 جون 2020چین میں کورونا وائرس کے 28 نئے کیسز

   چین میں مزید 28 کورونا کیسز سامنے آئے ہیں جن میں سے 21 کیسز دارالحکومت بیجنگ میں رپورٹ ہوئے ہیں۔

   گذشتہ کچھ دنوں میں بیجنگ میں اچانک کورونا کیسز میں اضافہ ریکارڈ کیا گیا ہے۔

   اس نئی لہر کے بارے میں یہ خیال ظاہر کیا جا رہا ہے کہ یہ بڑی فوڈ مارکیٹس سے پھیلی ہے۔ اس صورتحال میں نئی پابندیاں عائد کر دی گئی ہیں اور گردو نواح کے علاقوں کو بھی سیل کر دیا گیا ہے۔

   ان حالیہ کیسز سے پہلے بیجنگ میں 57 روز تک مقامی سطح پر کوئی کیس سامنے نہیں آیا تھا۔

5. 18 جون 2020آسٹریلیا کی ایک ریاست میں کورونا وائرس کے مقامی طور پر پھیلاؤ میں اضافہ

   ہم یہ تو جانتے ہیں کہ آسٹریلیا ان کامیاب ممالک میں شامل ہے جنھوں نے کامیابی سے کورونا وائرس کے پھیلاؤ کو روکا ہے او کئی علاقوں میں اس کا خاتمہ کر دیا۔

   تاہم ملک کی دوسری بڑی گنجان آباد ریاست وکٹوریا میں اس وائرس کے مقامی پھیلاؤ کے بارے میں معلوم ہوا ہے۔ آسٹریلیا کے محکمہ صحت کے حکام کا کہنا ہے کہ یہ درست ہے کہ اس ریاست میں کورونا وائرس سے متاثرہ افراد کی تعداد میں اضافہ ہوا ہے مگر یہ تعداد بہت کم ہے۔

   آج حکام نے ایسے 12 نئے متاثرین کا پتا چلایا ہے جبکہ چھ کے بارے میں گذشتہ روز تصدیق ہوئی تھی۔

   ان نئے متاثرین کے سامنے آنے کے بعد لوگوں میں تشویش پائی جاتی ہے نیو ساؤتھ ویلز میں کئی ہفتوں تک کوئی نئے متاثرین سامنے نہیں آئے تھے۔

   متاثرہ ریاست کے وزیر صحت جینی میکاکوس کا کہنا ہے کہ انھیں معلوم ہے کہ اس وقت کل متاثرین کی تعداد سے یہ تعداد زیادہ دکھائی دے رہی ہے لیکن خاص بات یہ ہے کہ ہم نے حالیہ ہفتوں میں وکٹوریا میں ایسے متاثرین کا کامیابی سے پتا چلایا ہے۔

   ہم کسی ایک دن مخصوص تعداد کے بجائے اس حوالے سے ٹرینڈ پر نظریں گاڑے ہوئے ہیں۔

   اپریل سے آسٹریلیا میں متاثرین کی تعداد 0.5 فیصد بنتی ہے۔ اس وقت ملک میں کل 500 ایکٹو متاثرین ہیں۔ یہ زیادہ تعداد میں وہ لوگ ہیں جو باہر کے ممالک سے واپس آئے ہیں اور اب قرنطینہ میں رہ رہے ہیں۔

6. 18 جون 2020انڈیا میں ایک دن میں کورونا وائرس کے ریکارڈ کیسز

   دنیا کی زیادہ تر توجہ کورونا وائرس سے متاثر ہونے والے لاطینی امریکہ پر ہے لیکن انڈیا میں بھی حالات انتہائی ابتر دکھائی دے رہے ہیں اور محکمہ صحت کا نظام صورتحال سے نمٹنے کے لیے کوشاں ہے۔

   بدھ کو ملک میں 12881 نئے کیسز روپورٹ ہوئے۔ وزارتِ صحت کا کہنا ہے کہ یہ ایک روز میں اب تک سامنے آنے والے متاثرین کی سب سے زیادہ تعداد ہے۔

   • دارالحکومت دہلی میں وزیرِ صحت کو بھی کورونا وائرس کی تشخیص ہوئی ہے۔ رواہں ہفتے کے آغاز میں وہ سانس لینے میں تکلیف اور شدید بخار میں متبلا ہو گئے تھے۔
   • صنعتی مرکز ممبئی میں رپورٹ ہونے والے کیسز کی تعداد ریاست مہاراشٹرا میں رپورٹ ہونے والے کیسز کی نصف تعداد سے زیادہ ہے۔ یہ سب سے زیادہ متاثر ہونے والا علاقہ ہے اور اب تک وہاں متاثرین کی تعداد ایک لاکھ سے بڑھ چکی ہے۔
   • انڈیا کورونا سے متاثر ہونے والوں میں تعداد کے اعتبار سے چوتھے نمبر پر ہے لیکن گذشتہ ہفتے حکومت نے ساڑھے تین لاکھ کیسز کے باوجود لاک ڈاؤن میں نرمی کر دی تھی۔

7. 18 جون 2020بریکنگ, پاکستان: مزید 118 ہلاکتیں، ملک میں 5358 نئے مریض

   پاکستان میں نیشنل کمانڈ اینڈ کنٹرول سسٹم کی جانب سے بتایا گیا ہے کہ گذشتہ 24 گھنٹوں میں کورونا وائرس کے مزید 118 مریض ہلاک ہو گئے۔

   اس حوالے سے جاری تفصیلات میں بتایا گیا ہے کہ بدھ کو ملک میں مزید 5358 افراد میں کورونا وائرس کی تشخیص ہوئی۔

   حکام کا کہنا ہے کہ 24 گھنٹوں میں 31,500 ٹیسٹ بھی کیے گئے اور اب تک ملک بھر میں صحت یاب ہونے والے مریضوں کی مجموعی تعداد 59,215 ہو چکی ہے۔

   پاکستان کا صوبہ پنجاب 1202 ہلاکتوں کے ساتھ سرِ فہرست ہے۔

   صوبہ سندھ 916 ہلاکتوں کے ساتھ متاثر ہونے والا دوسرا بڑا صوبہ ہے۔ دونوں صوبوں میں مریضوں کی بلترتیب تعداد 60138 اور 59983 ہے۔

   صوبہ خیبر پختونخوا میں ہلاکتوں کی تعداد 755، بلوچستان میں 93 دارالحکومت اسلام آباد میں 94 جبکہ گلگت بلتسان میں 18 اور پاکستان کے زیر انتظام کشمیر میں ہلاکتوں کی تعداد 15 ہو چکی ہے۔

8. 18 جون 2020پشاور میں 12 افراد زیرِ حراست

   پشاور کی ضلعی انتظامیہ کی ٹیموں نے مارکیٹس میں کورونا وائرس کے پھیلاؤ کو روکنے کے لیے کیے جانے والے اقدامات پر عملدرآمد کا جائزہ لیتے ہوئے اس کی خلاف ورزی کرنے والے 12 افراد کو گرفتار کیا ہے۔

9. 18 جون 2020راولپنڈی کے تین ہوٹلوں کو سیل کر دیا گیا

   پاکستان کے صوبہ پنجاب کے ضلع راولپنڈی میں کورونا وائرس کی وبا کے پیش نظر حکومت نے ہوٹل مالکان کو کاروبار کھولنے کے لیے چند مخصوص ضابطہ کار پر عمل کرنے کا پابند کیا ہے۔

   راولپنڈی کے ڈپٹی کمنشر کی جانب سے بدھ کو سماجی دوری پر عمل نہ کرنے کی وجہ سے شہر کے تین ہوٹلوں کو سیل کرنے کی تصدیق کی گئی۔

   یہ ہوٹل راولپنڈی کی معروف فوڈ سٹریٹ میں موجود ہیں۔

10. 18 جون 2020کووڈ-19: وہ خاتون جو انڈیا میں ’کورونا کی آواز بنی‘

11. 18 جون 2020کورونا وائرس کی وجہ سے پاکستان میں سیاحت پر پابندی: ’یہ موسم ہاتھ سے نکلا جارہا ہے‘, محمد زبیر خان، صحافی

    کورونا وائرس کے پھیلاؤ کی وجہ سے جہاں پاکستان میں صحت کا بحران پیدا ہوگیا ہے تو وہیں سیاحت سمیت بیشتر شعبے بھی متاثر ہو رہے ہیں۔

    حکومتی احکامات پر ملک بھر میں سیاحت مارچ کے تیسرے ہفتے سے بند ہے۔ حکمراں جماعت پاکستان تحریک انصاف سیاحت کو معیشت کے لیے اہم سمجھتی ہے لیکن موجودہ حالات میں سیاحتی و تفریحی مقامات کو کھولنے سے وائرس پھیلنے کا خدشہ موجود ہے۔

    اسی لیے صوبہ خیبرپختونخوا کی حکومت نے سیاحت پر سے پابندی ہٹانے کا اپنا فیصلہ موخر کردیا تھا۔ جبکہ گلگت بلتستان کی حکومت کی جانب سے سیاحت پر مزید دو ہفتوں کی پابندی عائد کی گئی ہے۔

    پاکستان کے یہ دو خطے ہر سال لاکھوں ملکی و غیر ملکی سیاحوں کو اپنے دلکش نظاروں کی طرف کھینچ لاتے ہیں۔

    مزید پڑھیے

12. 18 جون 2020کورونا وائرس: کیا ڈیکسامیتھازون پاکستان میں فوری استعمال ہو سکتی ہے؟

13. 18 جون 2020بریکنگ, دنیا بھر سے تازہ ترین

    دنیا بھر میں کورونا وائرس سے مجموعی ہلاکتوں کی تعداد 448,504 ہو گئی ہے۔

    جانز ہاپکنز یونیورسٹی کے تازہ ترین اعداد و شمار کے مطابق دنیا میں کورونا وائرس سے اب تک 8,331,135 افراد متاثر ہو چکے ہیں۔

    امریکہ میں اموات کی تعداد 117,717 ہو گئی ہے اور یہ سب سے زیادہ ہے۔

    دیگر ممالک میں ہلاکتوں کی تعداد:

    برازیل: 46,510

    برطانیہ: 42,238

    اٹلی: 34,448

    فرانس: 29,578

    سپین: 27,136

    میکسیکو: 19,080

    انڈیا: 11,903

    بیلجیئم: 9,675

    ایران: 9,185

14. 18 جون 2020کورونا وائرس: کراچی کے چھ اضلاع کےعلاقوں میں دو جولائی تک مکمل لاک ڈاؤن کا فیصلہ

    پاکستان کے سب سے بڑے شہر کراچی کے چھ اضلاع کی متعدد یونین کونسلز میں دو جولائی تک مکمل لاک ڈاؤن کرنے فیصلہ کیا گیا ہے۔

    اس فیصلے کا اطلاق آج شام سات بجے سے ہو گا۔

    جن اضلاع کے علاقوں میں لاک ڈاؤن کیا جا رہا ہے ان میں ضلع کورنگی، ضلع جنوبی، ضلع مشرقی، ضلع مغربی، ضلع ملیر، ضلع وسطی شامل ہیں۔

    لاک ڈاؤن کے دوران ان تمام علاقوں میں داخل ہونے والوں کے لیے ماسک پہننا لازمی ہو گا۔ اس کے علاوہ گھر کے صرف ایک فرد کو گھر سے نکلنے کی اجازت ہو گی اور شناختی کارڈ دکھانا لازم ہو گا۔

    گھروں پر کسی قسم کی کوئی تقریبات کرنے کی اجازت نہیں ہو گی جبکہ اس دوران صرف ضروری اشیا کی دکانیں اور فارمیسیز کھلی رہیں گی۔

15. 18 جون 2020کورونا وائرس: پاکستان میں آکسیجن سلینڈرز کی قلت، طلب اور قیمت بڑھنے سے مریضوں کو مشکلات درپیش

    پاکستان میں کورونا وائرس نے صحت کے نظام میں پائی جانے والی خامیاں اب واضح کر دی ہیں۔

    پاکستان میں کووڈ 19 کے پھیلاؤ کے ساتھ جہاں طبی عملے کے لیے حفاظتی سامان اور مریضوں کے لیے بستر، وینٹیلیٹرز، آئی سی یو وارڈز اور ادویات کی کمی محسوس کی جا رہی ہے تو وہیں اب آکسیجن کی قلت کا مسئلہ بھی سر اٹھا رہا ہے۔

    بڑے شہروں کے بڑے ہسپتالوں میں تو شاید آکسیجن کی قلت نہ ہو لیکن ان چند ایک بڑے شہروں کے علاوہ پاکستان کے بیشتر شہروں کے ہسپتالوں میں مریضوں کے لیے آکسیجن کی کمی واقع ہو رہی ہے۔

    خیبر پختونخوا کے ضلع پشاور اور ایبٹ آباد کے ہسپتالوں میں آکسیجن کا مرکزی نظام ہے۔ لیکن صوبے کے باقی 36 اضلاع کے ہسپتالوں میں آکسیجن کے سلینڈروں پر گزارہ ہوتا ہے۔ اگر یہ سلینڈر کم پڑ جائیں تو مریض کی جان کو خطرہ لاحق ہو جاتا ہے۔

    جانیے عزیز اللہ خان اور ترہب اصغر کی اس تحریر میں۔

16. 18 جون 2020کورونا وائرس: زندگی بچانے والی پہلی دوا کی تفصیلات

    کورونا وائرس سے شدید بیمار مریضوں کی زندگی ایک سستی اور وسیع پیمانے پر دستیاب دوا سے بچائی جا سکتی ہے۔ برطانیہ میں ماہرین نے اس دوا کو کتنا مفید قرار دیا ہے؟

    اس دوا کے بارے میں مزید تفصیلات بتا رہی ہیں ہدیٰ اکرام ہمارے ساتھی موسیٰ یاوری کی اس پوڈکاسٹ میں

17. 18 جون 2020فیس بک پر ’جھوٹ‘ پھیلانے پر روسی خاتون کو جرمانہ, بی بی سی مانیٹرنگ

    روسی اخبار نووایا گیزیٹا کے مطابق روس کے شہر یاکیتیرنبرگ میں ایک خاتون کو فیس بک پر ’جھوٹی‘ پوسٹ لگانے پر جرمانہ کیا گیا ہے۔ اس عورت نے اپنی پوسٹ میں لکھا تھا کہ ان کا مقامی ہسپتال کورونا وائرس کے مریضوں کو داخل کرنے سے اجتناب کر رہا ہے۔

    تاتنیا زنیک نے ایک دوست کے متعلق لکھا کہ ’ہسپتال بھر چکا ہے، لوگ بڑی تعداد میں مر رہے ہیں، ہر ایک میں نمونیے کی تشخیص ہو رہی ہے۔ انھوں نے اس کو راہداری میں ڈال دیا ہے۔‘

    عدالت نے کہا کہ خاتون نے حالات کو غلط طریقے سے پیش کیا ہے اور اصرار کیا کہ وہاں بیماری کی وجہ سے کوئی ہلاکت بہیں ہوئی ہے۔

    زنیک کو 15 ہزار روبل (200 ڈالر) جرمانہ کیا گیا ہے۔ ان کے وکیل نے کہا ہے کہ وہ اس فیصلے کے خلاف اپیل کریں گے۔ انھوں نے مزید کہا کہ ’اگر ضرورت پڑی تو ہم انسانی حقوق کی یورپی عدالت میں بھی جائیں گے۔‘

    سرکاری اعدادو شمار کے مطابق روس میں دنیا میں تیسرے نمبر سب سے زیادہ، 55 لاکھ 2 ہزار 549ّ، متاثرین ہیں اور اب تک 7 ہزار 468 ہلاکتیں ہو چکی ہیں۔

18. 18 جون 2020پیرس کا ایفل ٹاور اگلے ہفتے دوبارہ کھل رہا ہے

    پیرس کا ایفل ٹاور، جو فرانس کے سب سے زیادہ دیکھے جانے والے مقامات میں سے ایک ہے، سیاحوں کے لیے اگلے ہفتے دوبارہ کھل جائے گا۔

    دوسری جنگِ عظیم کے بعد سب سے لمبے عرصے کے لیے بند رہنے کے بعد اب ٹورازم کے اہلکاروں کا منصوبہ ہے کہ شروع میں محدود لوگوں کو ٹاور پر جانے دیا جائے گا۔

    اسے دیکھنے کے لیے آنے والے افراد کو صرف پہلی اور دوسری منزل پر جانے کی اجازت ہو گی، اور پہلے مرحلے میں لفٹیں بھی بند رہیں گی۔

    لوگوں کے چلنے پھرنے کی جگہوں کو ہر دو گھنٹوں کے بعد صاف کیا جائے گا، اور 11 سال سے اوپر سب آنے والوں کے لیے ماسک پہننا ضروری ہو گا۔ امکان ہے کہ یہ 25 جون کو مکمل طور پر کھول دیا جائے گا۔

    ایفل ٹاور کو دیکھنے ہر سال عموماً 70 لاکھ کے قریب لوگ آتے ہیں، لیکن مارچ میں لاک ڈاؤن کے اعلان کے بعد فرانس کی سیاحت کی صنعت کو بڑا نقصان پہنچا ہے۔

19. 18 جون 2020کورونا وائرس کے حوالے سے حکومتی پالیسی کو معید یوسف کیسے دیکھتے ہیں؟

    پاکستان کی لاک ڈاؤن پالیسی اب تک کنفیوثن کا شکار لگتی ہے۔ جس کے تحت اب تک یہ واضح نہیں ہے کہ لاک ڈاؤن کرنا ہے یا نہیں۔

    جہاں دیگر ممالک میں لاک ڈاؤن ختم ہونے کے بعد اب ملک کو مرحلہ وار کھولنے کی بات کی جارہی ہے، وہیں پاکستان میں جزوی لاک ڈاؤن کے بعد مختلف سیکٹرز کو پہلے سے ہی کاروبار کھولنے کی اجازت دے دی گئی ہے۔

    کورونا وائرس کی حکومتی پالیسی کیا ہے اور اس بارے میں حکومت کیا کررہی ہے، اس بارے میں وزیرِ اعظم کے معاونِ خصوصی برائے حفاظتی امور معید یوسف نے بی بی سی کی نامہ نگار سحر بلوچ سے بات کی۔

20. 18 جون 2020بریکنگ, کورونا وائرس: صوبہ پنجاب میں متاثرین 60 ہزار سے زیادہ، مزید 53 اموات

    پاکستان کے صوبہ پنجاب میں گذشتہ 24 گھنٹوں کے دوران کورونا وائرس سے مزید 1899 نئے مریض سامنے آئے جبکہ 53 افراد ہلاک بھی ہوئے ہیں۔

    اب تک صوبے میں کورونا وائرس سے متاثرہ افراد کی کل تعداد 60 ہزار سے تجاوز کر چکی ہے جبکہ اب تک صوبے میں 1202 اموات بھی ہوئی ہیں۔

    اب تک صوبے میں 17825 افراد اس وائرس سے صحتیاب بھی ہوئے ہیں۔