آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
دنیا بھر میں کورونا کے مصدقہ متاثرین کی تعداد 89 لاکھ سے زائد جبکہ ہلاکتوں کی مجموعی تعداد چار لاکھ 67 ہزار سے بڑھ گئی ہے۔ پاکستان میں متاثرین کی تعداد ایک لاکھ 80 ہزار سے زیادہ جبکہ اموات کی کُل تعداد 3587 ہے۔ برازیل، میکسیکو اور انڈیا کے بعد پاکستان ایسا ملک ہے جہاں اموات اور متاثرین کی تعداد کی شرح میں مسلسل تیزی سے اضافہ ہو رہا ہے۔ پاکستان متاثرین کی عالمی فہرست میں 14ویں نمبر پر آ گیا ہے۔
پاکستان کے صوبہ پنجاب میں گذشتہ 24 گھنٹوں کے دوران ریکارڈ 82 اموات ہوئی ہیں جبکہ 2538 افراد نئے مریض بھی سامنے آئے ہیں۔
اب تک صوبہ پنجاب میں متاثرین کی کل تعداد 64216 ہو چکی ہے جبکہ 1347 افراد اس وائرس کے باعث ہلاک بھی ہوئے ہیں۔ صوبے میں صحتیاب افراد کی تعداد 17964 ہو گئی ہے۔
اسرائیلی حکومت نے ملک میں کورونا وائرس کے تیزی سے پھیلنے کے بعد لاک ڈاؤن میں سختی کر دی ہے۔
انفیکشن کی وجہ سے تقریباً 500 فوجیوں کو بھی تنہا کر دیا گیا ہے۔
جنوبی اسرائیل میں بدؤں کے تین علاقوں کو، جہاں انفیکشن ریٹ بہت زیادہ تھا، لاک ڈاؤن کر دیا گیا ہے اور تل ابیب کے کچھ حصوں میں نئی پابندیاں لگائی گئی ہیں۔
گذشتہ مہینے لاک ڈاؤن میں نرمی کے بعد سے غربِ اردن میں بھی متاثرین میں اضافہ ہوا ہے۔ فلسطینی صحت کے اہلکاروں کے مطابق وبا کے شروع ہونے کے بعد سے گذشتہ دو دنوں میں سب سے زیادہ متاثرین سامنے آئے ہیں اور ہیبرون میں دوکانیں اور کاروبار عارضی طور پر بند کر دیے گئے ہیں۔
انفیکشنز میں اضافے کے بعد وزیرِ اعظم بنیامین نیتن یاہو نے کہا ہے کہ معیشت اب مزید نہیں کھلے گی۔
پاکستان کے زیر انتظام کشمیر کے حکام کے مطابق مظفرآباد کے آئیسولیشن ہسپتال میں زیر علاج ایک مریضہ چل بسی جبکہ ڈپٹی کمشنر ضلع حویلی اور 14 خواتین سمیت 34 افراد میں کورونا وائرس کی تشخیص ہوئی ہے جس کے بعد اس خطے میں کورونا وائرس سے متاثر ہونے والے افراد کی تعداد 803 ہوگی ہے۔
حکام کے مطابق کورونا وائرس سے متاثر ہونے والوں میں ایک لیڈی ڈاکٹر اور ایک پیرا میڈیکل اسٹاف کا بھی فرد شامل ہیں۔ ضلعی ہیلتھ آفیسر باغ ڈاکٹر سعید کے مطابق باغ میں 3 خواتین سمیت 10 افراد کورونا وائرس سے متاثر ہوئے ہیں۔
ضلعی ہیلتھ آفیسر مظفرآباد ڈاکٹر سعید کے مطابق مظفرآباد میں کورونا کے باعث ایک خاتون ہلاک جس کے بعد ہلاک ہونے والے افراد کی تعداد 16 ہوگی۔
ان کے مطابق 4 خواتین سمیت 7 افراد میں کورونا وائرس کی تشخیص ہوئی ہے۔ ضلع راولاکوٹ کے ڈپٹی کمشنر مرزا ارشد کے کورونا وائرس سے متاثر ہونے والی 3 خواتین سمیت 9 افراد کا تعلق حویلی جبکہ ایک خاتون سمیت 2 افراد کا تعلق راولاکوٹ سے ہے۔
کمشنر میرپور محمد رقیب خان کے مطابق کورونا وائرس سے متاثر ہونے والے ایک خاتون سمیت 2 افراد کا کوٹلی جبکہ ایک کا تعلق بھمبر سے ہے۔
ضلع پلندری کے ڈپٹی کمشنر کے مطابق پلندری میں ایک خاتون سمیت 3 افراد کورونا وائرس سے متاثر ہوئے ہیں۔ حکام کے مطابق 5 مزید کورونا کے مریض صحت یاب ہوئے ہیں جس کے بعد اس خطے میں صحت یاب مریضوں کی تعداد 317 ہوگی ہے۔
حکام کے مطابق اب تک اس خطے میں 13034 مشتبہ افراد کے ٹیسٹ لیے گے ہیں۔
بلوچستان میں کورونا کے 164 نئے کیسز کے اضافے کے بعد مجموعی کیسز کی تعداد 9162 ہوگئی ہے۔
کورونا سے مزید ایک فرد کی ہلاکت ہوئی ہے جس کے باعث ہلاک ہونے والے افراد کی مصدقہ تعداد 100 ہوگئی ہے۔
محکمہ صحت حکومت بلوچستان ترجمان ڈاکٹر وسیم بیگ کے مطابق 19جون 2020 کو کورونا کے770 ٹیسٹ کیے گئے جن میں سے 164 پازیٹو آئے۔
بلوچستان میں اب تک کورونا کے مجموعی طور پر 41736 ٹیسٹ کیے گئے ہیں جن میں سے 32574 کے نتائج منفی آئے۔
بلوچستان میں مجموعی طوپر پر91107 افراد کی سکریننگ کی گئی ہے۔ کورونا وائرس سے اب تک 3289 افراد صحت یاب ہوئے ہیں۔
محکمہ گلگت بلستان کے مطابق 40 نئے مریضوں کے ساتھ گلگت بلستان میں مجموعی متاثرین کی تعداد 1253 ہوگئی ہے۔
گذشتہ 24 گھنٹوں میں گلگت بلستان میں ریکارڈ تین مریض ہلاک ہوئے ہیں۔ جس کے بعد تعداد 21ہوگئی ہے۔
28 مریض صحت یاب ہوئے ہیں جس کے بعد صحت مند مریضوں کی تعداد 816 ہوگئی ہے جبکہ اس وقت 416 مریض زیر علاج ہیں۔
پاکستان کے صوبے خیبر پختونخوا میں گذشتہ 24 گھنٹوں کے دوران مزید 608 کیسز سامنے آئے ہیں جس کے بعد صوبے میں مصدقہ متاثرین کی تعداد 20190 ہو گئی ہے۔
اس دوران مزید 16 افراد کی ہلاکت کے بعد صوبے میں ہلاکتیں 189 ہو گئی ہیں۔
صوبے میں اب تک 5623 افراد وبا سے صحت یاب ہو چکے ہیں۔
اقوامِ متحدہ کی ایک رپورٹ کے مطابق تقریباً ایک ارب بچے، جو تقریباً دنیا کے تمام بچوں کا نصف ہیں، جسمانی، جنسی یا نفسیاتی تشدد کا نشانہ بنے ہیں جو وبا کی وجہ سے لگائے گئے لاک ڈاؤن کے باعث مزید بری شکل اختیار کر گیا ہے۔
اس طرح کی اپنی نوعیت کی پہلی تحقیق میں عالمی ادارۂ صحت نے دریافت کیا ہے کہ 2017 میں تقریباً 40 ہزار بچے قتل ہوئے تھے۔
اس نے کہا ہے کہ کورونا وائرس کی وبا نے تشدد کو بڑھایا ہے، کیونکہ گھر پر رہنے کی پالیسیوں نے مدد کے ذرائع کم کر دیے ہیں اور متاثرہ فرد کی دباؤ برداشت کرنے کی صلاحیت بھی کم ہو گئی ہے۔ عالمی ادارۂ صحت کے سربراہ ٹیڈروس ادہانوم غیبریسیئس نے اسے کووڈ۔19 کا ’پریشان‘ اثر کہا ہے۔
تقریباً 80 فیصد ممالک میں فنڈز کی کمی ہے اور روک تھام کے پروگراموں کے لیے قابلِ پیمائش اہداف نہیں ہیں، جس کی وجہ سے اس قسم کے رجحان میں اضافہ ہو رہا ہے۔ اس کے ساتھ ساتھ سائبر بولنگ جیسے نقصان دہ آن لائن رویے میں بھی اضافہ ہوا ہے۔
برطانوی حکومت کے سرکاری اعداد و شمار کے مطابق کورونا وائرس سے ہونے والی اموات میں 173 کا اضافہ ہوا ہے۔ یہ جمعرات سے زیادہ ہے جو 135 تھیں۔ اس طرح اب اموات کی کل تعداد 42 ہزار 461 ہو گئی ہے۔
انفرادی طور پر ویلز، سکاٹ لینڈ اور شمالی آئرلینڈ اپنے اعداد و شمار کا اعلان علیحدہ بھی کرتے ہیں۔ وہ اعداد و شمار برطانوی حکومت سے ذرا مختلف ہوتے ہیں کیونکہ وہ مختلف اوقات میں لیے جاتے ہیں۔
ویلز میں مزید چار افراد کی موت ہو گئی جبکہ شمالی آئرلینڈ میں ایک نئی ہلاکت ریکارڈ کی گئی۔
سکاٹ لینڈ نے پہلے ہی چار ہلاکتوں کی تصدیق کی تھی۔
پاکستان کے دارالحکومت اسلام آباد کے عوامی مقامات پر ماسک پہننا لازمی قرار دے دیا گیا ہے۔
ضلعی مجسٹریٹ کی جانب سے جاری حکم نامے کے مطابق تمام شہریوں پر لازم ہے کہ وہ عوامی مقامات پر جاتے ہوئے چہرے پر ماسک پہنیں۔
یہ حکم نامہ فوری طور پر نافذ العمل ہوگا اور اس کا اطلاق دو ماہ تک جاری رہے گا۔
یہ فیصلہ وفاقی حکومت اور طبی ماہرین ے مشورے پر کورونا وائرس کی وبا کے پھیلاؤ کو روکنے کی غرض سے کیا گیا ہے۔
امیریکاز میں ایک سرکاردہ صحت کے اہلکار نے بی بی سی کو بتایا ہے کہ نسخے کے بغیر ڈیکسامیتھازون خطرناک ہو سکتی ہے۔
ڈیکسامیتھازون ایک سستا سٹیروئڈ ہے جس کے متعلق حال ہی میں پتہ چلا ہے کہ وہ ہسپتال میں موجود کووڈ۔19 کے شدید بیمار مریضوں میں شرح اموات کم کرنے مددگار ثابت ہو سکتا ہے۔
پین امیریکن ہیلتھ آرگینائزیشن کے اسسٹنٹ ڈائریکٹر ڈاکٹر جارباس باربوسا نے بی بی سی کے پروگرام آؤٹ سائیڈ سورس کو بتایا کہ ’کئی مخصوص حالات میں، یہ جسم کے وائرس کے حوالے سے ردِ عمل کو مزید خراب بھی کر سکتا ہے۔‘
انھوں نے کہا کہ ’اگر آپ اسے انفیکشن کے شروع میں لیں، یا آپ کو کوئی اور انفیکشن ہے جو کہ کووڈ۔19 نہیں ہے، تو یہ صورتِ حال بگاڑ بھی سکتا ہے۔‘
’بدقسمتی سے لاطینی امریکہ کے کئی ممالک میں، آپ ڈیکسامیتھازون اور دوسری ادویات بغیر کسی نسخے کے خرید سکتے ہیں، اس لیے یہ بہت اہم ہے کہ قومی حکام اسے واضح طور پر بتائیں۔‘
مئی میں حکومت کی طرف سے ریکارڈ مقدار میں قرضہ لینے کے بعد برطانیہ کا قرضہ اس کی کل معیشت سے زیادہ ہو گیا ہے۔
55.2 ارب پاؤنڈ کا قرضہ گذشتہ مئی میں لیے جانے والے قرضے سے نو گنا زیادہ ہے اور 1993 کے بعد سب سے زیادہ لیا جانے والا قرضہ ہے۔
قرضوں کی ’شاہ خرچی‘ اتنی ہو گئی ہے کہ اب حکومت کا کل قرضہ بڑھ کر 1.95 ٹریلیئن پاؤنڈ تک پہنچ گیا ہے جو کہ گذشتہ 50 سال میں پہلی مرتبہ معیشت کے حجم سے بڑھ گیا ہے۔
چانسلر رشی سوناک نے کہا ہے کہ یہ اعداد و شمار اس بات کی تصدیق کرتے ہیں کہ وائرس کے پبلک فنانسز پر کتنے برے اثرات پڑے ہیں۔
انھوں نے کہا کہ ’ہمارے پبلک فنانسز کو زیادہ پائیدار بنیادوں پر دوبارہ بحال کرنے کا بہترین طریقہ ہے کہ احتیاط سے اپنی معیشت کو دوبارہ کھولیں تاکہ لوگ اپنے کام پر واپس آ سکیں۔‘
’ہم نے اپنی معیشت کی بحالی کا ایک ایسا منصوبہ ترتیب دیا ہے کہ اسے دھیرے دھیرے اور محفوظ طریقے سے کیا جائے، جس میں اس ہفتے پورے ملک کی ہائی سٹریٹس کو دوبارہ کھولنا بھی شامل ہے۔‘
وزیراعلیٰ سندھ سید مراد علی شاہ کا کہنا ہے کہ کورونا وائرس کی صورتحال صوبے بھر میں خطرناک شکل اختیار کرتی جا رہی ہے اور آج مزید 49 افراد کورونا کے باعث جان کی بازی ہار گئے جو صوبے میں 24 گھنٹوں کے دوران اب تک کی ہلاکتوں کی تعداد سب سے زیادہ ہے۔
اب تک سندھ میں کورونا وائرس کے باعث مجموعی ہلاکتیں 1013 ہو چکی ہیں۔
وزیراعلیٰ سندھ کے مطابق گذشتہ 24 گھنٹوں میں 13642 ٹیسٹ کئے گئے جو ایک ریکارڈ ہے جس کے بعد آج 2894 نئے کیسز سامنے آئے ہیں، جو سب سے زیادہ ہیںگ ’
سندھ اب تک 354129 ٹیسٹ ہوچکے ہیں، صوبے میں کورونا وائرس کے مصدقہ متاثرین کی تعداد 65163 ہے۔
وزیراعلیٰ سندھ سندھ کے مطابق اس وقت 31425 مریض زیر علاج ہیں، اور ان میں سے 673 مریض تشویشناک حالت میں ہیں اور 113 مریض وینٹی لیٹرز پر ہیں۔
انھوں نے بتایا کہ آج 1691 مریض صحتیاب ہوکر عام زندگی کی طرف لوگ گئے ہیں، جس کے بعد صوبے میں اب تک 32725 مریض صحتیاب ہوچکے ہیں۔
وزیراعلیٰ سندھ نے کہا کہ عوام کی حفاظت کی خاطر مختلف علاقوں میں منتخب لاک ڈاؤن کیا گیا ہے۔
وزیراعلیٰ سندھ نے عوام کو انتظامیہ سے تعاون کرنے کی ہدایت کی اور کہا کہ ’آپ کے تعاون سے ہم عوام کو اس وبائی صورتحال سے نکال لیں گے۔ یہ وقت اتحاد، ایک دوسرے کی حفاظت اور احتیاط کا ہے۔‘
محکمہ صحت حکومت بلوچستان نے تمام پرائیویٹ لیباریٹریوں کو ہدایت کی ہے کہ کورونا وائرس کے ٹیسٹ کروانے والے مریضوں کا مکمل اور جامع ریکارڈ رکھا جائےاور اس ریکارڈ کو کورونا وائرس سیل بلوچستان کے ساتھ روزانہ کی بنیاد پر شیئر کیا جائے۔
محکمہ صحت حکومت بلوچستان کے ترجمان ڈاکٹر وسیم بیگ کے مطابق کورونا وائرس سیل بلوچستان کے سربراہ ڈاکٹر نقیب نیازی کی قیادت میں کوئٹہ کی پرائیویٹ لیبارٹریز کے نمائندوں کا اجلاس ھوا۔
اجلاس میں کورونا وائرس کے ٹیسٹ کے لیے ایس او پیز پر مکمل طور پر عمل درآمد کا طریقہ کار طے کیا گیا۔
اس موقع پر تمام لیبارٹریز کے نمائندوں کو کورونا وائرس کے ایس او پیز پر مکمل عملدرآمد کو یقینی بنانے کی ہدایت کی گئی۔
ڈاکٹر نقیب نیازی نے کہا کہ کورونا وائرس سیل بلوچستان کی ٹیمیں مختلف اوقات میں ان لیبارٹریز کا دورہ کریں گی اور محکمہ صحت بلوچستان کی جانب سے متیعن کردہ ایس او پیزکو چیک کریں گی۔
قومی ادارہ برائے شماریات کے مطابق برطانیہ میں معذور افراد میں کورونا وائرس سے مرنے والوں کی تعداد دوگنا ہے۔
تحقیق کے مطابق لاکھ میں سے 200 افراد معذور ہیں جبکہ اسی تعداد کے متاثرین میں سے 140 معذوری کا سامنا کرنے والی خواتین کی شرح بنتی ہے۔
ایسے افراد جو معذور نہیں تھے ان کی ایک لاکھ افراد میں سے مرنے کی تعداد 70 بنتی ہے اور خواتین میں یہ تعداد صرف 36 تک بنتی ہے۔
اس تجزیے میں دو مارچ سے لے کر 15 مئی تک کورونا وائرس سے مرنے والے شامل ہیں۔
اقوامِ متحدہ کی بچوں کی ایجنسی یونیسیف کا بھیجا ہوا ایک چارٹرڈ جہاز 10 ہزار کورونا وائرس ٹیسٹ کِٹس لے کر یمن کے دارالحکومت صنعا پہنچا ہے۔
اس کے علاوہ آنے والے دنوں میں 8 ہزار کٹس کی ایک اور شپمنٹ دوسرے بڑے شہر عدن پہنچے گی۔
یمن میں یونیسیف کی نمائندہ سارا بیسلو نیانتی نے کہا کہ ’ان کِٹس سے ملک بھر میں کووڈ۔19 کی وسیع پیمانے پرٹیسٹنگ میں مدد ملے گی اور ان سے تصدیق شدہ کیسز کی بر وقت مینجمنٹ سے زندگیاں بچائی جا سکیں گی۔‘
گذشتہ ہفتے یونیسیف نے خبردار کیا تھا کہ یمن میں صحت کا نظام مکمل طور پر تباہ ہو چکا ہے، جہاں سرکاری طور پر کووڈ۔19 کے پہلے مریض کی تصدیق 10 اپریل کو ہوئی تھی۔
کورونا کے باعث پابندیوں کی وجہ سے افغانستان سے متصل بلوچستان کے سرحدی شہر چمن میں روزانہ اجرت کی بنیاد پر محنت مزدوری کرنے والے اور چھوٹے کاروباری افراد کا احتجاجی دھرنا جمعہ کو گیارہویں روز بھی جاری رہا۔
یہ احتجاج سرحد سے روزانہ اجرت کی بنیاد پر محنت مزدوری اور چھوٹے کاروباری افراد کی آمد و رفت پر تاحال پابندی برقرار رہنے کے خلاف کیا جارہا ہے۔
فون پر رابطہ کرنے پر چمن کے تاجر رہنما صادق اچکزئی نے بتایا کہ مزدوروں سمیت چمن سے تعلق رکھنے والے ہزاروں افراد کے معاش اور روزگار کا انحصار سرحدی تجارت پر ہے جس کے لیے انہیں روزانہ کی بنیاد پر افغانستان جانا اور واپس آنا پڑتا ہے۔
ان کا کہنا ہے کہ کورونا کے باعث سرحد کی بندش کے بعد سے ان لوگوں کے گھروں کے چولھے ٹھنڈے پڑ گئے ہیں جس کے باعث ان لوگوں کے پاس احتجاج کے سوا کوئی چارہ نہیں۔
انہوں نے بتایا کہ تاحال سرحدی تجارت کی اجازت نہ ملنے کے خلاف تین روز قبل چمن شہر میں شٹرڈاﺅن ہڑتال بھی کی گئی۔
ان کا کہنا تھا کہ جس طرح وزیر اعظم عمران خان لوگوں کی مالی مشکلات کی وجہ سے مکمل لاک ڈاﺅن کے حق میں نہیں اسی طرح انسانی ہمدردی کی بنیاد پر اس معاملے کا بھی جائزہ لیا جائے۔
ان کے بقول احتیاطی تدابیر کے ساتھ محنت کشوں اور چھوٹے تاجروں کی آمد و رفت پر بھی پابندی کا خاتمہ کیا جائے تاکہ ان لوگوں کا روزگار بحال ہو۔
اس برطانوی خاتون کے ہاں بچے کی پیدائش ہوئی ہے جو ہسپتال کے بستر سے لوگوں کو اپیل کرتی تھیں کہ وہ لاک ڈاؤن کی خلاف ورزی نہ کریں اور اسے سنجیدگی سے لیں۔
ان کی یہ اپیلیں انٹرنیٹ پر وائرل ہو گئی تھیں۔
کینٹ کے علاقے ہیرن بے سے تعلق رکھنے والی کیرن میننرنگ اس وقت چھ ماہ کی حاملہ تھیں جب انھیں مارچ میں کورورنا وائرس لگا۔ ان کو ہسپتال میں داخل کر لیا گیا جہاں ان کے دونوں پھیپھڑوں میں نمونیے کی تشخیص ہوئی۔
وہ کہتی ہیں کہ انھوں نے یہ ویڈیو ہسپتال کے بستر سے اس لیے بنائی تھیں کیونکہ وہ سب کو بتانا چاہتی تھیں کہ وائرس کو سنجیدگی سے لیں۔
اب وہ کورونا سے بحال ہو چکی ہیں۔
کورونا وائرس سے بچاؤ کے سلسلہ میں راولپنڈی کے سیل کیے گئے علاقوں میں سمارٹ لاک ڈاؤن کا نفاذ کیا جا رہا ہے۔
سی پی او راولپنڈی کے مطابق شہریوں کے تحفظ کی خاطر لاک ڈاؤن کے حکومتی احکامات پر عملدرآمد ہر صورت یقینی بنایا جائے گا۔
ان کا کہنا تھا کہ خلاف ورزی کی صورت میں قانونی کاروائی عمل میں لائی جائے گی۔
کورونا وائرس کی عالمی وبا نے ہماری روزمرہ کی زندگی میں کئی نئے الفاظ اور اصطلاحات متعارف کرائی ہیں، چاہے بات قرنطینہ، وائرس، مدافعت یا سماجی فاصلے کی ہو۔ لیکن آخر ان سب اصطلاحات کا مطلب کیا ہے؟
کورونا کو لے کر ہم سب کے ذہن میں بہت سے سوالات ہیں۔ خاص طور پر پاکستان میں ٹائیفائیڈ اور کورونا کے بیچ تشخیص کرنے کے حولے سے کیا اقدام لیے جانے چاہئے؟ ایسے ہی کئی سوال ہم نے وبائی امراض کے ماہر ڈاکٹر فہیم یونس سے پوچھے۔ ان کے جواب جاننے کے لیے محمد ابراہیم کی یہ ویڈیو ملاحظہ کریں۔۔۔