Ҳамон модел агентлиги раҳбари бўлган Эпштейн таниши "ҳаётимни хавф остига қўйди"

Жефри Эпштейн томонидан зўрланган аёл айтишича, жинсий зўравоннинг Флорида соҳилидаги уйига икки фото сессияга юборган моделлар агентлигининг президенти унинг ҳаётини хавф остига қўйган.

Ўша пайт, 2009 йили вояга етмаган инсон билан жинсий алоқа учун қамоқ муддатини ўтаётган Эпштейнга уйидан ишлашга рухсат берилган.

"Менинг агентлигим вазифаси мени муҳофаза қилиш эди. Лекин улар ҳимоя қилмадилар. Амалда улар мени хатарга қўйдилар. Ва бунинг учун улар жавоб беришлари керак", деди у BBC Жаҳон хизматига.

MC2 Model Management агентлигининг АҚШ бўлими томонидан Эпштейннинг Палма Соҳилидаги уйига илк бор юборилган вақти Роза 18 ёшда эди, атиги бир ой олдин Ўзбекистондан Қўшма Штатларига келган эди. Ўша пайтдаги MC2 АҚШ президенти Жеф Фуллер эди. Бугунги кунда у The Source Models деб аталадиган моделлар агентлигини бошқаради.

"Агентлигим мен қандай жойда эканимни яхши биларди. Жеф мен айнан қаерга бораётганимни яхши билган," дейди Роза.

Роза бизга бизга харажатлар ҳисоботини кўрсатди. Бу Эпштейннинг уйида ўтказилган иккинчи фотосессиядан кейин унинг Палм-Бичдан уйига қайтиш авиачиптаси чеки бўлиб, уни Фуллернинг ўзи брон қилган. Бундан олдин Фуллер Роза Эпштейннинг уйига бораётганини билмаганини айтганди.

Роза айтишича, фотосессиялар уни Эпштейннинг ёрдамчиси сифатида ишга олинишига етаклаган.

Бошқа жабрланувчилар ҳам молиячи ёш аёлларга нисбатан зўравонлигини давом эттириши учун ёрдамчиларни ёллашни пухта ўйланган ниқоб сифатида қўллаб келганини айтишган.

Розанинг айтишича, Эпштейн кейинчалик уни мунтазам равишда зўрлаган.

Фуллер Би-би-сининг айбловлар борасидаги сўровига жавоб бермади. У бундан олдин Розага нисбатан зўравонлик қилинаётганини билмаганини айтган.

Биз АҚШ Адлия вазирлиги (DOJ) томонидан эълон қилинган Эпштейнга доир ҳужжатлар орқали MC2 агентлигининг 10 нафар модели Эпштейн судланганидан кейин ҳам у билан учрашгани ёки мулоқотда бўлганини аниқладик.

Шунингдек, ҳужжатларда Эпштейн 2005 йилда MC2 агентлигига 1 миллион доллар (742 минг фунт стерлинг) бергани кўрсатилган. Ҳолбуки, агентлик эгалари икки йил ўтиб АҚШдаги бир нашрга Эпштейннинг компания фаолиятига ҳеч қандай алоқаси бўлмаганини айтган эдилар.

BBC Eye билан бўлишилган гувоҳликлар моделлик соҳасида фаолият юритган яна икки шахснинг роли ҳақида ҳам саволлар туғдиради. АҚШ Адлия вазирлиги ҳужжатларига кўра, собиқ агент Рамси Элхоли ва агентлик директори Фейт Кейтс Эпштейн билан яқин муносабатда бўлганлар.

Адлия вазирлигининг ўтган йили берилган, «жиноий жавобгарликка тортилмаган учинчи томонлар»га нисбатан қўшимча тергов ўтказишни талаб қиладиган далиллар топилмагани ҳақидаги баёноти ҳозир Ню-Йорк штати сенатори Зеллнор Майри томонидан шубҳа остига олинмоқда.

У полицияга Эпштейнга ёрдам берган бўлиши мумкин бўлган шахсларни кенгроқ суриштириш ваколатини бериш мақсадида одам савдоси ва жинсий эксплуатацияга қарши янги қонун лойиҳасини таклиф қилди.

Бу фикрни АҚШда моделларни янада кучлироқ муҳофаза қилиш кампаниясини юритаётган Model Alliance ташкилоти асосчиси Сара Зиф ҳам маъқуллайди.

"Кўпинча, муаммо модел агентликларида бўлади. Улар модел билан бу ваҳший одам ўртасидаги воситадир."

Розанинг сўзларига кўра, MC2 агентлиги уни юборган фото сессиядаги суратчи профессионал фотограф эмас, ўша пайтдаги Эпштейннинг хуштори Надия Марчинко бўлган.

Роза фотосессия вазиятини «ғалати эди, чунки у ерда стилист йўқ эди», деб тасвирлайди ва олинган суратлар ҳеч қачон ишлатилмаганини айтади. Шундан кейин у бу фотосессиялар Эпштейн ва MC2 томонидан саҳналаштирилганига ишонч ҳосил қилган.

АҚШ Адлия вазирлиги ҳужжатларидаги Фуллернинг Эпштейнга юборган электрон мактуби агентлик билан молиячи ўртасидаги яқин алоқаларни яққол кўрсатади.

«Сен бўлмаганингда, биз уни бир неча ой олдин ишдан бўшатган бўлардик», деб ёзади Фуллер 2012 йил март ойида бошқа бир модел ҳақида. «Ва мен эҳтиёт бўлардим, чунки у турли гапларни тарқатади», деб қўшимча қилади у.

Эпштейн 2019 йилда иккинчи марта ҳибсга олинганидан бир ой ўтиб, MC2 агентлигининг АҚШдаги бўлими тугатилди ва Фуллер ҳозиргача фаолият юритаётган The Source Models номли янги агентликни очди. Би-би-си аниқлашича, MC2нинг 50 нафар модели унинг янги агентлигига ўтказилган.

Биз аниқлаган маълумотлар юзасидан The Source Models агентлигига изоҳ сўраб мурожаат қилдик, аммо жавоб олмадик.

Эпштейн учун модел агентликлари фойдали восита бўлган, дейди Эпштейннинг 100 дан ортиқ қурбони манфаатларини ҳимоя қилаётган адвокат Сигрид Маккоули.

«Эпштейн кўпчиликка кунига уч нафардан турли қиз кераклигини айтган. Бу рақамлар ҳақида ўйлаб кўринг... Моделлар скаутлари жуда муҳим эди, чунки айнан улар Эпштейнга ёқадиган турдаги аёлларни аниқлаб беришарди», дейди у.

Собиқ агент Рамси Элхоли мисолида BBC Eye унинг 34 нафар аёлни Эпштейн билан боғлашга уринганини аниқлади. Улар орасида ҳали мактабда ўқиётган 18 ёшли қиз ҳам бўлган.

Бу аёллардан бирининг тажрибаси ёрдамчилар қандай қилиб зўравонлик тизимига жалб қилинганини кўрсатади.

Адлия вазирлиги ҳужжатларига кўра, Элхоли Эпштейнга молиячининг аёл ёрдамчиларидан бири аввал бу аёл билан дўстлашишини, шундан кейин уни Эпштейнга таништиришни таклиф қилган.

Биз бу аёл билан суҳбатлашдик. Унинг айтишича, Эпштейн билан илк учрашувида, 19 ёшида, у Ню-Йоркдаги шаҳар уйида уни жинсий зўравонликка дучор қилган.

Рамси Элхоли Би-би-сига шундай деди: «Мен ҳар қандай кўринишдаги зўравонлик ҳақида билганим ёки унга кўмаклашганим тўғрисидаги айбловларни қатъий рад этаман. Ўша пайтда мен ҳеч қандай зўравонлик ҳақида маълумотга эга эмас эдим ва фақат унинг ўзи 2008 йилги суд иши ҳақида айтган гапларини билардим, мен эса афсуски, шу гапларга ишонганман».

У сўзида давом этди: «Ҳужжатлар ва эълон қилинган материаллардан кўринишича, аёллар кўпинча унинг яқин доирасидаги бошқа аёллар томонидан ишончга киритилган. Мен ҳеч қачон ўша доиранинг бир қисми бўлмаганман ва бундай фаолиятда ҳам иштирок этмаганман. Менинг мақсадим моделларга касбий имкониятлар топишда ёрдам бериш, уларни жуда кенг алоқаларга эга инсон билан таништириш эди».

Адвокат Сигрид Маккоулининг айтишича, бу аёл ёрдамчиларнинг қандай йўл тутиш борасида деярли «танловлари бўлмаган».

«Бу ёш жабрланувчилар мунтазам равишда зўрланар эдилар. Уларнинг тирикчилиги ва даромад манбалари хавф остида қолган эди... Уларга нима дейилса, шуни қилишга мажбур эдилар».

Биз суҳбатлашган яна бир модел, Шарқий Европадан бўлган Симона (бу унинг ҳақиқий исми эмас), Эпштейн уни 200 мартадан ҳам кўпроқ зўрлаганини айтди.

«Одамлар биз қандайдир фойда кўрганмиз, пул ёки таъсирга эришиш учун бу зўравонликка рози бўлганмиз, деб ўйлашади. Аммо бу тўғри эмас. Бизга фақат чуқур руҳий жароҳат қолган», дейди Симона.

Унинг айтишича, молиячи билан биринчи марта учрашганида 20 ёшда бўлган ва ўша пайтга келиб Ню-Йоркдаги бир моделлик агентлиги билан шартнома имзолаган эди. Шунда Эпштейн уни ўзининг «яхши» дўсти Фейт Кейтс билан таништиришни таклиф қилган.

Ўша вақтда Кейтс дунёдаги энг йирик моделлик агентликларидан бири бўлган Next Management раҳбари эди. У ўтган йил декабр ойида юқори лавозимидан кетган, аммо ҳануз компаниянинг директорларидан бири сифатида расман рўйхатда турибди.

Симонанинг айтишича, шу учрашув чоғида Кейтс унга пластик операция қилдиришни тавсия этган ва жарроҳнинг маълумотларини Эпштейнга юборган.

Симонанинг сўзларига кўра, Кейтс билан учрашувдан кейин Эпштейн уни моделлик фаолиятини тўхтатишга кўндирган.

Шундан сўнг, Роза ва унинг бир қанча бошқа қурбонлари каби, у ҳам Эпштейннинг ёрдамчисига айланган. Унинг айтишича, кейинги қарийб икки йил давомида Эпштейн уни зўрлаган ва ҳаётининг деярли ҳар бир жиҳатини назорат қилган.

АҚШ Адлия вазирлиги ҳужжатларига кўра, Эпштейн Кейтсдан яна беш нафар модел билан учрашишни сўраган. Аммо бу учрашувлардан қанчаси ҳақиқатан ҳам бўлиб ўтгани аниқ эмас.

Фейт Кейтснинг адвокатлари Би-би-сига шундай деган:

«Жеффри Эпштейн моҳир манипулятор эди... Кейтс хоним ҳам Эпштейн томонидан қаттиқ чалғитилганлардан бири бўлган. Агар у ўша пайтда ҳозир ўзи ва бошқалар билаётган ҳақиқатларни билганида, ҳеч қачон у билан алоқа қилмаган бўларди».

Улар, шунингдек, Кейтс ҳеч қачон бирор моделдан пластик операция қилдиришни сўрамаганини ҳам айтдилар.

Биз Next Management агентлигига ҳам изоҳ сўраб мурожаат қилдик, аммо жавоб олмадик.

Майри Би-би-сига айтишича, агар у таклиф қилган қонун лойиҳаси қабул қилинса, «агар сиз моделларни Эпштейнга юборган бўлсангиз ва унинг нима қилаётганини билган бўлсангиз ёки билишингиз керак бўлган бўлса, жавобгарликка тортиласиз».

Роза ўз бошидан ўтказганларини ошкор қилиш бошқаларни ҳам гапиришга ундайди, деган умидда.

«У ерда ҳали гапирмаган жуда кўп жабрланувчилар бор, чунки бу қўрқинчли. Шунинг учун барча жабрдийда опа-сингилларимга айтмоқчиман... Энди мени танийсизлар. Менинг исмимни биласизлар. Мен сизларга шундай дейман: боғланинг, алоқага чиқинг».

Мақолани тайёрлашда Анника Гросссер кўмаклашган