Янги Энергетика вазири, метан-шохобчаларидаги янги эҳтимолий чекловлар
Сурат манбаси, Rasmiy
Энергетика вазирлиги метан-шохобчалар фаолиятига чеклов киритилиши мумкинлиги ҳақида хабар тарқатди. Бунга Ўзбекистонда келаси ҳафта бошидан ҳаво ҳарорати пасайиши кутилаётгани сабаб қилиб кўрсатилмоқда.
"Газ таъминотида хонадонлар, мактаблар, боғчалар, шифохоналар ва бошқа ижтимоий объектларга устуворлик берилади.Зарурат туғилса, мавсумий истеъмолчилар, жумладан, автомобилларга газ тўлдириш компрессор шохобчалари фаолияти вақтинча чекланиши мумкин.Чекловлар ҳокимликлар билан келишилган, тасдиқланган графиклар асосида жорий этилади. Истеъмолчилар олдиндан хабардор қилинади", – дейилади Энергетика вазирлиги хабарида.
Ўзбекистонда қиш келиши билан газ таъминотида чекловлар жорий этилиши, айниқса, метан шохобчалари фаолияти вақтинча тўхтатилиши ёки иш вақти қисқартирилиши сўнгги йилларда такрорланиб келаётган ҳолат.
Энергетика вазирлигининг бундай баёнотлари ҳам деярли бир хил мазмунда бўлади: ҳаво совиши билан газга талаб ортади, биринчи навбатда аҳоли хонадонлари ва ижтимоий муассасалар таъминланади, метан шохобчаларига эса чеклов киритилиши мумкин.
End of Ижтимоий тармоқлардаги саҳифаларимиз
Ўзбекистон ҳукумати қишда газ истеъмолининг табиий равишда ортиши ва газ таъминоти тизимининг ҳар йили шу талабни қондиришда қийинчиликка дуч келишига ечим топа олмаётган кўринади.
2026 йил 27 июлда Ўзбекистонда янги энергетика вазири тайинланди. Шерзод Хўжаев 2023 йил 16 январда Ўзбекистонда қаттиқ совуқ ва энергетика таъминотидаги инқироз фонида президент Шавкат Мирзиёев томонидан энергетика вазири ўринбосари лавозимидан озод қилингади.
Сурат манбаси, Dima Qayum
Бир ой ўтиб, 2023 йил февралда у яна Энергетика вазирлиги тизимига қайтган ва қайта тикланувчи энергия манбалари бўйича лойиҳа офиси директори этиб тайинланганди.
Унинг бу ёзда вазир этиб тайинланишидан кейин, у 6 август куни президентга тақдим этилган режаларда куз-қиш мавсумида электр ва газ таъминоти барқарорлигини таъминлаш асосий вазифалардан бири сифатида белгиланганини айтди.
Хусусан, газ босими пасайиши ва таъминотдаги узилишлар сабабларини бартараф этиш, муаммоли газ тармоқлари ва ускуналарни модернизация қилиш, авариявий узилишларни камайтириш, ҳар бир ҳудуднинг энергия истеъмоли балансини тузиш, қишки мавсумга пухта тайёргарлик кўриш режалангани айтилди.
11 августдаги президент йиғилишида эса мавсумий талабни олдиндан ҳисоблаш, етарли захиралар яратиш ва газ таъминотида узилишларга йўл қўймаслик вазифалари қўйилганди.
Сурат манбаси, Rasmiy
BBC News O‘zbek контенти энди Сизнинг WhatsApp да
Аъзо бўлиш учун бу ерга босинг
End of podcast promotion
Шерзод Хўжаевнинг шахсан «бу қишда метан шохобчалари ёпилмайди» ёки «газ чекловлари бўлмайди» деб аниқ ваъда берган бўлмаса-да, табиий савол туғилади:
Янги энергетика вазирлиги раҳбарияти август ойида қишки мавсумга пухта тайёргарлик кўриш, газ таъминотини барқарорлаштириш ва узилишларни камайтириш режаларини тақдим этган бўлса, нега ноябрь ойининг бошидаёқ метан шохобчаларига чеклов киритиш эҳтимоли ҳақида огоҳлантирилмоқда?
Ўзбекистонда 2022 йилги сўнгги очиқ умуммиллий расмий маълумотларга кўра, автомобилларнинг 65 фоизи метан газида ҳаракатланган. Демак, метан шохобчаларига чекловлар мамлакатдаги миллионлаб ҳайдовчиларга таъсир қилиши мумкин.
Энергетика вазирининг бу эълони аллақачон ўзбекистонликларнинг норозилигига сабаб бўлмоқда.
Блогер Дима Қаюм ўз Фейсбук саҳифасида, хусусан, шундай дейди:
"5 кун ишламай 1 кун хаво илиса очиш бу яна юзлаб машиналар шаҳар ичида турнақатор туриши, кимлардир уни видео олиб интернетга жойлаши, хориж сайтлари вазиятни танқидий кўрсатиши.. Шу керакми?! Қайтараман! Тўғрисини айтиш, нисбатан арзонроқ бензин билан бозорни тўлдириш шарт! Аҳолига бериш сабаб чеклов деган фикр.... таги йўқ, ёки.. Чунки аҳолини катта фоизи газдан узилганнига йиллар бўлди.. Ҳар йили шу бўлар такрор.. Айтмоқчи: юзлаб мошиналар турнақатор турганида ёнғинми, ё балони портлаб кетса яна томошани катта бўлади..»
«2008 йилдан бери таппи ёқиб уй иситамиз. Ўйлаб қараса, раҳбарлардан моллар кўп фойда беряпти газ йўқ ерда яшайдиган халққа», - дейди бошқа шарҳловчи.
Газ қазиб олиш камайган
Ўзбекнефтгаз» компаниясининг бош геологи Нодир Муҳиддинов 27 октябрда ўтган матбуот анжуманида Ўзбекистондаги йирик газ конларининг захиралари 80 фоиздан ортиқ ишлатиб бўлингани, янги қудуқлардан олинаётган газ эса қазиб чиқаришдаги пасайишни қоплашга етмаётганини айтганди.
Ўзбекистонда газ ишлаб чиқаришнинг қисқариши сўнгги йилларда кузатилаётган умумий тенденциянинг давомидир. Миллий статистика қўмитаси маълумотларига кўра, мамлакатда барча корхоналар томонидан қазиб олинган газ ҳажми 2021 йилдаги 53,8 миллиард куб метрдан 2023 йилда 46,7 миллиардга, 2024 йилда эса 41,3 миллиард куб метрга тушган.
2025 йилда бироз ўсиш кузатилиб, умумий ҳажм 42,3 миллиард куб метрни ташкил этган.
Бироқ бу йилги натижалар яна пасайишдан дарак бермоқда. 2026 йилнинг январь-сентябрь ойларида Ўзбекистонда жами 27 миллиард куб метр табиий газ қазиб олинган. Бу ўтган йилнинг шу давридаги 32,3 миллиард куб метрга нисбатан 5,3 миллиард куб метр ёки 16,4 фоиз камдир.
