Қадоқланган палов, портфелли йигитлар ва лотинча рус тили. Тошкентга саёҳат - Фото репортаж

Ўзбек миллий чопони ва дўппи кийган эркак ошқовоқ, сомон, кузги япроқлар ва эркак қиёфасидаги қўғирчоқ билан безатилган дўкон олдидан ўтмоқда.
Сурат тагсўзи, Тошкентдаги сайёҳлар кўп келадиган айрим дўкон ва қаҳвахоналар куз фаслига мослаб безатилган.
    • Author, Санжар Эралиев
    • Role, bbc.com/uzbek
    • Reporting from, Бишкек
  • Published
  • Ўқилиш вақти: 4 дақ

Тошкентга сўнгги қарийб етти йил ичида илк бор борган BBC мухбири Ўзбекистон пойтахтида эътиборини тортган лаҳзаларни тасвирга олди.

Чорсу бозори ёнидаги ошхона эълони ва эшак миниб турган Хўжа Насриддин қиёфасидаги ўйинчоқ.
Сурат тагсўзи, Тошкентга бошқа келадиган меҳмонларнинг эътиборини тортадиган жойлардан бири — Чорсу бозори.
Бекатда қора костюм-шим ва портфель кўтарган иккита йигит турибди, уларнинг ёнида қора куртка ва кепкада ўрта ёшли эркак ўтирибди.
Сурат тагсўзи, Ёшларнинг, айниқса йигитларнинг кийиниш услубида классик либосларга қизиқиш сезилади. Бу Тошкент кўчаларидаги замонавий шаҳар қиёфасининг бир қисми сифатида эътиборни тортади.
Иккита аёл болалар аравачасини туртиб бораётир
Сурат тагсўзи, Тошкент кўчалари ва сайргоҳларида болалар аравачасида фарзандини сайр қилдириб юрган аёлларни тез-тез учратиш мумкин.
Қизил кепкали сураткаш атрофни суратга олмоқда, унинг ёнидан рўмолли аёллар ўтиб боряпти.
Сурат тагсўзи, Ислом цивилизацияси маркази атрофида сайёҳларни суратга олиб, фотосуратларни бир неча дақиқада чоп этиб берадиган ёки смартфонларга ўтказадиган сураткашларни учратиш мумкин. Бу ерда улар сайёҳларга таклиф қилаётган хизматларидан бири орқали даромад топишади.
Ислом цивилизацияси маркази атрофида айланиб юрган сайёҳлар.
Сурат тагсўзи, Ислом цивилизацияси маркази сайёҳлар энг кўп борадиган жойга айланган.
Эски от арава олдида рўмолли аёл телефонда гаплашиб кетмоқда.
Сурат тагсўзи, Ислом цивилизацияси маркази атрофига юз йиллир аввалги ўзбеклар ҳаётини акс эттирувчи экспонатлар қўйилган.
Мама варит кофе деб номланган қаҳвахона олдида миллий кийимлар илиниб турибди.
Сурат тагсўзи, Сафар давомида BBC мухбирининг эътиборини тортган жиҳатлардан бири — хизмат кўрсатиш соҳасида рус тилининг кенг қўлланиши бўлди. Айрим ресторан ва дўконларда ходимлар асосан рус тилида мурожаат қилишади. Баъзи жойларда русча номлар лотин алифбосида ёзилганини кўрасиз.
Қора костюм-шим ва портфел кўтарган иккита йигит Амир Темур ҳайкали томон кетмоқда. Атрофда яна ўнлаб одамлар, иккита аскар ҳам бор.
Сурат тагсўзи, Қора костюм-шим кийган, қўлида портфел тутган икки йигит Амир Темур ҳайкали томон бормоқда. Атрофда эса шаҳарнинг одатий гавжум ҳаёти, ўнлаб одамлар ва аскарлар.
Қадоқланган палов ва мошкичири.
Сурат тагсўзи, Тошкентга келган меҳмонлар миллий таомларни ресторанда татиб кўришга вақт топа олмаса, дўконлардан қадоқланган палов ёки мошкичири сотиб олишлари мумкин. Бундай маҳсулотларни ҳатто ўзлари билан бошқа мамлакатларга ҳам олиб кетишади.
Дўппи сотиладиган жойда сотувчи тамаки чекиб ўтирибди.
Сурат тагсўзи, Дўппи бозори
Радар деган огоҳлантириш ёзуви олдида оқ автомобил ўтиб кетяпти.
Сурат тагсўзи, Ўзбекистон пойтахти кўчаларида тезликни назорат қилувчи радарлар ҳақидаги огоҳлантирувчи белгилар кўп учрайди.
Музей экспонати сифатида намойишга қўйилган "Волга" автомобили.
Сурат тагсўзи, Мирзо Улуғбек тумани ҳокимлиги Ўзбекистон президенти Шавкат Мирзиёев туманга раҳбарлик қилган пайтда минган "Волга" автомобилини тарихий экспонатга айландирган.
Мопедда буюртма олиб кетаётган йигит.
Сурат тагсўзи, Тошкент кўчаларида етказиб бериш хизматида ишлайдиган мопед ҳайдовчиларини тез-тез учратиш мумкин.
"Узум тезкор" деган ёзувли кўк кийим кийган йигит мопед ҳайдаб тротуарда кетмоқда.
Сурат тагсўзи, Мопедлар турли фирмалар орасида етказиш хизмати учун кенг тарқалган транспорт воситаларидан бирига ўхшайди.
Метро бекати ёнида иккита аскар турибди.
Сурат тагсўзи, Метронинг деярли ҳар бир бекати ташқарисида ҳарбий хизматчиларни учратиш мумкин. Айниқса, Амир Темур хиёбони атрофида уларнинг сони кўпроқ экани кўзга ташланади.
Оқ ва қора машина ёнма-ён кетмоқда.
Йўл бўйида сотилаётган миллий нақшлар билан безатилган идишларнинг ўртасида турган эркак.
Сурат тагсўзи, Йўл бўйида сотилаётган миллий нақшлар билан безатилган идишларни нисбатан арзон нархларда харид қилиш мумкин.
Мустақиллик кўчасидаги 75 рақамли иморатлар. Дераза ойнасида Россия ва АҚШ байроғи акс этиб турибди.
Сурат тагсўзи, Мустақиллик кўчасидаги иморатларнинг бири.
Дўппи кийган йигит велосипедда кетмоқда.
Сурат тагсўзи, Тошкент кўчаларида миллий ўзбек кийимларини кийган маҳаллий аҳоли вакилларини кам учратасиз, лекин онда-сонда олдингиздан чиқади. Бундай кийимлар, айниқса, сайёҳлар орасида кенг тарқалган бўлиб, улар миллий либосларда суратга тушишни хуш кўришади.
Катакда ва катак устида бир нечта товуқлар.
Сурат тагсўзи, Кўчадаги товуқ бозори.
Китоб дўкони олдида миллий кийимда кетаётган эркак.
Сурат тагсўзи, Тошкентдаги китоб дўконлари олдида қаҳва таклиф этувчи эълонларни ҳам тез-тез учратиш мумкин.
Тошкентнинг турли ҳудудларига борувчи йўлларни кўрсатган ёзувлар.
Сурат тагсўзи, Қаерга бормоқчисиз? Тошкентнинг айрим кўчаларида шаҳарнинг турли манзилларига йўналишни кўрсатувчи белгилар ўрнатилган.