Thòisich an obair air Hub Leòdhais a bheir dealan às an eilean 'son a' chiad uair

Chaidh cuirm a chumail air Mòinteach Àranais air iomall Steòrnabhaigh Diaordaoin, a' comharrachadh toiseach na h-obrach air a' bhun-structar a bheir dealan à Leòdhas gu tìr-mòr Bhreatainn airson a' chiad uair.

Tha Hub Leòdhais a' toirt a-steach stèisean HVDC agus fo-stèisean AC a tha mar phàirt de phlanaichean SSEN Transmission 'son càball-dealain ùr fon mhuir eadar tìr-mòr agus an t-eilean.

Bhiodh an càball sin comasach air suas ri 1.8 GW de dhealan bho thuathan-gaoithe mòra a tha san amharc san sgìre a cheangal ris a' ghriod nàiseanta.

Tha corr air 40 companaidh ionadail - eadar obair togail, taigheadas agus còmhdhail - mar thà a' faighinn buannachd às a' phròiseact, agus thuirt SSEN gu bheil iad am beachd £125m a chosg leotha fhad 's a mhaireas an obair.

Tha dùil cuideachd gum bi cothroman preantasachd agus trèanaidh ann do chòrr air 70 duine.

Tha SSEN cuideachd a' maoineachadh an ath-leasachaidh air seann Taigh-òsta a' Chaley ann an Steòrnabhagh agus sgeamaichean taigheadais do luchd-obrach a' phròiseict a bhios ri fhaotainn do mhuinntir an eilein nuair a bhios on obair deiseil.

Bha riochdairean bho na gnìomhachasan ionadail am measg na thàinig cruinn còmhla airson toiseach prìomh obair a' phròiseict a chomharrachadh.

'S e a' chompanaidh RJ McLeod a fhuair an cùmhnant airson an talamh a dhèanamh deiseil airson am bun-structar a bhios ann.

Thuirt Sandy Mac an t-Sagairt, Stiùiriche Far-chladaich aig SSEN: "Tha ceangal dìreach eadar na h-Eileanan an Iar agus an griod nàiseanta air a bhith na amas dhuinn airson nan deicheadan de bhliadhnaichean.

"Tha sin a-nis a' tachairt gus brath a ghabhail air na dh'fhaodadh a bhith aig na h-eileanan de chumhachd ath-nuadhachail, agus airson an lìonra dealain a neartachadh airson nan ginealaichean ri teachd."