Ukraine's president, Zelensky say Russian shelling dey affect evacuation for Mariupol

Live Coverage

1. 1 March 2022Ukraine say Russian troops strike southern city of Kherson

   Ukraine officials say Russian troops don begin launch strike on Kherson.

   Kherson na one city wey dey for di south of di Eastern European kontri.

   BBC reporter wey dey on ground say dem hear powerful explosions near di Kherson airport dis morning.

   Earlier missile don hit di centre of Ukraine second-biggest city Kharkiv.

   Ukraine president don describe di bombardment of Kharkiv, wey don kill dozens of civilians, as a war crime.

   Nine pipo, including three children, na im dem kill on Monday afta suspected Russian cluster bombs bin target residential buildings inside Ukraine second city.

   Inside comments wey e make before di latest strike in central Kharkiv, Volodymyr Zelensky say dem get eyewitness accounts of civilians being deliberately targeted.

   "Russian forces brutally fire on Kharkiv from jet artillery."

   Di International Criminal Court's chief prosecutor, Karim Khan, don opened one investigation into Russia's invasion.

   Khan say he believe say e get "reasonable basis" to believe war crimes or crimes against humanity don dey committed in Ukraine.

2. 1 March 2022Missile hit centre of Ukraine second-biggest city Kharkiv

   Missile don hit di centre of Ukraine second-biggest city Kharkiv.

   Ukraine president don describe di bombardment of Kharkiv, wey don kill dozens of civilians, as a war crime.

   Nine pipo, including three children, na im dem kill on Monday afta suspected Russian cluster bombs bin target residential buildings inside Ukraine second city.

   Inside comments wey e make before di latest strike in central Kharkiv, Volodymyr Zelensky say dem get eyewitness accounts of civilians being deliberately targeted.

   "Russian forces brutally fire on Kharkiv from jet artillery."

   Zelensky tok during a late night address to the Ukrainian people.

   "Dis na clearly a war crime. Peaceful city. Peaceful residential areas. No military facilities. Dozens of eyewitness records prove say dis no be a single false volley.

   "But di deliberate destruction of pipo. Di Russians bin know wia dem bin dey shooting."

   Di International Criminal Court's chief prosecutor, Karim Khan, don open one investigation into Russia's invasion.

   Khan say he believe say e get "reasonable basis" to believe war crimes or crimes against humanity don dey committed in Ukraine.

3. 1 March 2022Buhari dey go London for medical check-up, Some Nigeria tori...

   Article Information

   • • Author, Olaronke Alo
     • Role, Broadcast Journalist, BBC Pidgin

   President Muhammadu Buhari dey go London for medical check up.

   Di 79 year old Nigerian leader medical examination go last for a maximum of two weeks, according to di president office.

   Buhari media assistant, Femi Adesina say di president go depart Abuja Tuesday, 1st March.

   Im go first travel to Kenya to participate for di Commemoration of di 50th Anniversary of di United Nations Environmental Programme.

   UNEP@50 dey happun between 3rd - 4th March, 2022.

   Pipo wey dey follow di president travel include ministers, security advisers plus some oda goment ogas.

   Dis no be di first time wey im dey travel for medical checkup for di UK.

   Di exact sickness or health challenge wey di Katsina born former army general dey always travel to UK to treat, no dey known publicly.

   Both di goment of Nigeria, di president office and Buhari family keep di mata private.

4. 1 March 2022See Fotos as Ghanaian students arrive from Ukraine

   Di first batch of Ghanaian students wey govment evacuate from di war in Ukraine don land Accra.

   Ghana goment dey evacuate dia citizen wey dey stranded for di east European kontri following di Russian invasion.

   Na 17 students out of 400 students wey don comot Ukraine en route border kontris arrive for Kotoka international airport on Tuesday morning.

   See fotos as Ghana student arrive motherland.

5. 1 March 2022'75% of Russia forces don dey inside Ukraine'

   Russia don move from having 40% of im forces inside Ukraine to around 75%, one military academic tok am.

   Dr Jack Watling na research fellow for land warfare and military sciences for di Royal United Services Institute.

   Im tell di BBC Radio 4 Today programme say one large body of Russian troops dey advance south from Belarus and don start to dey set conditions to be able to conduct assault into Kyiv.

   Wen dem ask am about di suggestion say Russia don use grad missiles on residential areas for Kharkiv, im describe dis weapons as multiple launch rocket systems wey fire large numbers of unguided missiles into one area.

   E tok say evidence no dey say some of dis fit don contain cluster munitions.

   "Na di fact say dem dey unguided and you dey put huge amounts of high explosive into densely populated civilian area," im tok.

   Di Ukrainian army no longer dey function for military formations, but now dem dey defend positions and e dey become more and more part of di territorial defence and di volunteer force wey e dey follow operate, im tok.

6. 1 March 2022Russia-Ukraine war - Ghanaian students dey arrive today

   Di first batch of 24 students dey expected to land for Ghana today at 7:30 am GMT.

   Over 400 students don comot Ukraine en route to Poland, Hungary, Romania, Slovakia, and Czech.

   We bin reports say dem suppose land on Monday, but e no happun.

   Dem dey expected to land di Kotoka international airport for Acrra.

   Minister of Foreign Affairs, Shirley Ayorkor Botchway say Ghana don already request di five European kontris wey dey share border wit Ukraine to help facilitate di easy passage of Ghanaian nationals.

7. 1 March 2022Una good morning

   We begin today live coverage of all di news wey dey haapun around di world.

   Ukraine-Russia war 2022 see further explosions inside Kyiv and oda cities.

   Troops provocations dey happun as invasion enta day six on Tuesday 1 March.

   Daniel Semeniworima and Olaronke Alo go start today live coverage wit you.

   You go read tori from our reporters dem from across Nigeria and West Africa plus BBC all ova di world.

8. 1 March 2022Nigeria begin evacuate citizens from Ukraine back to di kontri

9. 28 February 2022Time don reach make we close gate

   Dis na all wey we get for una for BBC Live Page today Monday, 28 February, 2022.

   Abeg Scroll down to see all di beta informate we bring come una domot today.

   We go return 7a.m onTuesday wit more tori on Russia and Ukraine war and oda informate around di world.

   Na Jelilat Olawale, Faith Oshoko, Kareemot Salami and Annette Arotiba bring una all di tori.

   Good night.

10. 28 February 2022Fifa and Uefa suspend Russia plus oda tins wey happun for day five of Ukraine-Russia invasion

11. 28 February 2022FG go begin Evacuation of Nigerians from Ukraine on Wednesday

    Di Nigeria House of Representatives say dem go give Nigeria Foreign Ministry all di support e need to evacuate Nigerians back from Ukraine on Wednesday.

    Di Speaker of di House, Rep. Femi Gbajabiamila, give di assurance as e meet wit di Nigerian Foreign minister, Geoffery Oyeama to yarn on di plight of of Nigerian wey dey in dey in di middle of di Russian/Ukraine gbas-gbos.

    Oga Gbajabiamila say di evacuation suppose start dis Monday but dem gatz shift am to Wednesday to allow di ministry, the House and di Nigerian foreign missions for Ukraine, Poland and Russia to complete di formalities to move Nigerians to safe borders wit neighbouring kontris.

    Gbajabiamila, draw ear give di minister say di way di kontri di respond to emergency no quick at all.

    E explain give say e dey good for di kontri to get response mechanism like earoplanes and oda equipment dem including funds and dat di legislature go do legislation to include dis kain emergencies in di future.

    Nigeria foreign minister fo im response say Nigeria get about 5,600 Nigerian students for Ukraine and dat di delay to evacuate dem no becos di goment no ready and dat up to 80 percent to 90 percent of kontris no believe say Russia go strike.

    E explain further say im bin dey in touch wit di ambassador and dem re assure am say notin go happun as need no dey for evacuation plus di Ukranian goment no want most of di students to leave since e go affect dem to go back.

    E say dem don put everitin togeda and from dia dem go put dem inside bus and transport dem to di various airport to di kontri.

    E say dem go use Poland, Romania, Slovakia, Hungary and even Russia as exit point dem go use to evacuate Nigerians.

    "Wia we dey now na to find out di exact number of Nigerians and agree on di location wey we go use to evacuate dem” Onyeama explain.

12. 28 February 2022Nigerian students protest sake of unending Varsity strike

    Afta two weeks wey di Academic Staf Union of Universities go on anoda one month strike, Nigerian students under di National Association of Nigerian students stage protest.

    Di students cari placards wit different different write-ups to show dia grievances.

    From Unity Fountain Abuja dem waka go National Assembly, den back to di Ministry of Education wia dem call for di removal of Minister of Education Adamu Adamu.

    President of di National Association of Nigerian Students Sunday Asefon, for di National Assembly gate tok say" I give di Senate President and Speaker of di Senate four days to settle di mata between ASUU and Federal goment, if not we go comeback hia and wen we come back, we no go go back again until una open our schools" e tok.

    For di Ministry of Education, Mr Sunday Asefon and di protesting students begin chant" Adamu Adamu must go".

    For one small meeting wey di Minister hold wit di NANS Executive tori be say di Minister waka comot from di meeting afta di Union President ask am say " you no dey bothered as we dey on strike" ASUU and goment don tay for dis strike mata we don pass one decade.

13. 28 February 2022Snake Island Ukrainian Guards dey alive

    Ukrainian soldiers wey tori comot say dem attack and kill for Zmiinyi (Snake) island still dey alive, according to statement wey Ukraine naval services post for Facebook.

    Di statement wey dem post on Monday say, "we dey alive say our brothers dey alive and well".

    Di sailors "bin rebuke di attack of Russian invaders twice" but bin no fit to continue to protect di island, according to di statement.

    Di navy tok say afta Russia armed forces bin destroy infrastructure, dem bin no fit reach di sailors as connection with di island bin dey completely cut off.

    On Friday, Ukraine bin dey plan to honour di 13 soldiers dem say die as dem dey defend di Islands from Russia.

14. 28 February 2022More than 250 Nigerians don comot Ukraine - Goment

    Nigerian Embassy don receive 130 Nigerians to Bucharest, Romania, 74 Nigerians for Budapest, Hungary and 52 Nigerians for Warsaw Poland for dia work to comot Ngerians from Ukraine.

    Dis na according to di Federal Ministry of Foreign Affairs.

    For statement wey dem bin release, Nigeria tok say dem dey expect 200 more citizens for di city of Budapest today, and dem dey also process 23 pipo enta Poland.

    Di statement say dem still dey finalise plans to carry all dis Nigerians enta back di kontri.

15. 28 February 2022Russia-Ukraine de-escalation toks don end

    Russian and Ukrainian representatives don conclude toks wey dem hold for Belarus wey dey aimed at bringing peace even as conflict still dey go on.

    Both sides go return to dia capital cities for consultation ahead of a second round of toks wey fit take place in di days, di Reuters news agency cites Belarus' Belta news for di informate.

    Expectations for a peaceful resolution no too dey high before Monday meeting.

    Ukraine say dem want ceasefire and Russian withdrawal, while di Kremlin say dem no go announce diaposition.

    Russia negotiators bin tok of striking one deal wey go dey in di interests of both sides.

16. 28 February 2022Black and Indian students allege discrimination as dem run from Ukraine

17. 28 February 2022UN dey hold very important meeting ontop Russia-Ukraine mata

    President of di UN General Assembly Abdulla Shahid don ask all kontris to demonstrate moral courage and give peace a chance as dem gada for di United Nations General Assembly 11th emergency special session to discuss di Russia – Ukraine crisis.

    Di presido remind di special session say all di 193 kontris for di world get say for di General Assembly unlike di Security Council wey get five permanent, veto-wielding members and 10 non-permanent members wey hold two-year terms.

    E also remind di 193 members of di UN say for 1946 di League of Nations bin scata because of dia failure to provide mechanism for di enforcement of international collective security.

    Shahid na di first speaker for dis ogbonge meeting, e say di UN dey founded to take effective collective measures to prevent and remove threats to peace.

    Di secretary general, Anthony Guterres plus more than 100 members of di UN go follow chook mouth for di mata over di next few days.

    Diplomats dey expect a vote on a draft resolution – wey still dey on negotiation as at Wednesday.

    Di UN Security Council call for dis session afta dem no gree dem act wen Russia ban one US draft resolution on Friday, wey kick against Russia invasion on Ukraine and demand di immediate withdrawal of all of dia sojas from di kontri.

    Di draft GA resolution dey expected to pass because no nation get veto for dis chamber, but e no dey legally binding like security council resolutions.

18. 28 February 2022‘For night eh, na just bomb, bomb, na wetin we dey hear’

    Dr Gladys Ibrahim, tok to BBC Pidgin from train station for Kyiv Ukraine wia she, her husband, young daughter and oda Nigerians bin dey try catch train to run comot Ukraine afta Russia invade di kontri.

    Di doctor wey come from Rivers state and bin don dey live for di kontri for years bin tink say dem go fit stay and bin don even call pipo to come take shelter and dey distribute free food to Nigerians before di conflict begin serious.

    DI UNHCR say di number of pipo wey dey run comot Ukraine now don reach 368,000.

19. 28 February 2022See vex sake of how dem treat Nigerians for Poland border

    As thousands dey japa from crisis, Nigeria goment don condemn reports say im citizens, and pipo from oda African countries, dey prevented to leave war-torn Ukraine.

    We don hear from Isaac, one Nigerian man wey dey live for Ukraine who bin dey try to enter Poland. say border staff bin tell am say dem no dey " attend to Africans".

    Reports also dey say Ukrainian security officials dey try stop Africans from how dem go catch bus and train wey dey go to di border.

    On Sunday Nigeria Foreign Minister Geofrey Onyeama bin say e don tok wit im Ukrainian counterpart Dmytro Kuleba and e don get assurance say im don give Ukrainian border guards order to allow all foreigners wey dey leave Ukraine to pass without restrictions.

20. 28 February 2022Lassa Fever kill 59 pipo for di first six weeks of 2022 for Nigeria

    Fifty nine pipo don die for Nigeria for di first six weeks of 2022 sake of Lassa fever , according to di kontri centre for disease control, NCDC.

    Di agency tok say di dead pipo bin comot from di 358 pipo wey catch di viral haemorrhagic fever for dis period.

    Lassa Fever kill 59 pipo for di first six weeks of 2022 for Nigeria