Ukraine's president, Zelensky say Russian shelling dey affect evacuation for Mariupol

Live Coverage

1. 28 February 2022Fifa dey 'advanced toks' over suspending Russia

   Fifa dey hold advanced toks over di full suspension of Russia until further notice, according to BBC Sport editor Dan Roan.

   Di global football governing body dey understood to be working closely wit im European counterpart Uefa and announcement dey expected later today.

   E go mean say Russia no go fit play for di women's Euro 2022 in England for di summer and Poland go get bye for di World Cup qualifier play-off next month - match wey Poland's FA don tok say dem go boycott.

   Iceland don also tok say e go refuse to play against Russia in June, and di International Olympic Committee don recommend dat athletes from Russia and Belarus be banned from competitions.

2. 28 February 2022Russia celebrate 30 years of diplomatic relations wit South Africa

   Russia don highlight dia "strong bonds" wit South Africa, as di two nations mark 30 years since di establishment of diplomatic ties.

   Di Soviet Union wey dey defunct now bin play central role to support South Africa governing African National Congress (ANC), during dia long fight against di legalised system of racism for di kontri.

   For inside tweet, Russia foreign ministry say: "Our interaction dey notable by di strong bonds of friendship & cooperation wey dey established during di struggle against apartheid, wey continue to develop today."

   Russia no make any reference to South Africa foreign affairs ministry wey issue one statement last week as dem call on Russian troops to immediately withdraw from Ukraine.

   South Africa na di only African state wey be part of Brics – one group of emerging economies wey also includes Brazil, Russia, India and China.

3. 28 February 2022Wetin be di latest for Russia-Ukraine crisis?

   If you just dey join us, or u dey try catch up on events, here be di latest developments for di fifth day of di Russian invasion of Ukraine:

   • Tok tok don begin for Belarus between negotiators for Kyiv and Moscow but expectations no dey high
   • EU defence ministers dey set to meet for discussions on top di gbege
   • Ukraine President Zelensky don call for Russian troops to put down dia weapons and for immediate EU membership
   • Pipo dey hear blasts for Kyiv and Kharkiv dis morning, as one residential building for di northern city of Chernihiv dey hit by missile
   • Russia double dia interest rate to 20% as dia currency drop and expert dey warn of possible run on banks
   • Russia central bank don more dan double dia key interest rate to 20% from 9.5%
   • Despite di financial hit di Kremlin say Russia go "ride out" economic punishment

   If you want more detail, you fit read how Ukraine remain on alert and di latest here.

4. 28 February 2022Ukraine-Russia war - Putin go push di nuclear button?

5. 28 February 2022Russia-Ukraine crisis: Women for Nigeria cari protest go Russian Embassy to call for peace, Di pipo wey comprise women, men and youths, say di protest na to call for peace for between Russia and Ukraine

   About Fifty pipo, mostly womengada for di Russian Embassy for Abuja, Nigeria capital for peaceful protest sake of di Russia -Ukraine katakata.

   Di pipo wey comprise women, men and youths, say di protest na to call for peace for between Russia and Ukraine.

   Dem say since di katakata start dem neva hear from hear from dia children, siblingsand friends.

   And di uncertainty weda dem still dey alive maim dey trouble dem.

6. 28 February 2022Ukraine ask Chelsea owner Abramovich to helep dem find peace

   Wit tok tok wey dey currently happun for Belarus between Russian and Ukrainian officials, we dey sabi now say Ukraine don approach Chelsea FC owner Roman Abramovich say make e helep support dia aim to reach one "peaceful settlement" to di conflict.

   Di Russian billionaire tok-tok pesin say Abramovich dey contacted by Ukrainian officials and "don dey try to helep ever since".

   Abramovich bin announce on Saturday say "stewardship and care" of Chelsea bin dey given to trustees of di club charitable foundation.

   Di 55-year-old be one of Russia richest pipo and di believe be say e dey close to Russian President Putin.

7. 28 February 20225,000 Nigerians workers protest for Abuja, see wetin dem want, Di workers unda di Nigeria Labour body do protest for Abuja, di nation's capital to clamour for changes for Nigeria constitution

   Over 5,000 members of di Nigeria Labour Congress (NLC) on Monday, March 28, cari waka from Labour House go di National Assembly complex for Abuja, di kontri capital.

   Dem tok say dis dia waka na to highlight some changes dem want for di review of di 1999 constitution wey di lawmakers dey currently do.

   Part of wetin dem wan be local goment, judiciary and legislative autonomy. Dem follow tok say want changes to tins wey dey affect Nigerian workers and citizens in general like welfare.

   As e be so lawmakers for di Senate and House of Representatives dey review di constitution of Nigeria wey di kontri dey use since 1999 afta di end of military rule.

   Some of di laws wey Nigeria dey use dey very old and di lawmakers dey review di constitution as dem wan make di news laws wey go dey in place, go fit help reflect di current issues of administration.

8. 28 February 2022ECOWAS condemn Russia-Ukraine invasion

   West African Regional Bloc ECOWAS don condemn Russia’s invasion of Ukraine wey don cause human casualties, especially civilians.

   Di regional body for one statement don beg both parties to ceasefire and use dialogue to resolve di ongoing crisis.

   ECOWAS don also call on di two kontris to ensure di safety of citizens of im 15 member states wey dey live for Ukraine.

9. 28 February 2022Some 422,000 pipo don japa Ukraine - UN

   United Nation refugee agency say dem dey get reports say dey pipo blocked from getting onto trains inside Ukraine.

   One spokeswoman bin tweet say di UNHCR dey look into dis report.

   And she say 422,000 pipo don japa Ukraine to neighbouring kontris

   Di UNHCR "considers pipo wey dy run comot di kontri as refugees", di spokeswoman add.

   More than 100,000 pipo dey now displaced within Ukraine, according to di UN body.

   Meanwhile Ukraine defence ministry dey claim say more than 5,000 Russian soldiers don dey killed in di first four days of fighting in Ukraine.

   Dis informate dey inside one statement dem post for Facebook.

   Ukrainian officials dey claim sau approximately 5,300 Russian troops have don dey killed.

   Dem also claim say 191 tanks, 29 fighter jets, 29 helicopters and 816 armoured personnel carriers have been destroyed by Ukraine's forces.

   Di BBC never fit independently verify dis claims, though di UK's Ministry of Defence believe say Russia don chop "heavy" number of deaths for di opening stages of di conflict.

10. 28 February 2022Ghana FM narrate how over 220 Ghanaians for Ukraine escape

11. 28 February 2022Russia don dey near di heart of di capital of Ukraine

    Hundreds of thousands of pipo don spend di last two days for darkness underground.

    Dem don lift di curfew and finally dem fit come out of dia shelter inside Ukraine capital.

    But half an hour later di air raid sirens sound and pipo rush back.

    Dis na di moments wey dem hope say dem fit run to get food, water, to breathe fresh air and to see how di city don change for di fighting.

    Dis continue to be a unstable, unpredictable and as President Zelensky don tok am, na absolutely crucial time.

    Dis morning we hear from military officials say Ukraine don repel many attacks by Russian troops to storm di outside of di capital.

    Air raid sirens happun just before first light, explosions also happun around di city throughout di night.

    So e be like say even on a day wen peace tok-tok set to begin between Russia and Ukraine, Russia neva abandon dia efforts to push even closer to di heart of dis capital.

    Di president of Belarus promise di president of Ukraine for one telephone call say im go make sure say of safety for di delegations to travel close to di border for peace tok.

    But right afta dat phone call missiles were fired from Belarus territory into Ukraine so e make a mockery of dat promise.

    President Zelenski say im dey sceptical but im wan show Ukrainians hsay im dey do everything possible to end di war wey don enta di fifth day.

12. 28 February 2022Court deny Abba Kyari bail, Some Nigerian tori

    Article Information

    • • Author, Dooshima Abu
      • Role, BBC Pidgin, Abuja

    Court on Monday deny bail for suspended deputy commissioner of police, Abba Kyari.

    Judge of Federal High Court Abuja rule say Kyari bail application don dey over-taken by event.

    Justice Inyang Ekwo sake of say de same court don grant NDLEA or to keep Kyari for 14 days.

    Ekwo say di order na from court of concurrent jurisdiction and dat Kyari lawyer bin no take in to consideration di 14 days order wey di same court don grant di NDLEA.

    DCP Abba Kyari na Nigerian super cop accused of drug trafficking recently. Accuse wey im dey challenge.

    Na National Drug Law Enforcement Agency [NDLEA] accuse Kyari afta dem release a secret film of di alleged crime.

    According to Criminal Offences (Amended) Act 2012 (Act 849) penalties for narcotic crimes don make di offence dey punishable by life imprisonment as maximum penalty.

    Similarly for Nigeria penalty for transnational trafficking offences dey between 15 years and life imprisonment.

    Meanwhile wen dem resume to hear di bail application, Kyari lawyer, Cynthia Ikena say Kyari health dey go bad by di day.

    Ikena add say wen she go visit am wit im doctor on Thursday, di NDLEA officials no let am in to visit am.

    She pray di court to grant am bail since di crime wey NDLEA sama on am no be capital offence.

    But responding to her argument, NDLEA lawyer, Sunday Joseph say on di alleged ill health of Kyari, e no go pure say e dey detention and di see im private doctor.

    Joseph further explain give say NDLEA get all di medical personnel to handle Abba Kyari health.

    E say di risk to grant Kyaribail dey grave as e fit interfere wit witnesses for im mata.

    And e also go wan do mago mago for di money laundering investigation wey dem still di investigate am on.

    Afta di judge listen to di two side of di argument e come give judgement say court deny Kyari bail.

    Di court adjourn di mata to March 14 to hear di suit on im fundamental human right.

13. 28 February 2022Quick recap of latest news on Ukraine-Russia war, Ukraine asks for ceasefire ahead of tok-tok wit Russia

    Now make we quickly recap di Ukraine-Russia war so far.

    Ukrainian authorities don announce say dia delegation don arrive Ukraine-Belarus border to start peace tok-tok wit di Russian delegation.

    Di main issue on dia agenda, dem say, na a ceasefire and withdrawal of troops from di Ukrainian territory.

    Earlier, report say dem bin dey postpone di peace tok-tok due to logistical and safety issues.

    By air, land, and sea, Russia don launch one deadly attack on Ukraine.

    Intense fight-fight continue all through di weekend, as Russian forces dey target cities for inside Ukraine.

    But dem fail to hold di city Kharkiv, for di northeast of di kontri, wey be Ukraine second largest.

    However, di assault from Russia dey continue from all from almost all directions.

    And tori be say Kremlin forces dey make better progress from di south, besieging di port cities of Kherson and Berdyansk, on two parts of di Black Sea.

    Ukrainian President Volodymyr Zelensky announce plans to meet one Russian delegation for di Ukrainian-Belarusian border afta tok-tok wit Belarus leader Alexander Lukashenko.

    Dem neva offer timeline and di situation still neva clear, as Belarus dey support Putin invasion.

    Belarus say dem don prepare venue to host tok-tok between Ukrainian and Russian delegations.

    Dis dey come as Moscow invasion of im western neighbour enta di fifth day.

    Ukraine don agree to send diplomats to one location near di Ukrainian-Belorussian border.

    Ukraine na one European democracy of 44 million pipo.

    Russian forces and dia forces dey for di outskirts of di capital, Kyiv.

    For months, President Vladimir Putin bin deny say e go enter im neighbour.

    But on Thursday 24 February, Putin tear up one peace deal, and send forces across borders for Ukraine north, east and south.

14. 28 February 2022Romania don receive about 200 Nigerians wey japa from Ukraine

    Di Nigerian ambassador to Romania don tell di BBC say so far about 200 Nigerians - many of dem students - don arrive for di capital Bucharest from Ukraine.

    Safiya Nuhu say ‘‘dem don receive dem” and shelter dem in hotels afta dem flee di Russian invasion of Ukraine.

    Di envoy say many more pipo dey come.

    She describe di challenges of taking care of di hundreds of refugees wey dey arrive at di Nigerian embassy as ‘‘unexpected’’ but say dem dey do doing dia best.

    Plenti of thousands of Nigerians dey live in Ukraine.

    Nigeria ministry of foreign affairs don advise Nigerians wey dey leave Ukraine to prioritize crossing through di Hungarian and Romanian borders.

    Dis dey follow challenges including report of discrimination for Ukraine-Poland border.

    A number of Africans don share dia experience for di border dey allege racism.

    Nigeria foreign affairs minister Geofrey Onyeama say im don tok wit im Ukrainian counterpart Dmytro Kuleba on di issue,

    And Kuleba don assure am say Ukrainian border guards don get di order to allow all foreigners leaving Ukraine to pass without restrictions.

15. 28 February 2022Ghana begin evacuation of dia students from Ukraine today

    Ghana begin evacuation of students wey don comot from Ukraine to neighbouring kontris dis week.

    Di first batch of 24 students dey expected to arrive in Ghana from today.

    Over 400 students don comot Ukraine en route to Poland, Hungary, Romania, Slovakia, and Czech.

    According to di Minister of Foreign Affairs, Shirley Ayorkor Botchway, Ghana don already request di five European kontris wey dey Ukraine border to help.

    Ghana want dem to facilitate di easy passage of Ghanaian nationals into dia kontris sake of di crisis for Ukraine.

    Di foreign minister say about 460 students don comot Ukraine en route to Poland, Hungary, Romania, Slovakia and Czech Republic.

    Meanwhile Ghana say dem dey stand with Ukraine afta Russian invasion. Di UN rep declare on Friday.

    Harold Agyeman, Ghana permanent representative to di UN Security Council say im kontri support dia sovereignty and territorial integrity.

    According to Agyeman, de development dey worry. "De developments which de happen first Ukraine dey worry."

    He talk say "Dis situation get implications not for just Ukraine den en immediate neighbors but all countries" .

16. 28 February 2022Air raid sirens don go off for multiple cities for Ukraine as invasion enta day five

    As di day five of di invasion start, air raid sirens don go off for multiple cities across di kontri.

    Di BBC James Waterhouse for Kyiv drop dis summary:

    Local news outlet Kyiv Independent also list more places:

17. 28 February 2022Russia Ukraine crisis – 'E dey very painful wen as a father you no fit help your own pikin'

18. 28 February 2022Why Russia dey attack Ukraine?

    For months now, Russia President Vladimir Putin bin dey deny plan to attack Ukraine.

    But on Thursday 24 February, 2022 e announce a "special military operation" for di kontri Donbas region.

    Di announcement on live television bin dey followed by reports of explosions for Ukraine capital Kyiv as well as oda parts of di kontri.

    Mr Putin latest actions dey come days afta e bone peace deal and order troops inside two eastern regions wey rebels dey hold, for im own words to "maintain peace".

    Russia don deploy at least 200,000 troops near Ukraine borders in recent months, and fears dey say di latest move mark di first step of a new invasion.

    Russia for a long time don stand against Ukraine move towards European institutions, both Nato and di EU.

    Now, Mr Putin dey claim say Ukraine na toy of di West and no ever be proper state anyway.

    E dey demand guarantees from di West and Ukraine say dem no go join Nato, one defensive alliance of 30 kontris, and say Ukraine go demilitarise and become a neutral state.

    As a former Soviet republic Ukraine get deep social and cultural ties with Russia, and dem dey speak well-well dia, but ever since Russia invade for 2014 those relations don get K-Leg.

    Russia attack Ukraine wen dem comot di pro-Russian president for early 2014. Di war for di east don claim more dan 14,000 lives since den.

    Wen Russia invade Ukraine for 2014, rebels wey get President Putin support seize big areas of di east and dem don dey dig am out wit Ukraine army ever since.

    One international Minsk peace accord happun but di gbege still continue and so Russia leader say e dey send in troops to di two areas wey di rebels dey hold.

    UN Secretary-General don reject Russia use of di word peacekeepers.

    Di West believe say Moscow dey plan new invasion of Ukraine, a kontri of 44 million pipo wit border wit both Russia and di European Union.

    President Putin don warn say Ukraine go dey responsible for further bloodshed if dem no stop di attack on di east.

19. 28 February 2022UN confam at least 64 civilian deaths, 160,000 pipo dey displaced

    Intense fighting happun ova di weekend across several major Ukrainian cities.

    Di Office of di United Nations High Commissioner for Human Rights (OCHCR) reports say dem don get at least 240 pipo wey di war kill alias casualties.

    Dis number include at least 64 civilian deaths - inside di kontri so far.

    E add say damage to homes and critical infrastructure don leave hundreds of pipo without access to water and electricity.

    UN also say over 160,000 Ukrainians dey now internally displaced and trying to japa across international borders.

    Ukraine gonment dey estimate say di Russian invasion fit leave behind as many as five million refugees.

20. 28 February 2022Belarus don prepare venue for peace tok between Russia and Ukraine delegate

    Belarus say dem don prepare venue to host tok-tok between Ukrainian and Russian delegations.

    Dis dey come as Moscow invasion of im western neighbour enta di fifth day.

    Ukraine don agree to send diplomats to one location near di Ukrainian-Belorussian border.

    E dey happun even as reports dey comot say di kontri dictator, Alexander Lukashenko, fit send troops to join di invasion.

    "Di venue for tok between Russia and Ukraine for Belarus don dey prepared, na di arrival of delegations we dey expect."

    Na so Belorussian foreign ministry tok am on social media, as dem release foto of one long table wit Russian and Ukrainian flags.

    Anatoly Glaz, one tok-tok pesin for di kontri foreign ministry, say:

    "Di tok go start as soon as all di delegations arrive for di meeting point."

    Ukraine don vow say dem no go give any ground for di meeting.

    President Volodymyr Zelensky, don say im no dey expect di tok to yield any results.

    "As always: I no really believe in di outcome of dis meeting, but let dem try," im tok.