முழு புத்தகத்தையும் ஏஐ உதவியுடன் எழுத முடியுமா? ஏஐயால் எழுதப்பட்டது என்பதை கண்டுபிடிப்பது எப்படி?

பெரியார் அறிவுலகத்தில் பல தமிழ் மற்றும் ஆங்கில நூல்களை ஏஐ தொழில்நுட்பத்தை பயன்படுத்தி தயாரித்து, அச்சடித்து விற்பனை செய்திருப்பதாக, எழுத்தாளர் பெருமாள் முருகன் மற்றும் ஆராய்ச்சி மாணவர்கள் குற்றம் சாட்டினர். அதனைத் தொடர்ந்து அரசும் ஆய்வு செய்து அத்தகைய தமிழ் மற்றும் ஆங்கில நூல்களை தொடர்ச்சியாக அகற்றிவருகிறது.

இந்நிலையில், ஏஐ தொழில்நுட்பத்தைக் கொண்டு ஒரு முழுப்புத்தகத்தை எழுத முடியுமா, பொதுவாக எழுத்தாளர்கள் அதை எந்தளவில் பயன்படுத்தலாம், ஏஐ தொழில்நுட்பத்தை மட்டுமே பயன்படுத்தி புத்தகம் எழுதப்பட்டிருந்தால் அதை எப்படிக் கண்டுபிடிப்பது என்பது குறித்து பலவிதமான கேள்விகள் எழுகின்றன.

அதற்கான பதிலை எழுத்தாளர்கள், பதிப்பகத்தார் மற்றும் தொழில்நுட்பம் அறிந்த ஆராய்ச்சி மாணவர்கள் ஆகியோரின் விளக்கங்களாக பதிவு செய்கிறது இந்த தொகுப்பு.

'பெரியார் அறிவுலகத்திலிருந்த பல புத்தகங்கள் ஏஐ தயாரிப்பு என்ற குற்றச்சாட்டின் பின்னணி'

முக்கியமாக, ''தொழில்நுட்பம் மேம்படாத செயற்கை நுண்ணறிவு மூலம் நூல்கள் உருவாக்கப்பட்டுள்ளன. நூலாசிரியர் பெயர்கள் எல்லாம் பொய்ப்பெயர்கள்'' என்று தன்னுடைய கட்டுரையொன்றில் எழுத்தாளர் பெருமாள் முருகன் குற்றம் சாட்டியிருந்தார்.

மேலும், செய்தியாளர் சந்திப்பில், ''அகல் விளக்கு, ஃபீனிக்ஸ் பதிப்பகங்களால் விநியோகிக்கப்பட்டுள்ள 1800 புத்தகங்கள் அனைத்தும் போலியான நூல்கள். இந்த புத்தகங்களில் உள்ள வார்த்தைகளின் தொடர் அமைப்பு தமிழ் அமைப்பு போலவே இல்லாமல், பெரும் பிழையுடன், பொய்யான தகவல்களுடன் உள்ளது. தொழில்நுட்பம் மேம்படாத ஏஐ மூலம் இவை உருவாக்கப்பட்டிருக்கும் என்பது என் அனுமானம்'' என்று கூறியிருந்தார்.

பெருமாள் முருகன் இந்தப் பதிவை நவம்பர் 6ஆம் தேதி வெளியிட்டிருந்தார். ஆனால், அறிவுலகம் திறக்கப்பட்ட மறுநாளே இதுகுறித்து கோவையைச் சேர்ந்த எழுத்தாளர் பாலசுப்ரமணியம் பொன்ராஜ், தன்னுடைய முகநூல் பதிவில் இதே சந்தேகத்தை எழுப்பியிருந்தார். அகல் விளக்கு, ஃபீனிக்ஸ் பதிப்பகங்களில் சில புத்தகங்களில் இருந்த தகவல்களை உதாரணமாகக் குறிப்பிட்டிருந்த அவர், ''இரண்டு பெரிய அலமாரிகள் முழுக்க 'அகல் விளக்கு' பதிப்பகத்தின் ஏதேதோ தலைப்புகளில் அடுக்கி வைக்கப்பட்டிருக்கும் ஏராளமான எழுத்தாளர்கள், பேராசிரியர்கள் எழுதிய நூல்கள், ஆய்வுக் கட்டுரைகளா, இல்லை பொது நூல்களா இல்லை ஏஐ உருவாக்கியதா என்று தெரியவில்லை'' என்றும் தன்னுடைய கருத்தைத் தெரிவித்திருந்தார்.

பெருமாள் முருகனின் குற்றச்சாட்டுக்குப் பின்பு, அந்த நூல்கள் அனைத்தும் திமுக ஆட்சிக்காலத்தில் கொள்முதல் செய்யப்பட்டது என்று தமிழ்நாடு அரசின் சார்பில் விளக்கம் அளிக்கப்பட்டது. அக்குற்றச்சாட்டை மறுத்த திமுக, இதுதொடர்பாக விசாரிக்குமாறு லஞ்ச ஒழிப்புத்துறையிடம் புகார் மனு அளித்தது. தற்போது இவ்விவகாரம் தொடர்பாக விசாரணை நடத்தப்பட்டு வருகிறது.

பிபிசியிடம் பேசிய தமிழ் இலக்கிய ஆராய்ச்சி (பி.ஹெச்.டி.) மாணவி சுபல்லா, ''அறிவுலகத்தில் இருந்த 'அகல் விளக்கு' பதிப்பகப் புத்தகங்களைப் படித்துப் பார்த்தேன். அதிலுள்ள 'நாலடியார்' என்ற புத்தகத்தில் முதல் வார்த்தையே 'நாலடியார் நான்கு வகைப்படும்' என்பதைப் பார்த்தபோது பேரதிர்ச்சியாகி விட்டது. அதிலுள்ள எல்லா புத்தகங்களுமே செயற்கை நுண்ணறிவு தொழில்நுட்பமே மேம்படாத காலத்தில் அவற்றால் உருவாக்கப்பட்ட புத்தகங்கள் என்பது தெள்ளத்தெளிவாகத் தெரிகிறது.'' என்றார்.

இந்த குற்றச்சாட்டுகளுக்குப் பின்பு, பெரியார் அறிவுலகத்தில் இருந்த அகல் விளக்கு மற்றும் ஃபீனிக்ஸ் பதிப்பக புத்தகங்கள் அனைத்தும் அகற்றப்பட்டன. தமிழ்நாட்டிலுள்ள சிறப்பு நூலகங்கள் மற்றும் பொது நூலகங்கள் அனைத்திலிருந்தும் 26 ஆயிரத்துக்கும் அதிகமான புத்தகங்கள் அகற்றப்பட்டதாக தமிழ்நாடு அரசால் தகவல் பகிரப்பட்டது.

இந்நிலையில், பெரியார் அறிவுலகத்தில் விண்டேஜ் பிரஸ் லிமிடெட் என்ற பதிப்பகத்தின் பெயரில் வைக்கப்பட்டிருந்த 257 ஆங்கில நூல்களும் போலியானவை என்று ஆராய்ச்சி மாணவர்கள் பிரேம் குமார் மற்றும் சதீஷ்குமார் ஆகியோர் சில ஆதாரங்களுடன் குற்றச்சாட்டுகளை பொதுவெளியில் முன் வைத்தனர். இதையடுத்து, 200க்கும் மேற்பட்ட புத்தகங்கள் வெள்ளிக்கிழமை அறிவுலகத்திலிருந்து அகற்றப்பட்டன.

அந்த ஆங்கில நூல்களின் சில பக்கங்களை ஸ்கேன் செய்து தகவல் திருட்டைக் கண்டறியும் பிரத்யேக மென்பொருளைப் பயன்படுத்தி, அந்த புத்தகங்களை ஆய்வு செய்தபோது, அவற்றின் உள்ளடக்கத்தில் ஆய்வுத் திருட்டு மற்றும் செயற்கை நுண்ணறிவு பயன்பாடு இருப்பதாக அவர்கள் குற்றம் சாட்டினர். எனினும், இதை பிபிசியால் சுயாதீனமாக உறுதிப்படுத்த முடியவில்லை.

இதுகுறித்து பிபிசியிடம் பேசிய ஆராய்ச்சி மாணவர் சதீஷ்குமார், ''எங்களைப் போன்ற மாணவர்கள், ஆராய்ச்சிக் கட்டுரை சமர்ப்பிக்கும்போது, பிறரின் ஆய்வுகளில் இருந்து சில மேற்கோள்களைப் பயன்படுத்தலாம். ஆனால், அப்படியே எடுத்து அதைப் பயன்படுத்துவது கருத்துத் திருட்டு என்றே கருதப்படும். இப்படி மற்றவர் கருத்தை எடுப்பதற்கு ஒரு வரன்முறை உண்டு. அந்த சதவிகிதம் 10க்குள் இருக்க வேண்டும். ஐந்து சதவிகிதத்துக்குள் இருந்தால் சிறப்பு. வெறும் 3 சதவிகிதம் என்றால் வெகுசிறப்பு.'' என்றார்.

''இப்போது ஆய்வுக் கட்டுரைகளையே ஏஐ கொண்டு கருத்துத் திருட்டை மதிப்பிடுகிறார்கள். அப்படியிருக்கும்போது, நாங்கள் மேற்கோள் காட்ட பயன்படுத்தும் புத்தகத்தின் உண்மைத்தன்மையை அறியவே பெரியார் அறிவுலக ஆங்கில நூல்களை ஆய்வு செய்தோம். பொதுவாக ஒரு எழுத்தாளர் உண்மையில் இருந்து அவர் ஏஐ தரவுகளைப் பயன்படுத்தி நூல் எழுதியிருந்தால் அது பதிப்பகத்தின் தவறில்லை. ஆனால், எழுத்தாளரே இல்லை எனும்போதுதான் அது முழுமையான ஏஐ புத்தகம் என்பதைக் கண்டறிய முடிந்தது.'' என்றார் சதீஷ்குமார்.

''இவற்றைக் கண்டுபிடிக்க இணையதளங்கள் இருந்தாலும் அவை நம்பகத்தன்மையாக இல்லை. ஆனால், இந்தியாவில் பெரும்பான்மையான பல்கலைக்கழகங்கள் ஏற்றுக்கொண்ட Drillbit, turniton ஆகிய கட்டண முறை அடிப்படையில் கருத்துத் திருட்டைக் கண்டறியும் மென்பொருள்களில் இந்த புத்தகப் பக்கங்களைப் பதிவேற்றம் செய்தபோதுதான் இந்த ஆங்கில நூல்களில் 70.7 சதவிகிதம் ஏஐ தயாரிப்பு என்பது தெரியவந்தது.'' என்றார் சதீஷ்குமார்.

அவர்கள் இதற்காகப் பயன்படுத்திய மென்பொருளில் இந்த புத்தகங்கள் தொடர்பாக கிடைக்கப் பெற்ற அறிக்கையையும் அவர்கள் பிபிசியிடம் பகிர்ந்தனர். அதில், இணையப் பக்கங்களில் உள்ள வார்த்தைகள் எத்தனை சதவிகிதம் அப்படியே அந்த புத்தகங்களில் இடம் பெற்றிருக்கின்றன, இவற்றில் எத்தனை சதவிகிதம் மனிதர்களால் எழுதப்பட்டது, ஏஐ தொழில்நுட்பத்தால் உருவாக்கப்பட்ட வார்த்தைகள் எவ்வளவு சதவிகிதம் என்பதைத் தனித்தனியாகப் பிரித்து வரைபடங்கள் சகிதமாக அறிக்கையாகத் தந்துள்ளது.

அகல் விளக்கு மற்றும் ஃபீனிக்ஸ் பதிப்பகங்களின் புத்தகங்கள் செயற்கை நுண்ணறிவு கொண்டு தயாரிக்கப்பட்டதாக பெருமாள் முருகன் நேரடியாகக் குற்றம் சாட்டியிருந்த நிலையில், அவை குறித்து தொழில்நுட்ப ரீதியான எந்த ஆய்வுகளும் மேற்கொள்ளப்படவில்லை. ஆனால், விண்டேஜ் பதிப்பகத்தின் ஆங்கில நூல்கள் செயற்கை நுண்ணறிவால் தயாரிக்கப்பட்டதாக, தொழில்நுட்ப ரீதியாகவும் ஆராய்ச்சி மாணவர்கள் விளக்கியிருந்தனர். அதனால், பெரியார் அறிவுலகத்திலிருந்த விண்டேஜ் பதிப்பகத்தின் 257 ஆங்கில நூல்கள் அகற்றப்பட்டன.

இந்த நிகழ்வுகளைத் தொடர்ந்து, எழுத்தாளரே இல்லாமல் செயற்கை நுண்ணறிவை (ஏஐ) கொண்டு ஒரு புத்தகத்தை முழுமையாக எழுத முடியுமா, ஒரு எழுத்தாளர் எழுதும் புத்தகத்தில் ஏஐ தரவுகளை எந்த அளவில் பயன்படுத்தலாம், ஏஐ உதவியுடன் இல்லாமல் எழுத்தாளரால்தான் ஒரு புத்தகம் எழுதப்பட்டுள்ளது என்பதை பதிப்பகங்கள் எப்படிக் கண்டறிய முடியும் என்பது போன்ற பல்வேறு கேள்விகளும் எழத்தொடங்கியுள்ளன.

முதன்முறையாக இந்த குற்றச்சாட்டை முன் வைத்த எழுத்தாளர் பெருமாள் முருகனிடம் பிபிசி தமிழ் பேசியது.

அதுபற்றி விரிவாகப் பேசிய பெருமாள் முருகன், ''ஆங்கிலத்தில் இருக்கும் அளவில் தமிழில் செயற்கை நுண்ணறிவு (ஏஐ) செயலிகள் இன்னும் மேம்படவில்லை என்று நினைக்கிறேன். ஆங்கிலத்தில் ஒரு தலைப்பை ஏஐயிடம் கொடுத்தால் அது உடனடியாகக் கண்டுபிடிக்க முடியாத அளவுக்கு ஒரு கட்டுரையைத் தயார் செய்து கொடுத்துவிடும். அதன்பின்பு, பிரத்யேக மென்பொருளை வைத்து அதில் ஏஐ உள்ளீடு எவ்வளவு இருக்கிறது என்பதைக் கண்டுபிடித்துவிட முடியும். ஆனால், தமிழில் அது தவறான தகவலையே தருகிறது.'' என்றார்.

''உதாரணமாக, பெரியார் அறிவுலகத்தில் இருந்த அகல் விளக்கு புத்தகத்தில் நாலடியார் ஒரு கவிஞர் என்று குறிப்பிடப்பட்டுள்ளது. அதற்குக் காரணம் பாரதியார், நாமக்கல்லார் என்று 'ஆர்' என்ற விகுதியில் முடிந்தால் அவர் ஒரு கவிஞர் என்று அதற்கு உள்ளீடு தரப்பட்டுள்ளது. அதை வைத்தே நாலடியாரை ஒரு கவிஞர் என்று ஏஐ முடிவு செய்து, அதையே புத்தகத்தில் கொடுத்துள்ளது. அதை அப்படியே அவர்கள் அச்சிட்டிருக்கிறார்கள். அதேபோன்று ஏஐ தயாரித்த புத்தகம் என்பதற்கு ஆதாரமாக 'மற்றும்' என்பதைக் குறிப்பிடலாம்.'' என்றார் அவர்.

''பொதுவாக ஆங்கில நூல்களில் 'அண்ட்' (and) என்ற வார்த்தை அடிக்கடி பயன்படுத்தப்படும் நிலையில், சரியாக மொழிபெயர்க்கத் தெரியாத ஒருவர் ஆங்கிலத்தை மொழிபெயர்த்தால் எப்படியிருக்குமோ 'அதேபோன்று', 'மற்றும்' என்ற வார்த்தையை அடிக்கடி புத்தகங்களில் குறிப்பிட்டிருந்தது. இதுபோன்ற குறிப்பிட்ட சில விஷயங்களை வைத்தே இந்த புத்தகங்கள் அனைத்தும் நிச்சயமாக ஒரு எழுத்தாளரால் எழுதப்பட்டிருக்க வாய்ப்பில்லை என்று நினைத்தே அந்த குற்றச்சாட்டை முன் வைத்தேன்.'' என்றார் எழுத்தாளர் பெருமாள் முருகன்.

ஒரு புத்தகத்தை பதிப்பிடும் முன் அதை பதிப்பகத்தார் எப்படி மதிப்பிடுகிறார்கள்?

எழுத்தாளர் ஒருவரால் அனுபவம் மற்றும் துறை சார்ந்த அறிவின் அடிப்படையிலும், ஆராய்ச்சி மாணவர்களால் தொழில்நுட்ப உதவியுடனும் ஒரு புத்தகம் செயற்கை நுண்ணறிவால் தயாரிக்கப்பட்டது என்பதைக் கண்டறியும் சூழலில் பதிப்பகங்கள் நடத்துவோர், இவற்றை எப்படிக் கண்டறிகின்றனர் என்பது முக்கியக் கேள்வியாக உள்ளது. பொதுவாக ஒருவர் எழுதும் புத்தகத்தை, பதிப்பகங்கள் எப்படிப் பிரசுரிக்கத் தேர்வு செய்கின்றன என்பதிலிருந்து இந்த கேள்வி முற்றிலும் மாறுபட்ட ஒன்றாகவும் பார்க்கப்படுகிறது.

பிபிசியிடம் இதுபற்றி விளக்கிய கோவை விஜயா பதிப்பகத்தின் நிர்வாகி சிதம்பரம், ''முக்கிய எழுத்தாளர்கள் சிலரின் நூல்களை ஆய்வுக்கு உட்படுத்த வேண்டிய தேவையிருக்காது. சிலர் புதிதாக புத்தகம் எழுத வருவார்கள். அவர்கள் தரும் உள்ளடக்கத்தை முதலில் நாங்கள் வாங்கிப் பார்ப்போம். அது மக்களுக்கு பயனுள்ளதாக இருக்குமா, விற்பனைக்கு உதவுமா, எழுத்துநடையும் தரவுகளும் நன்றாகவும், சரியாகவும் இருக்கிறதா என்பதை எங்கள் பதிப்பகத்திலுள்ள ஆசிரியர் குழு ஒன்று பரிசீலிக்கும்.'' என்றார்.

''அந்த குழுவில் இலக்கியம், வரலாறு, அறிவியல், மொழியியல், சமூகவியல் சார்ந்த வாசிப்பில் அனுபவம் உள்ள சிலர் இருக்கிறார்கள். நாங்களும் அந்த அச்சுப்படிகளை படித்துவிடுவோம். அதன்பின்பே அதை அச்சுக்கு தயார் செய்வோம். சில புத்தகங்களை குறிப்பிட்ட காலத்துக்குப் பின்பு மறுபதிப்பு செய்ய முடியாது. உதாரணமாக, புதுமை அறிவியல் என்ற ஒரு புத்தகம் நன்றாக விற்பனையானது. ஆனால் அறிவியல் தொழில்நுட்பம் மாறிக் கொண்டேயிருப்பதால் 2016க்குப் பின்பு மறுபதிப்பு செய்யவில்லை.'' என்றார் சிதம்பரம்.

தொடர்ந்து பேசிய அவர், ''இதுவரை ஏஐ தொழில்நுட்பத்தைக் கொண்டு எழுதப்பட்ட புத்தகங்கள் எதுவும் எங்களின் பார்வைக்கு வரவில்லை. அப்படியே இருந்தாலும் ஒரு புத்தகத்தின் உள்ளடக்கம் அதை எழுத்தாளர் எழுதியிருக்கிறாரா அல்லது செயற்கை நுண்ணறிவால் எழுதப்பட்டுள்ளதா என்பதை வாசிப்பில் அனுபவம் உள்ள ஒருவரால் முன் கூட்டியே கண்டறிந்துவிட முடியும்.'' என்றார்.

ஆனால் ஒரு புத்தகத்தை எழுத்தாளர் ஏஐ உதவியுடன் எழுதுவதில் தவறில்லை, முழுப்புத்தகமுமே ஏஐ தொழில்நுட்பத்தைக் கொண்டு தயாரிக்கப்படுவதுதான் தவறு என்று கூறுகிறார், சென்னை டிஸ்கவரி பதிப்பகத்தின் உரிமையாளர் வேடியப்பன். அப்படி எழுதப்பட்டிருந்தாலும் அதைக் கண்டறியவும் ஏஐ தொழில்நுட்பம்தான் தேவைப்படுகிறது என்கிறார் அவர்.

பிபிசியிடம் பேசிய வேடியப்பன், ''நானே நிறைய வாசிப்பவன்தான். ஒரு புத்தகத்தின் முதல் 4 பக்கங்களை அல்லது ஓர் அத்தியாயத்தைப் படித்தாலே அந்த புத்தகம் தகுதியானதா, தரமானதா என்பதைக் கண்டறிந்துவிடமுடியும். ஏஐ தொழில்நுட்பத்தை இப்போது எதிலுமே தவிர்க்க முடியாது என்பதால் அதை புத்தகம் எழுதவும் பயன்படுத்தலாம். அதில் தவறில்லை. ஆனால், ஏஐ தொழில்நுட்பத்தில் ஒரு புத்தகம் எழுதப்பட்டாலும் அதை எடிட் செய்வது ஒரு மனிதராக இருக்க வேண்டியது கட்டாயம்.'' என்றார்,

''ஒரு நாவலை ஏஐ கொண்டு எழுதினால் அது அப்பட்டமாகத் தெரிந்துவிடும். அது வாசிப்புக்குரிய ஒரு புத்தகமாக இருக்காது. ஆனால், ஒரு வழிகாட்டுதல் புத்தகம் எழுதும்போது, உதாரணமாக புகைப்படக்கலை குறித்து ஒரு புத்தகம் எழுதுவதற்கு ஏஐ தொழில்நுட்பத்தைப் பயன்படுத்தினால் அது அதிநவீன தொழில்நுட்பம் வரை தகவல் தெரிவித்துவிடும். அதை ஒரு வாசிப்புக்குரிய வடிவமாக மாற்றுவதற்கு ஒரு மனிதர் தேவை. ஏஐ என்பதும் மனிதரின் கண்டுபிடிப்புதான். அதிலுள்ள உள்ளீடும் நாம் கொடுத்ததே.'' என்றார் வேடியப்பன்.

ஏஐ தொழில்நுட்பத்தை எந்தளவுக்கு பயன்படுத்தி எழுதலாம்?

ஏஐ தொழில்நுட்பத்தைக் கொண்டு அல்லது அதன் உதவியுடன் புத்தகங்கள் எழுதப்படுவதில் எழுத்தாளர்களிடையே மாறுபட்ட கருத்துகள் இருக்கின்றன.

பிபிசியிடம் பேசிய எழுத்தாளர் பெருமாள் முருகன், ''என்னைப் பொருத்தவரை, ஏஐ தரவுகளை ஒரு புத்தகம் எழுதுவதற்குப் பயன்படுத்துவதில் தவறில்லை. ஆனால், அந்த தகவல் வேறு ஏதாவது சான்றுகளை வைத்து சரிபார்க்கப்பட்டு (cross check) அதற்குப் பின்பே பயன்படுத்தப்பட வேண்டும். தமிழில் அத்தகைய நிலை வர இன்னும் சில காலமாகலாம் என்பதே என்னுடைய கணிப்பு.'' என்றார்.

செயற்கை நுண்ணறிவு என்பது மற்ற துறைகளுக்கு சிறந்த தொழில்நுட்பம் என்றாலும், பதிப்புத்துறையில் இது சிந்தனைகளை முடக்கி அறிவாற்றலுக்கு வேலையில்லாமல் செய்து விடும் அபாயம் அதிகமிருப்பதாகச் சொல்கிறார், பொறியாளரும், எழுத்தாளருமான சி.ஆர்.இளங்கோவன். இவர் கோவை குறித்தும், சிறுவாணி, நொய்யல் நதிகள் குறித்தும் பல்வேறு நூல்களை தமிழ், ஆங்கிலத்தில் எழுதியுள்ளார்.

பிபிசியிடம் பேசிய சி.ஆர்.இளங்கோவன், ''புத்தகங்களில் புனைவு மற்றும் புனைவு அல்லாதவை என 2 வகை இருக்கிறது. இதில் புனைவுகளைப் படைப்பதற்கு கற்பனை, படைப்பாற்றல், தகவல் சேகரிப்பு, கள உழைப்பு என எல்லாமே தேவை. ஆனால், ஏஐ தொழில்நுட்பம் வந்தவுடன், குறிப்பிட்ட எழுத்தாளரின் பதிவுகளை அதனிடம் கொடுத்துவிட்டால், நாம் கேட்கும் ஒரு தலைப்பில், அவரைப் போலவே எழுதிக்கொடுத்து விடும். சிறுவாணி என்ற ஒரு நூலுக்கு நான் பட்ட கஷ்டங்களைச் சொல்வதற்கு எடுக்கும் நேரத்தில் அதே கஷ்டத்தை அனுபவித்ததுபோல ஒரு புத்தகத்தை ஏஐ கொடுத்துவிடும். ஆனால், அதில் உண்மையிருக்காது.'' என்றார்.

''உதாரணமாக போக்குவரத்து குறித்து ஒரு தரவு வேண்டுமெனில், அனைத்துத் தரவுகளையும் மிகக்குறைந்த நொடிகளில் தரும் பிரமிக்க வைக்கும் ஆற்றல் ஏஐயிடம் இருக்கிறது. ஆனால், அதைச்சரி பார்ப்பதற்கு உரிய கருவி இல்லை. ஒரு விசாரணைக்கு 'ஏஐ'-ஐ பயன்படுத்தலாம். இலக்கியத்தில் அதைப் பயன்படுத்துவது சரியாக வராது.'' என்றார் அவர்.

தொடர்ந்து பேசிய இளங்கோவன், ''படைப்பிலக்கியம் என்று வரும்போது, அதில் கற்பனையுடன் உண்மையும் இருக்க வேண்டும். ஆனால் ஏஐ தயாரித்தால் சிந்தனை, செயல்பாடு, அறிவாற்றலுக்கு வேலையே இல்லாமல் போய்விடும். கம்ப ராமாயணப்பாடல் வேறு; அதேபோன்ற பாடல் வேறு. அதை நான் தரவாக எடுத்துக்கொண்டால், பல ஆயிரம் ஆண்டுகளாக இருந்த இலக்கியம் சிதைந்துவிடும். ஆனால், ஒரு தேர்ந்த வாசகனால் அதைக் கண்டுபிடிக்க முடியும். சாதாரண வாசகரால் கண்டுபிடிக்க முடியாது என்பதே உண்மை.'' என்றார்.

- இது, பிபிசிக்காக கலெக்டிவ் நியூஸ்ரூம் வெளியீடு