89 ரன்னுக்கு ஆல்அவுட்டாகி படுதோல்வி: முதல் ஓவரிலேயே ஆட்டத்தை கோட்டைவிட்ட இந்தியா

நியூசிலாந்துக்கு எதிரான நான்காவது ஒருநாள் போட்டியில் இந்திய அணி 244 ரன்கள் வித்தியாசத்தில் படுதோல்வியடைந்தது.

ஆட்டம் நடைபெற்ற நியூசிலாந்தின் மவுண்ட் மவுங்கானுயில் வெயில் அதிகமிருந்ததால் டாஸ் வென்ற இந்திய அணியின் தற்காலிக கேப்டன் ஸ்ரேயஸ் ஐயர், பேட்டிங்கைத் தேர்வுசெய்தார். இந்திய அணி 2-0 என முன்னிலை வகித்த நிலையில், இளம் வீரர்களுக்கு அணியில் வாய்ப்பளிக்கப்பட்டது.

கில்லுக்குப் பதிலாக தொடக்க வீரராக ருதுராஜ் கெய்க்வாட்டும், குல்தீப் யாதவுக்குப் பதிலாக அன்ஷுல் கம்போஜும் அணியில் சேர்க்கப்பட்டனர். அனுபவ வீரர் கே.எல்.ராகுலுக்குப் பதிலாக விக்கெட் கீப்பர் பேட்டர் இஷான் கிஷான் இடம்பிடித்தார்.

கடந்த மூன்று போட்டிகளில் விளையாடாத முகமது சிராஜுக்கு இம்முறையும் வாய்ப்புக் கிடைக்கவில்லை. ஆகிப் நபி வீசிய இன்னிங்ஸின் இரண்டாவது ஓவரிலேயே இரண்டு கேட்ச் வாய்ப்புகளை இந்திய வீரர்கள் கோட்டை விட்டனர். அடுத்தடுத்த பந்துகளில் யங் கொடுத்த கேட்ச் வாய்ப்புகளை ரோஹித் சர்மாவும் இஷான் கிஷானும் தவறவிட்டனர்.

வில் யங் அபார சதம்

தொடக்க வீரர் டிம் சைஃபர்ட் 48 பந்துகளில் 58 ரன்கள் எடுத்து குர்னூர் பிராரின் பவுன்சர் பொறியில் வீழ்ந்தார். சைஃபர்ட் ஆட்டமிழந்ததும் அவரை நோக்கிச் சென்ற பிரார் ஆக்ரோஷமான வார்த்தைகளை உதிர்த்தார். அவரை சமாதானம் செய்த கோலி, நிலைமை மேலும் மோசமடைவதைத் தடுத்தார்.

நிக் கெல்லி 4 ரன்களில் அக்சர் படேல் பந்துவீச்சில் ஆட்டமிழக்க, அடுத்துவந்த ஃபாக்ஸ்கிராஃப்ட் 8 ரன்கள் மட்டுமே எடுத்து நபியிடம் விக்கெட்டை இழந்தார். அபாரமாக விளையாடிய தொடக்க வீரர் வில் யங், 88 ரன்களில் சதமடித்து அசத்தினார். 14 பவுண்டரிகள், 4 சிக்ஸர்களை விளாசிய அவர், 125 ரன்கள் எடுத்து நமன் தீர் பந்துவீச்சில் ஆட்டமிழந்தார்.

இன்னிங்ஸின் இறுதிக்கட்டத்தில் அடுத்தடுத்து விக்கெட்டுகள் விழுந்ததால், நியூசிலாந்து அணி 333 ரன்களுக்கு ஆட்டமிழந்தது. கடைசி 12 ஓவர்களில் அந்த அணியால் 77 ரன்களை மட்டுமே எடுக்க முடிந்தது. இந்திய அணி தரப்பில் நபி, பிரார். அக்சர் ஆகியோர் தலா 2 விக்கெட்டுகள் வீழ்த்தினர்.

334 ரன்கள் எடுத்தால் வெற்றி என்ற இலக்குடன் களமிறங்கிய இந்திய அணிக்கு முதல் ஓவரிலேயே அதிர்ச்சி காத்திருந்தது. காயம் காரணமாக ஓய்வில் இருந்த நியூசிலாந்து வேகப்பந்துவீச்சாளர் ஹென்றி, மீண்டும் களமிறங்கிய முதல் போட்டியிலேயே தனது திறமையை நிரூபித்தார்.

முதல் ஓவரிலேயே நடையைக் கட்டிய ரோ-கோ!

ரோஹித் சர்மா, விராட் கோலி, ஸ்ரேயஸ் ஐயர் ஆகிய மூவரையும் ரன் ஏதுமின்றி ஆட்டமிழக்கச் செய்தார் ஹென்றி. அவருடைய தனித்துவமான வாபிள் சீம் பந்துகளை கணிக்க முடியாமல் இந்தியாவின் நட்சத்திர பேட்டர்கள் மூவரும் அடுத்தடுத்து ஆட்டமிழந்து நடையைக் கட்டினர்.

ரோஹித்தை வெளியே செல்லும் பந்தின் மூலம் வீழ்த்திய ஹென்றி, கோலி, ஸ்ரேயஸ் ஆகியோரை உள்ளே திரும்பிய பந்துகளின் மூலம் ஆட்டமிழக்கச் செய்தார். பந்தை இரு திசைகளிலும் அநாயசமாக ஸ்விங், சீம் செய்த அவர் சரியான லைன் மற்றும் லென்த்திலும் வீசி இந்திய பேட்டர்களை திணறடித்தார்.

ஒருநாள் கிரிக்கெட்டில் முதல் ஓவரில் நிகழ்த்தப்பட்ட மிகச்சிறந்த பந்துவீச்சுகளில் ஒன்றாக இது அமைந்தது. பெரிதும் எதிர்பார்க்கப்பட்ட ருதுராஜ் கெய்க்வாட் ஜேமிசன் பந்துவீச்சில் 5 ரன்களில் ஆட்டமிழந்து ஏமாற்றமளித்தார்.

இரண்டாவது ஸ்பெல்லிலும் ஹென்றி, தனது சிறப்பான பந்துவீச்சைத் தொடர்ந்தார். ஒருமுனையில் நிதானமாக விளையாடி வந்த இஷான் கிஷானை பேக் ஆஃப் த லென்த் பந்தை வீசி அவர் போல்டாக்கினார். இஷான் ஆட்டமிழந்ததும் இந்தியாவின் கடைசி நம்பிக்கையும் சிதறிப்போனது.

அடுத்ததாக, ரவுண்ட் த விக்கெட்டில் சென்று நல்ல லென்த்தில் அவர் வீசிய பந்து குல்தீப் யாதவின் ஸ்டம்புகளைப் பதம்பார்த்தது. இதன் மூலம் ஒருநாள் போட்டிகளில் நான்காவது முறையாக ஐந்து விக்கெட் கைப்பற்றினார்.

ஆட்டம் கையைவிட்டு போன நிலையில், கிடைத்த வரை லாபம் என்று நமன் தீர் அதிரடி ஆட்டத்தை கையிலெடுத்தார். ஃபிஷர் ஓவரில் இரண்டு சிக்ஸர்களை விளாசிய அவர், அதே ஓவரில் சாண்ட்னரிடம் கேட்ச் கொடுத்து நடையைக் கட்டினார். பிராரை தனது ஆறாவது விக்கெட்டாக ஹென்றி கைப்பற்ற இந்திய அணி 89 ரன்களுக்கு ஆல் அவுட்டானது. இதனால், இந்திய அணி 244 ரன் வித்தியாசத்தில் இந்திய அணி படுதோல்வியை சந்தித்தது.

ஒருநாள் கிரிக்கெட்டில் ரன் வித்தியாசம் அடிப்படையில் இந்தியாவின் இரண்டாவது மோசமான தோல்வியாக இது அமைந்தது. முன்னதாக 2000ஆம் ஆண்டு இலங்கைக்கு எதிராக 245 ரன் வித்தியாசத்தில் இந்திய அணி தோற்றிருந்தது.

முதல் ஓவரில் இந்திய அணியின் மூன்று விக்கெட்டுகளை கைப்பற்றியது ஆட்டத்தின் போக்கை மாற்ற உதவியதாக நியூசிலாந்து கேப்டன் சாண்ட்னர் தெரிவித்தார்.

"விக்கெட்டுகளை தாரைவார்க்க வேண்டும் என்று இந்திய பேட்டர்கள் விளையாடவில்லை. ஏன் இப்படி நடந்தது என்பது குறித்து விவாதித்து, அடுத்த போட்டிக்கு புத்துணர்ச்சியுடன் களமிறங்குவோம்" என்று இந்திய கேப்டன் ஸ்ரேயஸ் ஐயர் கூறினார்.

காற்று சாதகமாக வீசியதால் ஸ்விங் பற்றிக் கவலைப்படாமல், ஸ்டம்புகளை நோக்கி மட்டும் வீசினேன் என்று ஆட்ட நாயகன் விருதை வென்ற ஹென்றி தெரிவித்தார்.

- இது, பிபிசிக்காக கலெக்டிவ் நியூஸ்ரூம் வெளியீடு