வாய்க்குள் வெடித்த 'ரசகுல்லா': கணவரை பறிகொடுத்து தவிக்கும் மனைவி

(இந்தக் கட்டுரையின் சில பகுதிகள் மனதிற்கு சங்கடத்தை ஏற்படுத்தலாம்.)

மத்தியப் பிரதேச மாநிலம் திண்டோரி மாவட்டத்தைச் சேர்ந்த 35 வயதான ராஜேந்திர பரௌதியாவுக்கு அவரது நண்பர் ரசகுல்லா கொடுத்துள்ளார். அவர் அதை வாங்கி ஆசையுடன் உண்ணத் தொடங்கியதும் திடீரென பயங்கரமான வெடிப்புச் சத்தம் கேட்டது.

ராஜேந்திர பரௌதியா வாயில் போட்டு உண்ன முயன்ற ரசகுல்லா தான் அவருடைய வாயிலேயே வெடித்தது. இதில் படுகாயமடைந்த ராஜேந்திரா, மருத்துவமனையில் சிகிச்சை பெற்று வந்த நிலையில் பின்னர் உயிரிழந்தார்.

காவல்துறை தகவலின்படி, ராஜேந்திராவின் அண்டை வீட்டாரும் நண்பருமான ரம்பகத் சிங் பரௌதியா என்பவர், காட்டுப் பன்றிகளை வேட்டையாடப் பயன்படுத்தப்படும் வெடிபொருள் ஒன்றை ரசகுல்லாவில் மறைத்து வைத்து அவரிடம் கொடுத்துள்ளார்.

நவம்பர் 10-ஆம் தேதி மாலை, திண்டோரி கொத்வாலி காவல் நிலைய எல்லைக்கு உட்பட்ட படாரியா சாந்தா கிராமத்தில் இந்தச் சம்பவம் நடந்துள்ளது.

இந்த விவகாரம் தொடர்பாக காவல்துறையினர் இருவரை கைது செய்துள்ளனர். வெடிபொருள் மறைத்து வைக்கப்பட்டிருந்த ரசகுல்லாவை ராஜேந்திராவிடம் கொடுத்த ரம்பகத் மற்றும் அந்த வெடிபொருளைக் காட்டில் இருந்து கண்டெடுத்தவர் ஆகிய இருவரும் கைது செய்யப்பட்டனர்.

இதுகுறித்து திண்டோரி கொத்வாலி காவல் நிலையப் பொறுப்பு அதிகாரி துர்கா பிரசாத் நாக்புரே, பிபிசியிடம் கூறுகையில், "குற்றம் சாட்டப்பட்ட இருவரும் கைது செய்யப்பட்டுள்ளனர். இந்தச் சம்பவம் தொடர்பான விசாரணை தொடர்ந்து நடைபெற்று வருகிறது" என்றார்.

முழு விவரம் என்ன?

இந்த சம்பவம் தொடர்பாக பேசிய ராஜேந்திராவின் மனைவி சுசீலா பாய், "தீபாவளிப் பண்டிகையை முன்னிட்டு, தனது கணவரிடம் ரம்பகத் சிங் ரசகுல்லாவைக் கொடுத்துச் சாப்பிடுமாறு கூறினார். ராஜேந்திரா அதை வாயில் வைத்து கடித்த அடுத்த நொடியே அது பயங்கரமாக வெடித்தது." என்றார்.

சம்பவம் நடந்த அன்று மாலை, ராஜேந்திர பரௌதியா தனது குடும்பத்தினருடன் வீட்டின் முற்றத்தில் அமர்ந்து குளிர் காய்ந்து கொண்டிருந்தார் என்று காவல் நிலையப் பொறுப்பு அதிகாரி துர்கா பிரசாத் நாக்புரே தெரிவித்தார். அப்போது ராஜேந்திராவின் மனைவி, குழந்தை மற்றும் பாட்டியும் உடனிருந்தனர்.

அந்த நேரத்தில் அவர்களது அண்டை வீட்டாரான ரம்பகத் சிங் அங்கு வந்து அமர்ந்து பேசிக் கொண்டிருந்தார். அப்போது அவர்களுக்குள் இயல்பான, கலகலப்பான உரையாடல் நடைபெற்றதாகக் காவல்துறையினர் தெரிவித்தனர்.

அப்போது ரம்பகத், பந்து போன்ற சிறிய பொருள் ஒன்றை ராஜேந்திராவிடம் கொடுத்து, அது ரசகுல்லா என்றும், அதைச் சாப்பிடுமாறும் தெரிவித்ததாக நாக்புரே கூறினார்.

இதுகுறித்து பிபிசி நியூஸ் ஹிந்தியிடம் பேசிய ராஜேந்திராவின் மனைவி சுசீலா பாய், "என்ன நடக்கிறது என்றே எனக்குப் புரியவில்லை. என் கணவரின் தாடை சிதைந்துவிட்டது. ஒரே நொடியில் அவரது முகம் அடையாளம் காண முடியாத அளவுக்கு மாறிவிட்டது" எனக் கூறினார்.

காயமடைந்த ராஜேந்திராவை குடும்பத்தினர் ஆட்டோ ரிக்‌ஷாவில் ஏற்றி திண்டோரி மாவட்ட மருத்துவமனைக்குக் கொண்டு சென்றனர். அங்கு சிகிச்சை பலனின்றி அவர் உயிரிழந்தார். மறுநாள் உடற்கூறாய்வு செய்யப்பட்ட பிறகு, அவரது உடல் குடும்பத்தினரிடம் ஒப்படைக்கப்பட்டது.

சுசீலா பாயின் கூற்றுப்படி, அவரது கணவர் வாயில் வைத்துக் கடித்தது ஒரு வெடிகுண்டு. இது பொதுவாக விலங்குகளைக் கொல்வதற்குப் பயன்படுத்தப்படும் வகையைச் சேர்ந்தது.

ராஜேந்திராவின் மறைவுக்குப் பிறகு, அவரது மனைவி சுசீலாவும் குழந்தையும் ஆதரவற்ற நிலையில் உள்ளனர்.

'ரசகுல்லா' என்று கூறிக் கொடுக்கப்பட்ட வெடிபொருள் எங்கிருந்து வந்தது?

காவல்துறை தகவலின்படி, இந்த வழக்கில் கைது செய்யப்பட்டுள்ள இரண்டாவது நபர், காட்டில் அந்த வெடிபொருளைக் கண்டெடுத்துள்ளார்.

அவர் அதைக் கண்டெடுத்து ரம்பகத் சிங்கிடம் கொடுத்துள்ளார். பின்னர், ரம்பகத் அதை ரசகுல்லா என்று கூறி ராஜேந்திராவிடம் கொடுத்துள்ளார். அந்த வெடிபொருள் எங்கிருந்து வந்தது, காட்டில் அதை வைத்தது யார் என்பது குறித்து காவல்துறையினர் தொடர்ந்து விசாரித்து வருகின்றனர்.

முதற்கட்ட விசாரணையில், கைது செய்யப்பட்ட இருவருக்கும் ராஜேந்திராவுக்கும் இடையே முன்விரோதம் இருந்ததற்கான எந்த அறிகுறியும் கிடைக்கவில்லை.

இந்த வெடிகுண்டு எந்த அளவுக்கு ஆபத்தானது?

மத்திய இந்தியாவின் பல கிராமப்புறப் பகுதிகளில், காட்டுப் பன்றிகளைக் கொல்வதற்காக 'பன்றி வெடிகுண்டுகள்' எனப்படும் வெடிபொருட்கள் பயன்படுத்தப்படுகின்றன.

இவை கையால் தயாரிக்கப்படும் வெடிபொருட்கள் ஆகும். உணவுப் பொருட்களுக்குள் இவை மறைத்து வைக்கப்பட்டு, காட்டுப் பகுதிகளில் போடப்படுகின்றன. காட்டுப் பன்றிகளோ அல்லது பிற சிறிய விலங்குகளோ அவற்றைக் கடிக்கும்போது, அவை அவற்றின் வாயிலேயே வெடித்து அந்த விலங்குகளின் உயிரிழப்புக்குக் காரணமாகின்றன.

இந்தூரைச் சேர்ந்த வெடிபொருள் நிபுணர் சரத் சர்வாதே, பிபிசியிடம் பேசுகையில், இத்தகைய வெடிபொருட்களின் செயல்பாடு அவற்றில் பயன்படுத்தப்படும் வேதிப்பொருட்களைப் பொறுத்து அமையும் என்று விளக்கினார். அழுத்தம் கொடுக்கப்படும் போது வெடிக்கும் வகையில் அவை தயாரிக்கப்படுகின்றன.

"அம்மோனியம் நைட்ரேட் அல்லது நைட்ரேட் அடிப்படையிலான ஜெல் போன்ற சில வெடிப்புக் கலவைகள் நசுக்கப்படும் போது, மிக விரைவாக வாயுவை உருவாக்குகின்றன. இதனால் அழுத்தம் அதிகரித்து வெடிப்பு ஏற்படுகிறது" என்று அவர் கூறினார்.

இத்தகைய வெடிப்புக் கலவைகள் பெரும்பாலும் ஜெல் அல்லது பற்பசை போன்ற நிலையில் இருக்கும். அவற்றின் அளவு, தீபாவளியின் போது வெடிக்கப்படும் 'அணுகுண்டு பட்டாசை' ஒத்ததாக இருக்கும் என்றும் அவர் குறிப்பிட்டார்.

மேலும் அவர் கூறுகையில், "குறைந்த தீவிரம் கொண்ட வெடிப்பு தேவைப்படும் இடங்களில் இவை பயன்படுத்தப்படுகின்றன. காட்டுப் பன்றிகள் போன்ற விலங்குகளைக் குறிவைக்கும்போது, அவற்றின் உடலின் மற்ற பகுதிகள் சிதையாமல் இருக்க, சிறிய அளவிலான வெடிப்பு ஏற்படும் வகையில் இவை பயன்படுத்தப்படுகின்றன. இத்தகைய வெடிபொருளைக் கடிக்கும்போதோ அல்லது அழுத்தம் கொடுக்கப்படும் போதோ அது வெடித்து, வாய்ப்பகுதியில் கடுமையான காயங்களை ஏற்படுத்துகிறது" என்றார்.

இதற்கிடையில், சம்பவம் நடந்த இடத்திலிருந்து வெடிபொருளின் எஞ்சிய பாகங்கள் உள்ளிட்ட மாதிரிகளைத் திண்டோரி காவல்துறையினர் சேகரித்துள்ளனர். அவை தடயவியல் ஆய்வகத்துக்கு அனுப்பப்படவுள்ளதாக காவல் நிலையப் பொறுப்பு அதிகாரி துர்கா பிரசாத் நாக்புரே தெரிவித்தார்.

மேலும் அவர் கூறுகையில், "இதுவரை நடத்தப்பட்ட விசாரணையில், கைது செய்யப்பட்ட நபர்களுக்கும் உயிரிழந்தவருக்கும் இடையே முன்விரோதம் அல்லது தகராறு இருந்ததற்கான எந்த ஆதாரமும் கிடைக்கவில்லை. வெடிபொருளில் பயன்படுத்தப்பட்ட பொருட்கள் மேலதிக ஆய்வுக்காக அனுப்பப்பட உள்ளன" என்றார்.

- இது, பிபிசிக்காக கலெக்டிவ் நியூஸ்ரூம் வெளியீடு