ஆந்திராவில் பள்ளி வகுப்பறைக்குள் நுழைந்து மாணவி மீது ரம்பத்தால் தாக்குதல் - என்ன நடந்தது?

எச்சரிக்கை: இந்தக் கட்டுரையில் உள்ள விவரங்கள் சங்கடத்தை ஏற்படுத்தலாம்

ஆந்திரப் பிரதேசத்தின் அனந்தபூர் மாவட்டம், ராப்தாடு பகுதியில் உள்ள அரசு பள்ளியில் பத்தாம் வகுப்பு படிக்கும் மாணவி மீது மின்சார ரம்பத்தால் நடத்தப்பட்ட தாக்குதல் அதிர்ச்சியை ஏற்படுத்தியுள்ளது. இந்தச் சம்பவத்தில் தொடர்புடைய நபரை தேடி வருவதாக அனந்தபூர் காவல் கண்காணிப்பாளர் ஜகதீஷ் பிபிசியிடம் தெரிவித்தார்.

இந்தச் சம்பவம் குறித்து ஆந்திரப் பிரதேச முதலமைச்சர் சந்திரபாபு நாயுடு தனது அதிர்ச்சியை வெளிப்படுத்தியுள்ளார்.

வகுப்புகள் நடைபெற்றுக் கொண்டிருந்தபோது, வகுப்பறைக்குள் நுழைந்த ஒருவர் மாணவியைத் தாக்கியுள்ளார். அவரைக் காப்பாற்ற முயன்ற சக மாணவி ஒருவரும் காயமடைந்தார்.

ரம்பத்தால் நடத்தப்பட்ட தாக்குதலில் காயமடைந்த மாணவி சிகிச்சை பெற்று வந்த அரசு பொது மருத்துவமனைக்குச் சென்று அனந்தபூர் மாவட்ட ஆட்சியர் ஓ. ஆனந்த் அவரைப் பார்வையிட்டார்.

மேல்சிகிச்சைக்காக, சிறப்பு மருத்துவர்களின் கண்காணிப்பில் அந்த மாணவி ஆம்புலன்ஸ் மூலம் அரசு பொது மருத்துவமனையிலிருந்து பெங்களூருவுக்கு அழைத்துச் செல்லப்படுவதாக மருத்துவமனைக் கண்காணிப்பாளர் டாக்டர் மல்லேஸ்வரி பிபிசியிடம் தெரிவித்தார்.

'மின்சார ரம்பத்துடன் வகுப்பறைக்குள் நுழைந்த நபர்'

இந்தச் சம்பவம் குறித்த தகவல் கிடைத்ததும், ராப்தாடு காவல்துறையினர் உடனடியாகப் பள்ளிக்குச் சென்று விவரங்களைச் சேகரித்தனர். கொலை முயற்சி வழக்குப் பதிவு செய்து விசாரணையைத் தொடங்கினர்.

காலை சுமார் 10.30 மணியளவில், பத்தாம் வகுப்பு மாணவிகள் படித்துக் கொண்டிருந்த வகுப்பறைக்குள் மரங்களை வெட்டப் பயன்படுத்தப்படும் மின்சார ரம்பத்துடன் ஒருவர் நுழைந்து மாணவியைத் தாக்கியதாகக் காவல்துறையினர் தெரிவித்தனர்.

இந்தத் தாக்குதலில் மாணவியின் முகம், கழுத்து, வயிறு உள்ளிட்ட பல இடங்களில் பலத்த காயங்கள் ஏற்பட்டதாகவும், அவரது வலது கையும் கடுமையாகப் பாதிக்கப்பட்டதாகவும் காவல்துறையினர் தெரிவித்தனர். மாணவியைக் காப்பாற்ற முயன்ற மற்றொரு மாணவியும் காயமடைந்தார்.

பலத்த காயமடைந்த இரு மாணவிகளும் அனந்தபூர் அரசு மருத்துவமனைக்குக் கொண்டு செல்லப்பட்டனர். ஆபத்தான நிலையில் இருந்த முதன்மையாக பாதிக்கப்பட்ட மாணவிக்கு அவசர சிகிச்சைப் பிரிவில் சிகிச்சை அளிக்கப்பட்டது. பின்னர், மேல்சிகிச்சைக்காக அவர் பெங்களூருவில் உள்ள மருத்துவமனைக்கு மாற்றப்படுகிறார்.

பெங்களூருவில் உள்ள மணிப்பால் மருத்துவமனை மருத்துவர்களிடம், மாணவிக்கு சிறந்த சிகிச்சை அளிக்குமாறு அமைச்சர் நாரா லோகேஷ் கேட்டுக்கொண்டார்.

மாணவியை விரைவாகக் கொண்டு செல்வதற்காகப் போக்குவரத்தில் 'கிரீன் சேனல்' வசதியை ஏற்படுத்தித் தருமாறு கர்நாடக அரசிடமும் அவர் கோரிக்கை விடுத்தார்.

பள்ளியில் பணிகள் நடைபெற்று வந்ததால், சந்தேக நபரைப் பணியாளர் என்று தவறாகக் கருதிய சில ஆசிரியர்களும் ஊழியர்களும் அவரிடம் விசாரிக்காமல் உள்ளே செல்ல அனுமதித்ததாகக் காவல்துறையினர் தெரிவித்தனர்.

குற்றம் சாட்டப்பட்டவர் யார்?

இந்தத் தாக்குதலில் ஈடுபட்ட நபர் ஹேமந்த் என அடையாளம் காணப்பட்டுள்ளதாக அனந்தபூர் காவல் கண்காணிப்பாளர் ஜகதீஷ் தெரிவித்தார்.

"முதற்கட்ட விசாரணையில், அவர் பாதிக்கப்பட்ட மாணவியின் உறவினர் என்பது தெரியவந்துள்ளது. இருப்பினும், மாணவி சுயநினைவு திரும்பியதும் அவரிடம் வாக்குமூலம் பெற்று, இருவருக்கும் இடையே காதல் தொடர்பு இருந்ததா அல்லது வேறு ஏதேனும் பிரச்னைகள் இருந்தனவா என்பது குறித்து விசாரிப்போம். தாக்குதலுக்குப் பிறகு பள்ளியிலிருந்து தப்பிச் சென்ற குற்றம் சாட்டப்பட்டவரை தர்மாவரம் ரயில் நிலையத்தில் காவல்துறையினர் பிடித்துவிட்டதாகக் கூறப்படுவது உண்மையல்ல," என்று அவர் தெரிவித்தார்.

தாக்குதலுக்கு உள்ளான மாணவியின் குடும்பத்தினர் இந்தச் சம்பவத்தால் மிகுந்த வேதனை அடைந்துள்ளனர்

"யார் அவளைத் தாக்கினார்கள், எப்படி இந்தச் சம்பவம் நடந்தது என்பது இன்னும் எங்களுக்குத் தெரியவில்லை. அவள் மிகவும் மென்மையான குணம் கொண்டவள். தினமும் காலை 8.30 மணிக்குப் பள்ளிக்குச் செல்வாள். பள்ளியில்தான் இந்தச் சம்பவம் நடந்துள்ளது. அவளது கழுத்தில் வெட்டுக்காயம் ஏற்பட்டுள்ளது. கால்களிலும் கைகளிலும் காயங்கள் உள்ளன. அவள் தினமும் ஆட்டோவில் பள்ளிக்கு வருவாள். விறகு வெட்டும் இயந்திரத்துடன் அந்த நபர் பள்ளிக்குள் வந்திருந்தால், அங்கு பாதுகாப்புப் பணியாளர்கள் யாரும் இல்லையா?" என்று மாணவியின் உறவினர் ஒருவர் கேள்வி எழுப்பினார்.

" ஒருவர் வகுப்பறைக்குள் நுழைந்தார். அவர் தனியாக வந்து திடீரெனத் தாக்கத் தொடங்கினார். இதனால் மாணவர்கள் அச்சத்தில் அங்கிருந்து ஓடினர். என்ன செய்வதென்று அவர்களுக்குத் தெரியவில்லை," என்று வகுப்பு ஆசிரியர் ராஜேஸ்வரி தெரிவித்தார்.

சம்பவம் நடந்தபோது ராப்தாடு உயர்நிலைப் பள்ளியில் ஐந்து ஆசிரியர்கள் மட்டுமே இருந்ததாக அதன் தலைமை ஆசிரியர் ராஜேஸ்வரி கூறினார்.

"வகுப்பு நடைபெற்றுக் கொண்டிருந்தது. குழந்தைகள் அலறியபடி வெளியே ஓடி வந்தனர். வகுப்பறைக்குள் சென்று பார்த்தபோதுதான் அந்த மாணவி பலத்த காயமடைந்திருப்பது தெரியவந்தது. அந்த நபர் அங்கிருந்து தப்பியோடிவிட்டார். மாணவியை மருத்துவமனைக்குக் கொண்டு சென்றோம். அவர் நன்றாகப் படிக்கக்கூடிய மாணவி. அவரைக் காப்பாற்ற முயன்ற மற்றொரு மாணவியின் காலிலும் காயம் ஏற்பட்டது. அந்த மாணவியையும் மருத்துவமனைக்கு அழைத்துச் சென்றோம்," என்று அவர் தெரிவித்தார்.

மாணவியின் குடும்பத்தினரைத் தொலைபேசியில் தொடர்புகொண்ட முதலமைச்சர்

இந்தச் சம்பவம் குறித்து முதலமைச்சர் சந்திரபாபு நாயுடு அதிர்ச்சியை வெளிப்படுத்தினார்.

மாணவியின் உடல்நிலை குறித்து அதிகாரிகளிடம் கேட்டறிந்த அவர், அவருக்குச் சிறந்த சிகிச்சை அளிக்குமாறு மருத்துவக் குழுவுக்கு உத்தரவிட்டார். காயமடைந்த மாணவியின் தாயாருடன் தொலைபேசியில் பேசிய அவர், இந்தக் கடினமான சூழலில் அரசு குடும்பத்தினருக்குத் துணையாக இருக்கும் என்றும் உறுதியளித்தார்.

அமைச்சர் லோகேஷும் இந்தச் சம்பவம் குறித்து ஆழ்ந்த கவலை தெரிவித்தார்.

"வகுப்பறையில் ரத்த வெள்ளத்தில் கிடக்கும் அந்தக் குழந்தையைப் பார்த்த பிறகு கண்ணீரைக் கட்டுப்படுத்த முடியவில்லை. சிறுமிகள் மற்றும் பெண்களின் பாதுகாப்பில் அரசு ஒருபோதும் சமரசம் செய்துகொள்ளாது. குழந்தைகளின் பாதுகாப்பில் அலட்சியம் காட்டுபவர்கள் மீதும் நடவடிக்கை எடுப்போம்," என்று அவர் எச்சரித்தார்.

முன்னாள் முதலமைச்சரும் ஒய்.எஸ்.ஆர். காங்கிரஸ் கட்சித் தலைவருமான ஒய்.எஸ். ஜெகன்மோகன் ரெட்டியும் இந்தச் சம்பவம் குறித்து கருத்து தெரிவித்தார்.

மாநிலத்தில் சட்டம் - ஒழுங்கு நிலைமை குறித்து அவர் கேள்வி எழுப்பினார். மின்சார ரம்பத்துடன் ஒருவர் அரசு பள்ளிக்குள் நுழைந்து மாணவியைத் தாக்கியது எப்படி என்றும் அவர் கேள்வி எழுப்பினார். குற்றச் செயல்களைக் கட்டுப்படுத்துவதற்குப் பதிலாக அரசியல் ஆதாயங்களில் அரசு கவனம் செலுத்துவதாகவும் அவர் விமர்சித்தார்.

காயமடைந்த மாணவிகளுக்கு உடனடியாகவும் சிறந்த முறையிலும் மருத்துவ சிகிச்சை அளிக்க வேண்டும், இந்தச் சம்பவம் குறித்து வெளிப்படையான விசாரணை நடத்த வேண்டும், மாநிலம் முழுவதும் உள்ள பள்ளிகளின் பாதுகாப்பு ஏற்பாடுகளை மறுஆய்வு செய்ய வேண்டும் என்றும் அவர்கள் வலியுறுத்தினர்.

'இனி எப்படி குழந்தைகளை பள்ளிக்கு அனுப்புவது?'

பள்ளிகளில் குழந்தைகளின் பாதுகாப்பை உறுதி செய்ய நடவடிக்கை எடுக்க வேண்டும் என்று அப்பகுதி மக்கள் கோரிக்கை விடுத்துள்ளனர்.

"அந்த மாணவிகள் தினமும் ஆட்டோவில் பள்ளிக்கு வருகிறார்கள். பள்ளியில் அனைவரும் இருக்கும்போது, இப்படியொரு சம்பவம் நடப்பதைத் தடுக்க அவர்கள் என்ன செய்துகொண்டிருந்தார்கள்? அரசு பள்ளியிலேயே இதுபோன்ற சம்பவம் நடந்தால், நாளை காலை எப்படிக் குழந்தைகளைப் பள்ளிக்கு அனுப்புவது?" என்று அப்பகுதி மக்கள் கேள்வி எழுப்பினர்.

"உயர்நிலைப் பள்ளியில் இதுபோன்ற சம்பவம் நடந்தது மிகவும் வேதனை அளிக்கிறது. ரம்பத்தைக் கொண்டு வந்து மாணவியைத் தாக்கியிருப்பது அதிர்ச்சியளிக்கிறது. அந்த மாணவியுடன், அவரைக் காப்பாற்ற முயன்ற மற்றொரு மாணவியும் தாக்கப்பட்டுள்ளார். இது தொடர்பாகக் கடுமையான நடவடிக்கை எடுப்போம்," என்று ராப்தாடு சட்டப்பேரவை உறுப்பினர் பரிதாலா சுனிதா தெரிவித்தார்.

- இது, பிபிசிக்காக கலெக்டிவ் நியூஸ்ரூம் வெளியீடு