பெண் ஐஏஎஸ் அதிகாரிக்கு தவெக எம்எல்ஏ ஆபாச குறுஞ்செய்தி அனுப்பியதாக புகார் - இதுவரை நடந்தது என்ன?

தமிழ்நாட்டில் பெண் ஐ.ஏ.எஸ் அதிகாரிக்கு ஆபாச குறுஞ்செய்தி அனுப்பியதாகப் பேசப்படும் விவகாரத்தில் த.வெ.க எம்.எல்.ஏவை கண்டித்து வரும் செவ்வாய்க்கிழமை (நவம்பர் 17) கள்ளக்குறிச்சியில் ஆர்ப்பாட்டம் நடத்த உள்ளதாக அ.தி.மு.க அறிவித்துள்ளது.

'இந்த விவகாரத்தில் வெளிப்படையான விசாரணை நடத்தப்பட வேண்டும்' என்று தமிழக அரசியல் கட்சிகள் வலியுறுத்தியுள்ளன. 'த.வெ.க எம்.எல்.ஏ மீது முதலமைச்சர் உரிய நடவடிக்கை எடுக்க வேண்டும்' என்ற கோரிக்கையை அ.தி.மு.க, தே.மு.தி.க, பா.ஜ.க மற்றும் தவெக அரசை ஆதரிக்கும் இடதுசாரிக் கட்சிகள் முன்வைத்துள்ளன.

ஆனால், 'அப்படியொரு சம்பவமே நடக்கவில்லை' என, எம்.எல்.ஏ அருள் விக்னேஷ் மறுத்துள்ளார். இந்த விவகாரத்தில் இதுவரை என்ன நடந்தது?

கள்ளக்குறிச்சி சட்டப்பேரவைத் தொகுதி த.வெ.க எம்.எல்.ஏ அருள் விக்னேஷ் குறித்து தி.மு.க நாடாளுமன்ற உறுப்பினர் கனிமொழி தனது எக்ஸ் பக்கத்தில் நவம்பர் 9ஆம் தேதி குற்றச்சாட்டு ஒன்றை முன்வைத்திருந்தார்.

அந்தப் பதிவில், 'பெண் அதிகாரிக்கு த.வெ.க சட்டப்பேரவை உறுப்பினர் அருள் விக்னேஷ் ஆபாச குறுஞ்செய்தி அனுப்பியதாகவும் மது போதையில் அவரது வீட்டுக்கே சென்று தொந்தரவு செய்ததாகவும் இதைத் தொடர்ந்து பெண் அதிகாரிக்கு தனி பாதுகாப்பு அதிகாரி நியமிக்கப்பட்டதாகவும் சமூக வலைதளங்களில் செய்திகள் வருகின்றன' எனக் கூறியுள்ளார்.

'த.வெ.க எம்.எல்.ஏ ஒருவரால் ஐ.ஏ.எஸ் அதிகாரிக்கே பாதுகாப்பு இல்லாத நிலை ஏற்பட்டுள்ளது' என கனிமொழி சாடியிருந்தார்.

'தனிப் பாதுகாப்பு அதிகாரியை நியமிப்பதன் மூலமாக ஐ.ஏ.எஸ் அதிகாரிக்கு தலைமைச் செயலாளர் என்ன பாதுகாப்பைக் கொடுத்துவிடப் போகிறார்?' எனவும் அவர் கேள்வியெழுப்பியிருந்தார்.

கனிமொழியின் எக்ஸ் தள பதிவு, அரசியல் ரீதியாக விவாதப் பொருளாக மாறியது.

அரசியல் கட்சிகள் கூறியது என்ன?

'இந்தச் செய்தி மிகுந்த அதிர்ச்சியளிப்பதாக' அ.தி.மு.க பொதுச்செயலாளர் எடப்பாடி பழனிசாமி அறிக்கை மூலமாக தெரிவித்துள்ளார். 'பெண்கள் பாதுகாப்பை உறுதி செய்யும் ஐ.ஏ.எஸ் அதிகாரிக்கே பாதுகாப்பு இல்லை' எனவும் அவர் கூறியிருந்தார்.

'பெண் ஐ.ஏ.எஸ் அதிகாரிக்கு நடந்த கொடுமைக்கு எதிராக வழக்குப் பதிவு செய்து எம்.எல்.ஏவை கைது செய்ய வேண்டும். நேர்மையான, அரசியல் குறுக்கீடற்ற விசாரணை நடத்தப்படுவதை உறுதி செய்ய வேண்டும்' என எடப்பாடி பழனிசாமி வலியுறுத்தியிருந்தார்.

தமிழ்நாடு சட்டப்பேரவை எதிர்க்கட்சித் தலைவர் உதயநிதி வெளியிட்டுள்ள சமூக ஊடகப் பதிவில், 'கள்ளக்குறிச்சி எம்.எல்.ஏவை முதலமைச்சர் இன்னமும் பாதுகாப்பது ஏன்?' எனக் கேள்வியெழுப்பியுள்ளார்.

'மௌன முதலமைச்சருக்கு மனசாட்சி இருந்தால் தவறு செய்யும் உங்கள் கட்சிக்காரர்களைக் கட்டி வையுங்கள். இல்லை என்றால் மக்கள் சக்தி தட்டி வைக்கும்' என உதயநிதி குறிப்பிட்டுள்ளார்.

காங்கிரஸ் கட்சிக்குள் இருவேறு கருத்துகள்

த.வெ.க கூட்டணி அரசில் இடம் பெற்றிருக்கும் காங்கிரஸ் கட்சிக்குள் இதுதொடர்பாக இருவேறு கருத்துகள் வெளியாயின. அக்கட்சியின் கரூர் எம்.பி ஜோதிமணி தனது எக்ஸ் பக்கத்தில், 'இதுகுறித்து முறையாக விசாரணை செய்து கடும் நடவடிக்கை எடுக்க வேண்டும் எனவும் இதுபோன்ற மோசமான செயல்கள் ஆட்சிக்கும் கட்சிக்கும் களங்கம் விளைவிக்கக் கூடியவை. இதை வளரவிடாமல் தொடக்கத்திலேயே கடும் நடவடிக்கை எடுக்க வேண்டும்' என ஜோதிமணி கூறியுள்ளார்.

ஆனால், தமிழ்நாடு காங்கிரஸ் கமிட்டி தலைவர் மாணிக்கம் தாகூர் பேசும்போது, "எப்படிப்பட்ட வாட்ஸ்ஆப் உலகத்தில் வாழ்ந்து வருகிறோம் எனத் தெரிகிறது. வாட்ஸ்ஆப்பில் ஒருவர் செய்தியைப் போட்டுவிட்டால் அதற்காக எதிர்வினையாற்றி குற்றவாளியாக்குகிறார்கள்" என சாடினார்.

"கள்ளக்குறிச்சியில் மிகவும் பிற்படுத்தப்பட்ட சமூகத்தைச் சேர்ந்த ஒருவர் முதல்முறையாக எம்.எல்.ஏவாக ஆகியுள்ளார். அவர் மீது ஊடக விசாரணைகள் நடத்துவது எந்தவகையில் நியாயம் எனத் தெரியவில்லை" எனவும் அவர் கூறினார்.

மாணிக்கம் தாகூரின் கருத்துக்கு இடதுசாரிக் கட்சிகள் மற்றும் பா.ஜ.க மாநில தலைவர் ஆகியோர் கண்டனம் தெரிவித்துள்ளனர்.

"ஓர் ஐ.ஏ.எஸ் அதிகாரி தலைகுனிந்து நிற்கிறார். குழந்தைகளுக்கு எதிரான குற்றங்களை அவர் எவ்வாறு தட்டிக் கேட்க முடியும்?" என, மா.கம்யூனிஸ்ட் கட்சியின் முன்னாள் எம்.எல்.ஏ பாலபாரதி கேள்வியெழுப்பியுள்ளார்.

"எம்.எல்.ஏ தவறே செய்யவில்லை என மாணிக்கம் தாகூர் சொல்கிறார். அதனை அரசியலாக்க விரும்பவில்லை. ஆனால், இந்தச் சம்பவத்துக்கு முதலமைச்சர் மௌனம் சாதிக்கிறார்" என, தமிழ்நாடு பா.ஜ.க தலைவர் நயினார் நாகேந்திரன் விமர்சித்துள்ளார்.

'இது நிர்வாக அவலம்' - பிரேமலதா

தே.மு.தி.க பொதுச்செயலாளர் பிரேமலதா விஜயகாந்த் வெளியிட்டுள்ள அறிக்கையில், 'இரவு நேரங்களில் பெண் அதிகாரியைத் தொடர்பு கொண்டு தொந்தரவு செய்ததோடு, மதுபோதையில் அவரது இல்லத்துக்கே சென்று அச்சுறுத்தியதாக வரும் குற்றச்சாட்டுகள் கடும் கண்டனத்துக்குரியவை' எனக் கூறியுள்ளார்.

பெண் ஐ.ஏ.எஸ் அதிகாரிக்கே இதுபோன்ற அச்சுறுத்தல்கள் ஏற்படுகின்றன என்றால் சம்பந்தப்பட்டவர்களுக்கு எந்தளவுக்கு துணிச்சல் இருந்திருக்கும் என்பதை நினைத்துப் பார்க்கவே அதிர்ச்சியாக உள்ளதாகவும் பிரேமலதா விஜயகாந்த் விமர்சித்துள்ளார்.

'பெண்களைப் பாதுகாக்கும் அரசு என்று பெருமை பேசும் முதலமைச்சர் ஆட்சியில், ஒரு பெண் அதிகாரிக்கே பாதுகாப்பு இல்லாத நிலை ஏற்பட்டிருப்பது தமிழக அரசின் நிர்வாக அவலத்தையே வெளிப்படுத்துகிறது' என்கிறார் அவர்.

'இந்தச் சம்பவத்தைத் தொடர்ந்து பெண் அதிகாரிக்கு தனிப் பாதுகாப்பு அதிகாரி நியமிக்கப்பட்டுள்ளதாக வெளியாகியுள்ள தகவல் மிகுந்த கவலையளிக்கிறது. இந்த விவகாரத்தில் குற்றச்சாட்டுகளின் உண்மைத்தன்மையைக் கண்டறிய வெளிப்படையான, பாரபட்சமற்ற விசாரணைக்கு முதலமைச்சர் உத்தரவிட வேண்டும்' எனவும் பிரேமலதா விஜயகாந்த் வலியுறுத்தியுள்ளார்.

டி.ஜி.பி அலுவலகத்தில் புகார்

த.வெ.க எம்.எல்.ஏ மீது நடவடிக்கை எடுக்க வலியுறுத்தி டி.ஜி.பி அலுவலகத்தில் தி.மு.க மற்றும் அ.தி.மு.க சார்பில் தனித்தனியாக புகார் மனுக்கள் அளிக்கப்பட்டுள்ளன.

இதுகுறித்து செய்தியாளர்களிடம் பேசிய தி.மு.க அமைப்புச் செயலாளர் ஆர்.எஸ்.பாரதி, "பெண் ஐ.ஏ.எஸ் அதிகாரிக்கு எதிராக நடைபெற்றதாகக் கூறப்படும் சம்பவம் தொடர்பாக முழுமையான விசாரணை நடத்தப்பட வேண்டும். இதுதொடர்பான விசாரணையை சிபிசிஐடி மேற்கொள்ள வேண்டும்" எனக் கூறினார்.

த.வெ.க அமைச்சர்கள் கூறியது என்ன?

கள்ளக்குறிச்சி எம்.எல்.ஏ மீதான குற்றச்சாட்டு குறித்து செய்தியாளர்களிடம் பேசிய அமைச்சர் ராஜ்மோகன், "யாராக இருந்தாலும் குற்றச்சாட்டுக்கு ஆளானால் விசாரணை நடத்தி கடுமையான நடவடிக்கை எடுக்கப்படும்" எனக் கூறினார்.

கள்ளக்குறிச்சி மாவட்ட பொறுப்பு அமைச்சரான வன்னிஅரசுவிடம் இதுகுறித்து செய்தியாளர்கள் கேட்டபோது, "அதைப் பற்றி இனிமேல் தான் விசாரிக்க வேண்டும். அரசுப் பணியில் உள்ள பெண்களைப் பாதுகாக்க வேண்டிய பொறுப்பு உள்ளது. வி.சி.கவை பொறுத்தவரை பாதிக்கப்பட்டவர்கள் பக்கமே நிற்போம்" எனக் கூறினார்.

"இதுதொடர்பாக முழுமையாக தெரிந்த பிறகு பேசுகிறேன்" எனக் கூறிய அவர், "இதைப் பற்றி விசாரிப்பதற்கான அதிகாரத்தை என்னிடம் அளிக்கவில்லை. என்னிடம் யாரும் பேசவில்லை. முதலமைச்சரோ அல்லது சம்பந்தப்பட்டவர்களோ அறிக்கை அளிக்குமாறு கூறினால் செய்வேன்" என்கிறார்.

ஆளும்கட்சிக்கோ, எதிர்க்கட்சிக்கோ கட்டுப்படாமல் பெண் ஐ.ஏ.எஸ் அதிகாரியின் செயல்பாடுகள் அமைந்துள்ளதாகவும் வன்னிஅரசு தெரிவித்தார்.

இந்த விவகாரத்தை முதன்முதலில் தி.மு.க எம்.பி கனிமொழி தொடங்கி வைத்ததாகக் கூறுகிறார், தமிழ்நாடு சட்டத்துறை அமைச்சர் சி.டி.ஆர்.நிர்மல்குமார், "சமூக ஊடகங்களில் பார்த்த பிறகு இதனை அவர் பதிவு செய்கிறார். இதேபோன்று சமூக ஊடகத்தில் பார்த்ததாக அவரைப் பற்றி எதாவது கூறினால் ஏற்றுக் கொள்வாரா?" எனக் கேள்வியெழுப்பினார்.

தொடர்ந்து செய்தியாளர்களிடம் பேசிய அவர், "என்ன நடந்தது என்பதைப் பற்றி கேட்பதற்கு உரிமை உள்ளது. வதந்திகளுக்கு எல்லாம் பதில் சொல்லிக் கொண்டிருக்க முடியாது. யாருடைய தனிப்பட்ட விஷயங்களைப் பற்றியும் பேச முடியாது" எனக் கூறினார்.

"கனிமொழி கூறியதைப் போன்று எதுவும் நடக்கவில்லை. தி.மு.க தூண்டிவிட்ட செய்தியை ஊடகங்கள் கையாள்கின்றன" எனவும் அவர் விமர்சித்தார்.

கள்ளக்குறிச்சி எம்.எல்.ஏ விளக்கம்

பெண் ஐ.ஏ.எஸ் அதிகாரிக்கு ஆபாச குறுஞ்செய்தி அனுப்பியதாக ஊடகங்களில் வெளியாகும் செய்திக்கு கள்ளக்குறிச்சி தவெக எம்.எல்.ஏ அருள் விக்னேஷ் மறுப்பு தெரிவித்துள்ளார்.

கள்ளக்குறிச்சி புதிய பேருந்து நிலையத்தில் ஆய்வு நடத்திய பிறகு செய்தியாளர்களிடம் பேசிய அவர், "அதிகாரிகள் மீது எனக்கு மிகுந்த மதிப்பும் மரியாதையும் உள்ளது. அப்படியொரு செயலை நான் செய்யவில்லை. இதுபோன்ற வதந்திகளை ஏன் பரப்புகிறார்கள் எனத் தெரியவில்லை" எனக் கூறினார்.

"சர்ச்சைக்கு ஏன் முன்னரே விளக்கம் அளிக்கவில்லை?" என செய்தியாளர்கள் கேட்டபோது, "தவறான செய்திகளுக்குப் பதில் அளிக்க வேண்டியதில்லை. என் மீது அவதூறு பரப்புகின்றனர்" என அவர் தெரிவித்தார்.

"கள்ளக்குறிச்சி எம்.எல்.ஏ மீது முன்வைக்கப்படும் குற்றச்சாட்டுகளில் உண்மை உள்ளதா?" என, பெண் ஐ.ஏ.எஸ் அதிகாரியிடம் பிபிசி தமிழ் கேள்விகளை முன்வைத்தது. ஆனால், அவரிடம் இருந்து விளக்கம் பெறும் முயற்சிகள் எதுவும் பலன் அளிக்கவில்லை. இதுதொடர்பாக அவர் விளக்கம் அளிக்கும் பட்சத்தில் இந்தக் கட்டுரையில் சேர்க்கப்படும்.

- இது, பிபிசிக்காக கலெக்டிவ் நியூஸ்ரூம் வெளியீடு