గ్రీస్: సెలబ్రిటీల పెళ్లిళ్లకు గమ్యస్థానంగా ఎందుకు మారుతోంది?

సంగీత దర్శకుడు అనిరుధ్ రవిచందర్, సన్ టీవీ నెట్‌వర్క్ మేనేజింగ్ డైరెక్టర్లలో ఒకరైన కావ్య మారన్‌ వివాహం చేసుకున్నారు.

నవంబర్ 10, 11 తేదీల్లో రెండు రోజుల పాటు వివాహ వేడుకలు జరిగినట్లు సమాచారం.

తమిళనాడు మాజీ ముఖ్యమంత్రి ఎం.కె. స్టాలిన్, నటుడు రజనీకాంత్ సహా వధూవరుల సన్నిహిత బంధువులు, ప్రముఖులు ఈ వివాహ వేడుకల్లో పాల్గొనేందుకు గ్రీస్‌కు వెళ్లినట్లు మీడియాలో వార్తలు వెలువడ్డాయి.

డెస్టినేషన్ వెడ్డింగ్ కోసం సెలబ్రిటీలు గ్రీస్‌ను ఎంచుకోవడం కొత్తేమీ కాదు.

ప్రముఖులు తమ వివాహ వేడుకల కోసం‌ గ్రీస్‌ను ఎంచుకోవడానికి అనేక కారణాలు ఉన్నాయి.

ఐరోపా దేశమైన గ్రీస్ ప్రకృతి అందాలకు, ప్రాచీన చరిత్రకు ప్రసిద్ధి చెందింది. గ్రీస్‌లో వేలాది దీవులు ఉన్నాయి. వీటిలో అతిపెద్దది క్రీట్ దీవి. ఏజియన్ సముద్రంలో ఉన్న అనేక దీవులు గ్రీస్ దేశానికి ప్రత్యేక గుర్తింపుగా నిలుస్తున్నాయని ఆ దేశ పర్యటక వెబ్‌సైట్ పేర్కొంది.

ఎత్తైన పర్వతాలు, పొడవైన సముద్ర తీరాలు, నీలి రంగు సముద్రం.. ప్రకృతి అందాలతో గ్రీస్ అలరిస్తుంటుంది. అందుకే ఇక్కడకు డెస్టినేషన్ వెడ్డింగ్ జరుపుకోవడానికి ప్రపంచ వ్యాప్తంగా పర్యటకులు వస్తుంటారు.

పాశ్చాత్య సాహిత్యం, కళలు, తత్వశాస్త్రం, రాజకీయాలపై ప్రాచీన గ్రీకు నాగరికత ప్రభావం ఎంతో ఉందని, రాజధాని ఏథెన్స్ సహా గ్రీస్‌లోని ప్రధాన నగరాల్లో కనిపించే చారిత్రక కట్టడాలు ఇందుకు నిదర్శనమని ఓపెన్‌స్టాక్స్ పేర్కొంది.

రెండో ప్రపంచ యుద్ధం తర్వాత గ్రీస్‌లో ఆర్థిక, సామాజిక మార్పులు వేగంగా చోటుచేసు కున్నాయి. పర్యటకం, నౌకాయాన రంగాలు ఆ దేశ ఆర్థిక వ్యవస్థలో కీలక పాత్ర పోషించాయి.

గ్రీస్‌లోని ఓ దీవిలో పెళ్లి చేసుకోవాలన్నది ఎంతోమంది ప్రేమజంటల కల. ఇందుకు 'మమ్మా మియా' వంటి సినిమాలు కూడా ఒక కారణం. ఈ సినిమా చిత్రీకరణ జరిగిన గ్రీస్‌లోని స్కోపెలోస్ దీవి అంతర్జాతీయంగా ప్రత్యేక గుర్తింపు పొందింది.

గ్రీస్‌లోని శాంటోరిని దీవి విదేశీ జంటలు డెస్టినేషన్ వెడ్డింగ్ కోసం ఎంచుకునే ప్రముఖ ప్రాంతాల్లో ఒకటి.

2018 వేసవిలోనే వెయ్యికి పైగా విదేశీ జంటలు శాంటోరిని దీవిలో వివాహం చేసుకున్నట్లు ది గార్డియన్ కథనం వెల్లడించింది.

పెళ్లి చేసుకోవాలనకున్నవారే కాకుండా, పెళ్లైనవారు కూడా మరోసారి తమ వివాహ ప్రమాణాలను గుర్తుచేసుకోవడానికి శాంటోరినికి వస్తుంటారు.

నారింజ రంగులో కనిపించే సూర్యాస్తమయం, తెల్లటి ఇళ్లు, అగ్నిపర్వత విస్ఫోటనం కారణంగా ఏర్పడిన సముద్ర జలాలతో నిండిన బిలం (కాల్డెరా) ఇక్కడి ప్రధాన ఆకర్షణలు. ఇవి జంటలను విశేషంగా ఆకట్టుకుంటాయి.

సీ వ్యూ కనిపించేలా నిర్మించిన రిసార్టులు, ప్రత్యేక విందు ఏర్పాట్లు, వివాహ వేడుకల కోసం అందుబాటులో ఉండే ప్రత్యేక సదుపాయాలు కూడా ఈ దీవికి మరిన్ని జంటలను ఆకర్షిస్తున్నాయి.

గ్రీస్ అధికారిక పర్యటక వెబ్‌సైట్ కూడా శాంటోరిని దీవిని విదేశీ జంటలు ఇష్టపడే వివాహ, హనీమూన్ ప్రాంతంగా పేర్కొంది.

కుటుంబ సభ్యులు, అత్యంత సన్నిహిత మిత్రులు మాత్రమే హాజరయ్యే చిన్నపాటి వివాహ వేడుకలకు గ్రీస్ దీవులు అనువైన ప్రాంతాలుగా మారుతున్నాయి.

20 మందికి మించకుండా, కేవలం సన్నిహిత బంధువులు, స్నేహితుల సమక్షంలోనే వివాహం చేసుకోవడానికి వధూవరులు ఆసక్తి చూపుతున్నారు.

దీంతో మైకోనోస్, పాఫోస్ వంటి వేడుకలకు ప్రసిద్ధి చెందిన దీవులతో పోలిస్తే అమోర్గోస్, కెఫలోనియా వంటి చిన్నవైన, ప్రకృతి అందాలతో అలరించే దీవులకు ఆదరణ పెరుగుతోందని బీబీసీ కథనం పేర్కొంది.

అయితే విదేశాల్లో వివాహం చేసుకోవడం అంత సులభం కాదు. పెళ్లి జరిగే దేశంలోని చట్టపరమైన నిబంధనలు, అవసరమైన పత్రాలు, వాతావరణ పరిస్థితులు, వసతి సౌకర్యాలు, వేడుకల నిర్వహణ, ఖర్చులు.. ఇలా అనేక అంశాలను ముందుగానే ప్రణాళిక చేసుకోవాల్సి ఉంటుంది.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)