డీఎన్‌కే మూవీ రివ్యూ: నవ్వులతో మౌళి మెప్పించాడా?

యూట్యూబర్‌గా కెరీర్ మొదలుపెట్టి, #90s, లిటిల్ హార్ట్స్ చిత్రాలతో గుర్తింపు తెచ్చుకున్నాడు మౌళి. ఇప్పుడు మైత్రి మూవీ మేకర్స్ నిర్మాణంలో వచ్చిన 'డీఎన్‌కే' సినిమాతో ప్రేక్షకుల ముందుకు వచ్చాడు.

వైజాగ్‌లో జరిగే కథ ఇది. ఈశ్వర్ (మౌళి) గ్యాంబ్లింగ్‌కు అలవాటుపడిపోయిన కుర్రాడు. తాను ప్రేమించిన అమ్మాయి దీపు (సుస్మిత శెట్టి) బంగారాన్ని కూడా తాకట్టు పెట్టి అప్పులు చేస్తుంటాడు. ఈ విషయం దీపు తండ్రి పుల్లారావు (రఘుబాబు) కు తెలియడంతో ఇంటికి వచ్చి గొడవ చేస్తాడు.

తన కూతురి దగ్గర తీసుకున్న మొత్తం పది లక్షల రూపాయలను వారం రోజుల్లో తిరిగి ఇవ్వాలని డిమాండ్ చేస్తాడు. ఈ పది లక్షల కోసం ఈశ్వర్ ఒక దొంగతనం చేయాలని నిర్ణయించుకుంటాడు.

ఇంతకీ ఆ దొంగతనం ఎలా జరిగింది? ఆ దొంగతనం ఈశ్వర్ జీవితాన్ని ఎలా మార్చింది? అనేదే మిగతా కథ.

మరి ఈ సినిమా ప్రేక్షకులకు ఎలాంటి వినోదాన్ని అందించింది? మౌళి తన విజయాలను కొనసాగించాడా?

క్యారెక్టర్ ఉంది.. కానీ కథ ఎక్కడ?

ఈ సినిమా కథేంటో ట్రైలర్‌లోనే చెప్పేశారు. బెట్టింగులకు అలవాటుపడిన ఒక కుర్రాడు దొంగతనం చేసే కథ ఇది. సాధారణంగా కథలోని ప్రధాన సమస్యను పరిచయం చేసిన తర్వాత, దానికి సంబంధించిన సంఘటనలను దాటి అసలు కథలోకి వెళ్లాలి.

కానీ ఇందులో సమస్య ఏంటంటే.. ట్రైలర్‌లో చూపించిన సన్నివేశాలనే ఇంటర్వెల్ వరకు సాగదీశారు. దీంతో సినిమా ఎక్కడ వేసిన గొంగళి అక్కడే అన్నట్టుగా తయారైంది.

బెట్టింగులకు అలవాటుపడి అప్పులు చేసే ఒక కుర్రాడి క్యారెక్టర్ అయితే ఉంది. కానీ ఆ క్యారెక్టర్‌తో ఎలాంటి కథ నడపాలి అనే విషయంలో దర్శకుడు సరైన కసరత్తు చేయలేదనిపిస్తుంది. ఎందుకంటే అల్లరిచిల్లరిగా తిరిగే ఒక కుర్రాడు అప్పులు చేసి, చివరికి ఒక నేరం చేయాల్సిన పరిస్థితి రావడం అనేది గతంలో ఎన్నో సినిమాల్లో చూసిందే. ఈ సినిమా కూడా అదే ఛాయల్లో సాగుతుంది. అయితే ఆసక్తికరమైన కొత్త సన్నివేశాలు కానీ, నవ్వు పుట్టించే సీన్లుగానీ ఇందులో కొరవడ్డాయి.

ట్విస్టులే ట్విస్టులు!

సెకండ్ హాఫ్ కథ పూర్తిగా ట్విస్టుల మీదే ఆధారపడి ఉంటుంది.

ప్రేక్షకులను అలరించాలనే ఉద్దేశంతో దర్శకుడు శ్రీను కంభాల కుప్పలుతెప్పలుగా ట్విస్టులు రాసుకున్నాడు. ప్రతి పాత్ర చుట్టూ రెండు మూడు మలుపులు పెట్టాడు.

నిజానికి ఇన్ని ట్విస్టులు వస్తున్నప్పుడు ప్రేక్షకుల్లో ఆసక్తి పెరగాలి. కానీ ఇక్కడ ఆ ట్విస్టులన్నీ ఒక రొటీన్ వ్యవహారంలా మారిపోతాయి. వాటికి సరైన ప్లేస్‌మెంట్, పేఆఫ్ ఉండదు.

ఎవరెలా నటించారు?

#90s, లిటిల్ హార్ట్స్‌లో మౌళిని ప్రేక్షకులు ఇష్టపడటానికి ప్రధాన కారణం.. మన పక్కింటి కుర్రాడిలా కనిపించే క్యారెక్టరైజేషన్. కానీ ఇందులో మాత్రం అతని పాత్ర కాస్త ఓవర్ ది బోర్డ్‌గా అనిపిస్తుంది. నిజానికి జూదానికి, బెట్టింగులకు అలవాటుపడి అప్పులపాలైన ఒక వ్యక్తి ప్రవర్తనలోనూ, అతని చర్యల్లోనూ ఒక సహజత్వం ఉంటుంది. ఏదైనా చేసినా దానికి నమ్మశక్యమైన కారణం ఉండాలి. కానీ ఇందులో కేవలం నవ్వించాలనే ఉద్దేశంతో సన్నివేశాలు రాసినట్టుగా అనిపిస్తుంది. దీంతో మౌళి క్యారెక్టర్ కొన్నిచోట్ల అసహజంగా అనిపిస్తుంది. తన పంచ్ లైన్స్‌తో అక్కడక్కడా నవ్వించినప్పటికీ, చాలా సన్నివేశాల్లో డ్రామా తేలిపోతుంది.

హీరోయిన్‌గా చేసిన సుస్మిత శెట్టి అమాయకంగా కనిపించింది. కాకపోతే తన పాత్రకు అంతగా ప్రాధాన్యత లేదు. తండ్రి పాత్రలో చేసిన అలీ కొన్ని చోట్ల నవ్వించారు. అలాగే గుండు సుదర్శన్, రఘుబాబు పాత్రలు ఓకే అనిపిస్తాయి. లిటిల్ హార్ట్స్‌లో నటించిన జై కృష్ణ ఇందులో ఒక ప్రత్యేక పాత్రలో కనిపించాడు అయితే ఆ పాత్ర శ్రుతిమించిందనే చెప్పాలి. కేవలం నవ్వించాలనే ఉద్దేశంతో అలాంటి పాత్రను సృష్టించి, దాని చుట్టూ లేని ఎమోషన్ క్రియేట్ చేయడం కాస్త అసహజంగా అనిపిస్తుంది. బబుల్ క్యారెక్టర్ మాత్రం కొన్ని చోట్ల నవ్వించింది.

ఈ సినిమాకు సిన్జిత్ అందించిన మ్యూజిక్ అంతగా ప్రభావం చూపించదు. పాటలు కూడా సరిగ్గా రిజిస్టర్ కాలేదు. నేపథ్య సంగీతం మాత్రం కొన్ని చోట్ల హుషారుగా సాగుతుంది. కెమెరా వర్క్ డీసెంట్‌గా ఉంది. మౌళి ఈ సినిమాకు నిర్మాణంలో కూడా పనిచేశాడు. అయితే మైత్రి మూవీ మేకర్స్ లాంటి ప్రముఖ సంస్థ ఉన్నప్పటికీ, చాలా చోట్ల బడ్జెట్ పరిమితులు స్పష్టంగా కనిపిస్తుంటాయి.

ఏ సినిమాలోనైనా ఒకట్రెండు ఐక్యూ లేని సన్నివేశాలు ఉండటం సహజం. కానీ ఈ సినిమాలో మాత్రం చాలా సన్నివేశాలు కనీస లాజిక్‌కు కూడా అందకుండా ఉంటాయి.

ఒక బ్యాగ్‌ను మాయం చేయడానికి దాదాపు పది నిమిషాల సీక్వెన్స్ నడిపారు. ఆ సీక్వెన్స్ చూస్తున్నప్పుడు ఇదేం కాలంలో తీసిన సినిమా? అని ఆశ్చర్యం కలుగుతుంది.

పాత్రలని మరీ అంత బకరాలుగా చేసిన వైనం ఆకట్టుకోదు. ఓ సన్నివేశంలో మౌళి చెప్పిన డైలాగులన్నీ విన్న ప్రియా.. "సంతోషించాం కానీ నవ్వు రాలేదు" అంటోంది. అచ్చంగా ప్రేక్షకుడి రియాక్షన్ కూడా ఇదే.

డబుల్ మీనింగ్ ఫన్..

కొత్త దర్శకులు కొత్తగా ఆలోచిస్తున్నారు. కానీ కథను, సన్నివేశాలను తెరపైకి తీసుకొచ్చేటప్పుడు వాటిలో నమ్మశక్యమైన అంశాలు ఉండేలా చూసుకోవడం కూడా చాలా ముఖ్యం.

దర్శకుడు శ్రీను కంబాల ట్విస్టులతో, లెక్కకు మించిన మలుపులతో కథనాన్ని రక్తి కట్టించాలని ప్రయత్నించారు. కానీ ఆ మలుపులేవీ అనుకున్నంత ఫలితాన్ని ఇవ్వలేకపోయాయి.

కొన్ని నవ్వులు మాత్రమే అక్కడక్కడా పండాయి. నవ్వించడానికి కొన్ని చోట్ల డబుల్ మీనింగ్ డైలాగ్స్‌ను కూడా ఆశ్రయించారు. కామెడీ సినిమా అన్నంత మాత్రాన లాజిక్‌కు, ఎమోషన్స్‌కు, బిలీవబిలిటీకి దూరంగా ఉండాల్సిన అవసరం లేదు. ఎంత సహజంగా ఉంటే హాస్యం అంత బాగా ఆకట్టుకుంటుంది. కానీ ఈ సినిమాలో ఆ సహజత్వమే లోపించింది.

మొత్తానికి డీఎన్‌కే సినిమా అక్కడక్కడా కొన్ని నవ్వులు పంచినా, ఎక్కువసేపు ఆవలింతలతోనే సరిపెట్టుకుంటుంది.

(అభిప్రాయాలు సమీక్షకుడి వ్యక్తిగతం)

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)