నెలల చిన్నారిని సజీవంగా పాతిపెట్టిన తండ్రి, 24 గంటల తర్వాత ప్రాణాలతో ఎలా బయటపడ్డాడంటే..

ఈ కథనంలో కలిచివేసే అంశాలున్నాయి.

అమెరికాలోని దక్షిణ కరోలినా రాష్ట్రంలో ఓ పెట్టెలో సజీవంగా పాతిపెట్టి ఉన్న 11 నెలల చిన్నారిని అధికారులు రక్షించారు. తండ్రే చిన్నారిని అలా పాతిపెట్టారని అధికారులు చెబుతున్నారు.

కోవా షార్ప్ అనే 11 నెలల చిన్నారి సోమవారం(నవంబర్ 9) నుంచి కనిపించకుండా పోయాడని, బాబును తండ్రి మైఖేల్ కమెర్ (25) తీసుకెళ్లారని లెక్సింగ్టన్ కౌంటీ షెరిఫ్ విభాగం తెలిపింది.

సోమవారం సాయంత్రం దొంగతనం కేసులో మైఖేల్ కమెర్‌ను పోలీసులు అరెస్టు చేశారు. ఆ సమయంలో ఆయన వద్ద చిన్నారి లేడు.

మైఖేల్ ఇంటికి కొంతదూరంలో చిన్నారిని గుర్తించామని, బాబును సజీవంగా పాతిపెట్టారని తాము గుర్తించే సమయానికి చిన్నారి ప్రాణాలతో పోరాడుతున్నాడని లెక్సింగ్టన్ కౌంటీ షెరిఫ్ జే కూన్ మీడియా సమావేశంలో తెలిపారు.

సజీవంగా పాతిపెట్టిన తర్వాత చిన్నారి దాదాపు 24 గంటల పాటు అలానే ఉండి ఉంటాడని భావిస్తున్నారు.

ప్రస్తుతం చిన్నారికి ఆస్పత్రిలో చికిత్స అందిస్తున్నారు. బాబు పూర్తిగా కోలుకుంటాడని ఆశిస్తున్నట్టు కూన్ చెప్పారు.

చిన్నారి తండ్రిపై ఇంకా ఎలాంటి అదనపు కేసులు నమోదుచేయాలనే విషయాన్ని పోలీసులు పరిశీలిస్తున్నారు.

చిన్నారిని సోమవారం(నవంబర్ 9) నాయనమ్మ ఇంటినుంచి మైఖేల్ తీసుకెళ్లిన తర్వాత బాబు కోసం గాలింపు ప్రారంభమైంది.

నాయనయ్మ చిన్నారిని తండ్రి దగ్గర కాసేపు ఒంటరిగా వదిలిపెట్టిందని షెరీఫ్ కూన్ తెలిపారు. ఆ సమయంలో మైఖేల్ అకస్మాత్తుగా చిన్నారిని తీసుకుని అక్కడి నుంచి వెళ్లిపోయారు.

ఆ తర్వాత చిన్నారి లేకుండానే మైఖేల్ పలు ప్రాంతాలకు వెళ్లినట్టు గుర్తించారు. చివరకు లెక్సింగ్టన్ కౌంటీలో ఆయన్ను అరెస్టు చేశారు. కానీ అప్పుడు బాబు ఆయన వద్ద లేడు.

దీంతో చిన్నారి కోసం పోలీసులు, అగ్నిమాపక శాఖ సిబ్బంది కలిపి 100 మందితో గాలింపు బృందాన్ని ఏర్పాటు చేశామని కూన్ తెలిపారు.

'మీ అబ్బాయి ఎక్కడ ఉన్నాడు' అని మైఖేల్‌ను అడిగినప్పుడు ఆయన ఏమీ చెప్పలేదని కూన్ తెలిపారు.

మైఖేల్ ఇంటికి దగ్గరలోని అడవుల్లో గాలిస్తున్న సమయంలో అక్కడ మట్టిని తవ్వి అప్పుడే కప్పినట్టుగా ఉన్న ఓ చోటును అధికారులు గుర్తించారు. ఆ మట్టిని తవ్వడం ప్రారంభించగానే చిన్నారి ఏడుపు వినిపించిందని కూన్ చెప్పారు.

ఆ ఏడుపు జీవితంలో తాను విన్న అత్యంత ఆనందకరమైన శబ్దమని కూన్ అభివర్ణించారు.

"చిన్నారిని బయటకు తీసేందుకు అందరూ అక్కడికి పరుగెత్తారు. మట్టిని తొలగించి చిన్నారిని బయటకు తీసేందుకు వేగంగా పనిచేశాం" అని కూన్ తెలిపారు.

పెట్టె చుట్టూ ఒక టవల్ చుట్టి ఉందని దీంతో పెట్టెలోకి కొంత గాలి వెళ్లి ఉండవచ్చని అందుకే చిన్నారి అంతసేపు ప్రాణాలతో ఉండగలిగాడని భావిస్తున్నట్టు కూన్ చెప్పారు. అలాగే వాతావరణం చల్లగా ఉండటం వల్ల చిన్నారికి ఎక్కువ వేడి తగలలేదన్నారు.

"ఆ పెట్టె దాదాపు రెండు అడుగుల పొడవు, రెండు అడుగుల వెడల్పు ఉన్న చిన్న పెట్టె అయి ఉండవచ్చని అనుకుంటున్నా'' అని కూన్ వివరించారు. ఆ పెట్టే కుక్కలను ఉంచేది కావచ్చని ఆయన అన్నారు.

చిన్నారి తల్లిదండ్రుల మధ్య సంబంధాల్లో కొన్ని సమస్యలు ఉన్నాయని కూన్ చెప్పారు. మైఖేల్ గతంలో గృహహింస కేసుల్లో నేరం అంగీకరించినట్లు కోర్టు రికార్డుల్లో ఉంది.

చిన్నారి పూర్తి సంరక్షణ హక్కులు తల్లికే ఉన్నాయని అయితే తన కొడుకు చిన్నారిని చూసుకునే సమయంలో పర్యవేక్షించేందుకు తనకు ఆమె అనుమతి ఇచ్చిందని మైఖేల్ తల్లి ప్యాట్రిషియా కమెర్ ఎన్బీసీ న్యూస్‌తో చెప్పారు.

గతంలో ఎలాంటి సమస్యలు లేకుండా చిన్నారిని తన కుమారుడే ఒంటరిగా చూసుకున్నాడని ఆమె తెలిపారు.

"నేను అతని తల్లిని. ఇలా చేస్తాడని నేను ఎప్పుడూ ఊహించలేదు" అని ప్యాట్రిషియా కమెర్ అన్నారు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)