‘‘పెళ్లి చేసుకున్న ఐదు రోజులకే విడాకులు ఇచ్చాడు, సెక్స్ కోసం ఇంత పిచ్చి పనులు ఎందుకు చేస్తారో’’ అంటూ మతం మారిన ఓ మహిళ ఇంకా ఏం చెప్పారంటే..

ఇస్లాం మతంలోకి మారిన జేన్‌(అసలు పేరు కాదు)కు పెళ్లి చేసుకున్న అయిదు రోజుల తర్వాత భర్త నుంచి ఒక టెక్స్ట్ మెసేజ్ వచ్చింది.

ఆ సందేశం ఆమె జీవితాన్ని తలకిందులు చేసింది.

"నేను నీకు విడాకులు ఇస్తున్నా, ఇప్పటికే విడాకులు ఇచ్చేశా" అని ఆమె భర్త అందులో రాశారు.

ఆమె అసలు పేరును ప్రచురించబోమని బీబీసీ అంగీకరించింది. జేన్‌కు ఆయన దాదాపు 10 నెలల కిందట ‘మజ్’ అనే ముస్లిం పెళ్లిళ్ల వెబ్‌సైట్‌లో పరిచయమయ్యారు. జేన్ అంతకు ముందే ఇస్లాంలో మారారు.

ఆ సమయంలో తన పేరు ఆడమ్ అని, మాంచెస్టర్‌లో నివసిస్తున్నాననీ ఆయన చెప్పినట్లు గుర్తు చేస్తున్నారు. జేన్ ఆయన మాటలను పూర్తిగా నమ్మారు.

"ఇది నాకు చాలా బాధాకరంగా ఉంది. నేను పెళ్లి చేసుకుంటున్నానని అనుకున్నా, కానీ దుర్బరమైన ఒక పీడకలలోకి వెళ్లా" అని ఆమె చెప్పారు.

"ఇది నిజంగా దారుణం. సెక్స్ కోసం ఇలాంటి పనులు ఎందుకు చేస్తారో అర్థం కావడం లేదు" అని జేన్ ఆవేదన వ్యక్తం చేశారు.

వ్యక్తిగతంగా కలుసుకోవడానికి అంగీకరించే ముందు, ఆరు నెలల పాటు తాము ఆన్‌లైన్‌లో, వీడియో కాల్స్‌లో మాట్లాడుకున్నామని జేన్ చెప్పారు.

ఇద్దరి మధ్య ఏర్పడిన అనుబంధం నిజమైందని నమ్మానని, అందుకే ఆయన పెళ్లి ప్రతిపాదన చేసినప్పుడు ఏమాత్రం అనుమాన పడలేదని, ఏమీ ప్రశ్నించలేదని ఆమె బీబీసీకి చెప్పారు.

"నన్ను ప్రేమిస్తున్నానని, నాతో కలిసి జీవితాన్ని నిర్మించుకోవాలనుకుంటున్నానని నమ్మించాడు, అందుకే అనుమానించడానికి నాకు ఏ కారణమూ కనిపించ లేదు" అని ఆమె చెప్పారు.

ఆ తర్వాత ఆడమ్ అసలు పేరువేరని, ఆయనకు అప్పటికే పెళ్ళైందని కూడా ఆమె తెలుసుకున్నారు. జేన్ చేసిన ఆరోపణలను ఆడమ్ పూర్తిగా తిరస్కరించారని ఆయన తరఫు న్యాయవాదులు తెలిపారు.

జూన్ 2వ తేదీన, ఇస్లాం మతంలోకి మారిన జేన్, షరియా చట్టం ప్రకారం జరిగే ఇస్లామిక్ వివాహ వేడుకైన ‘నిఖా’ కోసం లాంకషైర్‌లోని బ్రియర్‌ఫీల్డ్‌కు వెళ్ళారు.

అయితే, నిఖా లాంటి పెళ్లిళ్లు, ఒప్పందాలు.. చట్టబద్ధమైన వివాహంతో సమానం కావు. ఇంగ్లండ్, వేల్స్‌లోలో వాటిని చట్టబద్ధమైన పెళ్లిళ్లుగా గుర్తించరు.

సొంత నగరమైన గ్లాస్గోలో స్నేహితులు, కుటుంబ సభ్యుల సమక్షంలో పెళ్లి చేసుకోవాలనుకున్నానని జేన్ ఆయనతో చెప్పారు. కానీ స్కాట్లాండ్‌లో పెళ్లికి ఆయన అభ్యంతరం చెప్పారని ఆమె తెలిపారు.

వెనక్కి తిరిగి చూసుకుంటే ఆ క్షణం ఒక సంకేతంగా, హెచ్చరికగా ఆమె భావిస్తున్నారు.

‘‘స్కాట్లాండ్‌లో చట్టబద్ధమైన వివాహం, నిఖా రెండింటినీ ఒకే సమయంలో జరపాలని వాళ్లు(అధికారులు) కోరారు" అని ఆమె వివరించారు.

"వాళ్లకు నా ఐడీ ఎందుకు? నిఖా చాలా సులభం, దానికి నా ఐడీ చూడాల్సిన అవసరం అస్సలు లేదు" అని ఆయన అన్నారు.

"ఆ విషయం గురించి చాలా అప్‌సెట్ అయ్యారు" అని ఆమె గుర్తు చేసుకున్నారు.

బ్రియర్‌ఫీల్డ్‌లో జరిగిన వేడుకకు ఇద్దరు ఇమామ్‌లు సాక్షులుగా వ్యవహరించారని, ఆ తర్వాత రెండు రాత్రులు ఒక హోటల్‌లో గడిపామని జేన్ చెప్పారు.

అయితే, పెళ్లి జరిగిన కేవలం ఐదు రోజుల తర్వాత, వారి వివాహ బంధం ముగిసిపోయిందని చెబుతూ జేన్‌కు సందేశం వచ్చింది.

ఆ మెసేజ్ చూడగానే తాను దిగ్భ్రాంతికి, గందరగోళానికి గురయ్యానని చెప్పిన జేన్, జరిగిన పెళ్లిని ఒక మోసమని, నకిలీ వివాహమనీ అభివర్ణించారు.

ఈ 'దిగ్భ్రాంతికరమైన' అనుభవం భావోద్వేగపరమైన, లైంగికపరమైన దోపిడీగా భావిస్తున్నారు.

ఆయన చట్టపరంగా, మతపరంగా కూడా మరో మహిళతో వివాహ బంధంలోనే ఉన్నారని బీబీసీ తెలుసుకుంది.

న్యాయవాదుల ద్వారా ఇచ్చిన వివరణలో.. తనపై వస్తున్న ఆరోపణలు దుష్ప్రచారంలో భాగమని, వాటికి ఎలాంటి ఆధారాలు లేవని, అబద్ధమని ఆయన అన్నారు.

గతంలో జరిగిన వివాహం గురించి ఆయనెక్కడా ప్రస్తావించలేదు కాబట్టి అది మోసం కిందికి రాదని జేన్ లాయర్లు బీబీసీతో అన్నారు.

జేన్‌తో జరిగిన పెళ్లి సందర్భంగా ఆయన తన డ్రైవింగ్ లైసెన్స్‌ను చూపించారు కాబట్టి ఆయన తన ఐడెంటినీ కూడా దాచినట్లు భావించకూడదని పేర్కొన్నారు.

'ఇది బాధాకరం'

జేన్‌కు మసీదు ఇచ్చిన ఇస్లామిక్ వివాహ ధృవీకరణ పత్రాన్ని బీబీసీ చూసింది. అందులో తప్పుడు వివరాలు ఉన్నాయి.

ఈ వివాహం సంతోషంగా కనిపించిన ఇద్దరు వయోజనుల మధ్య పరస్పర అంగీకారంతో జరిగిందని, దీనిపై మరిన్ని ప్రశ్నలు అడగడం తన బాధ్యత కాదని భావిస్తున్నట్లు వేడుకను నిర్వహించిన ఇమామ్ ముఫ్తీ అదీల్ జమాన్ చెప్పారు.

"జరుగుతున్న పరిణామాలపై తీవ్ర విచారం వ్యక్తంచేస్తున్నాం" అని ఆయన బీబీసీకి తెలిపారు.

"అన్నిపక్షాల పట్ల న్యాయంగా వ్యవహరిస్తూ, మాకు ప్రత్యక్షంగా తెలిసిన విషయాలకే మా వ్యాఖ్యలను పరిమితం చేస్తూ, తగిన మద్దతు, సహాయాన్ని అందించడమే మా ఉద్దేశ్యం" అని వివరించారు.

గుర్తింపు పత్రాలను తనిఖీ చేయడంలో పొరపాట్లు జరిగాయని ఆయన అంగీకరించారు. కానీ జేన్ వివాహం చేసుకున్న వ్యక్తి అసలు ఐడెంటిటీని బయటపెట్టడంలో తాను సహాయం చేశానని చెప్పారు.

ఇలాంటి వివాహ వేడుకలను నిర్వహించేవారు తగిన తనిఖీలు చేపట్టాల్సిన బాధ్యత ఉందని ఈ కేసులో మధ్యవర్తిత్వం వహిస్తున్న లాంకషైర్ మసీదుల మండలి పేర్కొంది.

ముస్లిం కమ్యూనిటీలోనే ఉన్న ఇలాంటి మోసగాళ్ల కేసులు కొన్ని తమకు దృష్టికి వచ్చాయని 'న్యూ బిగినింగ్స్' అనే సంస్థ తెలిపింది. గ్రేటర్ మాంచెస్టర్ కేంద్రంగా పని చేసే ఈ సంస్థ ఇస్లాం మతంలోకి మారిన వారికి సేవలు అందిస్తుంది.

"మా ముస్లిం సమాజంలో ఉన్న ఈ మోసగాళ్ల గురించి, వారు మోసం చేయడానికి ప్రయత్నిస్తున్న ప్రజల గురించి మాకు తెలుసు" అని సంస్థ వ్యవస్థాపకుడు బిలాల్ బ్రౌన్ అన్నారు.

కుటుంబ సభ్యుల ప్రమేయం లేకపోవడం ఇలాంటి పెళ్లిళ్లు సవ్యమైనవి కాకపోవచ్చని భావించడానికి ఒక సంకేతమని ఆయన అన్నారు.

ఇలాంటి పరిస్థితుల్లో ఇస్లాం మతంలోకి మారినవారు ప్రమాదానికి గురయ్యే అవకాశం ఉందని చెప్పారు.

ఇస్లామిక్ వివాహాలకు చట్టపరమైన గుర్తింపు లేకపోవడం కొంతమంది మహిళలకు సమస్యగా మారవచ్చని లాంకషైర్ మాజీ సహాయ పోలీస్, క్రైమ్ కమిషనర్ సైమా అఫ్జల్ బీబీసీతో అన్నారు.

"మీరు తరచుగా వినే ఒక నిఖా లొసుగు ఉంది: 'యూకేలో నిఖాకు చట్టబద్ధ గుర్తంపు లేదు. కాబట్టి, బహుభార్యత్వం విషయంలో వాటిని విచారణ చేయలేం" అని ఆమె అన్నారు.

‘‘నిఖా విషయాన్ని పక్కన పెట్టి, ఇక్కడ ప్రవర్తన చూద్దాం. అంటే ఇందులో కుయుక్తి, ఒక స్త్రీని వలలో వేసుకోవడం వంటివి ఉన్నాయి. అంటే ఇది మోసం’’ అన్నారామె

ఇస్లామిక్ వివాహాలు జరిగినా ఎక్కువగా రిజిస్టర్ కావడం లేదనీ, దీనివల్ల ప్రజలకు చట్టబద్ధమైన రక్షణ దక్కకుండా పోతోందని 2018లో పార్లమెంటుకు సమర్పించిన ఒక స్వతంత్ర సమీక్షలో తేల్చింది.

జేన్ ఫిర్యాదుపై విచారణ జరపాలని తమకు ఆదేశాలు వచ్చాయని గ్రేటర్ మాంచెస్టర్ పోలీసులు ధృవీకరించారు. మరోవైపు మోసానికి పాల్పడిన ఆ వ్యక్తిని తమ ప్లాట్‌ఫామ్ నుంచి శాశ్వతంగా తొలగించినట్లు ‘మజ్’ వెబ్‌సైట్ తెలిపింది.

"చట్టబద్ధంగా లేదా ఇతరత్రా వివాహితులు జరిగాయా అని ధ్రువీకరించాల్సిందిగా ఇకపై యూజర్లను కోరతాం" అని ‘మజ్’ చీఫ్ ఎగ్జిక్యూటివ్ షాజాద్ యూనస్ అన్నారు.

పెళ్లయిన వాళ్లయితే సైన్ అప్ సమయంలోనే వారిని బ్లాక్ చేస్తామని తెలిపారు.

ఇతర మహిళలు ఇలాంటి పరిస్థితులను ఎదుర్కోకుండా నిరోధించడానికి తన కేసు సహాయపడాలని కోరుకుంటున్నట్లు జేన్ చెప్పారు.

"ఇది సమాజంలో ఒక సమస్య, నాలాంటి నిస్సహాయ స్థితిలో ఉన్న మరో మహిళకు నేను సహాయం చేయగలిగితే, అదే నాకు విజయం" అని ఆమె అన్నారు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)