మయోపియా: పిల్లల్లో దూరపు చూపు మందగించడానికి కారణాలు ఏంటి, నివారణకు ఏం చేయాలి?

స్మార్ట్‌ ఫోన్లు, టీవీలు, కంప్యూటర్లు, పుస్తకాలు.. వీటితోనే పిల్లల బాల్యం గడిచిపోతోందా?

ఆటలు, ఆరుబయట గడిపే సమయం తగ్గిపోవడంతో చిన్న వయసులోనే దూరపు చూపు సమస్య పెరుగుతోందా?

మయోపియా అంటే ఏమిటి? దీనికి స్క్రీన్‌ వినియోగమే కారణమా?

అట్రోపిన్ చుక్కలు, ప్రత్యేక కళ్లద్దాలు దీనికి పరిష్కారమవుతాయా?

తల్లిదండ్రులు తీసుకోవాల్సిన జాగ్రత్తలేమిటి?

ప్రస్తుత కాలంలో పిల్లల్లో ఎక్కువగా కనిపిస్తున్న కంటి సమస్యల్లో మయోపియా ఒకటి. దీనినే సాధారణంగా దగ్గరి చూపు (నియర్ సైటెండ్‌నెస్) అని పిలుస్తారు.

మయోపియా ఉన్న పిల్లలు పుస్తకాలు, మొబైల్ ఫోన్లు వంటి దగ్గర వస్తువులను స్పష్టంగా చూడగలుగుతారు. కానీ వారికి దూరంలో ఉన్న బ్లాక్‌ బోర్డు, టీవీ, రోడ్డు సూచికలు, వ్యక్తుల ముఖాలు అస్పష్టంగా కనిపిస్తాయి.

గతంలో సాధారణంగా టీనేజ్ వయసులో ఎదురయ్యే ఈ సమస్య ఇప్పుడు ప్రాథమిక పాఠశాల వయసులోనే కనిపిస్తోంది. చిన్న వయసులో మయోపియా ప్రారంభమైతే, పెరిగే వయసుతో పాటు కంటి పవర్ కూడా వేగంగా పెరిగే అవకాశం ఉంటుంది. అందువల్ల కేవలం కళ్లద్దాలు ఇచ్చి సరిపెట్టకుండా, మయోపియా పెరుగుదలను నియంత్రించడం కూడా చాలా ముఖ్యం.

మయోపియా ఎందుకు వస్తుంది?

సాధారణంగా మనం చూసే వస్తువు నుంచి వచ్చే కాంతి కిరణాలు కంటి కార్నియా, లెన్స్ ద్వారా వక్రీభవించి రెటీనా మీద కేంద్రీకృతమవుతాయి. మయోపియా ఉన్నవారిలో కంటి పొడవు సాధారణం కంటే ఎక్కువగా ఉండటం లేదా కంటి కాంతి వక్రీభవన శక్తి అధికంగా ఉండటం వల్ల కాంతి కిరణాలు రెటీనాకు ముందే కేంద్రీకృతమవుతాయి. ఫలితంగా దూరపు వస్తువులు మసకగా కనిపిస్తాయి.

మయోపియా సాధారణంగా బాల్యంలో ప్రారంభమై, శరీర ఎదుగుదలతో పాటు కంటి పొడవు పెరుగుతున్న కొద్దీ ఎక్కువ కావచ్చు. ముఖ్యంగా 6–12 సంవత్సరాల మధ్య ప్రారంభమైన మయోపియాలో వేగంగా పవర్ పెరిగే అవకాశం ఉంది.

పిల్లల్లో మయోపియా పెరగడానికి కారణాలేమిటి?

మయోపియా రావడానికి జన్యుపరమైన, పర్యావరణపరమైన రెండు రకాల కారణాలున్నాయి.

1.జన్యుపరమైన కారణాలు

తల్లిదండ్రుల్లో ఒకరికి మయోపియా ఉంటే పిల్లలకూ వచ్చే అవకాశం పెరుగుతుంది. ఇద్దరికీ మయోపియా ఉంటే ఆ ప్రమాదం మరింత ఎక్కువ. అయితే తల్లిదండ్రులకు కంటి సమస్య లేకపోయినా పిల్లలకు మయోపియా రావచ్చు.

2. దగ్గరగా చూసే పనులు ఎక్కువసేపు చేయడం

పుస్తకాలు చదవడం, మొబైల్ ఫోన్లు చూడటం, టాబ్లెట్లు, కంప్యూటర్లపై ఎక్కువసేపు పనిచేయడం వంటి దగ్గరి పనులు ఎక్కువగా చేయడం వలన మయోపియా వచ్చే అవకాశం ఉంది. ముఖ్యంగా పుస్తకాలను లేదా మొబైల్‌ను కళ్లకు అతి దగ్గరగా పెట్టుకోవడం, విరామం లేకుండా ఎక్కువసేపు చదవడం ఈ ప్రమాదాన్ని పెంచవచ్చు.

3. ఆరుబయట ఆటలు తగ్గిపోవడం

ప్రస్తుత పిల్లలు ఆట స్థలాల్లో గడిపే సమయం తగ్గించి ఇంట్లోనే మొబైల్ ఫోన్లు, టీవీలు, వీడియో గేమ్స్‌తో ఎక్కువ సమయం గడుపుతున్నారు. సహజమైన పగటి వెలుతురులో గడిపే సమయం తగ్గిపోవడం కూడా మయోపియాకు కారణాల్లో ఒకటి.

పిల్లలు, టీనేజర్లలో ఎక్కువగా..

పరిశోధనల ప్రకారం ఆరుబయట ఎక్కువ సమయం గడిపే పిల్లల్లో కొత్తగా మయోపియా ప్రారంభమయ్యే ప్రమాదం తక్కువగా ఉంటుంది.

ప్రపంచవ్యాప్తంగా పిల్లలు, టీనేజర్లలో మయోపియా వేగంగా పెరుగుతోంది.

1990లో ప్రపంచవ్యాప్తంగా పిల్లలు, యువతలో మయోపియా ప్రాబల్యం సుమారు 24.3 శాతం ఉండగా, 2023 నాటికి అది 35.8 శాతానికి పెరిగింది.

2050 నాటికి ఇది 39.8 శాతానికి చేరుకోవచ్చని, అంటే సుమారు 74 కోట్ల మందికి పైగా పిల్లలు, యువత మయోపియా బారిన పడవచ్చని 2024లో 'బ్రిటిష్ జర్నల్ ఆఫ్ ఆప్తల్మాలజీ'లో ప్రచురితమైన ఒక సమగ్ర విశ్లేషణ అంచనా వేసింది.

భారత్‌లో పట్టణాల్లోని 5–15 సంవత్సరాల పిల్లల్లో మయోపియా ప్రాబల్యం 1999లో 4.44 శాతం ఉండగా, 2019లో 21.15 శాతానికి పెరిగినట్లు ఒక అధ్యయనం వెల్లడించింది.

పిల్లల్లో మయోపియా లక్షణాలు ఎలా గుర్తించాలి?

చిన్నపిల్లలు తమకు చూపు సమస్య ఉందని చెప్పలేకపోవచ్చు. అందువల్ల తల్లిదండ్రులు కొన్ని లక్షణాలను గమనించాలి.

కంటి వైద్యులు పిల్లల దృష్టి సామర్థ్యాన్ని పరీక్షించడంతో పాటు రిఫ్రాక్షన్ పరీక్ష నిర్వహించి మయోపియాను గుర్తిస్తారు.

మయోపియా చికిత్సకు కళ్లద్దాలు మాత్రమే సరిపోతాయా?

మయోపియా చికిత్సలో రెండు అంశాలు ముఖ్యం.

సాధారణ కళ్లద్దాలు లేదా కాంటాక్ట్ లెన్స్‌లు దూరపు చూపును స్పష్టంగా చేస్తాయి. అయితే ఇవి ఒక్కటే కంటి పొడవు పెరుగుదలను సమర్థంగా నియంత్రించలేవు. అందుకే ప్రస్తుతం మయోపియా కంట్రోల్ చికిత్సలకు ప్రాధాన్యం పెరుగుతోంది.

మయోపియా నియంత్రణలో చుక్కల మందు పాత్ర

పిల్లల్లో మయోపియా వేగంగా పెరుగుతున్నప్పుడు నేత్ర వైద్యులు తక్కువ మోతాదులో కొన్ని రకాల కంటి చుక్కల మందును సూచించవచ్చు. ఇవి కంటి పెరుగుదల వేగాన్ని తగ్గించి, మయోపియా పురోగతిని నియంత్రించడంలో సాయపడతాయి.

అయితే వీటి వాడకంతో కాంతిని చూడలేక ఇబ్బంది పడటం (ఫోటోఫోబియా), కంటిపాప పెద్దదిగా మారడం, దగ్గరి వస్తువులను చూడటంలో తాత్కాలిక ఇబ్బంది, కంటిలో మంట లేదా అలర్జీ లాంటి కొన్ని దుష్ప్రభావాలు ఉండవచ్చు.

ముఖ్యంగా ఈ చుక్కలను వైద్యుల సలహా లేకుండా ఉపయోగించకూడదు. చికిత్సను ఎప్పుడు ప్రారంభించాలి, ఎంత మోతాదులో వాడాలి, ఎప్పుడు తగ్గించాలి లేదా ఆపాలి అనే విషయాలను నేత్ర వైద్యుడే నిర్ణయించాలి. చుక్కలు ఆపిన తర్వాత కొందరిలో మయోపియా మళ్లీ వేగంగా పెరిగే అవకాశం (రీబౌండ్ ఎఫెక్ట్) కూడా ఉంటుంది.

మయోపియా కంట్రోల్ లెన్సెస్

సాధారణ కళ్లద్దాలకు భిన్నంగా, ప్రత్యేకంగా రూపొందించిన మయోపియా కంట్రోల్ లెన్స్‌లు కంటి పొడవు పెరుగుదలను తగ్గించడానికి ఉద్దేశించినవి.

వీటిలో ముఖ్యమైనవి:

1. డీఐఎంఎస్ లెన్సెస్(డీఫోకస్ ఇన్‌కార్పొరేటెడ్ మల్టిపుల్ సెగ్మెంట్స్)

2. హెచ్ఏఎల్‌టీ లెన్సెస్(హైలీ యాస్పిరికల్ లెన్స్‌లెట్ టార్గెట్)

మయోపియాను నియంత్రించడానికి మల్టీఫోకల్ కాంటాక్ట్ లెన్సెస్, ఆర్థోకెరటోలజీ వంటి పద్ధతులు కూడా ఉపయోగిస్తారు. ఈ చికిత్సా విధానాలను పిల్లల వయసు, కంటి పవర్, మయోపియా పెరుగుదల వేగం, కుటుంబ చరిత్రను బట్టి ఎంపిక చేస్తారు.

మయోపియా నివారణ - ఆరుబయట ఆటల ప్రాధాన్యం

మయోపియా రాకుండా నివారించడంలో అత్యంత సులభమైన, అందుబాటులో ఉన్న మార్గాల్లో ఆరుబయట గడిపే సమయం పెంచడం ఒకటి.

పిల్లలు ప్రతిరోజూ కనీసం 2 గంటల పాటు ఆరుబయట సహజమైన పగటి వెలుతురులో గడిపేలా ప్రోత్సహించాలి.

క్రికెట్, ఫుట్‌బాల్, బ్యాడ్మింటన్ వంటి ఆటలు ఆడేలా ప్రోత్సహించాలి.

పార్కులు, ఆటస్థలాల్లో పిల్లలు సమయం గడిపేలా చూడాలి.

ఉదయం లేదా సాయంత్రం పగటి వెలుతురులో నడవడం, ఆడుకోవడం అలవాటు చేయాలి.

పాఠశాలల్లో కూడా ఆటలకు తగిన సమయం కేటాయించాలి.

సహజమైన వెలుతురు కంటిలో డోపమైన్ విడుదలను ప్రేరేపించడం ద్వారా కంటి పొడవు అధికంగా పెరగకుండా సహాయపడవచ్చని పరిశోధనలు సూచిస్తున్నాయి.

ముఖ్యంగా ఆరుబయట సమయం గడపడం కొత్తగా మయోపియా వచ్చే ప్రమాదాన్ని తగ్గించడంలో ఉపయోగపడుతుంది. ఇప్పటికే మయోపియా ఉన్న పిల్లల్లో కూడా ఆరోగ్యకరమైన అలవాటుగా దీన్ని కొనసాగించాలి. అయితే ఇది కంటి చుక్కలు లేదా ఇతర మయోపియా కంట్రోల్ చికిత్సలకు ప్రత్యామ్నాయం కాదు.

స్క్రీన్ టైమ్ తగ్గించడం ముఖ్యమా?

మొబైల్ ఫోన్లు, టాబ్లెట్లు, కంప్యూటర్లు పిల్లల జీవితంలో ఇప్పుడు భాగమైపోయాయి. అయితే వాటిని అవసరానికి మించి ఉపయోగించడం, ముఖ్యంగా నిరంతరం దగ్గరి దూరంలో చూడటం సమస్యలకు దారితీయవచ్చు.

అందుకే తల్లిదండ్రులు కొన్ని జాగ్రత్తలు పాటించాలి.

1. రెండేళ్లలోపు పిల్లలకు వీడియో కాల్స్ వంటి పరిమిత అవసరాలు మినహా స్క్రీన్ వినియోగాన్ని వీలైనంత వరకు నివారించాలి.

2. పెద్ద పిల్లలకు వయసుకు తగిన స్క్రీన్ టైమ్ పరిమితులు పాటించాలి.

3. మొబైల్ ఫోన్‌ను కళ్లకు అతి దగ్గరగా పెట్టుకోకుండా కనీసం 30–40 సెంటీమీటర్ల దూరంలో ఉంచాలి.

4. కంప్యూటర్ స్క్రీన్‌ను సుమారు ఒక చేయి దూరంలో ఉంచాలి.

5. ప్రతి 20 నిమిషాలకు 20 అడుగుల దూరంలో ఉన్న వస్తువును 20 సెకన్ల పాటు చూడాలి (20-20-20 Rule). ఇది ప్రధానంగా కంటి అలసటను తగ్గించడానికి ఉపయోగపడుతుంది.

6. చీకటి గదిలో మొబైల్ ఫోన్లు ఉపయోగించకుండా తగిన వెలుతురు ఉండేలా చూడాలి. నిద్రపోయే ముందు మొబైల్ వినియోగాన్ని తగ్గించాలి.

మయోపియాను నిర్లక్ష్యం చేస్తే ప్రమాదమా?

సాధారణ మయోపియాలో కళ్లద్దాలతో చూపును సరిచేయవచ్చు. అయితే మయోపియా తీవ్రంగా పెరిగి హై మయోపియా (High Myopia) స్థాయికి చేరితే భవిష్యత్తులో రెటీనా పలుచబడటం, రెటీనా విడిపోవడం, గ్లకోమా, మాలిక్యులర్ డీజెనరేషన్, కంటిశుక్లం చిన్న వయసులోనే వచ్చే ప్రమాదం వంటి కొన్ని తీవ్రమైన కంటి సమస్యల ప్రమాదం పెరుగుతుంది.

అపోహలు – వాస్తవాలు

అపోహ: కళ్లద్దాలు పెట్టుకుంటే కంటి పవర్ ఇంకా పెరుగుతుంది.

వాస్తవం: సరైన పవర్ ఉన్న కళ్లద్దాలు ధరిస్తే మయోపియా పెరగదు. కళ్లద్దాలు పెట్టకపోవడం వల్ల చూపు సమస్యలు, చదువులో ఇబ్బందులు రావచ్చు.

అపోహ: మొబైల్ ఫోన్ల వల్ల మాత్రమే మయోపియా వస్తుంది.

వాస్తవం: జన్యుపరమైన కారణాలు, దగ్గరి పనులు, ఆరుబయట సమయం తగ్గడం వంటి అనేక అంశాలు మయోపియాతో సంబంధం కలిగి ఉంటాయి.

అపోహ: పెద్దయ్యాక మయోపియా దానంతట అదే తగ్గిపోతుంది.

వాస్తవం: పిల్లల్లో మయోపియా సాధారణంగా ఎదుగుదల సమయంలో పెరుగుతుంది. పెద్దయ్యాక స్థిరపడవచ్చు. కానీ పూర్తిగా తగ్గిపోతుందని చెప్పలేం.

అపోహ: కంటి వ్యాయామాలు చేస్తే మయోపియా తగ్గిపోతుంది.

వాస్తవం: కంటి వ్యాయామాలు మయోపియాను నయం చేయవు. అయితే కొన్ని ప్రత్యేక కంటి కండరాల సమస్యలకు వ్యాయామాలు ఉపయోగపడవచ్చు.

అపోహ: కొన్ని రకాల చుక్కల మందు వాడితే కంటి పవర్ పూర్తిగా తగ్గిపోతుంది.

వాస్తవం: చుక్కలు మయోపియా పెరుగుదల వేగాన్ని తగ్గిస్తాయి. ఇప్పటికే ఉన్న కంటి పవర్‌ను పూర్తిగా తొలగించవు.

అపోహ: ప్రత్యేక కళ్లద్దాలు పెట్టుకుంటే మయోపియా శాశ్వతంగా నయమవుతుంది.

వాస్తవం: మయోపియా కంట్రోల్ కళ్లద్దాలు పవర్ పెరుగుదలను తగ్గించడానికి సహాయపడతాయి. పూర్తిగా నయం చేయవు.

పిల్లల కంటి ఆరోగ్యం – తల్లిదండ్రులకు 10 సూత్రాలు

మయోపియా అనేది కేవలం కళ్లద్దాలతో సరిచేసుకునే చిన్న సమస్య మాత్రమే కాదు. చిన్న వయసులో ప్రారంభమై వేగంగా పెరిగితే భవిష్యత్తులో తీవ్రమైన కంటి సమస్యలకు కారణమయ్యే అవకాశం ఉంది. అందువల్ల పిల్లల్లో చూపు సమస్యలను తొలిదశలోనే గుర్తించడం, అవసరమైనప్పుడు ఆధునిక మయోపియా కంట్రోల్ చికిత్సలు అందించడం ముఖ్యం.

పిల్లలకు ఖరీదైన గాడ్జెట్ల కంటే ఆరోగ్యకరమైన ఆటలు, సహజమైన వెలుతురు, మంచి కంటి ఆరోగ్యం ఎంతో అవసరం.

(గమనిక: రచయిత ఓ డాక్టర్. వైద్యపరమైన విధానాలు, చికిత్సలపై అవగాహన కల్పించడమే ఈ ఆర్టికల్ ఉద్దేశం. ఆరోగ్యపరమైన ఏ నిర్ణయమైనా డాక్టర్‌ను సంప్రదించి మాత్రమే తీసుకోగలరు)

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)