అస్సాంలో మినీ బస్సు,కంటైనర్ ట్రక్ ఢీ, 24 మంది మృతి
ఫొటో సోర్స్, ANI
అస్సాంలోని కజిరంగా జాతీయ పార్కు దగ్గర మినీబస్సు, కంటైనర్ ట్రక్ ఎదురెదురుగా ఢీకొన్న ఘటనలో 24 మంది మృతి చెందారు. మరో 11 మంది గాయపడ్డారు.
ఈ ప్రమాదంలో 24 మంది మరణించారని ప్రమాద స్థలాన్ని సందర్శించిన అస్సాం మంత్రి అతుల్ బోరా చెప్పారు.
రెండు వాహనాల్లో ఏదో ఒకటి అతివేగంగా నడపడం వల్లే ఈ ప్రమాదం జరిగి ఉండొచ్చని, అయితే ప్రమాదానికి అసలు కారణం దర్యాప్తు తర్వాతే తెలుస్తుందని అన్నారు.
మృతుల్లో ఇద్దరు మహిళలు, పలువురు కాలేజీ విద్యార్థులు ఉన్నారని న్యూస్ ఏజెన్సీ పీటీఐ తెలిపింది. వారిలో చాలామంది కళాశాల నుంచి ఇంటికి తిరిగి వస్తున్న విద్యార్థులే.
జాతీయ రహదారి-715పై హాథీకులీ టీ ఎస్టేట్ సమీపంలో ఉన్న రోంగాజన్ దగ్గర ఈ ప్రమాదం జరిగిందని ఒక సీనియర్ అధికారి తెలిపారు.
"గాయపడిన వారికి ఎలాంటి ఆలస్యం లేకుండా సాధ్యమైనంత మెరుగైన చికిత్స అందేలా చూడటమే మా ప్రాధాన్యం" అని అస్సాం ముఖ్యమంత్రి హిమంత బిశ్వ శర్మ సోషల్ మీడియాలో పోస్ట్ చేశారు.
అస్సాంలోని జాతీయ రహదారులు అవినీతికి అడ్డాలుగా మారిపోయాయని కాంగ్రెస్ ఎంపీ గౌరవ్ గొగోయ్ ఆరోపించారు. రహదారుల నిర్మాణ నాణ్యత చాలా దారుణంగా ఉందని అందుకే ప్రతి నెలా ప్రమాదాలు జరుగుతున్నాయని అన్నారు.
‘‘కేంద్ర ప్రభుత్వం టోల్ ఫీజులు ఎందుకు వసూలు చేస్తోందో, అదే సమయంలో జాతీయ రహదారుల నిర్వహణను ఎందుకు సక్రమంగా నిర్వహించడం లేదో తెలియడం లేదు. ఇది చాలా దురదృష్టకరం. ఈ ప్రమాదాన్ని పూర్తిగా నివారించే అవకాశం ఉంది. కానీ కాంట్రాక్టర్ల అత్యాశ, అవినీతి, రాజకీయ నాయకులతో వారికి ఉన్న సంబంధాల వల్లే ఇలాంటి ఘటనలు జరుగుతున్నాయి. చివరకు సామాన్య ప్రజలు ఇబ్బందులు పడాల్సి వస్తోంది" అని ఆయన అన్నారు.
(బీబీసీ కోసం కలెక్టివ్ న్యూస్‌రూమ్ ప్రచురణ)
(బీబీసీ తెలుగును వాట్సాప్, ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)
