మధ్యప్రదేశ్: నోటిలో రసగుల్లా పేలి యువకుడు మృతి.. అసలేం జరిగింది?

(ఈ కథనంలో కొన్ని అంశాలు కలిచివేయవచ్చు)

మధ్యప్రదేశ్‌లోని దిండౌరీ జిల్లాలో 35 ఏళ్ల రాజేంద్ర బరౌతియాకు ఆయన స్నేహితుడు ఓ రసగుల్లా ఇచ్చారు.

ఆ రసగుల్లాను రాజేంద్ర నోట్లో వేసుకోగానే పెద్ద శబ్దంతో పేలిపోయింది.

ఆస్పత్రిలో చికిత్స పొందుతూ రాజేంద్ర మరణించారు.

దిండౌరీలోని పడ్రియా ఛాంటా గ్రామంలో రాజేంద్ర నివసిస్తున్నారు. ఆయన ఇంటి పక్కన రామ్‌భగత్ సింగ్ బరౌతియా ఉంటున్నారు. ఈ నెల 10న పందులను చంపడానికి ఉపయోగించే నాటు బాంబును రామ్‌భగత్ సింగ్ రసగుల్లా అంటూ రాజేంద్రకు ఇచ్చారని పోలీసులు తెలిపారు.

ఈ ఘటనలో పోలీసులు ఇద్దరిని అరెస్టు చేశారు.

బాంబు ఉన్న రసగుల్లాను రాజేంద్రకు ఇచ్చిన రాంభగత్‌తో పాటు అడవిలో నాటు బాంబును గుర్తించిన మరో వ్యక్తిని అరెస్టు చేశారు.

ఇద్దరు నిందితులను అరెస్టు చేశామని, దర్యాప్తు కొనసాగుతోందని దిండౌరీ కోత్వాలి పోలీస్ స్టేషన్ ఇన్‌చార్జ్ దుర్గా ప్రసాద్ నాగ్పురే బీబీసీతో చెప్పారు.

రసగుల్లాలో ఏం ఉంది?

నవంబర్ 10వ తేదీ సాయంత్రం రాజేంద్ర బరౌతియా తన కుటుంబసభ్యులతో కలిసి ఇంటి ఆవరణలో చలిమంట కాచుకుంటున్నారు. ఆయన భార్య, బిడ్డ, నానమ్మ కూడా అక్కడే ఉన్నారు.

ఆ సమయంలో పొరుగునే ఉండే రామ్ భగత్ సింగ్ అక్కడికి వచ్చారు. ఇద్దరూ చలిమంట దగ్గర కూర్చుని మాట్లాడుకోవడం మొదలుపెట్టారు. వాళ్లిద్దరి మధ్య సంభాషణ సరదాగా సాగిందని పోలీసులు చెప్పారు.

తర్వాత రాజేంద్రకు రామ్ భగత్ ఒక చిన్న బంతి ఆకారంలో ఉన్న వస్తువును ఇచ్చారు.

అది రసగుల్లా అని, రుచి చూడమని రాజేంద్రతో రామ్ భగత్ చెప్పినట్టు నాగ్పురే తెలిపారు.

"దీపావళి పండుగ గురించి మాట్లాడుతూ రామ్ భగత్ నా భర్తను రసగుల్లా రుచి చూడమని ఇచ్చారు. ఆయన దాన్ని నోట్లో పెట్టుకుని నమలగానే ఒక్కసారిగా పేలుడు సంభవించింది" అని రాజేంద్ర భార్య సుశీలా బాయీ బీబీసీతో చెప్పారు.

"ఏం జరిగిందో నాకేం అర్థం కాలేదు. నా భర్త దవడ పూర్తిగా చీలిపోయింది. ఒక్కక్షణంలోనే ఆయన ముఖం గుర్తుపట్టలేనివిధంగా మారిపోయింది" అని సుశీల తెలిపారు.

ఆ తర్వాత కుటుంబ సభ్యులు ఆయన్ను ఆటోలో దిండౌరీ జిల్లా ఆస్పత్రికి తీసుకువెళ్లారు.

అక్కడ చికిత్స పొందుతూ రాజేంద్ర మరణించారు.

మరుసటి రోజు పోస్ట్‌మార్టం అనంతరం మృతదేహాన్ని కుటుంబ సభ్యులకు అప్పగించారు.

జంతువులను చంపడానికి ఉపయోగించే బాంబును తన భర్త తిన్నారని రాజేంద్ర భార్య సుశీలాబాయి చెప్పారు.

భర్త మరణంతో సుశీల, ఆమె బిడ్డ ఒంటరివాళ్లయ్యారు.

రసగుల్లా పేరుతో ఇచ్చిన బాంబు ఎక్కడిది?

ఈ కేసులో అరెస్టు అయిన రెండో నిందితుడు అడవిలో పేలుడు పదార్థాలను గుర్తించిన వ్యక్తని పోలీసులు చెప్పారు.

అడవిలో దొరికిన బాంబును ఆ వ్యక్తి రామ్ భగత్ సింగ్‌కు ఇచ్చారు. ఆ తర్వాత రామ్ భగత్ దానిని రసగుల్లా అని చెప్పి రాజేంద్రకు ఇచ్చారు. ఆ బాంబును అడవిలో ఎవరు పెట్టారో తెలుసుకోవడానికి దర్యాప్తు జరుగుతోంది.

అరెస్టు అయిన ఇద్దరు వ్యక్తులకు, రాజేంద్రకు మధ్య గతంలో ఎలాంటి శత్రుత్వం లేదని ప్రాథమిక విచారణలో వెల్లడైందని పోలీసులు తెలిపారు.

ఇద్దరు నిందితులపై భారత న్యాయసంహితలోని సెక్షన్ 105, పేలుడు పదార్థాల చట్టంలోని సెక్షన్లు 3, 4 కింద కేసు నమోదు చేశారు.

ఈ బాంబు ఎంత ప్రమాదకరం?

మధ్య భారతంలోని అనేక గ్రామీణ ప్రాంతాల్లో అడవి పందులను చంపడానికి బాంబులను ఉపయోగిస్తుంటారు. వీటిని పిగ్ బాంబ్స్ లేదా సుర్‌మార్ బాంబ్స్ అని పిలుస్తారు.

ఇలాంటి నాటుబాంబులను తినుబండారాల్లో కలిపి అడవిలో ఉంచుతారు. అడవి పందులు లేదా ఇతర చిన్న జంతువులు వాటిని నమలగానే అవి వాటి నోటిలోనే పేలిపోతాయి. దీంతో జంతువులు చనిపోతాయి.

ఇలాంటి పేలుడు పదార్థాలు ఎంత ప్రమాదకరంగా ఉంటాయనేది వాటిలో పెట్టే కెమికల్స్‌పై ఆధారపడి ఉంటుందని ఇండోర్‌కు చెందిన పేలుడు పదార్థాల నిపుణులు శరద్ సర్వటే చెప్పారు. ఇలాంటి బాంబులలో ఉపయోగించే పదార్థాలు ఒత్తిడికి గురై పేలతాయన్నారు.

"అమ్మోనియం నైట్రేట్, నైట్రేట్ జెల్లీ వంటివాటిని ఉపయోగించి తయారుచేసే కొన్ని పేలుడు పదార్థాలను నలిపినప్పుడు అవి వేగంగా వాయువును ఉత్పత్తి చేస్తాయి. దీంతో ఒత్తిడి పెరిగి పేలుడు జరుగుతుంది'' అని సర్వతే తెలిపారు.

ఇలాంటి మిశ్రమాలు జెల్ లేదా టూత్‌పేస్ట్‌లాగా ఉంటాయని, ఇవి దీపావళి సమయంలో పేల్చే 'సుత్లీ బాంబ్' పరిమాణంలో ఉంటాయని అన్నారు.

"తక్కువ తీవ్రతతో పేలుడు అవసరమయ్యేచోట ఇలాంటి పేలుడు పదార్థాలను ఉపయోగిస్తారు. పందుల వంటి అడవి జంతువులను చంపడానికి చిన్న పేలుడు సరిపోతుంది. దీనివల్ల వాటి శరీరంలోని మిగిలిన భాగాలను ఉపయోగించుకోడానికి అవకాశముంటుంది. ఈ బాంబును నమిలినా లేదా నొక్కినా వెంటనే అది పేలిపోతుంది. దాంతో ప్రభావితమైన శరీర భాగం తీవ్రంగా గాయపడుతుంది" అని సర్వటే అన్నారు.

సంఘటనా స్థలం నుంచి పేలుడు పదార్థాల అవశేషాలు, ఇతర నమూనాలను దిండౌరీ పోలీసులు సేకరించారు. ఈ నమూనాలను ఫోరెన్సిక్ సైన్స్ లాబొరేటరీకి పంపిస్తామని దుర్గా ప్రసాద్ నాగ్పురే చెప్పారు.

అరెస్టు అయిన వ్యక్తులకు, మృతుడికి మధ్య ఎలాంటి వివాదం లేదా శత్రుత్వం ఉన్నట్టు ఇప్పటివరకు జరిగిన దర్యాప్తులో వెల్లడి కాలేదని ఆయన అన్నారు. బాంబులో ఎలాంటి పదార్థాలున్నాయో తెలుసుకోవడానికి దానిని పరీక్షలకోసం పంపిస్తున్నామని చెప్పారు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)