అమెరికాలో మధ్యంతర ఎన్నికల ప్రాధాన్యత ఏంటి? భారత్ మీద వీటి ప్రభావం ఎలా ఉండొచ్చు?

అమెరికాలో మధ్యంతర ఎన్నికలు జరుగుతున్నాయి. ఈ ఎన్నికలకు సంబంధించిన ముందస్తు ఓటింగ్ ఇప్పటికే ప్రారంభమైంది. ఇప్పటివరకు సుమారు 4 కోట్ల మంది అమెరికా పౌరులు తమ ఓట్లను వేశారు.

పోలింగ్ ముగిసిన వెంటనే ఓట్ల లెక్కింపు ప్రారంభమవుతుంది. యావత్ ప్రపంచం ఈ ఎన్నికలను గమనిస్తోంది. భారతదేశం కూడా ఈ పరిణామాలను నిశితంగా గమనిస్తోంది.

అమెరికా ప్రతినిధుల సభ (దిగువ సభ)లోని 435 స్థానాలకు, సెనేట్ (ఎగువ సభ)లోని 35 స్థానాలకు ఎన్నికలు జరుగుతున్నాయి.

ప్రస్తుతం యూఎస్ కాంగ్రెస్ ఉభయ సభలలోనూ ట్రంప్ ప్రాతినిధ్యం వహిస్తున్న రిపబ్లికన్ పార్టీకి మెజారిటీ ఉంది. ఇప్పుడు డెమొక్రటిక్ పార్టీ ఈ సభలపై నియంత్రణ సాధించడానికి ప్రతి సభలోనూ అదనంగా నాలుగు సీట్లు గెలుచుకోవాలి.

ఈ మధ్యంతర ఎన్నికలు అధ్యక్షుడు ట్రంప్ ప్రజాదరణకు పరీక్షగా నిలవడమే కాకుండా, ఆమెరికా కాంగ్రెస్‌పై ఆయన పార్టీ మెజారిటీని నిలుపుకోగలదా లేదా అనేదానికి కూడా ఒక సూచికగా పనిచేస్తాయి.

రిపబ్లికన్ పార్టీ ఏ సభలోనైనా మెజారిటీని కోల్పోతే, అధ్యక్షుడు ట్రంప్ తన విధానాలు, నిర్ణయాలకు ఆమోదం పొందడం కష్టతరం అవుతుంది.

ఈ నేపథ్యంలో చాలామంది మదిలో ఒక ప్రశ్న వినిపిస్తోంది.

ఒకవేళ అమెరికా కాంగ్రెస్‌లో పవర్ బ్యాలన్స్ మారితే , దిగుమతి సుంకాలు, హెచ్1బీ వీసాలు, రష్యా నుంచి చమురు కొనుగోలు వంటి అంశాలపై భారతదేశానికి కొంత ఉపశమనం లభిస్తుందా?

మధ్యంతర ఎన్నికలు ఎందుకు వస్తాయి?

అమెరికా అధ్యక్షుడి పదవీకాలం నాలుగు సంవత్సరాలు. ఈ ఎన్నికలు ఆ పదవీకాలంలో రెండో సంవత్సరంలో జరుగుతాయి. అందుకే వీటిని ‘మిడ్‌టర్మ్’ (మధ్యంతర) ఎన్నికలు అని అంటారు.

అమెరికా కాంగ్రెస్‌లో రెండు సభలు ఉంటాయి:

అమెరికా సంయుక్త రాష్ట్రాల కాంగ్రెస్‌లో, దేశం మొత్తం కోసం సమాఖ్య చట్టాలు తయారుచేసి, అమలు చేస్తారు. ఈ చట్టాలు దేశవ్యాప్తంగా వర్తిస్తాయి.

అమెరికా కాంగ్రెస్‌లో అధ్యక్షుడు ట్రంప్ రిపబ్లికన్ పార్టీ లేదా ప్రతిపక్ష డెమొక్రటిక్ పార్టీలో ఏది మెజారిటీని కలిగి ఉంటుందో మధ్యంతర ఎన్నికల ఫలితాలు నిర్ణయిస్తాయి.

ఇప్పటివరకు అధ్యక్షుడు ట్రంప్ పనితీరు పట్ల అమెరికా ప్రజలు ఎంత సంతృప్తిగా ఉన్నారో కూడా ఈ ఎన్నికల ఫలితాలు సూచిస్తాయి.

ఇక ప్రతినిధుల సభ విషయానికొస్తే, మొత్తం 435 స్థానాలకు ఎన్నికలు జరుగుతున్నాయి. ఈ సభలోని సభ్యులు రెండేళ్లపాటు పదవిలో ఉంటారు. కొత్త చట్టాల కోసం ప్రతిపాదనలు సాధారణంగా ఈ సభలోనే ప్రవేశపెడతారు, చర్చిస్తారు.

ప్రస్తుత ప్రతినిధుల సభలో 435 స్థానాలకుగాను రిపబ్లికన్ పార్టీకి 219 స్థానాలు, డెమొక్రటిక్ పార్టీ 214 స్థానాల బలం ఉంది. రెండు స్థానాలు ఖాళీగా ఉన్నాయి.

సెనేట్ అనేది అమెరికా కాంగ్రెస్ ఎగువ సభ. దీనిలోని 100 స్థానాలకుగాను 35 స్థానాలకు ఎన్నికలు జరుగుతున్నాయి. సెనేటర్లు ఆరేళ్లపాటు పదవిలో ఉంటారు. ప్రతినిధుల సభ ముందుకు తెచ్చిన ప్రతిపాదనలను ఆమోదించే లేదా అడ్డుకునే అధికారం సెనేట్‌కు ఉంది.

ప్రతినిధుల సభ తెచ్చిన చట్ట ప్రతిపాదనలను ఆమోదించే లేదా నిరోధించే అధికారం సెనేట్‌కు ఉంది. 100 సెనేట్ స్థానాలలో 53 స్థానాలు రిపబ్లికన్ పార్టీ, 45 స్థానాలు డెమొక్రటిక్ పార్టీకి ఉన్నాయి. అదనంగా, డెమొక్రటిక్ పార్టీతో పొత్తు పెట్టుకున్న ఇద్దరు స్వతంత్ర సెనేటర్లు కూడా ఉన్నారు.

ఈ ఎన్నికల్లో యునైటెడ్ స్టేట్స్‌లోని చాలా ప్రాంతాల్లోని ఓటర్లు రాష్ట్ర స్థాయి నాయకులను కూడా ఎన్నుకోనున్నారు.

వీటిలో, కాలిఫోర్నియా, ఫ్లోరిడా, జార్జియా, మిషిగన్ వంటి రాష్ట్రాల్లో జరిగే గవర్నర్ ఎన్నికలు అత్యధిక దృష్టిని ఆకర్షిస్తున్నాయి.

మధ్యంతర ఎన్నికల్లో ఎవరికి పైచేయి ఉంది?

గతంలో కూడా అమెరికన్ ఓటర్లు అధికారంలో ఉన్న పార్టీకి వ్యతిరేకంగా ఓటేసిన సందర్భాలు ఉన్నాయి. ఇటీవలి సర్వేల ప్రకారం, ప్రస్తుత అధ్యక్షుడు ట్రంప్ ప్రజాదరణ లేదా ఆమోదపు రేటింగ్ కూడా తగ్గింది.

ఎన్నికల సర్వేలను పర్యవేక్షించే 'సిల్వర్ బులెటిన్' వెబ్‌సైట్ ప్రకారం, ట్రంప్ రెండోసారి అధ్యక్ష బాధ్యతలు చేపట్టిన సమయంలో ఆయన ప్రజాదరణ 50 శాతానికి కొంచెం పైన ఉండేది. అయితే, అక్టోబర్ ప్రారంభం నాటికి అది సుమారు 37 శాతానికి పడిపోయింది. అదే సమయంలో, 61 శాతం మంది ప్రజలు ట్రంప్ పట్ల అసంతృప్తిని వ్యక్తం చేశారు.

అయినప్పటికీ, అన్ని ఎన్నికల పోరాటాలు హోరాహోరీగా లేవు. కొన్ని స్థానాలు రిపబ్లికన్ లేదా డెమొక్రటిక్ పార్టీలకు 'సురక్షితమైనవి'గా చెబుతారు.

బీబీసీకి అమెరికా భాగస్వామి అయిన సీబీఎస్ న్యూస్ కథనం ప్రకారం, ఈ ఎన్నికల్లో కొన్ని స్థానాల్లో తీవ్ర పోటీ ఉండే అవకాశం ఉంది. అయోవా, న్యూ హ్యాంప్‌షైర్ వంటి రాష్ట్రాల్లోని 10 సెనేట్ స్థానాలకు, అలాగే అరిజోనా, ఓహియో వంటి రాష్ట్రాల్లోని 42 ప్రతినిధుల సభ (హౌస్ ఆఫ్ రిప్రజెంటేటివ్స్) స్థానాలకు గట్టి పోటీ నెలకొననుందని ఆ సంస్థ పేర్కొంది.

ట్రంప్ పార్టీ బలం తగ్గితే దాని ప్రభావం భారతదేశంపై ఎలా ఉంటుంది?

అమెరికా కాంగ్రెస్‌లో రిపబ్లికన్ పార్టీ సభ్యుల సంఖ్య తగ్గడం వల్ల భారత్-అమెరికా సంబంధాలపై ఎలాంటి ప్రభావం పడవచ్చు?

దీనిని అర్థం చేసుకోవడానికి, ట్రంప్ పదవీకాలంలో భారత్-అమెరికా సంబంధాలు ఎలా ఉన్నాయో ముందుగా పరిశీలిద్దాం.

చారిత్రక కోణంలో చూస్తే, అమెరికాలోని రిపబ్లికన్, డెమొక్రటిక్ పార్టీలు రెండింటి నుంచీ భారత్‌కు మద్దతు లభిస్తూ వచ్చింది. అయితే, రిపబ్లికన్ అధ్యక్షుల హయాంలోనే భారత ప్రభుత్వం కొన్ని కీలక ఒప్పందాలను కుదుర్చుకోవడం గమనార్హం.

ట్రంప్ అధికారంలో ఉన్న సమయంలో కూడా భారత్ అటువంటి ఆశలనే పెట్టుకుంది. ప్రధాన మంత్రి నరేంద్ర మోదీ, ట్రంప్ మధ్య మంచి సాన్నిహిత్యం ఉన్నట్లు కనిపించింది. ట్రంప్ మొదటి పదవీకాలంలో, వైట్ హౌస్‌లో ఉన్నప్పుడు మోదీ ఆయనను భారత్‌కు "మంచి మిత్రుడు" అని కూడా పేర్కొన్నారు.

భారత దృక్కోణం నుంచి చూస్తే, ట్రంప్ రెండో పదవీకాలంలో ఒడిదుడుకులున్నాయి. పరిస్థితి ఎంతలా మారిందంటే, అమెరికాతో ఒప్పందాలు కుదుర్చుకునే విషయంలో భారత ప్రభుత్వం తన విధానాన్ని మార్చుకోవాల్సి వచ్చింది.

కొన్ని సందర్భాల్లో, వైట్ హౌస్ చేసిన వ్యాఖ్యలకు భారత ప్రభుత్వం బహిరంగంగానే స్పందించాల్సి వచ్చింది.

సుంకాల ఒప్పందంపై చర్చల సందర్భంగా, అమెరికన్ వ్యవసాయ, పాల ఉత్పత్తుల కోసం తన మార్కెట్‌ను మరింతగా తెరవాలని అమెరికా భారత్‌పై ఒత్తిడి తెచ్చింది.

మరోవైపు, భారత్ తన వ్యవసాయ ఉత్పత్తులు, ఔషధాల ఎగుమతులపై సుంకాల రాయితీలను కోరింది. అయితే, అమెరికా ఈ డిమాండ్‌ను అంగీకరించడానికి నిరాకరించింది.

నిపుణుల అభిప్రాయం ప్రకారం, ప్రతిపాదిత సుంకాల ఒప్పందం తీవ్ర విమర్శలకు దారితీసింది. దీనికి ప్రధాన కారణం, ఈ ఒప్పందం వల్ల అమెరికాకు ఎక్కువ ప్రయోజనం, భారత్‌కు ఆర్థికంగా నష్టం వాటిల్లే ప్రమాదం ఉంది.

సెప్టెంబర్ 2026లో, న్యూయార్క్‌లోని 'ఏషియా సొసైటీ' నిర్వహించిన ఒక కార్యక్రమంలో, భారత విదేశాంగ మంత్రి డాక్టర్ ఎస్. జైశంకర్ అమెరికాను, ముఖ్యంగా ట్రంప్ పరిపాలనను తీవ్రవాదం, వాణిజ్య విధానాలకు సంబంధించిన అంశాలపై విమర్శించారు.

ఒక మిత్రదేశం తమ ఆందోళనలను అర్థం చేసుకోవడంలో విఫలమైతే, అది సహజంగానే ఆ రెండు దేశాల మధ్య సంబంధాలపై ప్రభావం చూపుతుందని జైశంకర్ పేర్కొన్నారు.

భారత్, అమెరికాల మధ్య విభేదాలు తలెత్తడం ఇదే మొదటిసారి కాదని, ఇతర అనేక అంశాలపై కూడా ఈ రెండు దేశాల మధ్య భిన్నాభిప్రాయాలు లేదా వివాదాలు ఉన్నాయని నిపుణులు పేర్కొంటున్నారు.

సుంకాలపై విభేదాలు

ట్రంప్ రెండో పదవీకాలంలో, భారత్-అమెరికా మధ్య పలు అంశాలపై విభేదాలు తలెత్తాయి. వీటిలో సుంకాలు ప్రధానమైనవి.

దిగుమతి చేసుకునే వస్తువులపై భారత్ అధిక సుంకాలు విధిస్తోందని ట్రంప్ యంత్రాంగం తరచుగా విమర్శించేది. అంతేకాదు, భారత్‌ను టారిఫ్ కింగ్ అని కూడా పేర్కొంది.

"పరస్పర సుంకాల" అమలు పేరుతో, భారత్ నుంచి ఎగుమతి అయ్యే ఉక్కు, అల్యూమినియం, వస్త్రాలు, ఆభరణాలు వంటి కీలకమైన వస్తువులపై అమెరికా భారీ సుంకాలను విధించింది.

అదే సమయంలో, 'జనరలైజ్డ్ సిస్టమ్ ఆఫ్ ప్రిఫరెన్సెస్' పథకం కింద భారత్‌కు లభించే ప్రత్యేక సుంకాల మినహాయింపులను కూడా అమెరికా రద్దు చేసింది.

గతంలో, ఈ పథకం ద్వారా భారతీయ వస్తువులను అమెరికా మార్కెట్‌లో ఎటువంటి సుంకాలు లేకుండా విక్రయించే అవకాశం ఉండేది.

అమెరికా విదేశాంగ మంత్రి మార్కో రూబియో ఇటీవల భారత్ ఆర్థిక రాజధాని ముంబైని సందర్శించారు. ఈ పర్యటనలో భారత్-అమెరికా సంబంధాలకు సంబంధించిన విస్తృత అంశాలపై చర్చలు జరిగినప్పటికీ, ప్రధాన దృష్టి వ్యాపార వాణిజ్య అంశాలపైనే ఉన్నట్లు కనిపిస్తోంది.

అమెరికా విధించిన సుంకాలు భారత్‌ను శిక్షించడానికి లేదా హాని కలిగించడానికి ఉద్దేశించినవి కావని 'ది ఇండియన్ ఎక్స్‌ప్రెస్'కు ఇచ్చిన ఇంటర్వ్యూలో రూబియో స్పష్టం చేశారు. రష్యా-యుక్రెయిన్ మధ్య జరుగుతున్న యుద్ధంతో సహా అమెరికా విదేశాంగ విధానానికి సంబంధించిన కొన్ని అంశాలు దీనికి కారణమని ఆయన వివరించారు.

రూబియో వ్యాఖ్యలను బట్టి చూస్తే, అమెరికా ఇప్పటికీ భారత్‌తో తన సంబంధానికి ప్రాముఖ్యతనిస్తోందని అర్థమవుతోంది. అమెరికా దృక్కోణంలో, ఈ సుంకాలు భారత్‌పై తీసుకున్న శిక్షాత్మక చర్యలు కావు. ఇవి రష్యా-యుక్రెయిన్ సంఘర్షణకు సంబంధించిన ఒక విస్తృత విధాన వ్యూహంలో భాగం మాత్రమే. ఏది ఏమైనప్పటికీ, ఈ సుంకాల వల్ల ఏర్పడిన సమస్యలు ఇంకా పూర్తిగా పరిష్కారం కాలేదు.

వీసాలు, వలసలకు సంబంధించిన సమస్య

అమెరికాలో ఉద్యోగాలను రక్షించేందుకు అమలు చేసిన విధానాలు, భారతదేశపు సాంకేతిక రంగంపై అలాగే అమెరికాలో నివసిస్తున్న భారతీయులపై ప్రత్యక్ష ప్రభావాన్ని చూపాయి.

హెచ్1 బీ వీసాలలో అధిక భాగం భారతీయ సాంకేతిక రంగంలోని ఉద్యోగులకే లభిస్తాయి. దీని ఫలితంగా, టీసీఎస్, ఇన్ఫోసిస్, విప్రో వంటి ప్రముఖ భారతీయ ఐటీ కంపెనీలు హెచ్1బీ వీసా దరఖాస్తులపై కఠినమైన పరిశీలన, తిరస్కరణల పెరుగుదల, వీసా రుసుములను పెంచే ప్రతిపాదనల కారణంగా ప్రభావితమయ్యాయి.

అమెరికా అక్రమ వలసదారులపై కఠిన చర్యలు తీసుకుంది. దీని ఫలితంగా చాలామంది భారతీయులను వారి స్వదేశాలకు తిరిగి పంపించాల్సి వచ్చింది. ఈ చర్య భారతదేశంలో తీవ్ర విమర్శలకు దారితీసింది.

మరో సమస్య రష్యాతో వాణిజ్యానికి సంబంధించింది. భారతదేశం తన సొంత అవసరాల ఆధారంగా రష్యా నుంచి చమురు, ఇతర ఇంధన వనరులను కొనుగోలు చేస్తుంది. అయితే, ఈ విధానం తరచుగా అమెరికా విదేశాంగ విధానంతో ఏకీభవించదు.

భారతదేశం రష్యా నుంచి సరసమైన ముడి చమురును కొనుగోలు చేస్తూ వస్తోంది. ఈ పద్ధతిపై అమెరికా భారతదేశంపై పదేపదే ఒత్తిడి తెచ్చింది.

రష్యా నుంచి ఇంధనాన్ని కొనుగోలు చేసే దేశాలపై సుంకాలు విధిస్తామని అమెరికా హెచ్చరించింది కూడా.

భారతదేశం పట్ల అమెరికన్ చట్ట సభ సభ్యుల వైఖరి ఏమిటి?

భారత్-అమెరికా సంబంధాల విషయంలో కొంతమంది నిపుణులకు భిన్నమైన అభిప్రాయాలున్నాయి.

వాషింగ్టన్‌లోని కార్నెగీ ఎండోమెంట్ ఫర్ ఇంటర్నేషనల్ పీస్ (సీప్) సౌత్ ఏషియా ప్రోగ్రామ్ డైరెక్టర్ మిలన్ వైష్ణవ్, అల్ జజీరాతో ఈ అంశంపై మాట్లాడారు. ట్రంప్ ప్రభుత్వం భారత్-అమెరికా సంబంధాలను నిర్వహించిన తీరు పట్ల సెనేట్‌లోని చాలా మంది రిపబ్లికన్, డెమొక్రటిక్ పార్టీల సభ్యులు అసంతృప్తిగా ఉన్నారని చెప్పారు.

"వారు భారతదేశ దేశీయ రాజకీయాలు, ఆర్థిక వ్యవస్థ లేదా విదేశాంగ విధానాన్ని విమర్శించినప్పటికీ, భారత్-అమెరికా మధ్య బలమైన భాగస్వామ్యం అత్యవసరం అని గట్టిగా నమ్ముతున్నారు" అని మిలన్ వైష్ణవ్ అభిప్రాయపడ్డారు.

డెమొక్రటిక్ చట్టసభ్యులు భారత్ పట్ల సాపేక్షంగా మృదువైన వైఖరిని అవలంబించవచ్చని మిలన్ వైష్ణవ్ పేర్కొన్నారు.

మధ్యంతర ఎన్నికల ఫలితాల గురించి, వాషింగ్టన్‌లోని విల్సన్ సెంటర్‌కు చెందిన దక్షిణాసియా నిపుణుడు మైఖేల్ కుగెల్‌మాన్ అల్ జజీరాతో మాట్లాడుతూ, ఈ ఫలితం ట్రంప్ విదేశాంగ విధానంపై ప్రభావం చూపుతుందని తాను అనుకోవడం లేదని చెప్పారు. "భారత్ పట్ల అమెరికా విధానం మారే అవకాశం లేదు" అని ఆయన అన్నారు.

"ట్రంప్ చట్టబద్ధంగా మూడోసారి అధ్యక్ష పదవికి పోటీ చేయలేరు కాబట్టి, భారత్‌తో వ్యవహారాలలో అమెరికా ప్రయోజనాలకు ప్రాధాన్యతనిచ్చే విధానాలను ఆయన కొనసాగిస్తారు" అన్నారాయన.

అయితే, కాంగ్రెస్ ఉభయ సభలలో దేనిలోనైనా ట్రంప్ పార్టీ తన మెజారిటీని కోల్పోతే, చట్టాలను ఆమోదింపజేసుకోవడానికి ఆయనకు ప్రతిపక్షాల మద్దతు అవసరం అవుతుంది. డెమొక్రటిక్ పార్టీ ట్రంప్ అనేక విధానాలను బహిరంగంగా వ్యతిరేకించింది. అందువల్ల సుంకాల వంటి సమస్యలపై భారతదేశానికి కొంత ఉపశమనం లభించవచ్చు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)