ትራምፕ ምቍራጽ ተዅሲ ኢራንን እስራኤልን ግብራዊ ምዃኑ ኣፍሊጡ

ቀጥታዊ ሸፈነ

1. 27 ነሓሰ 2026ብምጽናት ዓሌት ገበነኛ ኮይኑ ዝተረኽበ 'ሓራዲ ቦዝንያ' ሞይቱ

   ብምጽናት ዓሌት ንሕልፈት ተፈሪዱ ዝነበረ ቦስንያዊ-ሰርብ ኣዛዚ ሰራዊት ነበር ኣብ ማእሰርቲ ሞይቱ።

   እቲ "ሓራዲ ቦዝንያ" ዝብል ቅጽል ዝተዋህቦ ወዲ 84 ዓመት ጀነራል ራትኮ ምላዲች ኣብታ ዩጐስላቪያ ተባሂላ ትፍለጥ ዝነበረት ምብራቕ ኣውሮጳዊት ሃገር፡ ብፍላይ ኣብ ልዕሊ ሰዓብቲ እስላም ቦዝንያውያን ዝፈጸሞ ጃምላዊ ቅትለታት ንዓመታት ክህደን ድሕሪ ምጽናሕ'ዩ ኣብ 2017 ተፈሪዱ።

   ንሱ ዝመርሖም ዝነበረ ሓይልታት ቦዝንያ-ሰርብ ብኣሽሓት ዝቚጸሩ ሰባት ክቕትሉ እንከለዉ፡ ኣብ ልዕሊ ደቂኣንስትዮ ዘስካሕክሕ ጾታዊ ዓመጽ ከምዝፈጸሙ ይፍለጥ።

   ምላዲች ኣብ ሄግ (ነዘርላንድስ) ኣብ ዝርከብ ቤትማእሰርቲ ሕቡራት ሃገራት'ዩ ካብዛ ዓለም ብሞት ተሰናቢቱ ዘሎ።

   እቲ ንዩጎስላቭያ ናብ ሓያሎ ሃገራት ዝጐዛዘየ ኲናት ብምትእትታው ወተሃደራዊ ኪዳን ሰሜን ኣትላንቲክ (ኔቶ) ድሕሪ ምህድኡ፡ ተሰዊሩ ድሕሪ ምጽናሕ ኣብ 2011 ኣብ ሓደ ደንበ ተሓቢኡ ጸኒሑ።

   እቲ ሓይልታቱ ዝፈጸምዎ ግፍዒ ድሕሪ'ቲ ኣብ እዋን ካልኣይ ኲናት ዓለም ብሰራዊት ሂትለር ዝተፈጸመ፡ እቲ ዝኸፍአ ምዃኑ ይንገር።

2. 27 ነሓሰ 2026ኣሸሓት ኣባላት ፖሊስን ሰራዊትን ኣብ ስርሒት ህይወት ምድሓን ይሳተፉ'ለዉ

   ኣብ ዶብ ኔፓል-ቲቤትን ትማሊ ዘጋጠመ ከቢድ ውሕጅ፡ ሰራሕተኛታት ህይወት ኣድሕን፡ ካብ ሞት ዝደሓኑ ሰባት ይደልዩ ኣለዉ።

   ሃገራዊ በዓል መዚ ምሕደራ ሓደጋታት ኔፓል፡ 9,260 ኣባላት ፖሊስን ሰራዊትን ኣብቲ ስርሒት ይሳተፉ ከምዘለዉ ሓቢሩ።

   ኣብ ልዕሊ መንበሪ ኣባይቲ፡ ጽርግያታትን ድልድላትን ዝርከቡዎም ትሕተ-ቅርፂ ሰፊሕ ዕንወት በፂሑ ኣሎ።

   ምሉእ ስፍሓት ናይቲ ሓደጋ ገና ኣብ ምፅራይ ርከብ ኰይኑ፡ መብዛሕትኦም ካብቶም ደሃዮም ጠፊኡ ዘሎ፡ ወጻእተኛታት ዜጋታት እዮም።

   ፖሊስ ኔፓል ሕዚ ዝሃቦ ሓበሬታ፡ ብሰንኪ እቲ ሓደጋ ብዝሒ ዝሞቱ ናብ 359 ክብ ከምዝበለ የመልክት። ከምኡ ድማ፡ ልዕሊ 900 ሰባት ዛጊድ ደሃዮም ኣይተረኽበን።

   ብወገን ቲቤት፡ ብውሕዱ 558 ደሃዮም ከምዘይተረኽበ መንግስታዊ ሚድያ ቻይና ፀብፂቡ።

   እቲ ኣሃዛት፡ ምስቲ ብወገን ኔፓል ዝተገልፀ ሓዊሱ ድዩ ኣይኰነን፡ ንጹር ኣይኮነን።

   ቅድሚ ሕጂ ኣብ ኔፓል ተመሰሳሊ ሓደጋ ውሕጅ ዝረኣየ ሓደ ፍሉጥ ተቐዳዳማይ ኣኽራናት፡ ከምዚ ዓይነት ሃንደበታዊን ሓደገኛን ሓደጋ ርእዩ ከምዘይፈልጥ ንቢቢሲ ገሊጹ።

3. 27 ነሓሰ 2026ኔፓል-ቲበት፡ ቊጽሪ ምውታት ዕልዕሊ 350 በጺሑ

   በቲ ኣብ ዶብ ኔፓልን ቲበትን ዘጋጠመ ሓደጋ ውሕጅ ዛጊት 359 ሰባት ከምዝሞቱ ፖሊስ ኣረጋጊጾም።

   ብቐጻሊ ሬሳታት ይርከብ ብምህላዉ ግን ቊጽሪ ምውታት ክንህር ትጽቢት ይግበር።

   ካልኦት ኣስታት 900 ግን ሃለዋቶም ኣይተፈልጠን ዘሎ። ኣስታት 517 ካብኣቶም ወጻእተኛታት በጻሕቲ፡ ከምኡ'ው ልዕሊ 70 ኣባላት ሰራዊትን ፖሊስን ከምዝኾኑ ሰብመዚ ሓቢሮም ኣለዉ።

   ህይወት ናይቶም ብድበት ተደፊኖም ዘለዉ ሰባት ንምድሓን ጽዑቕ ናይ ቅድድም ስራሕ ይካየድ ኣሎ።

   ዛጊት ልዕሊ 350 ሰባት ብደገፍ ነበርቲን ሰራሕተኛታት ህጹጽ ደገፍን ብህይወት ድሒኖም ኣለዉ።

4. 27 ነሓሰ 2026ህዳሴ ዘመኑ: ብሽማ ቤተ-መፃሕፍቲ ዝተሰየመላ ኣብ ፈተና 12 ክፍሊ ልዑል ውፅኢት ዘመዝገበት ተምሃሪት

5. 27 ነሓሰ 2026ትግራይ፡ ዝካየድ ዘሎ ጻዕሪታት ሰላም እንታይ ይመስል?

6. 27 ነሓሰ 2026ኢትዮጵያ፡ ኣብ ዛዕባ ሃገራዊ ምኽክር ኢዜማ ዘውጽኦ መተሓሳሰቢ እንታይ እዩ?

7. 27 ነሓሰ 2026ዶሊ ፓርተን፡ ፍኖት ተስፋን ሓያል ቈራጽነትን ዝዓሰሎ ሙዚቃዊ ጕዕዞኣ

8. 26 ነሓሰ 2026ብዙሓት ምዕራባውያን ሃገራት፡ ፍሉይ ልኡኽ ሕብረት ኣፍሪቃ ንዝጀመሮ ዝርርብ-ሰላም ድጋፈን ገሊፀን

   በቲ ኣብ ትግራይ ኣንፀላልዩ ዘሎ ኩነታት ከምዝተሻቐለ ዝገለፀ፡ ልኡኽ ሕብረት ኣውሮጳ ኣብ ኣዲስ ኣበባ፡ ህወሓትን መንግስቲ ፌዴራልን ብቕልጡፍ ናብ ልዝብ ውዕል ፕሪቶርያ ክምለሱ ፃውዒት ኣቕሪቡ።

   ልኡኽ እቲ ሕብረት፡ ምስ ኢምባሲታት ምዕራብ ሃገራት ብሓባር ኣብ ዘውፅእዎ ምግለፂ፡ ክልቲኦም ተፃባእቲ ኣካላት ናብ ጐንፂ ካብ ዘምርሑ ተግባራት ክቝጠቡን፡ ናብቲ ብሕብረት ኣፍሪቃ ዝምእዘን ዝርርብ ሰላም ክምለሱን፡ ሙሉእ ድጋፍ ከምዝገብሩ ኣፍሊጦም ኣለዉ።

   22 ኣባል ሃገራት ሕብረት ኣውሮጳ፡ ከምኡ'ውን ዓዲ እንግሊዝ፣ ኖርወይን ካናዳን ኣብቲ መግለፂ ተኻቲተን ኣለዋ።

   ፍሉይ ወኪል ሕብረት ኣፍሪቃ፡ ፕረዚደንት ናይጀርያ ነበር ኦሉሴጉን ኦባሳንጆ ናብ መቐለ ዝገበሮ መገሻ ዘተባበዐ እቲ መግለፂ፡ እቲ ካብ ዝሓለፈ ኲናት ሃሰያ ሚሊኡ ዘይደሓነ ክልል፡ ድርቂ ተወሲኹዎ፡ "ናብ ካልእ ዙር ወተሃደራዊ ገጭት ክኣቱ፡ ኣዝዩ ሓደገኛ" ከምዝኸውን፡ ኣስሚርሉ።

   ኣምባሳደር ኣመሪካ ኣብ ኢትዮጵያ ኢርቪን ማሲንጋ ትማሊ ተመሳሳሊ መግለፂ ምውፅኡ ዝዝከር እዩ።

   ክልቲኦም ኣውሓስቲ፡ እቲ ኣብ 2022 ዝተፈረመ ውዕል ፕሪቶርያ፡ ሕብረት ኣውሮጳን ኣመሪካን፡ ኣብ ትግራይ ዝምዕብል ዘሎ ወጥሪ ንምህዳእ፡ እቲ ምቀራፅ ተፃብኦታት ብመመላእታ ክትግበር፡ ምስ ፍሉይ ልኡኽ ሕብረት ኣፍሪቃ ብቕርበት ክሰርሑ ምዃኖም ቃል ኣትዮም ኣለዉ።

   ቅድሚ ሓደ ወርሒ ኣብ ዶባት ሱዳን፡ ሸረሪና ኣብ ዝበሃል - ምዕራብ ትግራይ- ናይ ሓደ መዓልቲ ከቢድ ውግእ ምስተገብረ፡ ኣብ ዝተፈላለዩ ከባብታት ትግራይ ተኸታተሊ መጥቃዕቲ ድሮን ክካየድ ቀንዩ ኣሎ። ኣብ ደቡባዊ መዋስንቲ ትግራይ ድማ፡ ኣብ ዝዀነ እዋን ናብ ግጭት ከምርሕ ዝኽእል፡ ብኽልቲኡ ገፅ፡ ወተሃደራዊ ምፅግጋዕ ከምዘሎ ፀብፃባት ይሕብሩ፡

9. 26 ነሓሰ 2026ቀዳማይ ምኒስተር ኔፓል፡ ዛጊድ 95 ሬሳታት ተረኺቡ ኣሎ, ብሓገዝ ወተሃደራዊ ነፈርት ናይ ብሕቲ ሄሊኮፕተራትን 114 ሰባት ድሒኖም

   ቤት ጽሕፈት ቀዳማይ ምኒስተር ኔፓል፡ ክሳብ ሕጂ 95 ሬሳታት ብኣለሻ ከምዝተረኽበ ኣረጋጊጹ።

   ባሌንድራ ሻህ፡ ድሕሪ'ቲ ኣብታ ሃገር ዘጋጠመ ሰፊሕ ሞት ዘስዓበ ውሕጅ "ከቢድ ሓዘን" ከምዝተሰመዖ ገሊጹ።

   እዚ ከምዚ ኢሉ እንከሎ፡ ፖሊስ ኔፓል፡ ኣብ ራሱዋ ኣብ ዝርከብ ሩባ ቦተኮሺ፡ 114 ሰባት ከምዝደሓኑ ማዕከናት ዜና እታ ሃገር ሓቢረን ኣለዋ።

   ሰራዊት እታ ሃገር ልዕሊ 80 ሰባት ከድሕን እንከሎ፡ 29 ሰባት ብዝተፈላለዩ ናይ ብሕቲ ኩባንያታት ሄሊኮፕተር ከምዝደሓኑ እቲ ፀብፃብ የመልክት።

   ዜጋታት ብሪጣንያ ካብቶም ኣስታት 400 ሃለዋቶም ዘይተፈልጠ በጻሕቲ ዓዲ እዮም።

   ሓደ ኩባንያ ዑደት፡ ኣብ ዶብ ኔፓልን ቲቤትን ኣብ ዝጓዓዝሉ እዋን፡ እቶም 12 ብሪጣንያውያን ከም ዝጠፍኡ ኣረጋጊጹ።

   ምኒስተር ጉዳያት ወጻኢ ኔፓል ሺሺር ካናል፡ ኣብ ጥቓ እቶም ሩባታት ገና ሓደጋ ከምዘሎ ብምግላፅ፡ ነበርቲ ልዑል ጥንቃቐ ክገብሩ ሓቢሩ ኣሎ።

   ኣብ ቻይና ኩለን መራኸቢ ብዙሓን- ብፍላይ ኣብ ግዝኣት ቲቤት- ጥቡቕ ቁፅፅር ስለዝግበረለን፡ ሙሉእ ሓበሬታ እቲ ሓደጋ ክትረክብ ኩሉ ግዜ ኣጸጋሚ ምዃኑ ወኪል ቢቢሲ ኣብቲ ከባቢ ትገልፅ።

   እንተዀነ፡ መራሒ ቻይና ፕረዚደንት ሺ ጂንፒንግ፡ ኣብ ምድሓን ህይወት፡ ውልቃዊ መምርሒታት ክህብ ከሎ፡ መብዛሕትኡ ግዜ ሓደ ፍጻመ ኣዝዩ ከቢድ ምዃኑ ዘርኢ እዩ፡ ትብል።

   ንሱ፡ ጉጅለታት ህይወት ኣድሕን ነቶም ዝጠፍኡ ንምድላይ ዝከኣሎም ኩሉ ክገብሩ ኣተሓሳሲቡ ኣሎ።

10. 26 ነሓሰ 2026ቻይና ዜጋታታ ካብ ኣፍሪቃዊት ንግስነት ክወጹ ተማሕጺና

    መንግስቲ ቻይና ዜጋታቱ ካብ ንግስነት ኢስዋቲኒ ክወጹ ተማሕጺኑ።

    ሚኒስትሪ ጉዳያት ወጻኢ ዴሳዊት ቻይና ከምዝበሎ፡ ኣብታ ደቡብ ኣፍሪቃዊት ንግስነት ዘለዉ ዜጋታቱ "ጸጥታዊ ሓደጋ" ኣጋጢምዎም ኣሎ።

    በይዢንግ ብሰንኪ እታ ንግስነት ምስ ታይዋን ዘለዋ ዲፕሎማስያዊ ዝምድና ምስ ኢስዋቲኒ ዝነበራ ርክብ ከምዝበተኸት ይፍለጥ።

    እታ ንግስነት ንታይዋን ኣፍልጦ ዝሃበት እንኮ ኣፍሪቃዊት እያ። ካልኦት 11 ሃገራት ዓለም'ውን ምስታ ቻይና ናተይ እትብላ ደሴት ታይዋን ዲፕሎማስያዊ ዝምድና ኣለወን።

    ዜጋታት ቻይና ምስ ናይ "ሳይበር ምጥፍፋእን ገበናዊ ንጥፈታት ጠላዕን" ዝተሓሓዝ ጸጥታዊ ጸገማት ከምዘጋጠሞም ዘመልከተ እቲ ሚኒስትሪ ብህጹጽ ናብ ደቡብ ኣፍሪቃ ትርከበን ጐረባብቲ ሃገራት ክግዕዙ መኺሩ።

    ካብ ዝሓለፈ ወርሒ ኣትሒዙ ኣስታት 40 ቻይናውያን ኣብ ቀይዲ ከምዝኣተዉ 'ታይምስ ኦፍ ኢስዋቲኒ" ዝተባህለ ማዕከን ዜና ይሕብር።

    መንግስቲ ኢስዋቲኒ ብዛዕባ'ቲ ብወገን ቻይና ዝወጸ መጠንቀቕታ ዝሃቦ መግለጺ ዛጊት የለን።

11. 26 ነሓሰ 2026‘ደረጃ እቲ ሓደጋ ንምሕሳቡ ዘጸግም’ዩ’: ንጥፈታት ህይወት ምድሓን ይቕፅል, ዛጊድ 31 ሰባት ሕይወቶም ከምዝሰኣኑ ተረጋጊፁ

    ድሕሪ እቲ ኣብ 2015 ኣስታት 9 ሽሕ ሰባት ዝቐዘፈ ምንቅጥቃጥ ምድሪ፡ እዚ ናይ ሕዚ ኣብ ኔፓል ዘጋጠመ ኣዝዩ ኣዕናዊ ሓደጋ ከምዝኾነ ተገሊፁ።

    ኣብ ዶብ ኔፓልን ቻይናን ዝርከባ ሓያሎ ታሕተዎት ግዝኣታት በቲ ሓደጋ ተሃስየን ኣለዋ።

    ሰበስልጣን እታ ሃገር፡ ኣብ ልዕሊ ህይወትን ንብረትን ዓቢ ኪሳራ ከምዘጋጠመ'ኳ እንተገለጹ፡ ክሳብ ሕጂ ግን ንጹር ግምት ኣየቕረቡን።

    ኣብ ወሰን ሩባ ቦተኮሺ ዝርከባ ግዝኣታት፡ ራሱዋን ኑዋኮትን ዝርከባ ሓያሎ ከባቢታት፡ ዝያዳ ተሃስየን ኣለዋ።

    እተን ግዝኣታት ውሑድ ብዝሒ ህዝቢ ዘለወን ኮይነን፡ ጽርግያታተን ግን ንንግዲ ኔፓልን ቻይናን ከም ቀንዲ መተሓላለፊ መስመር ኮይኖም የገልግሉ ነይሮም።

    ኣብቲ ከባቢ ዝርከብ ሓይሊ ኤሌክትሪክ፡ ጽርግያታትን ድልድላትን ሓዊሱ ወሰንቲ መሰረተ ልምዓት ዓንዩ ኣሎ።

    ሰብመዚ እቲ ከባቢ ብዝሒ ዝሞቱ ሰባት ዛጊት 31 ከምዝበጽሐ ክገልጹ እንከለዉ፡ ሓደ ወሃቢ ቃል ንቢቢሲ ኣብ ዝሃቦ ሓበሬታ፡ መጠን ዕንወት "ንምሕሳቡ ዘፀግም" ከምዝኾነ ተዛሪቡ።

    ብበዝሒ ህንዳውያን ዜጋታት ዝርከብዎም ኣሽሓት በጻሕቲ ዓዲ፡ ዓመት መፀ፡ በዚ ከባቢ ብምስጋር ናብተን ኣብ ቲቤት ዝርከባ ታሪኻዊ ቦታታት፡ ሃይማኖታዊ ጉዕዞ ይገብሩ ነይሮም።

    ኣብዚ ኣማኢቲ ሃለዋቶም ዘይተፈልጠሉ ኩነታት፡ ስርሒታት ምድላይን ምድሓንን ምስ ግዜ ይቕፅሉ ኣለዉ።

    ኣብ ዝሓለፈ ዓመት ኣብ ተመሳሳሊ ከባቢ ብዝተፈጥረ ሓደገኛ ውሕጅ፡ 18 ሰባት ክሞቱ እንከለዉ ልዕሊ 6 ቢልዮን ሩፒስ (46 ሚልዮን ፓውንድ) ዝግመት ዕንወት ኣስዒቡ ምንባሩ ይዝከር።

    እዚ ኣብ ተመሳሳሊ ከባብን ግዜን ዳግማይ ዝተኸስተ ሓደጋ፡ ኣብቲ ከባቢ ንዝነብር ሕብረተሰብ ከቢድ ጽልዋ ኣሕዲሩሉ ኣሎ።

12. 26 ነሓሰ 2026ኣብ ኔፓል ኣብ ዘጋጠመ ሓያል ውሕጅ ኣማኢት ሰባት ሃለዋቶም ኣይተፈልጠን

    ኣብ ዶብ ኔፓል-ቲቤት ኣብ ዝርከብ ሩባ ቦተ ኮሺ ብዝተፈጥረ ሃንደበታዊ ውሕጅ ኣማኢት ሰባት ሃለዋቶም ኣይተፈልጠን።

    ብመሰረት፡ ቦርድ ቱሪዝም ኔፓል ኣብ ኤክስ ዘቃለሖ ሓበሬታ፡ 291 ወጻእተኛታት ዝርከብዎም ብዙሓት ተጓዓዝቲ ደሃዮም ብንፁር ኣይተረጋገጸን።

    "ሃለዋትን ኩነታት ድሕንነትን" ናይቶም በቲ ከባቢ ዝጓዓዙ ሰባት "ንምርግጋፅ ይሰርሕ ኣሎ" ይብል፡ እቲ ቦርድ።

    ሓደጋ እቲ ሓያል ውሕጅ፡ ሎሚ ረቡዕ ኣብ ሰሜን ርእሰተማ ኔፓል ዝኾነት ካትማንዱ ኣብ እትርከብ ራሱዋ ዘጋጠመ ዀይኑ፡ ኣብቲ ከባቢ ዘጋጠመ ምንቅጥቃጥ መሬት ዘንቀሎ ከምዝዀነ ይግለፅ።

13. 26 ነሓሰ 2026'ቃንዛይ ናብ ዕላማ ክቕይሮ መሪፀ' - ንኢትዮጵያ ወኪላ ኣብ 'ሚስወርልድ' ትወዳደር ዘላ ሩት ይርጋለም

14. 26 ነሓሰ 2026'ሙዚቃ ሃይማኖተይ እዩ' - ስንብታ ኤርትራዊ 'ንጉስ ቦክስ ጊታር' ዩሱፍ ስዒድ

15. 26 ነሓሰ 2026ትራምፕ፡ ንስርዓት ኢራን ከውድቖ ተስፋ ገይሩሉ ዘሎ ሓድሽ ትልሚ

16. 26 ነሓሰ 2026ኢትዮጵያ፡ ኣፍኮን 2028 ንምእንጋድ ዓቕሚ ኣለዋ ድዩ?

17. 25 ነሓሰ 2026ኤርትራ ምስታ ኣብ ገማግም የመን ብቀርሰንቲ ዝተጨውየት መርከብ ምትእስሳር ከምዘይብላ ገሊጻ

18. 25 ነሓሰ 2026ትግራይ፡ ኣመሪካ ብዛዕባ ምብጻሕ ኦባሳንጆ ናብ መቐለ ዝሃበቶ መግለጺ

19. 25 ነሓሰ 2026ንግዳዊ ኲናት ኦታዋን ዋሽንግተንን ይረስን፡ ካናዳ ሕነኣ ትፈዲ

    ካናዳ ነቲ ብኣመሪካ ዝተወሰነላ ቀረጽ ምላሽ ንምሃብ ተመሳሳሊ ውሳነ ከምእትወስድ ኣፍሊጣ።

    ኦታዋ ኣብ ዘውጽኣቶ መግለጺ፡ "ዶላር ብዶላር" ዝዳረግ ገብረመልሲ ከምእትህብ ብምግላጽ፡ ኣብ ልዕሊ ካብ ኣመሪካ ዝኣቱ ስርሓት ሓጺን፡ ጸባን ንዋያት ገዛን ዝርከቦም ኣቚሑት ቀረጽ ክትውስን ምዃና ኣነጺራ።

    በዚ መሰረት ካናዳ ንኣስታት 20 ቢልዮን ዶላር ዝግመት ካብ ኣመሪካ ዝኣቱ ንግዳዊ ኣቚሑት ካብ 15% ክሳብ 50% ቀረጽ ከተኽፍል'ያ።

    እቲ ሓድሽ ቀረጽ ካብ 8 መስከረም፡ ፍርቂ-ለይቲ ኣብ ግብሪ ክውዕል ትጽቢት ይግበረሉ።

    ምምሕዳር ፕረዚደንት ዶናልድ ትራምፕ ኣብ ልዕሊ ካናዳ ሓድሽ 50% ቀረጽ ድሕሪ ምውሳኑ'ዩ መንግስቲ ካናዳ ነቲ ስጉምቲ ክወስድ ተገዲዱ ዘሎ። ኣቐዲማ'ውን ዋሽንግተን ካብ ካናዳ ንዝኣቱ ስርሓት ሓጺን፡ ኣልሚንየምን ተሽከርከርትን ዝርከቦ ንብረት ዒላማ ዝገበረ ወሰኽ ቀረጽ ኣንቢራ ነይራ'ያ።

    ነቲ ኣብ መንጐ ክልቲአን ጐረባብቲ ሃገራት ተፈጢሩ ዘሎ ንግዳዊ ኲናት ፍታሕ ንምርካብ ኣብ ዝሓለፈ መዓልታት ዝተኻየደ ዝርርብ ብዘይፍረ ከምዝተወድአ ይዝከር።

20. 25 ነሓሰ 2026ንቻይና ዘቖጠዐ እገዳ ኣመሪካ ኣብ ልዕሊ ኢራን

    ኣመሪካ ኣብ ልዕሊ ኢራንን ቻይናን እትርከበን ንግዳዊ መሻርኽታን ቁጠባዊ እገዳ ከተስፍሕ ከምዝወጠነት ድሕሪ ምእዋጃ፡ ቻይና ረብሓታታ ክትሕሉ ከም እትንቀሳቐስ ኣጠንቂቓ።

    ወሃቢ ቃል ሚኒስትሪ ጉዳያት ወጻኢ ሊን ጂያን፡ ቻይና ነቲ "ዘይሕጋውን በይናውን”፡ ዝበሎ እገዳ ብጽኑዕ ከም እትቃወሞን፡ ረብሓታታ ንምሕላው "ኩሉ ኣድላዪ ስጉምትታት" ከም እትወስድን ገሊጹ።

    ሚኒስተር ፋይናንስ ኣመሪካ - ስኮት በሰንት ትማሊ ሰኑይ፡ ነዚ ሓድሽ ስጉምትታት እገዳ ኣብ ዘፍለጠሉ እዋን፡ ምስ ኢራን ብንግድን ገንዘብን እትሻረኽ ሃገር ሓቢራ ክትንፀል ምዃና ድሕሪ ምጥንቃቑ'ያ በይዢንግ ምላሽ ሂባ ዘላ።

    ቻይና፡ ብሰንኪ እቲ ኣመሪካ ኣብ ልዕሊ ወደባት ኢራን ዘንበረቶ እገዳ ስዒቡ፡ ዋሕዚ ነዳዲ ኢራን እንተነከየ’ኳ፡ ከም ንቡር ዝዓበየት ዓዳጊት ነዳዲ ኢራን እያ።

    ሊን፡ "ምትሕብባር ቻይናን ኢራንን ኩሉ ግዜ ኣብ ክሊ ዓለማዊ ሕጊ ዝካየድ ኮይኑ፡ ዝዀነ ኢድ ክሰደሉ ወይ ድማ ብዝዀነ ኣካል ክዕንቀፍ ኣይንፈቅድን" ኢሉ።

    በሰንት፡ ነቲ ሓድሽ ስጉምቲ ኣብ ልዕሊ ኢራን "እቲ ዝዓበየ ፋይናንሳዊ መቕፃዕቲ" ክብል ብምግላጽ፡ ባንክታትን ትካላት ንግድን ምስታ ሃገር ዘለወን ርክብ ምቁራጽ እንተኣብየን፡ ምስ ኢራን ኣብ 'ተነጽሎ' ክካተታ ምዃነን ኣጠንቂቑ።

    ፕረዚደንት ኣመሪካ ዶናልድ ትራምፕ፡ ንመራሕቲ ዓለም "ምስቲ ስርዓት [ኢራን] ዘለዎም ርክብ ደው ከብሉ ክምሕፀን" ብቴሌፎን ከዛርቦም ምዃኑ’ውን ገሊጹ።

    ይኹን እምበር፡ በሰንት፡ ብዛዕባ ባንክታት ቻይና ንዝቐረበሉ ሕቶ እንትምልስ፡ ፡ "ካብ እገዳ ኣመሪካ ዘምልጥ ከምዘይህሉ" ብንጹር ክገልጽ ከምዝዀነ ገሊጹ።