کورونا وائرس: اتوار کو دنیا بھر میں متاثرین کی تعداد میں ریکارڈ اضافہ

لائیو کوریج

1. 11 جولائی 2020ہڑتال ختم، ینگ ڈاکٹرز کا کام کرنے کا اعلان, ایم اے جرال

   

   ،تصویر کا ذریعہMA Jarral

   پاکستان کے زیر انتظام کشمیر میں ینگ ڈاکٹرز ایسوسی ایشن نے اپنے بیشتر مطالبات پورے ہونے پر اپنا احتجاج ختم کرنے کا اعلان کیا ہے۔

   ینگ ڈاکٹرز ایسوسی ایشن کے صدر ڈاکٹر فہیم گردیزی کی سربراہی میں ایک وفد نے وزیر اعظم راجہ فاروق حیدر خان سے وزیراعظم ہاؤس میں ملاقات کی اور ان کو اپنے مسائل سے آگاہ کیا۔

   ایسوسی ایشن کے ترجمان ڈاکٹر راجہ عمر منیر نے بتایا کہ ینگ ڈاکٹرز آج سے ریاست بھر کے اسپتالوں میں حسب معمول میڈیکل سروسز فراہم کرنا شروع کر دیں گے۔

   ڈاکٹر عمر منیر نے بتایا کہ وزیراعظم نے اس خطے کے ڈاکٹرز کی پاکستان کے دیگر صوبوں میں کام کرنے والے ڈاکٹرز کے برابر مساوی حقوق دینے کے بارے میں متعلقہ حکام کو ہدایت کی ہے

   انھوں نے بتایا کہ وزیر اعظم نے ریاست بھر کے بنیادی ہیلتھ یونٹ میں ڈاکٹر تعینات کرنے کی بھی یقین دہانی کروائی جبکہ سات اضلاع میں آئی سی یو یونٹ، مختلف اسپتالوں وینٹی لیٹرز سمیت دیگر سازوسامان اور مختلف اسپتالوں کو آپ گریڈ کرنے کے بارے بھی وفد کو آگاہ کیا.

   ڈاکٹرز کی مختلف کیڈرز کی آسامیاں کو ینگ ڈاکٹرز کے مطالبات کے مطابق تخلیق کیا جائے گا۔

   راجہ عمر منیر نے بتایا کہ وزیر اعظم نے کورونا کی وبا میں محدود وسائل کے باوجود فرنٹ لائن پر کام کرنے والے ینگ ڈاکٹرز کی خدمات کو سراہا اور ان کے مطالبات کے حل کے بارے میں متعلقہ حکام کو احکامات بھی جاری کر دیے ہیں۔

2. 11 جولائی 2020کورونا کی وبا میں پاکستانی سیکس ورکرز کِس حال میں ہیں؟

3. 11 جولائی 2020بریکنگ, پاکستان میں کورونا کے مزید 65 مریض ہلاک

   پاکستان میں کورونا وائرس کے نتیجے میں 24 گھنٹوں کے دوران مزید 65 مریض ہلاک ہوئے ہیں جس کے بعد ملک میں ہلاکتوں کی مجموعی تعداد 5123 ہو گئی ہے۔

   نیشنل کمانڈ اینڈ کنٹرول سینٹر کی جانب سے سنیچر کو جاری اعداد و شمار میں بتایا گیا ہے کہ جمعے کو ملک میں کورونا وائرس کی تشخیص کے لیے 23,569 ٹیسٹ کیے گئے۔

   10 جولائی کو کورونا کے مزید 2752 کیسز سامنے آنے کے بعد مجموعی طور پر فعال مریضوں کی تعداد 88,094 ہو گئی ہے۔

   مختلف ہسپتالوں میں وینٹی لیٹر پر موجود مریضوں کی تعداد 394 بتائی گئی ہے تاہم حکام کا کہنا ہے کہ گلگت بلتستان، پاکستان کے زیر انتظام کشمیر اور بلوچستان میں کوئی بھی مریض وینٹی لیٹر پر نہیں ہے۔

   صوبہ سندھ میں جمعے کو مزید 32 افراد ہلاک ہوئے۔ صوبہ پنجاب میں 13، صوبہ خیبر پختونخوا میں 11، گلگت بلتستان میں دو جبکہ دارالحکومت اسلام آباد، بلوچستان اور پاکستان کے زیر انتظام کشمیر میں میں ایک، ایک مریض کی ہلاکت رپورٹ ہوئی ہے۔

   حکام کا کہنا ہے کہ اس وقت ملک کے 733 ہسپتالوں میں کورونا وائرس کے کل 4,254 مریض موجود ہیں۔

4. 11 جولائی 2020ایمریٹس: پاکستان سے بیرونِ ملک سفر کرنے والے تمام افراد پر کورونا وائرس ٹیسٹ لازم

   

   ،تصویر کا ذریعہEmirates

   متحدہ عرب امارات کی ایئرلائن ایمیریٹس کے مطابق پاکستان سے بیرونِ ملک سفر کرنے والے تمام مسافروں کے لیے کورونا وائرس ٹیسٹ کروانا لازم ہو گا۔

   ایمیریٹس کے جاری کردہ اعلامیے کے مطابق پرواز سے چار روز قبل ہر مسافر کو کورونا وائرس ٹیسٹ لازمی کروانا ہو گا ورنہ انھیں طیارے میں بیٹھنے کی اجازت نہیں دی جائے گی۔

   یہ ٹیسٹ تمام مسافروں کے لیے ضروری قرار دیا گیا ہے خواہ وہ عمر کے کسی بھی حصے میں ہوں۔

5. 11 جولائی 2020پاکستان کے زیر انتظام کشمیر میں وبائی امراض کی نگرانی اور روک تھام کا یونٹ قائم

   

   ،تصویر کا ذریعہM. A Jarral

   پاکستان کے زیر انتظام کشمیر میں محکمہ صحت نے کورونا سمیت تمام وبائی امراض کی مانیٹرنگ اور روک تھام کے لیے پروونشنل ڈزیز سرویلینس اینڈ رسپانس یونٹ کا قیام کر دیا ہے جس کا افتتاح اس خطے کے وزیر صحت ڈاکٹر نجیب نقی نے کیا۔

   اس موقعے پر سیکریٹری صحت میجر جنرل طاہر سردار اور ڈی جی صحت ڈاکٹر سردار آفتاب حسین بھی ان کے ہمراہ تھے۔

   محکمہ صحت کے ترجمان کے مطابق اس یونٹ کے تحت خطے کے 10 اضلاع میں محکمہ صحت کے افسران اور عملہ بھی مرکزی دفتر کے اعلیٰ حکام کے ساتھ ڈیجیٹل یونٹ کے تحت ان لائن رہے گا۔

   ان کے مطابق اس یونٹ کا قیام امریکہ کے امدادی ادارے یو ایس ایڈ اور نجی ادارے جے ایس آئی کے تعاون سے قائم کیا ہے۔

   ترجمان کے مطابق اس یونٹ کے تحت پاکستان کے زیر انتظام کشمیر بھر میں کورونا وائرس و دیگر وبائی بیماریوں سے متا‍ثر ہونے والے افراد کا ڈیٹا جمع کیا جائے گا اور اس بنیاد پر وبائی امراض کو مانیٹر کرنے اور پھر اس کی روک تھام سمیت شواید کی بنا پر طبی سہولیات کی منصوبہ بندی کی جائے گی۔

   ان کے مطابق ضلعی سرویلنس رسپانس یونٹ کو انٹرنیٹ کی مدد سے مرکزی دفتر نظامت اعلیٰ محکمہ صحت سے منسلک کر دیا گیا ہے۔ اس طرح کورونا وائرس سمیت کسی بھی وبائی مرض میں مبتلا مریض سے متعلق فوری معلومات حاصل ہوں گی جس کے بعد اس کی مانیٹرنگ اور روک تھام ممکن ہوگا۔

6. 11 جولائی 2020بریکنگ, پاکستان کے زیر انتظام کشمیر: 47 نئے متاثرین سامنے آ گئے, ایم اے جرال، صحافی

   

   پاکستان کے زیر انتظام کشمیر کے حکام کے مطابق گذشتہ 24 گھنٹوں کے دوران 47 افراد کورونا وائرس سے متاثر ہوئے ہیں جس کے بعد اس خطے میں کورونا وائرس سے متاثر ہونے والے افراد کی تعداد 1532 ہوگئی ہے.

   حکام کے مطابق ایک مزید شخص کی ہلاکت کے بعد کورونا وائرس سے ہلاک ہونے والے افراد کی تعداد 42 ہوگئی یے۔

   بتایا گیا ہے کہ کورونا وائرس سے متاثر ہونے والوں میں ایک ڈاکٹر بھی شامل ہے۔

   ضلع مظفرآباد کے ہیلتھ آفیسر ڈاکٹر سعید کے مطابق کورونا وائرس سے جہاں مظفرآباد میں ایک شخص ہلاک ہوا ہے وہاں پر تین خواتین سمیت پانچ افراد متاثر بھی ہوئے ہیں۔ ان کے مطابق کورونا وائرس سے متاثر ہونے والی ایک خاتون سمیت دو افراد کا تعلق وادی نیلم سے ہے۔

   ضلع ہٹیاں کے ہیلتھ آفیسر ڈاکٹر نعمان بٹ کے مطابق وادی جہلم میں پانچ افراد کورونا وائرس سے متاثر ہوئے ہیں۔ میرپور ڈویژن کے کمشنر محمد رقیب خان کے مطابق کورونا وائرس سے متاثر ہونے والی تین خواتین سمیت 15 افراد کا تعلق میرپور، تین خواتین سمیت سات افراد کا بھمبر اور پانچ خواتین سمیت 13 افراد کا تعلق کوٹلی سے ہے۔

   حکام کے مطابق گذشتہ 24 گھنٹوں کے دوران مزید 34 مریض صحتیاب ہوئے ہیں جس کے بعد اس خطے میں کورونا وائرس سے صحت یاب ہونے والے مریضوں کی تعداد 894 ہوگئی ہے۔

   حکام کے مطابق اب تک اس خطے میں 19 ہزار 262 مشتبہ افراد کے ٹیسٹ لیے گئے ہیں۔

   

   ،تصویر کا ذریعہM.A Jarral

7. 10 جولائی 2020پاکستان کے زیر انتظام کشمیر کے ضلع مظفرآباد میں سمارٹ لاک ڈاؤن میں نرمی میں ایک ہفتے کی توسیع

   

   ،تصویر کا ذریعہM A Jarral

   پاکستان کے زیر انتظام کشمیر کے دارالحکومت مظفرآباد سمیت ضلع بھر میں انتظامیہ نے ایک ہفتے کے لیے سمارٹ لاک ڈاؤن میں دی جانے والی نرمی میں مزید ایک ہفتے کی توسیع کی ہے جس کے تحت دکانیں، کاروباری و تجارتی مراکز احتیاطی تدابیر کے تحت مزید ایک ہفتے تک کھلے رہیں گے۔

   صحافی ایم اے جرال کے مطابق ڈپٹی کمشنر مظفرآباد کی جانب سے جاری ہونے والے نوٹیفکیشن کے مطابق کاروباری و تجارتی مراکز کو صبح آٹھ بجے سے شام چھ بجے جبکہ دودھ، دہی، بیکری اور تندور کی دکانیں صبح چھ سے شام آٹھ بجے تک کھولنے کی اجازت ہو گی۔

   میڈیکل سٹورز ان اوقات کار سے متثنیٰ ہیں۔ جمعہ اور منگل کے روز حسب معمول مکمل لاک ڈاون ہو گا البتہ میڈیکل سٹورز بیکری، ایل پی جی، کریانہ، فروٹ و سبزی، دودھ و دہی اور مرغی والی دکانیں مقررہ وقت کے لیے ضابطہ اخلاق کے تحت کھلی رہیں گی۔

   ضلع مظفرآباد میں ہر قسم کے عوامی اجتماعات، شادی بیاہ کی تقریبات، جلسے جلوسوں کے علاوہ مزارات اور زیارات پر اجتماع سمیت لنگر تقسیم کرنے پر پابندی ہے جبکہ تعلیمی اداروں سمیت تربیتی مراکز اور مدارس کو کھولنے پر بھی پابندی ہے۔

   ضلع بھر میں سیاحوں کی آمدورفت پر بھی پابندی رہے گی۔ ضلع بھر اور بیرون ضلع ہر قسم کی ٹرانسپورٹ پہلے سے طہ شدہ ضابطہ اخلاق کے تحت مزید ایک ہفتے کے لیے چلانے کی اجازت ہوگی۔

8. 10 جولائی 2020عالمی ادارۂ صحت: روزانہ کی انفیکشنز میں ریکارڈ اضافہ

   

   ،تصویر کا ذریعہGetty Images

   عالمی ادارۂ صحت (ڈبلیو ایچ او) کے مطابق گذشتہ 24 گھنٹوں میں نئی انفیکشنز میں 2 لاکھ 28 ہزار 102 کا اضافہ ہوا ہے، جو کہ ایک ریکارڈ اضافہ ہے۔

   اقوامِ متحدہ کے ادارے نے اپنی روزانہ کی رپورٹ میں کہا کہ سب سے زیادہ اضافہ امریکہ، برازیل، انڈیا اور جنوبی افریقہ میں ہوا ہے۔

   اس سے قبل ریکارڈ اضافہ 4 جولائی کو دیکھا گیا تھا جو کہ 2 لاکھ 12 ہزار 326 تھا۔

   ڈبلیو ایچ او نے اب تک 1 کروڑ 21 لاکھ متاثرین رپورٹ کیے ہیں، جبکہ جان ہاپکنز یونیورسٹی یہ تعداد 1 کروڑ 23 لاکھ بتاتی ہے۔

9. 10 جولائی 2020بریکنگ, صوبہ بلوچستان میں 29 نئے مریض، ایک ہلاکت

   

   ،تصویر کا ذریعہGovt. of Balochistan

   صوبہ بلوچستان میں کورونا وائرس کے 29 نئے کیسز کے اضافے کے بعد مجموعی کیسز کی تعداد 11128 ہو گئی ہے۔

   کورونا سے مزید ایک مریض کی ہلاکت ہوئی ہے جس کے باعث ہلاک ہونے والے افراد کی مصدقہ تعداد 126 ہے۔

   محکمہ صحت حکومت بلوچستان کے ترجمان داکٹر وسیم بیگ کے مطابق 10جولائی 2020 کو کورونا کے 275 ٹیسٹ کیے گئے جن میں سے 29 مثبت آئے۔

   بلوچستان میں اب تک کورونا کے مجموعی طور پر 52935 ٹیسٹ کیے گئے ہیں جن میں سے 41807 کے نتائج منفی آئے۔

   بلوچستان میں مکورونا وائرس سے اب تک 7224 افراد صحتیاب ہوئے ہیں۔

10. 10 جولائی 2020بریکنگ, صوبہ سندھ میں 1468 نئے مریض، مزید 36 ہلاکتیں

    پاکستان کے صوبہ سندھ میں اب تک 102368 افراد کورونا وائرس سے متاثر ہو چکے ہیں جبکہ 1713 ہلاک بھی ہوئے ہیں۔

    گذشتہ 24 گھنٹوں میں صوبے میں 1468 مریض سامنے آئے جبکہ 36 اموات بھی ہوئیں۔

    اس کے علاوہ صوبے میں اب تک 59165 افراد صحتیاب بھی ہو چکے ہیں۔

    گذشتہ روز 10276 ٹیسٹ کیے گئے جس کے حساب سے انفیکشن ریٹ 14 اعشاریہ دو رہا۔

    

    ،تصویر کا ذریعہGovt. of Sindh

11. 10 جولائی 2020کیا کلورین کورونا وائرس کو مار سکتی ہے؟, جیمز گیلیگھر، بی بی سی نیوز

    

    ،تصویر کا ذریعہGetty Images

    جی ہاں۔

    کلورین کو سوئمنگ پولز کو ڈس انفیکٹ کرنے کے لیے استعمال کیا جاتا ہے اور آسانی سے وائرس، بشمول کورونا وائرس، اور دوسرے سخت جان کیڑوں کو مفلوج بنا سکتی ہے۔

    کیمیکل کو درست مقدار میں استعمال کرنا چاہیئے اور یہ معیاری پریکٹس ہو گی۔

    پول میں دو طرح کی انفیکشن کا رسک ہوتا ہے۔ دوسرے تیراکوں سے اور اس پانی سے جسے انھوں نے کونٹیمینیٹ کیا ہو سکتا ہے۔

    حکومت کے سائنس کے مشیر ’سیج‘ کے مطابق پانی سے وائرس لگنے کے امکانات ’نا ہونے کے برابر‘ ہیں۔ لیکن سوئمر سے دو میٹر کی دوری پہ، جب شاید آپ کم گہرے پانی میں اپنا سانس درست کر رہے ہوں گے، موجود رہنا ایک بہت بڑا رسک ہے۔

    یاد رکھیں کہ رسک صرف پول سے نہیں ہے۔ کورونا وائرس قریبی رابطوں سے پھیلتا ہے، سو کپڑے بدلنے کی تنگ جگہوں پہ بھی محتاط رہیں۔ اور یہ وائرس لاکروں، بینچوں، شاور کے بٹنوں اور نلکوں پر بھی ہو سکتا ہے۔

12. 10 جولائی 2020کیا لاک ڈاؤن میں پھنسے سائنسدانوں کی جگہ ربورٹس لے لیں گے؟

    

    برطانیہ کی یونیورسٹی آف لیورپول کے سائنسدانوں نے اپنے ایک روبوٹ ساتھی کی رونمائی کی ہے جو لاک ڈاؤن کے دوران اُن کی لیبارٹری میں کوئی وقفہ لیے بغیر تحقیق کرنے کے کام میں مصروف ہے۔

    اس محقق روبوٹ کی مالیت ایک لاکھ پاؤنڈ ہے اور یہ بذاتِ خود حاصل کردہ نتائج سے سیکھتا ہے تاکہ آئندہ تجربوں کو مزید بہتر بنا سکے۔

    اس روبوٹ کو بنانے والوں میں سے ایک بینجامن برگر نے اس حوالے سے تفصیلات بتاتے ہوئے کہا کہ ’اس روبوٹ میں آزادی کے ساتھ کام کرنے کی صلاحیت ہے جس کے باعث میں گھر سے کام کرنے کے قابل ہو جاتا ہوں۔‘

    سائنسدانوں کا کہنا ہے کہ اس طرح کی ٹیکنالوجی کے ذریعے سائنسی دریافتیں ’ہزار گنا تیز‘ ہو سکتی ہیں۔

    پڑھیے نامہ نگار سائنس وکٹوریہ گِل کی یہ تحریر۔

13. 10 جولائی 2020بریکنگ, روس میں 6635 نئے مریض، مزید 174 اموات

    

    ،تصویر کا ذریعہGetty Images

    حکام کے مطابق روس میں گذشتہ 24 گھنٹوں کے دوران کورونا وائرس سے 6635 افراد متاثر ہوئے ہیں جبکہ 174 ہلاکتیں بھی ہوئی ہیں۔

    اب تک ملک میں کل 713936 افراد اس وائرس سے متاثر ہو چکے ہیں جبکہ 11 ہزار سے زیادہ اموات بھی ہوئی ہیں۔

14. 10 جولائی 2020دنیا بھر میں کورونا وائرس سے اب تک پانچ لاکھ 55 ہزار سے زیادہ افراد ہلاک ہو چکے ہیں

    

    ،تصویر کا ذریعہJohns Hopkins University

    جانز ہاپکنز یونیورسٹی کی جانب سے جاری کردہ اعداد و شمار کے مطابق دنیا بھر میں اب تک پانچ لاکھ 55 ہزار افراد ہلاک ہو چکے ہیں۔

    اسی طرح اب تک دنیا بھر میں ایک کروڑ 23 لاکھ سے زیادہ افراد اس وائرس سے متاثر بھی ہوئے ہیں۔

15. 10 جولائی 2020کورونا وائرس کے دور میں روسی صدر سے ملنے کے لیے ایک ا نوکھی شرط

    YouTube پوسٹ نظرانداز کریں

    Google YouTube کا مواد دکھانے کی اجازت دی جائے؟?

    اس تحریر میں ایسا مواد ہے جو Google YouTube کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے Google YouTube ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔

    Accept and continue

    تنبیہ: بی بی سی دیگر ویب سائٹس کے مواد کی ذمہ دار نہیں ہے۔ YouTube کے مواد میں اشتہارات ہو سکتے ہیں۔

    YouTube پوسٹ کا اختتام

    روسی صدر ولادیمیر پوتن کی کورونا وائرس سے حفاضت کے لیے ایک خاص ڈس انفیکشن سرنگ قائم کی گئی ہے۔

    روسی صدر سے ملنے آنے والے ہر شخص کو اس میں سے گزرنا پڑتا ہے۔ مزید تفصیلات فرقان الہی کی اس ویڈیو میں۔۔

16. 10 جولائی 2020بریکنگ, صوبہ خیبرپختونخوا میں 369 نئے مریض، مزید 11 ہلاکتیں

    X پوسٹ نظرانداز کریں

    X کا مواد دکھانے کی اجازت دی جائے؟?

    اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔

    Accept and continue

    تنبیہ: بی بی سی دیگر ویب سائٹس کے مواد کی ذمہ دار نہیں ہے۔

    X پوسٹ کا اختتام

    پاکستان کے صوبہ خیبر پختونخوا میں گذشتہ 24 گھنٹوں کے دوران مزید 369 نئے مریض سامنے آئے ہیں جبکہ 11 افراد ہلاک بھی ہوئے ہیں۔

    اب تک صوبے میں متاثرین کی کل تعداد 29775 ہو گئی ہے جبکہ ہلاکتیں 1074 ہو چکی ہیں۔

    صوبے میں اب تک 20271 افراد اس وائرس سے صحتیاب بھی ہو چکے ہیں۔

17. 10 جولائی 2020بورس کا سکول چھوڑنے والے بچوں کو پیغام: ’فائنل ایئر جیسا کوئی سال نہیں‘, شان کوفلن، بی بی سی نیوز

    

    ،تصویر کا ذریعہEPA

    برطانیہ کے وزیرِ اعظم بورس جانسن نے سکول چھوڑنے والے بچوں کو ایک پیغام میں کہا ہے کہ ’یہ ایسا فائنل ایئر ہے جیسا کہ کوئی نہیں تھا۔‘

    انھوں نے بچوں کو کہا کہ ’موقع کو رگبی ٹیکل کریں۔‘

    انھوں نے یو ٹیوب اور فیس بک پر ایک ریکارڈ شدہ ویڈیو پیغام میں کہا کہ ’ٹین ایجرز کا ان گرمیوں میں بہت سا مزہ چھوٹ گیا ہے لیکن ان کی قربانی کی وجہ سے زندگیاں بچی ہیں۔‘

    بورس جانسن نے کہا کہ ’آپ کی نسل ایسے چیلنجز کے ساتھ جوان ہوئی ہے جو آپ سے پہلے کسی بھی نسل کو درپیش نہیں تھا۔‘

    ’ہمدردی، لچک، خود انضباطی، صبر، یہ ایسی خصوصیات ہیں جن کی ہمیں معاشرے کو منصفانہ بنانے کے لیے ضرورت ہے۔‘

18. 10 جولائی 2020بریکنگ, برطانیہ میں کورونا وائرس سے مزید 48 اموات

    برطانیہ میں محکمہ صحت و سماجی بہبود کے مطابق کورونا وائرس سے مزید 48 افراد ہلاک ہو گئے ہیں۔

    اس کے بعد ملک میں کووڈ 19 سے ہلاک ہونے والے افراد کی کل تعداد 44 ہزار سے تجاوز کر گئی ہے۔

    گذشتہ روز ملک میں 160970 ٹیسٹ کیے گئے جن میں سے 512 مثبت آئے۔

19. 10 جولائی 2020ایکٹیمرا انجکشن سے سنا مکی تک: کوورنا کے علاج میں یہ سب کس حد تک مددگار؟

    

    ،تصویر کا ذریعہROCHE

    دنیا بھر میں جہاں کورونا وائرس سے متاثرہ افراد کی تعداد دن بدن بڑھتی جا رہی ہے وہیں اس کی ویکسین کی تیاری کی کوششوں میں بھی تیزی آئی ہے۔

    تاحال اس بیماری کا علاج دریافت نہیں کیا جا سکا ہے لیکن پاکستان میں اس وبا کے آغاز کے ساتھ ہی سوشل میڈیا پر ایسے پیغامات کی بھرمار دیکھی گئی جس میں مختلف ادویات، جڑی بوٹیوں یا پھر کھانے پینے میں روزمرہ استعمال ہونے والی اشیا کو اس بیماری سے صحت یابی میں مددگار یا پھر اس کا علاج ہی قرار دے دیا گیا۔

    مزید جانیے ترہب اصغر کی اس تحریر میں۔

20. 10 جولائی 2020کیا انڈیا میں ایک مرتبہ پھر لاک ڈاؤن نافذ ہونے کا خدشہ ہے؟

    

    ،تصویر کا ذریعہGetty Images

    جمعے کے روز انڈیا میں مزید 26 ہزار سے زیادہ نئے مریض سامنے آئے جس کے بعد ریاست اترپردیش میں پھر سے لاک ڈاؤن نافذ کر دیا گیا۔ اس کے ساتھ ساتھ اکثر فیکٹریوں میں بھی کام بند کر دیا گیا ہے۔

    اب تک ملک میں قریب آٹھ لاکھ افراد کورونا وائرس سے متاثر ہو چکے ہیں اور کم سے کم 21 ہزار افراد ہلاک بھی ہوئے ہیں۔

    انڈیا متاثرین کے اعتبار سے دنیا کا تیسرا سب سے زیادہ متاثرہ ملک ہے۔ انڈیا میں مجموعی کیسز کا 60 فیصد نئی دہلی، مہاراشٹر اور تمل ناڈو میں ہے۔

    کورونا وائرس کے باعث انڈیا میں لوگوں کی ایک بڑی تعداد بیروزگار ہو گئی ہے۔ ملک کی معاشی صورتحال بھی دیگر ممالک کے طرح خراب ہے۔ یہی وجہ ہے کہ لاک ڈاؤن میں نرمی لائی گئی تھی تاکہ معیشت کو کھولا جا سکے اور کاروبار زندگی بحال ہو۔ تاہم اس کے بعد صورتحال مزید پیچیدہ ہو گئی۔

    انڈیا کی ریاست مہاراشٹر کے صنعتی شہر اورنگ آباد میں وائرس کے پھیلاؤ کے باعث نو روز کے لیے کرفیو نافذ کیا گیا ہے۔