Ўзбекистон: миграция сиёсатидан Мирзиёевнинг ҳафсаласи пир бўлдими? Видео
Сурат манбаси, Telegram/Prezident matbuot kotibi
Ўзбекистонда миграция агентлиги ташкил этилганидан буён тизимни икки марта ўзгартирган Президент Шавкат Мирзиёев 2027 йилдан соҳада яна ўзгаришлар бўлишини айтди. Бу миграция агентлиги жиноий ишлар ва коррупция можароларига дуч келгани ортидан кузатилмоқда.
Президент Мирзиёев 2 ноябр куни миграцияга бағишланган ҳукумат мажлисини ўтказди.
Республиканинг барча раҳбарлари, вилоятлар ҳокимлари ва Ўзбекистоннинг хорижий мамлакатлардаги элчилари ҳам иштирок этган йиғилиш Президент девонида эмас, Тошкент шаҳри Учтепа туманидаги «Intil» тил ва касбга ўқитиш марказида ўтказилди.
Президент Мирзиёев Ўзбекларнинг ҳам бой бадавлат, фаровон яшашларини истайди, ислоҳотларининг бош мақсади - инсон қадрига етадиган шароит барпо этиш эканинии қайта қайта таъкидлайди.
Марҳум президент Ислом Каримов мигрантларни дангасалар деб атаган бўлса, Мирзиёев миграция билан шуғулланадиган махсус тизим ташкил қилди.
Бошида Меҳнат, Бандлик вазирлиги таркибида Ташқи меҳнат миграцияси агентлиги тузилди, сўнг у бевосита Вазирлар Маҳкамасига бўйсунадиган Миграция агентлигига ўзгартирилди.
Мақсад, ўзбекистонлик Россияга бориб, не-не азоблар билан қора ишда банд бўлмасин, хорижда ҳақ-ҳуқуқи таъминланган, шароити ва маоши яхши ишларда ишласин.
Айни мақолада Google YouTube томонидан тақдим қилинган контент мавжуд. Биз бу контент юкланмасидан аввал сизнинг розилигингизни сўраймиз, чунки улар куки ва бошқа технологиялардан фойдаланган бўлиши мумкин. Сиз Google YouTube ҳаволасида кукиларга доир ва шахсий маълумотларга оид қоидалар ҳақида аввал ўқиб, кейин қабул қилишга рози бўлишингиз мумкин. Кўриш учун “қабул қилиш ва давом этиш”ни танланг.
Охири YouTube пост
"Сўнгги йилларда тартибли меҳнат миграциясига муносабат тубдан ўзгарди. Илгари бу йўналишда учта давлат билан иш олиб борилган бўлса, ҳозир уларнинг сони 27 тага етди. Ҳамкорлик қилаётган йирик хорижлик иш берувчилар қарийб 400 тага кўпайди", деди Президент Мирзиёев.
BBC News O‘zbek контенти энди Сизнинг WhatsApp да
Аъзо бўлиш учун бу ерга босинг
End of podcast promotion
Россия 2000 йиллардан ўзбекистонликлар ёппасига қонуний ва ноқонуний меҳнат қилиш учун борган мамлакат.
Бунга асосан Россия билан Ўзбекистон ўртасида визасиз тартиб мавжудлиги, иши оғир, маоши нисбатан кам ишларда россияликларнинг ўзлари меҳнат қилишни хоҳламаганлари сабаб бўлди.
Ва ҳали 2007 йили Жанубий Корея билан меҳнат миграцияси бўйича имзоланган келишувлар давлат даражасида одам юборишга шароит яратган эди.
"Чет элда ишлаётган юртдошларимиз сони ўн йилда икки баравар камайган бўлса-да, уларнинг оилаларига юбораётган маблағлари тўрт карра ошди. Бу, Президентимиз таъкидлаганидек, халқаро меҳнат бозорида ўзбек мутахассисларига муносабат ўзгариб, одамларимиз четга оддий ишчи эмас, малакали кадр сифатида бораётганини кўрсатади", дея хабар қилади Ўзбекистон президенти матбуот хизмати.
2016 йилларда Ўзбекистондан чет элда ишлаётган меҳнат мигрантлари сони тўрт миллионга яқин деб баҳоланган.
Масалан, таҳлилларда 2010-2014 йилларда хорижда ишлаган ўзбекистонликлар сони "4 миллиондан ортиқ" деб келтирилади.
Бугун эса расмий маълумотларга кўра, чет элда ишлаётган Ўзбекистон фуқароларининг сони тахминан 1,4 миллион нафарни ташкил этади.
2016 йилда Россия иқтисодий инқирозидан кейин Ўзбекистонга келган пул жўнатмалари анча қисқарган эди.
Ўша давр учун халқаро баҳолар пул жўнатмалари ҳажмини тахминан 3,5-4,0 миллиард доллар атрофида деб кўрсатади.
2025 йил якунлари бўйича Ўзбекистонга 18,9 миллиард доллар пул жўнатмаси келиб тушган.
Расмий маълумотларга кўра, 2026 йилнинг биринчи ярмида 9,3 миллиард доллар келиб тушган.
Бугун ҳам Ўзбекистонда оиласи эҳтиёжини қондиришга етадиган, яхши маошли иш излаётган инсонлар кўп.
Аммо Бандлик вазирлиги ва Миграция агентлиги мулозимларининг ўзлари ҳам тан олаётганларидек, бугун ҳам кўп ўзбекистонликлар мамлакатнинг ичида ва хорижда бўш иш ўринлари борлигидан етарли хабардор эмаслар.
Шунинг учун ҳам "Кореяга ўғлимни ишга юбориш учун 30 минг доллар бердим" деган отани ҳам, ҳеч қандай ҳуқуқи ва кафолат йўқ Россиядаги ҳайдовчиликка яқинда йўл олган ёш ўзбекистонлик йигитни ҳам учратиш мумкин.
Сурат манбаси, gazeta.uz
Четга чиқишга талабгорлар шунчалар кўплигидан ташқи миграция соҳаси криминалга чатишиб кетди, одамлар қаллобларга пулларини йўқотдилар.
Шу боис ҳам хориждаги ишни текшириш мураккаб жараёнга айланди.
Бугун ҳам чет элда мўмай даромадли иш ваъда қилаётган Телеграм каналлари ҳам кўп учрайди, Ўзбекистон Миграция агентлиги ўзининг XORIJDA ISH веб саҳифаси ва Телеграм канали орқали огоҳ бўлишга чақиради.
Президент Мирзиёев кўнгли тўлмагани учун ҳам миграция тизимини икки марта ўзгартирди, агентликнинг икки раҳбари устидан жиноят иши қўзғатилди, яна бир раҳбари "мармар гўшт" можароси остида қолди.
"Тинчроқ, кўздан панароқ тузилмага олинди", деб ёзди блогер Илёс Сафаров.
Охирги вақтларда бандлик сиёсатида ўзгариш кузатилаётгандек:
Бандлик вазирлиги "oson ish" ва "Mening ishim" платформаларида Ўзбекистоннинг ичкарисидаги ишларни эълон қилишни бошлаган.
Миграция агентлигининг XORIJDA ISH Телеграм канали ва веб саҳифасида чет элдаги вакансиялар ва хусусий бандлик агентликлари ҳақидаги эълонлар бериб борилаяпти.
"Миграция агентлиги бўш вакансияларни эълон қилиш билан чекланиб қолмасдан, балки ҳар битта ҳудудда алоҳида хорижий иш берувчиларнинг меҳнат ярмаркаларини ташкил этади. Яъни, хорижий иш берувчиларнинг ўзлари келиб маҳаллий ҳокимликлар билан биргаликда ишсиз фуқаролар ёки хорижда ишлаш истагидаги фуқаролар учун меҳнат ярмаркалари ташкил қиладилар", дейди Миграция агентлиги матбуот котибаси Гулруҳ Тулаева.
Гулруҳ Тулаева айтишича, октябр ойида Словакиядан 20 дан ортиқ иш берувчи келиб меҳнат ярмаркалари ўтказганлар.
Шунингдек, Япония ва Германиядаги автобус ширкатлари, Қатарнинг Qatar Airways авиа ширкати вакиллари келиб ўзбекистонликларни ишга ёллаганлар.
Лекин замонавий дунёдаги бугунги мақсад, ҳар бир ўзбекистонлик маҳалласидан чиқмасдан туриб, хоҳ Ўзбекистоннинг ичида бўлсин, хоҳ хориждаги, ўзига маъқул ишни топа олсин.
Ана шундай қулай шароитни яратишга фармон берди Президент Шавкат Мирзиёев миграцияга бағишланган сўнгги йиғилишда.
