Беш кундан кейин ажрашиш: «Сохта никоҳдаги эрим мени севишига ишонтирганди»

Исломий никоҳ маросимидан беш кун ўтиб, Жейннинг ҳаётини остин-устун қилиб юборган хабар келди.

«Мен сен билан ажрашаман ва сени талоқ қилдим», деб ёзганди унга янги турмуш ўртоғи.

Би-би-си асл исмини ошкор қилмасликка рози бўлган Жейннинг айтишича, у бу эркак билан 10 ой аввал мусулмонлар учун мўлжалланган Muzz никоҳ сайти орқали танишган.

Ўша пайтда Жейн унинг исми Адам эканига ва Манчестерда яшашига ишонган.

«Бу мен учун жуда оғир. Мен турмуш қуряпман, деб ўйлагандим, аммо ҳаётимдаги энг даҳшатли тушга тушиб қолдим», дейди у.

«Бу ақлга сиғмайдиган иш. Одамлар жинсий алоқа учун нега бундай ишларга қўл уришини тушунмайман».

Жейннинг айтишича, улар юзма-юз учрашишга келишишдан олдин олти ой давомида интернет орқали ёзишиб, видеоалоқада гаплашиб юришган.

У Би-би-сига муносабатлари самимий эканига ишонганини ва эркак унга турмуш қуришни таклиф қилганида ҳеч нарсадан шубҳаланмаганини айтди.

«У мени севишига ва мен билан бирга ҳаёт қурмоқчи эканига ишонтирганди. Шунинг учун ундан шубҳаланишимга ҳеч қандай асос йўқ эди», дейди Жейн.

Кейинчалик Жейн Адамнинг асл исми бошқа эканини ва у аллақачон уйланганини билиб қолган.

Адамнинг адвокатлари эса у Жейннинг барча айбловларини қатъиян рад этишини билдирди.

Ислом динини қабул қилган Жейн 2 июнь куни никоҳ ўқитиш учун Англиянинг Ланкашир графлигидаги Брайерфилд шаҳрига борган.

Никоҳ — шариат қоидалари асосида тузиладиган исломий никоҳ шартномаси ёки маросимидир.

Бироқ бундай никоҳ Англия ва Уэлсда қонуний никоҳ сифатида тан олинмайди.

Жейн аслида тўйини ўзи яшайдиган Глазго шаҳрида, дўстлари ва оила аъзолари даврасида ўтказмоқчи бўлганини айтади. Аммо бўлажак турмуш ўртоғи Шотландияда никоҳдан ўтишга қарши чиққан.

Энди Жейн ўша пайтдаёқ бундан шубҳаланиши керак бўлганини тушунмоқда.

«Шотландияда биздан диний никоҳ билан бир вақтда қонуний никоҳдан ҳам ўтишни талаб қилишди», дея тушунтиради у.

«У эса: "Нега улар менинг шахсимни тасдиқловчи ҳужжатимни кўриши керак? Ахир никоҳ ўқитиш жуда оддий жараён-ку. Бунинг учун ҳужжатимни кўришлари шарт эмас", деди.

У бундан жуда қаттиқ норози бўлди».

Жейннинг айтишича, Брайерфилддаги никоҳ маросими гувоҳ сифатида қатнашган икки имом иштирокида ўтган. Шундан сўнг жуфтлик меҳмонхонада икки кеча бирга қолган.

Аммо никоҳдан атиги беш кун ўтиб, Жейнга турмуши тугагани ҳақида хабар келган.

Жейн бу воқеадан кейин қаттиқ шокка тушганини, нима бўлганини тушунолмай қолганини айтиб, никоҳини «сохта никоҳ» деб таърифлади.

Унинг фикрича, бошидан кечирган бу даҳшатли воқеа руҳий ва жинсий эксплуатация бўлган.

Би-би-си маълумотларига кўра, эркак ҳозир ҳам бошқа бир аёл билан қонуний ва диний никоҳда яшамоқда.

Эркак ўз адвокатлари орқали юборган батафсил жавобида Жейннинг айбловларини ўзига қарши узоқ вақтдан бери олиб борилаётган кампаниянинг бир қисми деб атаган. Унинг таъкидлашича, бу айбловлар ҳеч қандай далилга асосланмаган ва ёлғон.

Адвокатлар Би-би-сига эркак Жейнни аввалги никоҳи ҳақида алдамаганини, чунки бу ҳақда умуман гапирмаганини билдирган.

Шунингдек, уларнинг айтишича, эркак Жейн билан никоҳ маросимида ҳайдовчилик гувоҳномасини тақдим этган ва шу боис ўзининг ҳақиқий шахсини яширмаган.

«Қаттиқ афсусдамиз»

Би-би-си Жейнга масжид томонидан берилган исломий никоҳ гувоҳномасининг нусхасини кўрди. Унда айрим маълумотлар тушириб қолдирилган, баъзилари эса нотўғри кўрсатилган.

Никоҳ маросимини ўтказган имом, муфтий Одил Замоннинг айтишича, никоҳ ўзаро рози бўлган икки катта ёшли инсон ўртасида ўқилган ва улар бахтли кўринган. Шу боис у қўшимча саволлар беришни ўз вазифаси деб ҳисобламаган.

«Юзага келган вазиятдан қаттиқ афсусдамиз», деди у Би-би-сига.

«Биз бошиданоқ барча томонларга нисбатан адолатли муносабатда бўлган ҳолда, тегишли ёрдам ва кўмак кўрсатишга ҳаракат қилдик. Шу билан бирга, фақат ўзимиз бевосита хабардор бўлган масалалар юзасидан изоҳ беришни маъқул кўрдик».

Имом шахсни тасдиқловчи ҳужжатларни текширишда хатоларга йўл қўйилганини тан олди. Бироқ у Жейн турмуш қурган эркакнинг ҳақиқий шахсини аниқлашга ёрдам берганини айтди.

Никоҳ бузилганидан кейин томонлар ўртасида воситачилик қилган Ланкашир масжидлари кенгаши бундай маросимларни ўтказувчи шахслар тегишли текширувларни амалга ошириш учун масъул эканини билдирди.

Катта Манчестер ҳудудидаги Олдем шаҳрида фаолият юритувчи New Beginnings ташкилоти ислом динини қабул қилган одамларга ёрдам кўрсатади. Ташкилот вакилларининг айтишича, улар мусулмон жамоаси ичида бошқаларни алдашга уринган кишилар билан боғлиқ ҳолатларга дуч келишган.

«Биз мусулмон жамоамиз орасида бундай фирибгарлар борлигини биламиз. Улар одамларни алдаш пайида юришади», дейди ташкилот асосчиси Билол Браун.

Унинг айтишича, муносабатлар ёки никоҳга шошилинч киришиш, шунингдек, бу жараёнда катта оила аъзоларининг иштирок этмаслиги нимадир жойида эмаслигидан дарак берувчи жиддий огоҳлантирувчи белгилар бўлиши мумкин.

Брауннинг қўшимча қилишича, бундай вазиятларда ислом динини янги қабул қилган кишилар айниқса алданиб қолиш хавфига дуч келиши мумкин.

Ланкашир полицияси ва жиноятчилик масалалари бўйича комиссарининг собиқ ёрдамчиси Сайма Афзал BBC North West Tonight дастурига берган интервьюсида исломий никоҳнинг қонуний тан олинмаслиги айрим аёллар учун муаммо туғдириши мумкинлигини айтди.

«Никоҳ билан боғлиқ қонуний бўшлиқ ҳақида кўп эшитамиз. Масалан, "Биз уларни кўпхотинлилик учун жавобгарликка торта олмаймиз, чунки исломий никоҳ Британияда қонуний тан олинмайди", дейишади», деди у.

«Аммо никоҳ масаласини бир четга қўйиб, бу ердаги хатти-ҳаракатларга қарайлик.

Бу ерда ҳийла-найранг, манипуляция ва аёлни тузоққа тушириш ҳолатларини кўряпмиз.

Демак, бу — алдаш».

2018 йилда Британия парламентига тақдим этилган мустақил таҳлил натижаларига кўра, исломий никоҳларнинг сезиларли қисми қонуний никоҳ билан мустаҳкамланмаган. Оқибатда бундай никоҳдаги одамлар қонунан тан олинган никоҳда назарда тутилган ҳуқуқий ҳимоядан маҳрум қолмоқда.

Шотландия полицияси мамлакат ҳудудида жиноят содир этилгани аниқланмаганини билдирди.

Катта Манчестер полицияси эса Жейннинг шикояти юзасидан тергов ўтказиш сўралганини тасдиқлади.

Muzz платформаси эркакнинг аккаунти бутунлай блокланганини маълум қилди.

Компания бош директори Шаҳзод Юнус шундай деди:

«Биз фойдаланувчилардан никоҳда эканини, у қонуний ёки диний никоҳ бўлишидан қатъи назар, кўрсатишни талаб қиламиз.

Агар улар никоҳда бўлса, рўйхатдан ўтиш жараёнидаёқ иловадан фойдаланишларига рухсат бермаймиз».

Унинг айтишича, компания одатий текширувлар доирасида электрон почта манзили, телефон рақами, қурилма ва селфи орқали текширув ўтказади. Шахсни тасдиқловчи ҳужжат орқали текширувдан ўтиш эса ихтиёрий.

Фойдаланувчиларнинг профилида қайси текширувлардан ўтгани ва қайсиларидан ўтмагани кўрсатилади.

Жейн ўз бошидан кечирган воқеа бошқа аёлларнинг ҳам шундай вазиятга тушиб қолишининг олдини олишга ёрдам беришини истайди.

«Бу жамоамизда мавжуд муаммо», дейди у.

«Агар мен ўзим каби алданиб қолиши мумкин бўлган яна бирор аёлга ёрдам бера олсам, шунинг ўзи мен учун катта ютуқ бўлади».