Полшанинг иккинчи йирик шаҳрида қуролли шахс ҳужуми. 6 инсон ҳалок бўлган. Нималар маълум?

Полшанинг иккинчи энг йирик шаҳри бўлган Краков марказида ўта ўнг қарашлар тарафдорлари билан алоқадорликда гумон қилинаётган қуролли шахс ўт очди.

Камида олти киши ҳалок бўлди ва ўндан ортиқ одам жароҳат олди.

Полиция гумондорнинг уйини тинтув қилганда у ердан яна уч кишининг жасади топилди.

Ҳужум қандай рўй берди?

Ҳужум маҳаллий вақт билан соат 15:00 дан сал аввал Краковнинг сайёҳлар орасида машҳур ва шаҳарнинг гавжум марказий нуқтаси ҳисобланган Марказий бозор майдонида бошланган.

Полиция маълумотига кўра, бир эркак автомобилда майдонга кириб келган ва сўнгра «дуч келган одамларга қарата» ўт оча бошлаган.

Воқеа жойидан тарқалган видеоларда одамлар саросимага тушиб қочаётгани, ўқ овозлари эса аниқ эшитилиши акс этган.

Ҳужумчи, кўринишидан, тасодифий нишонларга ўқ узган. Бу пайтда майдондан ўтиб кетаётган трамвай ҳам ўққа тутилган. Трамвай ойналари синган, аммо йўловчилардан ҳеч ким жабрланмаган.

Расмийлар маълум қилишича, қуролланган полиция ходимлари тезда воқеа жойига етиб келган ва гумондор билан отишмага киришган. Ҳужум бошланганидан уч дақиқа ўтиб ҳужумчига қарата ўқ очилган ва у жароҳат олиб йиқилган.

Қўлга олинган 25 ёшли касалхонага олиб кетилган. Амалиётдан сўнг у ҳали ҳам шифохонада қолмоқда.

BBC Verify томонидан ҳақиқийлиги тасдиқланган даҳшатли видеода полиция ходими ерда ётган гумондорга яқинлашиб, унга бир неча марта ўқ узган лаҳза тасвирланган.

Шундан кейин полициячи ҳам жароҳат олиб, ерга йиқилган.

Шаҳар расмийлари тергов ишлари давом этаётгани сабабли маҳаллий аҳоли ва сайёҳларни ушбу ҳудуддан узоқроқ туришга чақирди.

Полициянинг билдиришича, шу яқин атрофда гумондорнинг автомобили топилган. Машина ичи портловчи қурилмалар бор-йўқлиги бўйича текширилган, аммо ҳеч қандай портловчи восита аниқланмаган. Амалиёт давомида яқин атрофдаги бинолар аҳолиси эвакуация қилинган.

Олти киши, жумладан тўрт аёл ва икки эркак ҳалок бўлгани тасдиқланган. Қурбонлар орасида Британия фуқароси ҳам бор. Уч нафар ҳалок бўлган шахс Полша фуқароси экани маълум, яна икки қурбон ҳозирча аниқланмаган.

Беш нафар хорижлик, икки полиция ходими ва ҳужумчи дохил , жами 16 киши шифохонага ётқизилган.

Кейинроқ Ички ишлар вазирлиги жабрланганлар Австрия, Британия, Германия, Португалия ва Россия фуқаролари эканини маълум қилди.

Полша ҳукумати вазирларидан бири ҳужумчини ҳибсга олиш чоғида уч марта ўқ еган полиция ходимларидан бири «ўта оғир аҳволда» эканини маълум қилди. Унинг айтишича, полициячига жарроҳлик амалиёти ўтказилмоқда.

Ҳужумдан кейин қуролли шахснинг уйи тинтув қилинганда икки аёл ва бир эркакнинг жасади топилган.

Якшанба куни Полша полицияси ушбу уч қурбон ҳужумчининг ота-онаси ва 21 ёшли синглиси эканини тасдиқлади.

Ҳужумчи ким?

Полиция ҳужумчини 25 ёшли Полша фуқароси сифатида аниқлаган, аммо унинг исмини ҳозирча эълон қилмаган.

Полиция вакилининг маълум қилишича, гумондор «ҳарбий услубдаги кийим» кийган ва ҳарбий тоифадаги қурол билан қуролланган бўлган. Бироқ расмийлар унинг ҳарбий хизматчи эмаслигини таъкидлади.

«Унинг автомобилидан кўп миқдорда қурол ва ўқ-дорилар топилди», деди полиция вакили.

Полша оммавий ахборот воситалари гумондорда қурол сақлаш рухсатномаси бўлгани ва қуролларни оиласи яшайдиган уйдан олган бўлиши мумкинлигини хабар қилди.

Вазирлардан бирининг айтишича, дастлабки тергов натижалари унинг «ўта ўнг мафкуралар» таъсирида ҳаракат қилганини кўрсатмоқда. У шунингдек гумондорни «ашаддий миллатчи» деб атади, аммо бунга оид қўшимча тафсилот бермади.

Краковдан тахминан 200 километр узоқликда жойлашган Островец-Швентокшиски шаҳридаги унинг уйи терроризмга қарши кураш бўлинмалари кўмагида тинтув қилинган.