Simon Ekpa: 'A tọhapụbeghị ya mana...' Nkọwa Ụlọikpe Finland nyere BBC maka mkpebi abalị 15 Ọktoba, 2026
Ebe foto si, Simon Ekpa x
Ụlọikpe Mkpegharị nke mba Finland akọwaala na nwaafọ Nigeria bụ Simon Ekpa ka nọ n'ụlọmkpọrọ, dịka mkpebi e nyere ya n'abalị 15 nke ọnwa Ọktoba apụtaghị na a tọhapụla nwaamadi ahụ.
N'abalị 15 nke ọnwa Ọktoba, afọ 2026, Ụlọikpe Mkpegharị nke mba Finland n'ikpe nke bu akara: R 17/2025/918, nyere mkpebi nke gbubiri afọ ole Ekpa ga-anọ na mkpọrọ site n'afọ isii gbatuo gaa afọ anọ.
End of Akụkọ ndị ọzọ yiri nke a
Dịka e wepụtara ozi na Ụlọikpe Mkpegharị nke Finland nyere mkpebi ọhụrụ n'isi Ekpa, akụkọ na ihe onyonyoo malitere fegharịwa na soshal midịa nke na-ekwu na Ekpa enwerela onwe ya.
Mana ozi nke Aino Finnilä nke Ụlọikpe Mkpegharị mba Finland ziteere BBC Igbo n'ọsịsa ajụjụ anyị jụrụ banyere mkpebi ụlọikpe ahụ, kọwara na Ekpa ka bụ onye e ji eji.
Ozi ahụ sịrị, "Ekpa ka nọ na mkpọrọ maka na mkpebi e nyere n'Ọktoba 15 enyeghị ntuziaka ka a tọhapụ ya."
Finnilä gara n'ihu kwuo na mkpebi ahụ ekwughị kpọmkwem oge a ga-atọhapụ Simon Ekpa dịka ọ bụ Iwu mba Finland ga-ekwu mgbe nke ahụ ga-eme.
Kedụ ihe iwu Finland kwuru maka onye nọ na mkpọrọ?
Finnilä rụtụrụ aka na dịka Isiokwu nke Abụọ, Akụkụ nke Ise, Mpaghara nke Abuo nke Iwu Ppụ nke mba Finland, "Onye nọ mkpọrọ ga-enwe ohere ntọhapụ ma ọ nọọ ụzọ abụọ n'ime atọ oge e nyere ya ịnọ na mkpọrọ."
O kwukwara si, "Ọ bụrụ na onye ahụ agabeghị mkpọrọ afọ ise tupu a maa ya ikpe, onye ahụ ga-enwe ohere inwere onwe ya ma ọ nọọ ọkara afọ ole a tụrụ ya mkpọrọ."
Cheta na a tụrụ Ekpa mkpọrọ n'afọ 2025 maka iji sohal midịa akpalite iyi ọha egwu n'Ọwụwa Anyanwụ Nigeria n'agbata afọ 2021 na 2024.
Ebee ka mba Finland kwụ na mkpebi ahụ?
Ebe foto si, Simon Ekpa/x
Ministrị mba Finland na-ahụ maka mmekọrịta mba ahu na mba ndị ọzọ gwara BBC Igbo na aka gọọmentị adịghị na mkpebi ahụ ụlọikpe nyere dịka, "ngalaba ikpe bụ nke kwụụrụ onwe ya."
Mana ha rụtụrụ aka na e nwere ike 'ịgbagha mkpebi nke abalị 15 nke ọnwa Ọktoba afọ 2026 nke Ụlọikpe Mkpegharị nke Ọwụwa Anyanwu Finland nyere n'ikpe Simon Ekpa.
Ozi ha nke Linda Hyttinen binyere aka, kwuru sị: "Mkpebi Ụlọikpe Mkpegharị abụghị ebe okwu biri, nke pụtara na e nwere ike itinye akwụkwọ iji gbaghaa ya."
Mịnịstrị ahụ rụtụrụ aka na Ụlọikpe Mkpegharị makwara Ekpa ikpe maka iyi ọha egwu dịka ụlọikpe kpeburu ikpe ahụ.
"Mkpebi ibelata ya bụ ọnọdụ ka e lere anya, dịka Ụlọikpe Mkpegharị nke Ọwụwa Anyanwụ Finland si kwuo."
