Latest news updates on Ukraine-Russia war and di big tori dem from around di world.
Wia dis foto come from, Reuters
Di mayor of Kyiv don reveal say four pipo don die afta airstrikes hit di capital overnight.
Vitali Klitschko tok for Telegram, say "rescuers still dey off di fire since early mor-mor".
Before, emergency services bin report say na two pipo die for one apartment block afta di blast.
Three-year-old American pikin don accidentally shoot and kill im mama as e dey play wit gun for di suburbs of Chicago, Police took on Monday.
According to Dolton police, di tragedy happun on Sarurday for 8:30 pm evening for parking lot of one supermarket for Dolton, a suburb of Midwestern city.
Di young boy bin sidon for child seat for di back of im papa car and im papa bin sidon for driver seat while im mama, for passenger seat.
E no dey clear how e mange to get di pistol gun wey belong to im papa- but agency report yarn give say di boy bin dey play wit di gun for inside car.
At some point, di pikin come pull di trigger come shoot im mama wey im name be Deejah Bennett, 22 years old for back of her neck.
Di Dolton Police oga, Robert Collins say dem rush di mama to hospital for University of Chicago Medical Centre.but dem pronounce am dead.
E explain give say detectives dem do forensic interview wit di pikin and di boy gree say na im shoot im mama. Dem don gbab di papa of di pikin and dem dey chook eye on top di mata to find out wether e possess di gun legally.
Wia dis foto come from, Getty Images
Ukrainian President Volodymyr Zelensky don tell Russian soldiers to surrender.
President Zelensky for im usual TV address say Russian forces don suffer worse losses during di invasion of im kontri pass wetin dem see for di Chechnya conflict.
E say dem don already begin see say dem no fit achieve anything by war.
"I know say una wan survive," e tok, adding say dem go treat those wey surrender "as pipo, decently".
Zelensky also pay tribute to Marina Ovsyannikova, di woman wey interrupt Russian state TV news by holding up an anti-war sign.
Negotiations between Russia and Ukraine dey expected to continue later, wit Zelensky saying dem don make "pretty good" progress so far.
Wia dis foto come from, EPA
Prime ministers of Poland, Czech and Slovenia dey travel by train go Kyiv for tok-tok wit Ukraine president and prime minister.
Dem dey travel as representatives of di European Union and go present details of dia actual support package for Ukraine, Michal Dworczyk, di head of di Polish prime minister office tok.
Dem arrange di visit during di recent EU summit for Versailles, Dworczyk add.
Di three leaders, wey di head of Poland governing party, Jaroslaw Kaczynski dey follow on di trip, go present broad package of EU support for Ukraine, e tok.
Di EU don unveiled dia fourth package of sanctions against Kremlin. Dis time di target na luxury goods exports as well as investments for Russia energy sector.
More oligarchs and pipo wey dey spread so-called "disinformation" go join for di list of individuals wey di EU asset freeze go affect. Sources don tell di BBC say di list go include Chelsea football club owner Roman Abramovich, wey UK goment don already sanction.
Di ban go also affect exportation of luxury goods, such as expensive cars and jewellery, to Russia. Also, restrictions on di import of Russian steel products and on new investments for Russian energy sector.
While di EU don go further and faster on sanctions dan many expect, diplomats don tell di BBC of increasingly obvious quarrel between Poland and Baltic states - wey want stronger measures - versus a more cautious approach wey kontris like Germany and Italy like.
From Tuesday Kenyans go begin pay more for fuel as di Russian invasion of Ukraine continue to affect di price of crude oil and refined products.
Di East African kontri petroleum regulator say di price of petrol and diesel will increase by five Kenyan shillings ($0.044: £0.034)
Di fuel prices regulator say di price of kerosene, wey many poor Kenyan households dey take cook, “neva change”.
Kenya petroleum subsidy programme don make fuel prices neva change for four months in a row.
Afta Russia invade Ukraine, Brent crude oil hit 14-year high. Di price of essential commodities dey expected to go up for di East African kontri.
Wia dis foto come from, AFP
Ukraine authorities don release more foto of a separate nine-storey residential tower for Svyatoshinsky district of Kyiv on fire afta shelling.
Dem put out di fire at 05:36 local time (03:36 GMT).
Authorities neva tok if pipo die for di .
Wia dis foto come from, UKRAINE STATE EMERGENCY
Wia dis foto come from, UKRAINE STATE EMERGENCY
Wia dis foto come from, Other
Nigeria goment don assure say aviation jet A1 fuel go sell at N500 within di next three days.
Dis na to prevent airlines from shutting down.
Mele Kyari, Group Managing Director of di Nigerian National Petroleum Corporation (NNPC) give di assurance afta meeting marketers, regulators and operators for di aviation industry.
E say operators go get license to import aviation fuel.
Na di Deputy Speaker of the House of Representatives, Ahmed Wase preside over di meeting as dem continue di investigation over di scarcity and high cost of aviation fuel wey lead to di increase in price of airline ticket.
Wia dis foto come from, Reuters
Di Nigerian police Force don deny tori say dia officers dey plan to go strike over non-implementation of di new salary package goment approve for police.
Olumuyiwa Adejobi, force tok-tok pesin make di denial for statement e release.
E say police officers know say strike na mutiny for di police force.
“Di Nigeria Police Force wishe to say di publication dey fake and na mischievous attempt by corrupt individuals to bring di Force to disrepute, misinform di general public and heat up di polity.
“Di Federal goment dey fully committed to di implementation of di new salary package.
Tori bin come out say police wan go strike on March 26, 2022.
One Ukrainian goment advisor say e expect di war to end by early May latest, wen Russia run out of money to attack dia neighbour.
"I tink no later dan for May, early May, we go peace agreement," Oleksiy Arestovich tok, advisor to di Ukrainian president chief of staff, late on Monday.
E outline two possible outcomes for di months ahead.
"Na either we strike peace deal very quickly, within one week or two, wit troop withdrawal and everi tin or attempt to jam dem togeda.
Di Pentagon don earlier claim say Russia dey try recruit Syrians to fight for Ukraine - though we neva verify dis one.
Arestovich no dey personally involved for talks between Ukraine and Russia
Good morning!
Welcome to Tuesday live-text report of all di main tori dem you suppose know around di world.
Our today proverb na from Ezeka Elvis wey say.
"Today overfeeding no go stop tomorrow hunger"
Na here we go end today Live Page.
So far, we bring you report say one of di wives of di suspended DCP Abba Kyari faint for court as dem try hear her husband bail application.
Cameroon ban smoking of shisha pipes as dey say e get health risk for young pipo.
Pregnant woman and her baby die afta Ukraine hospital attack.
You fit scroll down to read all di tori wey you miss out during di day.
Na Jelilat, Helen, Ronke, and Tunde bring una all di tori for today.
One person don die and six more don dey injured after missile fragments fall ontop road for Kurenivka area of Kyiv today.
Di mayor of di capital Vitaliy Klitschko tok say di debris na from a missile wey don dey by Ukrainian air defences.
Di BBC bin dey di scene where di fragments hit, and we capture some fotos.
Russian state TV don show wetin e tok say be Ukrainian navy boats being disarmed for di port of Berdyansk wey don dey captured
Di fast patrol boats Akkerman and Vyshhorod dey abandoned along wit a tug called Korets, di defence ministry channel Zvezda bin report.
Russian forces capture Berdyansk two weeks ago, on di Sea of Azov. E lie between Crimea and Ukrainian city of Mariupol wey dey besieged.
One reporter wey dey tour one of di vessels show ammunition and "personal belongings" allegedly leave behind by Ukrainian crew members as dey run comot di Russian assault.
Wia dis foto come from, TV Zvezda screenshot
Countless Ukrainian families don dey separated as women and children evacuate and leave men behind for di war zone. But many women don choose to remain on di front line. Di BBC speak to five women about di reason why dem dey stay.
Kira Rudik - 'e dey scary, but I dey vex'
Wia dis foto come from, Kira Rudik
"I never touch gun until di war start,” member of parliament Kira Rudik tok. “E no just dey necessary.
She tok say wen di invasion bin start and di possibility to get a gun happunn, she dey shocked say she decide to carry am.
Marharyta Rivachenko - 'I no get anywhere to run to’
Wia dis foto come from, Marharyta Rivachenko
Regular women also join politicians to volunteer for di war effort.
Marharyta don learn how to sleep wit di sound of air sirens for shelters sake of say her city don dey bombarded by Russian forces.
"When di war start, my family bin dey Kharkiv and I bin dey alone for Kyiv. I no get anywhere to run," di PR manager tell di BBC.
Yustyna Dusan - 'My priority na to survive'
Olena Biletskyi - 'I want make my daughter dey born inside free Ukraine'
Wia dis foto come from, Olena Biletskyi
"For di first few days, fear and anxiety bin hold me well,” Olena tok. “But now fear no dey again, na just di desire to defeat di enemy.
Olena tok say she dream to have her third daughter for inside free and independent Ukraine.
Yaryna Arieva - 'I no dey scared for myself'
Wia dis foto come from, Yaryna Arieva
Yaryna bin move to di territorial defence base with her husband, but she never dey experienced enough to go on combat missions yet.
Yaryna tok say before di war, she bin get a lot of fears.
"But right now, di only fear wey I get na to lose my husband - I no dey scared for myself.”
Wia dis foto come from, Reuters
Di authorities for Nigeria say 559 ex-Boko Haram members don graduate de-radicalisation programme and dey expected to re-enter di society soon.
Di graduation ceremony wey hold ova di weekend at a de-radicalisation centre for di north-eastern state of Gombe.
For di event, di graduands pledg dia allegiance to di Nigerian authorities dey once fight against.
Di military-run initiative dey introduced for 2015 by di Nigerian goment and become operational for 2016 as part of im counter-terrorism strategies.
Members of Boko Haram wey voluntarily lay down dia arms and surrender to di authorities collect special training wey nclude vocational skills, religious reorientation and psychological support to de-radicalise dem before being reintegrated into di society.
Di total number of those wey don complete di programme now be 1,629.
Sense of mistrust still dey di society towards former Boko Haram members given di level of violence wey di group don comit.
Di Boko Haram insurgency wey begin for 2009 don cause di deaths of about 350,000 pipo wit millions of odas displaced for Nigeria and several oda kontris for di Lake Chad region.
Wia dis foto come from, Reuters
In case you just dey join us, see wetin dey happun on day 19th of Russia invasion of Ukraine:
Small drama bin happun for Federal High court, Abuja as wife of di suspended Deputy Commissioner of police, Abba Kyari slump afta proceedings.
Wia dis foto come from, Getty Images
Cameroon don ban di smoking of shisha pipes as dem tok say e dey cause health risk to mostly young pipo who use am for bars and homes.
About 46% of young Cameroonians dey smoke di substance according to di health ministry – wey be mixture of tobacco, molasses, glycerine and flavourings.
Doctor tok say misconception dey about shisha as pipo think say e no dey harmful as cigarettes. Dem tok say di British Heart Foundation say one hour of smoking shisha fit be di same as smoking more dan 100 cigarettes.
“Traditionally shisha tobacco contain cigarette tobacco, so like cigarette e contain nicotine, tar, carbon monoxide and heavy metals, such as arsenic and lead,” di foundation tok.
For recent years, shisha don dey banned for Tanzania and Sudan – though di ban dia don dey reversed and introduced again several times since.
Wia dis foto come from, Favour Nunoo/BBC
High Court for Ghana adjourn bail application case of #FixTheCountry campaigner, Oliver Barker Vormawor.
Lawyers for Mr Barker Vormawor plead wit de Court say dem get de discretion to grant de bail despite de treason felony charge against dia client.
Dis be after state prosecutors argue say Oliver Barker Vormawor be flight risk sake of he no get place of residence.
But en legal team, led by Lawyer Akoto Ampaw debunk de claims as plus details of de residence of Mr Vormawor.
He argue say de state also get de accused en travel passports so that again go make an difficult for him to leave de country.
After hearing both arguments from prosecution and defense, Justice Daniel Mensah adjourn hearing to Wednesday, March 16, 2022 for en ruling.
