தந்தையால் மண்ணில் புதைக்கப்பட்ட 11 மாத குழந்தை உயிருடன் மீட்பு - என்ன நடந்தது?

அமெரிக்காவின் தெற்கு கரோலினா மாகாணத்தில், 11 மாத குழந்தை ஒன்று கூண்டில் அடைக்கப்பட்டு உயிருடன் புதைக்கப்பட்ட நிலையில் மீட்கப்பட்டுள்ளது. குழந்தையின் தந்தையே இந்தக் கொடூர செயலில் ஈடுபட்டதாக அதிகாரிகள் தெரிவித்துள்ளனர்.

லெக்சிங்டன் கவுண்டி ஷெரிப் துறை தகவலின்படி, கோவா ஷார்ப் என்ற அந்தக் குழந்தை திங்கள்கிழமை முதல் காணாமல் போயிருந்தது. குழந்தையை அதன் தந்தையான 25 வயது மைக்கேல் கோமர் தன்னுடன் அழைத்துச் சென்றிருந்தார். திங்கள்கிழமை மாலை திருட்டு வழக்கில் மைக்கேல் கோமர் கைது செய்யப்பட்டார். ஆனால், அப்போது குழந்தை அவருடன் இல்லை.

செவ்வாய்க்கிழமை, குழந்தையின் தந்தை வீட்டுக்கு அருகே அந்தக் குழந்தை கண்டுபிடிக்கப்பட்டதாக லெக்சிங்டன் கவுண்டி ஷெரிப் ஜே கூன் செய்தியாளர் சந்திப்பில் தெரிவித்தார்.

கூண்டுக்குள் அடைக்கப்பட்டு மண்ணில் புதைக்கப்பட்டிருந்த குழந்தை, மிகவும் மோசமான நிலையில் மீட்கப்பட்டது. சுமார் 24 மணிநேரமாக குழந்தை அந்த இடத்தில் இருந்திருக்கலாம் என்று அதிகாரிகள் கருதுகின்றனர்.

தற்போது மருத்துவமனையில் அனுமதிக்கப்பட்டுள்ள குழந்தைக்குச் சிகிச்சை அளிக்கப்பட்டு வருகிறது. குழந்தை முழுமையாகக் குணமடைந்துவிடும் என நம்புவதாக ஷெரிப் கூன் தெரிவித்தார்.

குழந்தையை அதன் தந்தை தாயின் வீட்டிலிருந்து அழைத்துச் சென்றதைத் தொடர்ந்து, திங்கள்கிழமை குழந்தையைத் தேடும் பணி தொடங்கியது.

ஷெரிப் கூன் கூறுகையில், குழந்தை அதன் தாயின் பராமரிப்பில் இருந்தது. தாய் சிறிது நேரம் குழந்தையைத் தனியாக விட்டுச் சென்றிருந்தபோது, கோமர் திடீரென அங்கு வந்து குழந்தையை தூக்கிச் சென்றுவிட்டார்.

மைக்கேல் கோமர் பல இடங்களுக்குச் சென்றது விசாரணையில் தெரியவந்தது. ஆனால், அந்தச் சமயங்களில் குழந்தை அவருடன் இருக்கவில்லை.

பின்னர், லெக்சிங்டன் கவுண்டியில் மைக்கேல் கோமர் கைது செய்யப்பட்டார். அப்போதும் குழந்தை அவருடன் இல்லை. குழந்தையை தேடுவதற்காகக் காவல்துறை மற்றும் தீயணைப்புத் துறையைச் சேர்ந்த சுமார் 100 பேர் கொண்ட குழு களமிறக்கப்பட்டதாக ஷெரிப் தெரிவித்தார்.

குழந்தை எங்கே இருக்கிறது என்று அதிகாரிகள் கேட்டபோது, மைக்கேல் கோமர் எந்த தகவலையும் தெரிவிக்கவில்லை என்று ஷெரிப் கூறினார்.

கோமரின் வீட்டுக்கு அருகிலுள்ள காட்டுப் பகுதியில் மீட்புக் குழுவினர் தேடுதல் பணியில் ஈடுபட்டிருந்தனர். அப்போது, சில இடங்களில் மண் புதிதாகத் தோண்டப்பட்டிருப்பதைக் கவனித்தனர். அந்த இடத்தைத் தோண்டத் தொடங்கியபோது, குழந்தையின் அழுகுரல் கேட்டது. அந்த ஒலியை "மிகவும் மகிழ்ச்சியான ஒலி" என்று ஷெரிப் விவரித்தார்.

"அதன் பிறகு, அனைவரது கவனமும் குழந்தையைப் பாதுகாப்பாக மீட்பதிலேயே இருந்தது" என்று அவர் கூறினார்.

"குழந்தை அடைக்கப்பட்டிருந்த கூண்டு சுமார் இரண்டு அடி நீளமும் இரண்டு அடி அகலமும் கொண்டது. அதை நிலத்தில் வைத்து, அதன் மேல் குறைந்தது ஒரு அடி உயரத்துக்கு மண்ணைக் கொட்டி மூடியிருந்தார் என்று கருதுகிறேன்" என்றும் ஷெரிப் தெரிவித்தார்.

குழந்தையின் பெற்றோருக்கிடையிலான உறவு குறித்துக் குறிப்பிட்ட ஷெரிஃப், "இருவருக்கும் இடையே சில சிக்கல்கள் இருந்தது தெளிவாகவே தெரிகிறது" என்று தெரிவித்தார்.

நீதிமன்ற ஆவணங்களின்படி, மைக்கேல் கோமர் இதற்கு முன்பு குடும்ப வன்முறை தொடர்பான குற்றச்சாட்டுகளை ஒப்புக்கொண்டிருந்தார்.

கோமரின் தாயாரான பேட்ரிசியா கோமர், என்.பி.சி நியூஸ் ஊடகத்திடம் கூறுகையில், குழந்தையின் தாயாரே குழந்தையைப் பராமரிக்கும் முழு உரிமையையும் கொண்டுள்ளார் என்றும், இருப்பினும் தனது மகன் குழந்தையுடன் இருக்கும் நேரங்களில் தான் கவனித்துக் கொள்வதாகவும் தெரிவித்தார்.

இதற்கு முன்பும் தனது மகன் மேற்பார்வை இன்றி குழந்தையைப் பராமரித்திருந்ததாகவும், அப்போது எந்தப் பிரச்னையும் ஏற்படவில்லை என்றும் அவர் கூறினார்.

பேட்ரிசியா கோமர், "உண்மையைச் சொல்லப்போனால், நான் அவனது தாய்; அவன் இப்படிப்பட்ட காரியத்தைச் செய்வான் என்று நான் ஒருபோதும் நினைத்துக் கூடப் பார்த்ததில்லை" என்று தெரிவித்தார்.

- இது, பிபிசிக்காக கலெக்டிவ் நியூஸ்ரூம் வெளியீடு