விஜய் ஆட்சியில் முதல் ஆறு மாதங்களில் ஏற்பட்ட 6 முக்கிய சர்ச்சைகள்

2026 சட்டப்பேரவைத் தேர்தலில் வெற்றி பெற்று, விஜய் ஆட்சிப் பொறுப்பேற்ற ஆறு மாதங்களில் அவரது அரசு பல்வேறு சவால்களை எதிர்கொள்ள வேண்டியிருந்தது. நிர்வாக அனுபவம், அரசு நியமனங்கள், முக்கியத் திட்டங்கள் தொடர்பான முடிவுகள் எனப் பல்வேறு விவகாரங்களில் அரசின் செயல்பாடுகள் விமர்சனத்துக்கு உள்ளாகின. பரந்தூர் விமான நிலையத் திட்டம், முதலமைச்சருக்கு நெருக்கமானவர்களின் அரசு நியமனங்கள், குதிரைப் பேரக் குற்றச்சாட்டு எனத் தொடங்கிய சர்ச்சைகள், மின்சாரக் கொள்முதல் மற்றும் புத்தகக் கொள்முதல் விவகாரங்கள் வரை நீண்டன.

ஆட்சிப் பொறுப்பேற்ற 6 மாதங்களுக்குள் இடைத்தேர்தல்களையும் தவெக எதிர்கொண்டது. அதிமுகவைச் சேர்ந்த 6 எம்எல்ஏக்கள் பதவியை ராஜினாமா செய்துவிட்டு தவெகவில் இணைந்ததைத் தொடர்ந்து, அவற்றில் இரண்டு தொகுதிகளில் இடைத்தேர்தல்கள் நடைபெற்றன. இந்தக் கட்சி மாற்றங்கள் குதிரைப் பேரம் தொடர்பான அரசியல் விவாதங்களையும் தீவிரப்படுத்தின.

மறுபுறம், தேர்தல் பிரசாரத்தின்போது அளிக்கப்பட்ட வாக்குறுதிகள் முழுமையாக நிறைவேற்றப்படவில்லை என்ற விமர்சனமும் உண்டு. அரசின் நிர்வாகத் திறன், முடிவெடுக்கும் அணுகுமுறை மற்றும் தேர்தல் வாக்குறுதிகளை நிறைவேற்றுவதில் உள்ள முன்னேற்றம் ஆகியவற்றை எதிர்க்கட்சிகள் கேள்விக்குள்ளாக்குகின்றன. விஜய் ஆட்சியில் முதல் 6 மாதங்களில் ஏற்பட்ட 6 முக்கிய சர்ச்சைகள் என்ன?

1. பரந்தூர் விமான நிலையத் திட்டம் ரத்து

சென்னைக்கான இரண்டாவது விமான நிலையமாக, காஞ்சிபுரம் மாவட்டம் பரந்தூரில் புதிய விமான நிலையம் அமைக்கும் திட்டத்தை முந்தைய திமுக அரசு முன்னெடுத்தது. இதற்காகப் பரந்தூர் மற்றும் அதைச் சுற்றியுள்ள கிராமங்களில் நிலங்களைக் கையகப்படுத்தும் பணிகள் தொடங்கப்பட்டன. விவசாய நிலங்களும் நீர்நிலைகளும் பாதிக்கப்படும் என்றும், தங்களது வாழ்வாதாரம் கேள்விக்குறியாகும் என்றும் கூறி ஒரு தரப்பினர் போராட்டங்களில் ஈடுபட்டு வந்தனர்.

இந்த விவகாரத்தில், 2025 ஜனவரி 20ஆம் தேதி ஏகனாபுரத்தில் போராட்டத்தில் ஈடுபட்டிருந்த மக்களைத் தவெக தலைவர் விஜய் சந்தித்தார். அப்போது, தவெக ஆட்சிக்கு வந்தால் விமான நிலையத் திட்டம் கைவிடப்படும் என்று அவர் உறுதியளித்திருந்தார். அதன்படி, 2026 ஆகஸ்ட் 24ஆம் தேதி சட்டப்பேரவையில் பரந்தூர் விமான நிலையத் திட்டத்தைக் கைவிடும் முடிவை அவர் அறிவித்தார். விவசாயிகளின் வாழ்வாதாரத்தையும் மக்களின் வாழ்விடங்களையும் பாதுகாப்பதே இந்த முடிவுக்கான காரணம் என்று விஜய் விளக்கமளித்தார்.

ஆனால், இந்த முடிவு வேறு சில கேள்விகளையும் எழுப்பியது. முந்தைய திமுக ஆட்சியில் நிலம் கையகப்படுத்தும் நடவடிக்கைகள் முன்னெடுக்கப்பட்டிருந்த நிலையில், அந்தப் பணிகளின் தற்போதைய நிலை என்ன, ஏற்கெனவே எடுக்கப்பட்ட நடவடிக்கைகள் என்னவாகும் என்ற கேள்விகள் எழுந்தன.

விவசாய நிலங்களுக்கும் குடியிருப்புகளுக்கும் பெரிய அளவில் பாதிப்பு ஏற்படாத மாற்று இடங்கள் பரிசீலிக்கப்படும் என்றும், சென்னை விமான நிலையத்தில் ஐந்தாவது முனையம் அமைப்பதன் மூலம் அதன் பயணிகள் கையாளும் திறன் அதிகரிக்கப்படும் என்றும் அரசு அறிவித்தது. இந்த நடவடிக்கைகள் எதிர்காலத்தில் அதிகரிக்கக்கூடிய விமானப் போக்குவரத்துத் தேவையைச் சமாளிக்கப் போதுமானதாக இருக்குமா என்ற கேள்வியும் எழுந்தது.

2. முதலமைச்சருக்கு நெருக்கமானவர்களுக்கு அரசு நியமனங்கள்

தவெக அரசு பதவியேற்ற தொடக்கத்திலேயே, முதலமைச்சர் விஜய்க்கு நெருக்கமானவர்களுக்கு அரசு நிர்வாகத்தில் முக்கியப் பொறுப்புகள் வழங்கப்பட்டன.

முதலில், ஜோதிடர் ரிக்கி ராதன் பண்டிட் வெற்றிவேல், முதலமைச்சரின் சிறப்புப் பணி அலுவலராக நியமிக்கப்பட்டார். இந்த நியமனத்துக்கு எதிர்ப்புகள் எழுந்த நிலையில், அதற்கான ஆணை ரத்து செய்யப்பட்டது.

தொடர்ந்து, விஜயின் மேலாளராகச் செயல்பட்ட ஜெகதீஷ் பழனிசாமி அரசியல் விவகாரங்களுக்கான தனிச் செயலாளராகவும், திரைப்படத் தயாரிப்பாளர் கே. வெங்கட நாராயணா டெல்லியில் தமிழக அரசின் சிறப்புப் பிரதிநிதியாகவும் நியமிக்கப்பட்டனர். வெங்கட நாராயணா தமிழ்நாட்டைச் சேர்ந்தவர் அல்ல என்ற பின்னணியில், தமிழகத்தைச் சேர்ந்த ஒருவருக்கு இந்தப் பொறுப்பை வழங்கியிருக்கலாமே என்று எதிர்க்கட்சிகள் கேள்வி எழுப்பின.

முதலமைச்சருக்கு நெருக்கமானவர்களுக்கு முக்கியப் பொறுப்புகள் வழங்கப்படுவது, அவர்களது தகுதி மற்றும் நியமனங்களுக்கான அடிப்படை குறித்த விவாதத்தை ஏற்படுத்தியது.

3. குதிரை பேர குற்றச்சாட்டு

தவெக ஆட்சிப் பொறுப்பேற்ற பிறகு, மே 25ஆம் தேதி தொடங்கி, அதிமுகவைச் சேர்ந்த ஆறு சட்டமன்ற உறுப்பினர்கள் தங்கள் பதவிகளை ராஜினாமா செய்துவிட்டு தவெகவில் இணைந்தனர். இதற்குப் பின்னால் பணப் பரிமாற்றம் நடந்திருப்பதாக அதிமுக தரப்பில் குதிரைப் பேரக் குற்றச்சாட்டு முன்வைக்கப்பட்டது. இந்த விவகாரம் தொடர்பான வழக்குகள் நீதிமன்றத்துக்கும் சென்றன.

ஆறு சட்டமன்ற உறுப்பினர்கள் பதவி விலகிய நிலையில், மதுராந்தகம் (தனி) மற்றும் தாராபுரம் (தனி) ஆகிய இரண்டு தொகுதிகளில் அக்டோபர் 6ஆம் தேதி இடைத்தேர்தல் நடைபெற்றது. இந்த இரண்டு தொகுதிகளிலும் தவெக வெற்றி பெற்றது.

ஒரு கட்சி சார்பில் தேர்ந்தெடுக்கப்பட்ட மக்கள் பிரதிநிதிகள், ஆட்சிக்கு வந்த சில மாதங்களிலேயே பதவியை ராஜினாமா செய்து ஆளுங்கட்சியில் இணைந்தது விவாதத்தை எழுப்பியது. தவெக அரசுக்கு ஆதரவு அளிக்கும் இடதுசாரிகள் இதுகுறித்து கேள்விகளை எழுப்பின.

4. பட்டினப்பாக்கம் புதிய தலைமைச் செயலக அறிவிப்பு

சென்னை பட்டினப்பாக்கத்தில் சுமார் ரூ.1,200 கோடி மதிப்பீட்டில் புதிய தலைமைச் செயலகம் மற்றும் சட்டப்பேரவை வளாகம் அமைக்கும் திட்டத்துக்கு, தவெக அரசு செப்டம்பர் மாதம் கொள்கை அளவில் ஒப்புதல் அளித்தது. சென்னையின் நிர்வாகக் கட்டமைப்பை மேம்படுத்தும் முக்கியத் திட்டமாக இது அறிவிக்கப்பட்டது. செப்டம்பர் 8ஆம் தேதி வெளியிடப்பட்ட அரசாணையில், விரிவான திட்ட அறிக்கை மற்றும் கட்டட வடிவமைப்புகளைத் தயாரிப்பதற்கான நடவடிக்கைகள் இடம்பெற்றிருந்தன. எனினும், திட்டத்துக்கான இறுதி ஒப்புதல் வழங்கப்படவில்லை.

திட்டமிடப்பட்ட இடம் கடற்கரையை ஒட்டியுள்ள பகுதி என்பதால், அப்பகுதியைச் சேர்ந்த மீனவர்கள் எதிர்ப்புத் தெரிவித்தனர். புதிய கட்டுமானத்தாலும் பாதுகாப்புக் கட்டுப்பாடுகளாலும் தங்களது மீன்பிடித் தொழில், படகுகளை நிறுத்தும் இடங்கள், வலைகளைப் பராமரிக்கும் பகுதிகள் மற்றும் கடற்கரையைச் சார்ந்த வாழ்வாதாரம் பாதிக்கப்படும் என்று அவர்கள் தெரிவித்தனர். கடற்கரைச் சூழலில் ஏற்படக்கூடிய பாதிப்புகள் குறித்தும் கவலைகள் எழுப்பப்பட்டன.

இதையடுத்து, திட்டத்துக்கு எதிராக மீனவர்கள் போராட்டத்தில் ஈடுபட்டனர். எதிர்ப்பு வலுத்த நிலையில், பட்டினப்பாக்கத்தில் வளாகம் அமைப்பது தொடர்பாக இறுதி முடிவு எடுக்கப்படவில்லை என்றும், மாற்று இடங்கள் குறித்தும் ஆய்வு செய்யப்பட்டு வருவதாகவும் அமைச்சர் சி.டி.ஆர். நிர்மல் குமார் தெரிவித்தார்.

5. அதிக விலைக்கு மின்சாரம் கொள்முதல் என சர்ச்சை

தமிழ்நாட்டில் மின்சார தேவை அதிகரிக்கும் காலங்களில் கூடுதல் மின்சாரத்தை வாங்குவதற்காக மின்சார விநியோக நிறுவனம் ஒப்பந்தங்களை மேற்கொள்கிறது. ஆனால், தவெக ஆட்சியில் மேற்கொள்ளப்பட்ட மின்சாரக் கொள்முதல் நடவடிக்கைகள், அதன் விலை காரணமாகச் சர்ச்சையை ஏற்படுத்தின.

அக்டோபர் மாத மின்தேவையைச் சமாளிப்பதற்காக, குறிப்பாக உச்சநேரத் தேவைக்காக, ஒரு யூனிட் மின்சாரத்தை ரூ.37 வரை கொடுத்து வாங்க தமிழ்நாடு மின்சார விநியோக நிறுவனம் ஒப்பந்தம் மேற்கொண்டது. அதிக விலைக்கு மின்சாரம் கொள்முதல் செய்யப்படுவதாக எதிர்க்கட்சிகள் விமர்சித்தன.

இதற்கிடையே, அடுத்தடுத்த மாதங்களுக்கான மின்சாரக் கொள்முதல் ஏலத்தில் ஒரு யூனிட்டுக்கு ரூ.41.50 வரை விலை கோரப்பட்டது. இந்த விலைக்கும் எதிர்ப்பு வலுத்த நிலையில், அடுத்த மூன்று மாதங்களுக்குத் தேவையான மின்சாரம் போதுமான அளவில் இருப்பதாகக் கூறிய மின்சாரத் துறை அமைச்சர் சி.டி.ஆர். நிர்மல் குமார், அதிக விலை கோரப்பட்ட அந்த ஒப்பந்தப்புள்ளி ரத்து செய்யப்படுவதாக அறிவித்தார்.

மின்தேவையைச் சமாளிப்பதற்காக மேற்கொள்ளப்பட்ட கொள்முதல் நடவடிக்கை என்று அரசு இதை விளக்கினாலும், அக்டோபர் மாதத்துக்கு ஒரு யூனிட் மின்சாரத்தை ரூ.37 வரை கொடுத்து வாங்க ஒப்புக்கொண்டதும், பின்னர் நடைபெற்ற ஏலத்தில் ரூ.41.50 வரை விலை கோரப்பட்டதும் மின்சாரக் கொள்முதல் திட்டமிடல் குறித்த கேள்விகளை எழுப்பின.

6. பெரியார் அறிவுலக சர்ச்சை

கோவையில் அண்மையில் திறக்கப்பட்ட பெரியார் அறிவுலகம் நூலகத்தில் வாங்கப்பட்ட புத்தகங்களின் தரம் மற்றும் நம்பகத்தன்மை குறித்து புகார்கள் எழுந்தன.

அங்கு இடம்பெற்றிருந்த சில புத்தகங்களில் தவறான தகவல்கள் இருப்பதாகவும், சில எழுத்தாளர்களின் பெயர்கள் மற்றும் அவர்களது உண்மைத்தன்மை குறித்துச் சந்தேகம் எழுவதாகவும் எழுத்தாளர் பெருமாள் முருகன் குற்றம்சாட்டினார். சில புத்தகங்கள் செயற்கை நுண்ணறிவைப் பயன்படுத்தி உருவாக்கப்பட்டிருக்கலாம் என்றும் அவர் சந்தேகம் தெரிவித்தார். இதையடுத்து, நூலகத்துக்கான புத்தகத் தேர்வு மற்றும் கொள்முதல் நடைமுறைகள் குறித்து கேள்விகள் எழுந்தன.

கொள்முதல் எந்த ஆட்சியில் தொடங்கப்பட்டது, ஒப்பந்தம் எப்போது இறுதி செய்யப்பட்டது, புத்தகங்கள் எப்போது வாங்கப்பட்டன என்பதில் திமுகவும் தவெகவும் மாறுபட்ட விளக்கங்களை அளித்தன. முறைகேடு குறித்த குற்றச்சாட்டுகள் விசாரணையில் உள்ளன.

"தவெகவுக்குள் பல அதிகார மையங்கள்"

இந்த ஆறு விவகாரங்களையும் தாண்டி, அரசின் ஒட்டுமொத்த நிர்வாகச் செயல்பாடுகள் குறித்தும் விமர்சனங்கள் எழுந்துள்ளன.

சென்னையில் 'தி வீக்' ஆங்கில வார இதழின் தலைமைச் செய்தியாளரான மூத்த பத்திரிகையாளர் லட்சுமி சுப்பிரமணியன், பிபிசி தமிழிடம் பேசும்போது, விஜயின் வாக்குறுதிகள் காரணமாக மக்கள் மத்தியில் அதிக எதிர்பார்ப்புகள் இருந்ததாகக் குறிப்பிட்டார்.

ஆனால், அந்த எதிர்பார்ப்புகளை அரசால் நிறைவேற்ற முடியவில்லை என்றும், நிர்வாகத்தில் அரசு தோல்வியடைந்துள்ளதாகவும் அவர் மதிப்பிடுகிறார். அரசு நிர்வாகத்தில் அதிகாரிகளின் ஒத்துழைப்பு கிடைக்கவில்லை என்று ஆளுங்கட்சியினர் குற்றம்சாட்டும் நிலையில், நிர்வாகத்தைச் சீரமைப்பதற்குப் பதிலாகத் தங்களுக்கான பிம்பத்தையும் அரசியல் கதையாடலையும் உருவாக்குவதிலேயே அவர்கள் கவனம் செலுத்துவதாகவும் அவர் கூறுகிறார்.

தவெகவுக்குள் பல அதிகார மையங்கள் இருப்பதும், பலரும் பல்வேறு விஷயங்களைக் கட்டுப்படுத்த முயல்வதும் அரசின் செயல்பாட்டைப் பாதிப்பதாக லட்சுமி சுப்பிரமணியன் கூறுகிறார். முதலமைச்சர் விஜய் ஏன் அமைதியாக இருக்கிறார் என்பதற்கான காரணம் தெரியவில்லை என்றும், அவருக்கு நிர்வாகத்தை நடத்தும் அனுபவமும் புரிதலும் இருக்கிறதா என்ற கேள்வி எழுவதாகவும் அவர் கூறுகிறார்.

எதிர்க்கட்சிகள் விமர்சனம்

முன்னாள் முதலமைச்சரும் திமுக தலைவருமான மு.க. ஸ்டாலின், ஆறு மாத ஆட்சி குறித்து சமூக ஊடகத்தில் விமர்சித்துள்ளார். சட்டம்-ஒழுங்கு தீவிர சிகிச்சைப் பிரிவிலும், ஆட்சி நிர்வாகம் கோமாவிலும் இருப்பதாகக் குறிப்பிட்ட அவர், விஜய் பகுதி நேர முதலமைச்சராகவும் முழுநேர உள்ளடக்க உருவாக்குநராகவும் செயல்படுவதாகவும் விமர்சித்தார்.

அதிமுக பொதுச்செயலாளர் எடப்பாடி பழனிசாமியும், ஆறு மாத தவெக ஆட்சியில் மக்கள் விலைவாசி உயர்வு மற்றும் சட்டம்-ஒழுங்கு பிரச்னைகளால் பாதிக்கப்பட்டுள்ளதாகக் கூறினார். திறமையற்ற அரசு செயல்படுவதாகவும், இந்தக் காலகட்டத்தில் குறிப்பிடத்தக்க பெரிய திட்டங்கள் எதுவும் கொண்டுவரப்படவில்லை என்றும் அவர் விமர்சித்தார்.

பாஜக மாநிலத் தலைவர் நயினார் நாகேந்திரன், சட்டம்-ஒழுங்கு சீர்குலைவு, போதைப்பொருள் புழக்கம், காவல்துறையினருக்கே பாதுகாப்பற்ற சூழல் மற்றும் காவிரி நீர் மேலாண்மை தொடர்பான குளறுபடிகள் குறித்து அரசைக் குற்றம்சாட்டினார்.

அரசின் பதில் என்ன?

இந்த விமர்சனங்களுக்கு பதிலளிக்கும் வகையில் ஊடகங்களிடம் பேசிய அமைச்சர் சி.டி.ஆர். நிர்மல் குமார், ஆறு மாதங்களில் பல்வேறு திட்டங்களை அரசு கொண்டுவந்துள்ளதாகவும், அனைத்து மட்டங்களிலும் ஊழலை ஒழிக்கப் போராடி வருவதாகவும் தெரிவித்தார்.

சட்டம்-ஒழுங்கு விவகாரத்தில் காவல்துறைக்கு முழு சுதந்திரம் வழங்கப்பட்டுள்ளதாகக் கூறிய அவர், பாலியல் குற்றங்களில் இருந்து குழந்தைகளைப் பாதுகாக்கும் போக்சோ சட்டத்தின் கீழ் சுமார் 6,700 வழக்குகள் பதிவு செய்யப்பட்டுள்ளதாகத் தெரிவித்தார். இதில் முந்தைய ஆட்சிக் காலத்தில் புகார் அளிக்கப்பட்ட சுமார் 2,800 சம்பவங்களும் அடங்கும் என்று அவர் கூறினார்.

- இது, பிபிசிக்காக கலெக்டிவ் நியூஸ்ரூம் வெளியீடு