అమెరికాలో ఎయిర్ ట్రాఫిక్ కంట్రోల్ వ్యవస్థలో సాంకేతిక సమస్య, దేశవ్యాప్తంగా విమానాల రాకపోకలకు అంతరాయం

అమెరికాలో ఎయిర్ ట్రాఫిక్ కంట్రోల్ కమ్యూనికేషన్ వ్యవస్థలో తలెత్తిన సాంకేతిక సమస్య కారణంగా దేశవ్యాప్తంగా విమానాల రాకపోకలను తాత్కాలికంగా నిలిపివేశారు.

దాదాపు నాలుగు గంటల తర్వాత ఈ ఆంక్షలను ఎత్తివేసి, విమానాలు మళ్లీ టేకాఫ్ అయ్యేందుకు అధికారులు అనుమతించారు. అయితే, విమాన సర్వీసులు పూర్తిస్థాయిలో సాధారణ స్థితికి రావడానికి మరికొన్ని రోజులు పట్టవచ్చని అమెరికా రవాణా శాఖ మంత్రి సీన్ డఫీ తెలిపారు.

2001 సెప్టెంబర్ 11 ఉగ్రదాడుల తర్వాత అమెరికాలో ఇంత భారీ స్థాయిలో విమాన సర్వీసులను నిలిపివేయడం ఇదే తొలిసారని ఆ దేశ జాతీయ రవాణా భద్రతా మండలి మాజీ చీఫ్ తెలిపారు.

"ఇప్పటి ఆధునిక కాలంలో కూడా ఇలాంటి సమస్య తలెత్తడం ఆశ్చర్యం కలిగిస్తోంది" అని బీబీసీకి అమెరికా మీడియా భాగస్వామి అయిన సీబీఎస్ న్యూస్‌తో మాట్లాడిన రాబర్ట్ ఎల్. సుమ్వాల్ట్ అన్నారు.

అయితే, ఈ ఘటన వెనుక సైబర్ దాడికి సంబంధించిన ఎలాంటి సంకేతాలు లేవని ఆ దేశ హోంల్యాండ్ సెక్యూరిటీ మంత్రి మార్క్‌వేన్ ముల్లిన్ తెలిపారు. ప్రయాణికులంతా సురక్షితంగానే ఉన్నారని స్పష్టం చేశారు.

కెనడా-అమెరికా మధ్య నడిచే అన్ని విమాన సర్వీసులను శుక్రవారం సాయంత్రం వరకు నిలిపివేసినట్టు ఎయిర్ కెనడా ప్రకటించింది.

ఈ సమస్య సైబర్ దాడి వల్ల లేదా కృత్రిమ మేధ (ఏఐ) కారణంగా తలెత్తినట్లు కనిపించడం లేదని అమెరికా అధ్యక్షుడు డోనల్డ్ ట్రంప్ ఫాక్స్ న్యూస్‌తో చెప్పారు.

ఇది మరో 9/11 తరహా ఘటన కాదని మార్క్‌వేన్ ముల్లిన్ పదేపదే స్పష్టం చేస్తూ ప్రజలకు భరోసా ఇచ్చారు.

అంతకుముందు భద్రతా కారణాలను చూపుతూ అమెరికా విమానయాన అధికారులు దేశవ్యాప్తంగా అన్ని విమానాల రాకపోకలను నిలిపివేయాలని ఆదేశించారు. ప్రస్తుత పరిస్థితిని అసాధారణ పరిస్థితిగా అభివర్ణించారు.

వైట్‌హౌస్‌లో జరిగిన మీడియా సమావేశంలో మార్క్‌వేన్ ముల్లిన్ మరో విషయాన్ని స్పష్టం చేశారు. మైక్రోసాఫ్ట్ సేవల అంతరాయానికి, ఈ సమస్యకు సంబంధం లేదని చెప్పారు.

ప్రజల భద్రతకు భరోసా కల్పించడంతోపాటు విమానాశ్రయాల్లో చిక్కుకుపోయిన ప్రయాణికులకు సహాయం చేసేందుకు ప్రభుత్వం మునుపెన్నడూ లేనంత వేగంతో చర్యలు తీసుకుంటోందని ముల్లిన్ తెలిపారు.

సామాన్య ప్రజలకు ఎలాంటి ప్రమాదం లేదని ఆయన భరోసా ఇచ్చారు. "ఎవరి ప్రాణాలకూ ముప్పు ఏర్పడలేదు" అని పేర్కొన్నారు.

సమస్యకు కారణమేంటి?

నెట్‌వర్క్ అప్‌డేట్ కారణంగానే కమ్యూనికేషన్ వ్యవస్థలో సమస్య తలెత్తినట్లు సీబీఎస్ తన కథనంలో వెల్లడించింది.

సీబీఎస్ ప్రకారం, అమెరికాలో విమానాల రాకపోకలను నిలిపివేయడానికి కారణమైన సాంకేతిక లోపం.. ఎయిర్ ట్రాఫిక్ కంట్రోల్ వ్యవస్థలన్నింటినీ అనుసంధానించే ప్రైవేట్ కమ్యూనికేషన్ నెట్‌వర్క్‌ను అప్‌డేట్ చేయడం వల్లే ఏర్పడినట్లు పలు వర్గాలు తెలిపాయి.

ఈ నెట్‌వర్క్ నిర్వహణ బాధ్యతలను ఎల్3హ్యారిస్ సంస్థ చూస్తోంది. నెట్‌వర్క్‌ను అప్‌డేట్ చేసిన తర్వాత అది రీబూట్ అయింది. ఆ తర్వాత పూర్తిగా పనిచేయడం ఆగిపోయింది.

ప్రపంచంలోనే అత్యాధునిక గగనతల వ్యవస్థలు, ఆయుధ వ్యవస్థలు, కమాండ్ అండ్ కంట్రోల్ వేదికలకు కమ్యూనికేషన్ సేవలు అందించే ప్రముఖ సంస్థగా ఎల్3హ్యారిస్ తన వెబ్‌సైట్‌లో పేర్కొంటోంది.

ఈ ఘటనపై వివరణ కోరుతూ బీబీసీ సంప్రదించగా.. ఎల్3హ్యారిస్ ఇంకా స్పందించలేదు.

మరోవైపు, అమెరికా నుంచి వచ్చే, అక్కడికి వెళ్లే అన్ని విమానాల రాకపోకలను తాత్కాలికంగా నిలిపివేసినట్లు సిడ్నీలోని ఆస్ట్రేలియా అతిపెద్ద అంతర్జాతీయ విమానాశ్రయం ప్రకటించిందని బీబీసీ ప్రతినిధి సిమోన్ అట్కిన్సన్ తెలిపారు.

2023లోనూ దేశవ్యాప్తంగా విమానాలపై ప్రభావం

అమెరికాలో విమానాల రాకపోకల నిలిపివేతను గతంలో చోటుచేసుకున్న ఇలాంటి ఘటనలతో పోలుస్తున్నారని బీబీసీ వెరిఫై ప్రతినిధి జాక్ హోర్టన్ తెలిపారు.

దేశవ్యాప్తంగా విమానాల రాకపోకలను నిలిపివేయడంపై నిర్వహించిన మీడియా సమావేశంలో హోంల్యాండ్ సెక్యూరిటీ మంత్రి మార్క్‌వేన్ ముల్లిన్.. ఇది 9/11 తరహా ఘటన కాదని పదేపదే స్పష్టం చేశారు.

క్రాన్‌ఫీల్డ్ యూనివర్సిటీలో ఏవియేషన్ అండ్ ఎన్విరాన్‌మెంట్ విభాగంలో అసోసియేట్ ప్రొఫెసర్‌గా పనిచేస్తున్న డాక్టర్ గై గ్రాటన్‌తో ఈ ఘటనపై బీబీసీ మాట్లాడింది.

"9/11 తర్వాత జరిగిన అత్యంత తీవ్రమైన ఘటనగా ఇది కనిపిస్తోంది. అయితే, ఆ దాడుల స్థాయిలో మాత్రం లేదు" అని ఆయన వివరించారు.

గతంలో ఇలాంటి ఘటనలు ఏమైనా జరిగాయా అని అడిగినప్పుడు.. 2023లో అమెరికాలో నోటీస్ టు ఎయిర్ మిషన్స్ వ్యవస్థలో సాంకేతిక లోపం తలెత్తిన విషయాన్ని ఆయన గుర్తుచేశారు. ఆ సమయంలోనూ విమానాల రాకపోకలను నిలిపివేయాల్సి వచ్చిందన్నారు.

"అప్పట్లో ఇలాంటి పరిస్థితి గంటా 52 నిమిషాల పాటు కొనసాగింది. ఈ సమయంలో దాదాపు 9,500 విమానాలు ఆలస్యంగా నడిచాయి. మరో 1,300 విమానాలను రద్దు చేశారు" అని తెలిపారు.

ఆ వ్యవస్థలో సాంకేతిక సమస్య కారణంగా విమాన రాకపోకలకు సంబంధించిన భద్రతా సమాచారాన్ని జారీ చేయడం సాధ్యం కాలేదు. వ్యవస్థను తిరిగి అందుబాటులోకి తీసుకొచ్చే వరకు విమానాల రాకపోకలపై ఆంక్షలు కొనసాగాయి.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)