అనిరుధ్‌ను పెళ్లి చేసుకున్న కావ్య మారన్ ఎవరు, ఆమెను చూస్తే ‘టెన్షన్‌’ వస్తోందని రజినీకాంత్ ఎందుకన్నారు?

దక్షిణ భారతదేశంలోని అత్యంత ప్రభావవంతమైన వ్యాపార కుటుంబాలలో ఒకటైన మారన్ కుటుంబంలో కావ్య మారన్ పుట్టారు.

ప్రజల దృష్టిని పెద్దగా ఆకర్షించకుండా తనకంటూ ఒక ప్రత్యేకగుర్తింపు తెచ్చుకున్నప్పటికీ వ్యాపార, వాణిజ్య వర్గాల్లో ఆమె రాణించారు.

సంగీత దర్శకుడు అనిరుధ్ రవిచందర్‌తో కావ్యమారన్ వివాహంపై కొన్ని నెలలగా వదంతులు, ఊహాగానాలు ప్రచారంలో ఉన్నప్పటికీ అటు కావ్య గానీ ఇటు అనిరుధ్ గానీ మొదట్లో తమ సంబంధం గురించి బహిరంగంగా మాట్లాడలేదు.

పెళ్లి వదంతులను ఒకానొక సమయంలో అనిరుధ్ ఖండించారు.

కానీ తర్వాత పెళ్లిపై చాలా వార్తాలు బయటికొచ్చాయి. గ్రీస్‌లో అనిరుధ్, కావ్యమారన్ వివాహం జరిగింది.

1991లో చెన్నైలో పుట్టారు కావ్య. కళానిధి మారన్, కావేరి ఆమె తల్లిదండ్రులు.

భారత్‌లోని ప్రముఖ మీడియా సంస్థల్లో ఒకటైన సన్ గ్రూప్‌ వారసురాలిగా గుర్తింపుపొందిన ఆమె...వ్యాపారం, రాజకీయాలు, క్రీడలు, వినోదంవంటి అనేక రంగాల్లో కీలక పాత్ర పోషిస్తున్నారు.

చెన్నైలో కామర్స్‌లో బ్యాచిలర్ డిగ్రీ పూర్తి చేసిన కావ్య ఆ తర్వాత ఎంబీఏ చదివారు. చదువు పూర్తయ్యాక ఆమె కుటుంబ వ్యాపారంలో చేరి సన్ గ్రూప్‌కు చెందిన వివిధ కార్యకలాపాల్లో అనుభవం సంపాదించారు.

కొన్నేళ్ల క్రితం సన్ టీవీ నెట్‌వర్క్ ఎగ్జిక్యూటివ్ డైరెక్టర్‌గా బాధ్యతలు స్వీకరించడం ఆమె కెరీర్‌లో ఒక కీలక మలుపు.

మీడియా కంపెనీ కార్యకలాపాలు, అభివృద్ధి ప్రాజెక్టులు, డిజిటల్ ప్లాట్‌ఫామ్‌లకు సంబంధించిన వ్యవహారాల్లో ఆమె కీలకపాత్ర పోషిస్తున్నట్టు సంస్థ వర్గాలు చెబుతున్నాయి.

ముఖ్యంగా సన్ గ్రూప్ ఓటీటీ ప్లాట్‌ఫామ్ అయిన సన్ నెక్స్ట్ అభివృద్ధిలో ఆమె పాత్ర ముఖ్యమైందని చెబుతారు. అయితే తన పని గురించి ఆమె బహిరంగంగా పెద్దగా మాట్లాడరు.

సన్‌రైజర్స్‌తో దేశవ్యాప్త గుర్తింపు

అయితే కావ్య మారన్‌ను యావత్ దేశానికి పరిచయం చేసింది టెలివిజన్ ప్రపంచం కాదు... క్రికెట్.

ఐపీఎల్‌లో సన్‌రైజర్స్ హైదరాబాద్ జట్టు ప్రతినిధిగా, నిర్వహణ బాధ్యతలు చూసేవ్యక్తిగా ఆమె కనిపించడం మొదలుపెట్టినప్పటినుంచి అభిమానుల దృష్టి సహజంగానే ఆమె వైపు మళ్లింది. సన్‌రైజర్స్ హైదరాబాద్ జట్టుకు సీఈఓగా ఉన్న ఆమె కొన్నేళ్లుగా ఆటగాళ్ల వేలంలో పాల్గొంటున్నారు. జట్టు నిర్వహణకు సంబంధించిన నిర్ణయాల్లో భాగస్వామిగా ఉంటున్నారు. మ్యాచ్‌ల సమయంలో స్టాండ్స్ నుంచి ఆటగాళ్లను ఉత్సాహపరచడం వంటివి చేస్తూ భారత క్రికెట్‌లో అత్యంత సుపరిచితమైన నిర్వాహకులలో ఒకరిగా గుర్తింపు పొందారు.

జట్టు గెలిచినప్పుడు ఆమె ముఖంలో కనిపించే ఆనందం, ఓడిపోయినప్పుడు కనిపించే నిరాశ సోషల్ మీడియాలో తరచూ చర్చనీయాంశమవుతుంటాయి.

దక్షిణాఫ్రికాలో జరిగే క్రికెట్‌ పోటీల్లో సన్‌రైజర్స్ ఈస్టర్న్ కేప్ జట్టుకు, ఇంగ్లాండ్, వేల్స్‌లో జరిగే షార్ట్-ఫార్మ్ క్రికెట్ టోర్నమెంట్ అయిన 'ది హండ్రెడ్'లో సన్‌రైజర్స్ లీడ్స్ జట్టు నిర్వహణబాధ్యతలను కూడా కావ్యామారన్ చూస్తున్నారు.

రజనీకాంత్ అప్పుడేమన్నారంటే...

కావ్య మారన్, కళానిధి మారన్ హాజరైన ఒక కార్యక్రమంలో హీరో రజనీకాంత్ చేసిన వ్యాఖ్యలు సోషల్ మీడియాలో అందరిదృష్టిని ఆకర్షించాయి.

''వచ్చేసారి ఎస్ఆర్‌హెచ్ టీంలో మంచి ఆటగాళ్ళను తీసుకోండి. సన్‌రైజర్స్ మ్యాచ్ జరుగుతుంటే కావ్య ఎక్స్ ప్రెషన్స్ చూస్తుంటే నాకు టెన్షన్ వస్తోంది. కావ్యను చూస్తుంటే నాకు బీపీ పెరుగుతోంది'' అని 2023 ఆగస్టులో జైలర్ సినిమా ప్రిరిలీజ్ ఫంక్షన్‌లో రజినీకాంత్ అన్నారు.

సన్ గ్రూప్ సినిమా విభాగమైన సన్ పిక్చర్స్ నిర్మించిన అనేక చిత్రాల్లో రజనీకాంత్ నటించారు. ఆయన ఇటీవలి చిత్రం జైలర్ 2ను సన్ పిక్చర్స్ నిర్మించగా అనిరుధ్ రవిచందర్ సంగీతం అందించారు.

ఐపీఎల్ మ్యాచ్‌లను క్రమం తప్పకుండా చూసేవారికి కావ్య మారన్ ముఖం బాగా సుపరిచితమే అయినా, ఆమె మాట్లాడడం విన్నవారు మాత్రం చాలా తక్కువ. ఆమె మీడియాకు అరుదుగా ఇంటర్వ్యూలు ఇస్తుంటారు. సోషల్ మీడియాలో కూడా ఆమె అంత చురుగ్గా ఉండరు.

ఈ వివాహాన్ని తమిళనాడులోని రెండు ప్రభావవంతమైన కుటుంబాల కలయికగా కూడా చూస్తున్నారు. ఒకవైపు మీడియా, రాజకీయాలతో సంబంధాలున్న మారన్ కుటుంబం ఉండగా, మరోవైపు తమిళ సినీపరిశ్రమలో అగ్రకథానాయకుడైన రజనీకాంత్ కుటుంబానికి బంధువైన ప్రముఖ సంగీతకారుడు అనిరుధ్ రవిచందర్ ఉన్నారు.

అనిరుధ్ రవిచందర్ రజనీకాంత్ భార్య లత మేనల్లుడు. అనిరుధ్ తండ్రి రవి రాఘవేంద్ర లత తమ్ముడు.

కావ్య మారన్ తమిళనాడు మాజీ ముఖ్యమంత్రి కరుణానిధి మేనల్లుడు మురసోలి మారన్ మనవరాలు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)