విశాఖ: సీఐఐ భాగస్వామ్య సదస్సుల్లో భారీ పెట్టుబడి ఒప్పందాల ప్రకటనలు... అమల్లోకి వచ్చేవి ఎన్ని?

విశాఖలో మరోసారి అంతర్జాతీయ పెట్టుబడుల సందడి మొదలైంది. నవంబర్ 12న విశాఖపట్నంలో ప్రారంభమైన 31వ సీఐఐ పార్ట్‌నర్‌షిప్ సమ్మిట్ తొలి రోజు 73 పెట్టుబడి ఒప్పందాలు కుదరగా, 15 పరిశ్రమలకు ప్రభుత్వం అధికారిక అనుమతులు ఇచ్చింది.

వీటి ద్వారా మొత్తం రూ. 5.84 లక్షల కోట్ల పెట్టుబడులు వస్తాయని, సుమారు 1.07 లక్షల మందికి ఉద్యోగ అవకాశాలు లభిస్తాయని రాష్ట్ర ప్రభుత్వం వెల్లడించింది. ఈ సదస్సు రెండు రోజుల పాటు జరగనుంది.

సదస్సు ప్రారంభానికి ముందు ప్రభుత్వం రెండు రోజుల వ్యవధిలో 141 ఒప్పందాలు, 30 అనుమతులు లక్ష్యంగా ప్రకటించింది. వాటి ద్వారా రూ. 12.14 లక్షల కోట్ల పెట్టుబడులు, 2,46,373 ఉద్యోగాలు వస్తాయని ముందస్తు అంచనా వేసింది.

అయితే భారీ పెట్టుబడులు, లక్షలాది ఉద్యోగాల అంచనాలు వినిపిస్తున్న వేళ.. సీఐఐ సదస్సులు జరిగిన ప్రతిసారీ వచ్చే ప్రశ్నలే ఈసారీ ముందుకు వచ్చాయి.

పెట్టుబడుల సదస్సుల్లో కుదిరిన ఒప్పందాల్లో ఎన్ని కార్యరూపం దాల్చుతాయి? గత సదస్సుల్లో ప్రకటించిన పెట్టుబడి ఒప్పందాల్లో ఎన్ని ఆచరణలోకి వచ్చాయి? అనే ప్రశ్నలు తెరపైకి వచ్చాయి.

పెట్టుబడుల సదస్సుల్లో లక్షల కోట్ల పెట్టుబడులకు ఒప్పందాలు కుదిరినట్లు ప్రభుత్వాలు ప్రకటిస్తుంటాయి.

ఆ సంఖ్యలు చూస్తే రాష్ట్ర భవిష్యత్తే ఇక మారిపోతుందనే విధంగా ఉంటాయి.

"పెట్టుబడుల సదస్సుల్లో కుదిరిన ఒప్పందాల్లో 10 నుంచి 20 శాతం క్షేత్రస్థాయిలో కార్యరూపం దాల్చినా.. అవి రాష్ట్రాల అభివృద్ధికి ఎంతో దోహదపడతాయి. సీఐఐ సదస్సుల వద్ద కనిపించే హడావిడి చూస్తే పెట్టుబడులు పెట్టేందుకు ఇంతమంది వచ్చారా అనిపిస్తుంది. అయితే ఇక్కడ అర్థం చేసుకోవాల్సింది.. అవి పెట్టుబడులు కాదు, ఒప్పందాలు మాత్రమే" అని విశాఖకు చెందిన ఐటీ కంపెనీ యజమాని, పారిశ్రామికవేత్త ఓ. నరేష్ కుమార్ బీబీసీతో అన్నారు.

ఒప్పందాలు కార్యరూపం దాల్చుతాయా?

ఈ ఏడాది కుదిరిన ఒప్పందాల్లో దాదాపు 70 శాతం కార్యరూపం దాలుస్తాయని టీడీపీ రాష్ట్ర అధ్యక్షుడు పల్లా శ్రీనివాసరావు బీబీసీతో అన్నారు.

బీబీసీ: గతేడాది జరిగిన ఒప్పందాల్లో (రూ. 13,25,716 కోట్లు) ఎంత శాతం కార్యరూపం దాల్చాయి?

పల్లా శ్రీనివాసరావు: మా నాయకుడు (చంద్రబాబునాయుడు) చెప్పారు కదా దాదాపు 50 శాతమని.

బీబీసీ: మరి ఆ వివరాలు పబ్లిక్ డొమైన్‌లో ఎక్కడా కనిపించడం లేదు కదా?

పల్లా శ్రీనివాసరావు: అన్నీ పబ్లిక్ డొమైన్‌లో ఉండవు. మీరే విచారించుకోవాలి.

బీబీసీ: ప్రభుత్వమే ఆ వివరాలను ఎక్కడైనా వెల్లడిస్తే, లేదా అధికారులు చెబితేనే కదా.. వాటిని అధికారికంగా పరిగణించగలం.

పల్లా శ్రీనివాసరావు: గత ప్రభుత్వంలా మేం చేయం. ఖచ్చితంగా అనుకున్నట్లు ఒప్పందాలు కుదుర్చుకున్న పరిశ్రమలను కార్యాచరణలోకి తీసుకొస్తాం.

సీఐఐ సదస్సు ప్రాంగణంలో (12.11.26) రాష్ట్ర గృహనిర్మాణ, పౌరసంబంధాల శాఖ మంత్రి కొలుసు పార్థసారథి మీడియాతో మాట్లాడారు.

"2024, జూన్‌ నుంచి ఇప్పటివరకు రాష్ట్రానికి రూ. 22.61 లక్షల కోట్ల విలువైన 714 ప్రాజెక్టుల ఏర్పాటుకు ప్రభుత్వం వివిధ సంస్థలతో ఒప్పందాలు చేసుకుంది. 526 ప్రాజెక్టులకు అవసరమైన భూములతో పాటు ప్రోత్సాహకాలకు ప్రభుత్వం ఆమోదం తెలిపింది. రూ.7.30 లక్షల కోట్ల విలువైన ప్రాజెక్టుల నిర్మాణ పనులు ప్రారంభమయ్యాయి" అని మంత్రి పార్థసారథి తెలిపారు.

తొలిరోజు ఒప్పందాలు ఎవరితోనంటే...

సీఐఐ భాగస్వామ్య సదస్సులో తొలిరోజు కియా, రిలయన్స్, గెయిల్ సహా వివిధ దిగ్గజ కంపెనీలు రాష్ట్రంలో పెట్టుబడులు పెట్టేందుకు ఆంధ్రప్రదేశ్ ప్రభుత్వంతో ఒప్పందాలు కుదుర్చుకున్నాయి. తొలి రోజు మొత్తం 73 అవగాహనా ఒప్పందాలు కుదరగా, 15 ప్రభుత్వ ఉత్తర్వులు జారీ అయ్యాయి. తొలిరోజు పెట్టుబడి ప్రతిపాదనలు చేసిన సంస్థల్లో రిలయన్స్ ఇండస్ట్రీస్, గ్రీన్‌కో ఎనర్జీస్, క్లీన్ మ్యాక్స్ ఎన్విరో ఎనర్జీ సొల్యూషన్స్, కియా ఇండియా ఉన్నాయి.

శ్రీకాకుళంలో రష్మి మెటలర్జికల్ ఇండస్ట్రీస్, కడపలో జేఎస్‌డబ్ల్యూ గ్రూప్ పెట్టుబడులు పెట్టనున్నాయి. పునరుద్పాదక ఇంధన రంగంలో గ్రీన్‌కో సంస్థ, క్లీన్ మ్యాక్స్, కృష్ణా జిల్లాలో మేఘా ఇంజినీరింగ్ ఎంఓయూలు చేసుకున్నాయి.

శ్రీ సత్యసాయి జిల్లాలో కియా, తిరుపతి జిల్లాలో హీరో మోటోకార్ప్, ప్రకాశం జిల్లాలో ఎంఎన్‌ఎల్ సొల్యూషన్స్ ఒప్పందాలు చేసుకోగా.. రసాయనాలు, పెట్రోకెమికల్స్ రంగంలో శ్రీకాకుళంలో గెయిల్ ఇండియా, నెల్లూరులో ఎన్‌ఏఎన్ మ్యాగ్నెటెక్, తిరుపతిలో ఎన్‌ఏఎన్ సిలోక్స్ గ్రీన్‌మెట్ ప్రాజెక్టుల ఏర్పాటుకు ముందుకు వచ్చాయి.

ఫుడ్ ప్రాసెసింగ్ రంగంలో నాయుడు పేటలో ఎస్‌ఎల్‌ఎన్ కాఫీ, హిందుస్థాన్ కోకాకోలా బెవరేజెస్, అనంతపురంలో శ్రీ వసుధ ఫుడ్స్ ఎంఓయూలు చేసుకున్నాయి. ఏరోస్పేస్, రక్షణ రంగంలో సత్యసాయి జిల్లాలో ఆస్ట్రోబేస్ స్పేస్ టెక్నాలజీస్, నెల్లూరులో వజ్రశక్తి వెంచర్స్, క్షిపణులు, లాయిటరింగ్ మ్యూనిషన్స్, డ్రోన్ల తయారీకి ఆదిత్య ప్రెసిటెక్ పెట్టుబడి ప్రతిపాదనలు చేశాయి.

గతేడాది పెట్టుబడులు ఏ రంగాల్లో వచ్చాయి?

సదస్సులో ముఖ్యమంత్రి చంద్రబాబు చేసిన ప్రజెంటేషన్‌లో పునరుత్పాదక ఇంధనం, ఎలక్ట్రానిక్స్, సెమీకండక్టర్లు, ఏరోస్పేస్, రక్షణ, అంతరిక్ష సాంకేతికత, ఆహార శుద్ధి, పోర్టులు, నౌకా నిర్మాణం, క్వాంటం కంప్యూటింగ్, డేటా సెంటర్లు వంటి రంగాలను ప్రాధాన్యత రంగాలుగా వివరించారు.

2025 నవంబర్‌లో విశాఖలో జరిగిన 30వ సీఐఐ పార్ట్‌నర్‌షిప్ సదస్సులో 613 ఒప్పందాలు కుదిరాయి. వాటి విలువ రూ. 13,25,716 కోట్లు. ఈ ప్రాజెక్టుల ద్వారా 16,31,188 మందికి ఉద్యోగాలు వచ్చే అవకాశం ఉందని అప్పట్లో ప్రభుత్వం ప్రకటించింది.

రంగాలవారీగా చూస్తే అత్యధిక పెట్టుబడి ప్రతిపాదనలు ఇంధన రంగంలో వచ్చాయి. ఆ తర్వాత పరిశ్రమలు, మౌలిక వసతులు, ఐటీ-ఎలక్ట్రానిక్స్ రంగాలు నిలిచాయి.

2025 సీఐఐ సదస్సులో రంగాలవారీ పెట్టుబడి ప్రతిపాదనలను ఈ కింది పట్టికలో చూడండి.

ఇంధన రంగంలో వచ్చిన ప్రతిపాదనల్లో పునరుత్పాదక విద్యుత్ ప్రాజెక్టులు కీలకంగా ఉన్నాయి. ఐటీ రంగంలో డేటా సెంటర్లపై ఆసక్తి కనిపించింది.

గత ఒప్పందాలు ఎంతవరకు అమలయ్యాయి?

2025 సీఐఐ సదస్సులో రూ. 13.25 లక్షల కోట్ల పెట్టుబడుల ఒప్పందాలు కుదిరిన తర్వాత, వాటి అమలుపై ప్రభుత్వం ప్రకటనలు చేసింది. అదే ఏడాది డిసెంబర్ 4న జరిగిన 13వ రాష్ట్ర పెట్టుబడుల ప్రోత్సాహక మండలి (SIPB) సమావేశంలో ముఖ్యమంత్రి చంద్రబాబు నాయుడు ఈ అంశంపై మాట్లాడారు.

"సీఐఐ సదస్సులో కుదిరిన ఒప్పందాల్లో 50 శాతానికి పైగా ఆమోదాల దశకు చేరుకున్నాయి. రూ. 7.69 లక్షల కోట్ల విలువైన పెట్టుబడులు అమలు దిశగా ముందుకు వెళ్తున్నాయి. ఆయా ప్రాజెక్టులకు 45 రోజుల్లోగా శంకుస్థాపనలు జరిగేలా చూడాలని అధికారులను ఆదేశించాం. భూసేకరణ సమస్యలు లేకుండా చూడాలని, ప్రాజెక్టుల పురోగతిని నిరంతరం పర్యవేక్షించాలని సూచించాం." అని అన్నారు.

అయితే ఆ తర్వాత ఆ 613 ఒప్పందాల్లో ఎన్ని పూర్తిగా గ్రౌండింగ్ అయ్యాయి? ఎన్ని నిర్మాణ దశలో ఉన్నాయి? ఎన్ని ఉత్పత్తి ప్రారంభించాయి? ప్రకటించిన 16.31 లక్షల ఉద్యోగాల్లో వాస్తవంగా ఎన్ని ఉద్యోగాలు వచ్చాయి? అనే ప్రశ్నలకు సదస్సులోని మొత్తం 613 ఒప్పందాల వారీగా పూర్తి సమాధానం ఇచ్చే సమగ్ర గణాంకాలు బహిరంగంగా అందుబాటులో లేవు.

"సీఐఐ సదస్సులు ఇప్పటివరకు దేశంలో 30 వరకు జరిగాయి. కానీ వాటిలో కుదిరిన ఒప్పందాల్లో ఎన్ని అమలయ్యాయనే కచ్చితమైన నివేదిక ఎక్కడా దొరకదు. అదొక అందమైన ఈవెంట్‌లా జరుగుతూ ఉంటుంది" అని సీనియర్ జర్నలిస్ట్ యుగంధర్ రెడ్డి బీబీసీతో అన్నారు.

"సీఐఐ సదస్సులు విశాఖలోనే నాలుగు జరిగాయి. కానీ వాటి ఫలితాలపై పెద్దగా మాట్లాడలేం. అయితే ఈసారి విశాఖలో గూగుల్ డేటా సెంటర్ హడావిడి ఉండటంతో సీఐఐ సదస్సులో కుదిరిన ఒప్పందాల్లో ఎక్కువ భాగం అమలయ్యే అవకాశం ఉందని అనిపిస్తోంది" అని ఆయన అన్నారు.

అయితే ఒప్పందాలు వాస్తవ రూపంలోకి తీసుకురావడానికి అవసరమైన మౌలిక వసతులు కూడా ఉండాలని చెప్పారు.

గత ఒప్పందాల లెక్కలేంటి?

2023లో విశాఖలో జరిగిన గ్లోబల్ ఇన్వెస్టర్స్ సమ్మిట్‌లో 352 అవగాహన ఒప్పందాలు కుదిరాయి. వాటి విలువ రూ. 13,05,663 కోట్లు. వీటి ద్వారా 6,03,223 మందికి ఉద్యోగాలు వచ్చే అవకాశం ఉందని అప్పటి ముఖ్యమంత్రి వైఎస్ జగన్‌మోహన్ రెడ్డి ప్రకటించారు. వాటిలో ఇంధన రంగానికి చెందిన 40 ఒప్పందాల విలువ రూ. 8,84,823 కోట్లు. పరిశ్రమల రంగానికి రూ. 3.35 లక్షల కోట్ల పెట్టుబడుల ప్రతిపాదనలు వచ్చాయి. ఐటీ, ఐటీఈఎస్ రంగంలో రూ.25,587 కోట్లు, పర్యటక రంగంలో రూ. 22,096 కోట్ల ఒప్పందాలు కుదిరాయి.

2024లో సీఐఐ పార్ట్‌నర్‌షిప్ సదస్సు విశాఖలో జరగలేదు. ఆ ఏడాది డిసెంబర్ 2, 3 తేదీల్లో న్యూఢిల్లీలో జరిగింది. 2024 సెప్టెంబర్ 25న విశాఖపట్నంలో సీఐఐ ఆంధ్రప్రదేశ్ ఇన్‌ఫ్రాస్ట్రక్చర్ సమ్మిట్ జరిగింది.

అందువల్ల 2023, 2025, 2026 సదస్సుల గణాంకాలను వరుసగా జరిగిన సీఐఐ సదస్సుల పెట్టుబడులుగా చూడకూడదని ప్రొఫెసర్ ప్రసాదరావు అన్నారు.

గతంలో విశాఖలో జరిగిన సీఐఐ సదస్సుల చరిత్రను చూస్తే..2016లో 290 ప్రాజెక్టుల ద్వారా రూ. 3.44 లక్షల కోట్ల పెట్టుబడుల ప్రతిపాదనలు వచ్చాయి. 2017లో 586 ప్రాజెక్టులకు సంబంధించి రూ. 7.65 లక్షల కోట్ల పెట్టుబడుల ఒప్పందాలు కుదిరాయి. 2018లో 734 ఒప్పందాల ద్వారా రూ. 4.39 లక్షల కోట్ల పెట్టుబడులు వస్తాయని అప్పటి ప్రభుత్వం ప్రకటించింది.

2016, 2017 సదస్సుల తర్వాత వెల్లడైన గణాంకాల ప్రకారం...2016లో ప్రాజెక్టుల సంఖ్యలో 65.17 శాతం, పెట్టుబడి విలువలో 44.26 శాతం ప్రతిపాదనలు తదుపరి దశకు వెళ్లాయి. 2017లో ఈ రేట్లు వరుసగా 39.76 శాతం, 33.86 శాతంగా నమోదయ్యాయని...దీనిని బట్టి పెట్టుబడుల ప్రతిపాదనలన్నీ వాస్తవ పెట్టుబడులుగా మారవనే విషయం గుర్తుంచుకోవాలని పారిశ్రామికవేత్త ఓ. నరేష్ కుమార్ అన్నారు.

వాస్తవ రూపంలోకి తీసుకురావాలి: మాజీ మంత్రి అమర్నాథ్

పరిశ్రమలకు, పెట్టుబడిదారులకు సాధారణం కంటే ఎక్కువ రాయితీలు, సౌకర్యాలు కల్పించే అవకాశం ఉంటుందని, వాటిని పొందేందుకు సదస్సుల్లో ఒప్పందాలు చేసుకూనేందుకు పరిశ్రమలు ముందుకు వస్తుంటాయని మాజీ మంత్రి గుడివాడ అమర్నాథ్ అన్నారు.

"సదస్సుల్లో ప్రభుత్వంతో ఒప్పందాలు జరిగిన తర్వాత... ప్రభుత్వ ఆమోదం, భూమి కేటాయింపు, శంకుస్థాపన, నిర్మాణం, ఉత్పత్తి ప్రారంభం.. ఒక్కోటి ఒక్కో దశలో జరుగుతాయి. అందుకే ఈ సదస్సుల ఫలితాలను అంచనా వేయాలంటే ప్రభుత్వం ప్రతి ఒప్పందానికి సంబంధించిన ప్రాజెక్టు పేరు, పెట్టుబడి విలువ, భూమి కేటాయింపు, అనుమతులు, నిర్మాణ పురోగతి, ఉత్పత్తి ప్రారంభ తేదీ, వాస్తవంగా కల్పించిన ఉద్యోగాల వివరాలను ప్రజలకు అందుబాటులో ఉంచాల్సిన అవసరం ఉంది." అని మాజీ మంత్రి అమర్నాధ్ అన్నారు.

భారీ సంఖ్యలతో పెట్టుబడుల ప్రకటనలు రావడం ఒక దశ మాత్రమే. అవి పరిశ్రమలుగా మారినప్పుడే ఫలితం కనిపిస్తుందని పారిశ్రామికవేత్త ఓ. నరేష్ కుమార్ అన్నారు.

ఎస్క్రో ఖాతా ఇవాళ్టి నుంచే: చంద్రబాబు

ఏపీలో పారిశ్రామిక ప్రోత్సాహకాలను ఎస్క్రో ఖాతా ద్వారా అందించాలని నిర్ణయించామని, అలాగే రాజకీయ వైరుధ్యాలకు పెట్టుబడిదారులు బలి కాకూడనే ఉద్దేశంతో దేశంలోనే తొలిసారిగా ఏపీ నుంచి ఇన్వెస్ట్‌మెంట్ ప్రొటెక్షన్ యాక్ట్‌ను తీసుకువస్తున్నామని చంద్రబాబు చెప్పారు.

ఎస్క్రో ఖాతా అంటే ఇద్దరు వ్యక్తులు లేదా సంస్థల మధ్య జరిగే ఆర్థిక లావాదేవీల్లో డబ్బును ఒక తటస్థ పక్షం (సాధారణంగా బ్యాంకు) వద్ద భద్రంగా ఉంచే ప్రత్యేక ఖాతా. ఆ డబ్బును ముందుగా నిర్ణయించుకున్న షరతులు నెరవేరిన తర్వాతే సంబంధిత వ్యక్తికి లేదా సంస్థకు విడుదల చేస్తారు.

ఒక చిన్న ఉదాహరణ చూద్దాం.

ఒక కంపెనీ ఆంధ్రప్రదేశ్‌లో పరిశ్రమ ఏర్పాటు చేస్తే ప్రభుత్వం ఆ కంపెనీకి రూ. 10 కోట్ల ప్రోత్సాహకాలు ఇస్తామని హామీ ఇచ్చింది. ఆ మొత్తాన్ని ఎస్క్రో ఖాతాలో ఉంచుతుంది. కంపెనీ పరిశ్రమ ఏర్పాటు చేసి, నిర్దేశించిన పెట్టుబడులు, ఉద్యోగాల కల్పన వంటి షరతులు నెరవేర్చాలి. ఆ తర్వాత నిబంధనల ప్రకారం బ్యాంకు ఆ మొత్తాన్ని విడుదల చేస్తుంది.

దీని వల్ల పెట్టుబడిదారులకు ప్రభుత్వం ఇచ్చిన ఆర్థిక హామీకి భద్రత ఉంటుంది. షరతులు నెరవేరకుండానే ప్రభుత్వం డబ్బు విడుదల చేయాల్సిన అవసరం ఉండదు. అలాగే నిధుల విడుదలపై బ్యాంకు ద్వారా పర్యవేక్షణ ఉంటుంది.

పెట్టుబడుల పరిరక్షణ చట్టం విషయానికి వస్తే.. ప్రభుత్వం మారినా గతంలో ఇచ్చిన పెట్టుబడి హామీల కొనసాగింపు ఉంటుంది. పరిశ్రమలకు కేటాయించిన భూములకు రక్షణ, ఇచ్చిన అనుమతులు, రాయితీలకు భద్రత. పెట్టుబడుల విధానాల్లో ప్రభుత్వాల మార్పుల వల్ల కంపెనీలకు నష్టం కలగకుండా చూడటం ఈ చట్టం ప్రధాన ఉద్దేశం.

విశాఖపట్నమే ఎందుకు?

విశాఖపట్నంలో సీఐఐ సదస్సుల నిర్వహించిన చరిత్ర ఉంది. 2016, 2017, 2018 సంవత్సరాల్లో వరుసగా మూడేళ్లు సీఐఐ పార్ట్‌నర్‌షిప్ సదస్సులు విశాఖలో జరిగాయి. ఆ తర్వాత 2023లో రాష్ట్ర ప్రభుత్వం నిర్వహించిన గ్లోబల్ ఇన్వెస్టర్స్ సమ్మిట్ కూడా విశాఖలోనే జరిగింది.

అయితే 2023 నాటి సదస్సు సీఐఐ పార్ట్‌నర్‌షిప్ సమ్మిట్ కాదు. 2024లో 29వ సీఐఐ పార్ట్‌నర్‌షిప్ సదస్సు న్యూదిల్లీలో జరిగింది. 2025, 2026లో మళ్లీ విశాఖ వేదికగా ఈ సదస్సులు జరుగుతున్నాయి.

"విశాఖకు సహజమైన పోర్టు సదుపాయాలు, స్టీల్ ప్లాంట్, పారిశ్రామిక ప్రాంతాలు, ఔషధ పరిశ్రమలు, విమానాశ్రయం, రైల్వే, రోడ్డు అనుసంధానం వంటి మౌలిక వసతులు ఉన్నాయి. తూర్పు తీరంలో కీలక నగరంగా ఉండటం, సముద్ర మార్గం ద్వారా అంతర్జాతీయ వాణిజ్యానికి అనుసంధానం ఉండటం కూడా పెట్టుబడిదారులను ఆకర్షించే అంశాలు. ఇవి విశాఖను సదస్సుల వేదికగా ఎంచుకోవడానికి దోహదపడతాయి" అని ఆంధ్రా యూనివర్సిటీ ఎకనామిక్స్ విభాగం ప్రొఫెసర్ ఎం. ప్రసాదరావు బీబీసీతో అన్నారు.

విశాఖ సీఐఐ భాగస్వామ్య సదస్సుకు శాశ్వత వేదికగా మారుతోందని ఈ ఏడాది సదస్సులో పాల్గొన్న కేంద్ర వాణిజ్య, పరిశ్రమల శాఖ మంత్రి పీయూష్ గోయల్ వ్యాఖ్యానించారు.

సీఐఐ సదస్సులో మాజీ క్రికెటర్ జాంటీ రోడ్స్

దక్షిణాఫ్రికాకు చెందిన ప్రముఖ మాజీ క్రికెటర్ జాంటీ రోడ్స్ విశాఖలోని సీఐఐ సదస్సులో కనిపించారు. ఆయన ముఖ్యమంత్రి చంద్రబాబును కలిశారు.

విశాఖ భాగస్వామ్య సదస్సులో పాల్గొనేందుకు వచ్చిన జాంటీ రోడ్స్ ఏపీ ప్రభుత్వంతో ఒప్పందం చేసుకున్నారు.

భోగాపురం విమానాశ్రయం వద్ద ఏర్పాటు చేస్తున్న ముక్కం కోస్టల్ వెల్ నెస్, సర్ఫ్ క్లబ్ కు బ్రాండ్ అంబాసిడర్ గా ఉన్నారు. రూ.55 కోట్ల పెట్టుబడితో భోగాపురం సమీపంలోని ముక్కం బీచ్ లో వెల్ నెస్ సెంటర్ ఏర్పాటు చేసేందుకు ఆ సంస్థ ముందుకు వచ్చింది.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)