'వరుసకు అన్న అయ్యేవాడే ఇంత ఘోరం చేస్తాడనుకోలేదు' - రాప్తాడు బాలిక తల్లి పార్వతమ్మ

ఈ కథనంలో కలిచివేసే అంశాలున్నాయి.

''ఇలా జరుగుతుందని కలలో కూడా ఊహించలేదు.. వావి వరుస లేకుండా కుక్కలాగా ప్రవర్తించడం చాలా తప్పు కదా’’ అన్నారు పార్వతమ్మ.

ఇటీవల అనంతపురం జిల్లా రాప్తాడు పాఠశాలలో జరిగిన దాడి ఘటనలో తీవ్రంగా గాయపడి ఆసుపత్రిలో చికిత్స పొందుతున్న గోపికకు పార్వతమ్మ తల్లి.

కుమార్తెపై జరిగిన దాడిని తలచుకుని ఆమె తీవ్ర ఆందోళనకు గురవుతున్నారు.

రాప్తాడులోని జిల్లా పరిషత్ ఉన్నత పాఠశాలలో పదో తరగతి చదువుతున్న గోపిక అనే బాలికపై అక్టోబరు 31న హేమంత్ అనే వ్యక్తి తరగతి గదిలోకి వచ్చి ఎలక్ట్రిక్ రంపంతో దాడికి పాల్పడ్డాడు. దీంతో గోపిక తీవ్రంగా గాయపడింది. ఈ దాడిని అడ్డుకోవడానికి ప్రయత్నించిన తోటిబాలిక లక్ష్మి కూడా గాయపడింది. ప్రస్తుతం గోపిక బెంగళూరులోని మణిపాల్ ఆస్పత్రిలో చికిత్స పొందుతుండగా, లక్ష్మి అనంతపురం జిల్లా ప్రభుత్వాసుపత్రిలో చికిత్స పొందుతోంది.

గోపిక చికిత్సకు సంబంధించి ఏపీ ప్రభుత్వం నుంచి తమకు ఎంతో సహకారం అందుతోందని పార్వతమ్మ తెలిపారు. ''లోకేశ్ సార్ మాటిచ్చారు... పాపకు ఏమీ కాదని.. అంతా తాను చూసుకుంటానని. అలాగే వైద్యం కూడా అందిస్తున్నారు'' అని పార్వతమ్మ చెప్పారు.

మరోపక్క ఏపీ విద్యాశాఖామంత్రి లోకేశ్ కూడా బాలిక ఆరోగ్యంపై సామాజిక మాధ్యమాలలో తరచూ అప్టేట్స్ ఇస్తున్నారు.

‘‘రాప్తాడు బాలిక ఆరోగ్యపరిస్థితి నిలకడగా ఉంది. కృత్రిమ ఆక్సిజన్ అవసరం తగ్గింది. మెత్తని ఆహారం తీసుకుంటోంది. బాలిక ముఖానికి వేసిన కుట్లు కూడా తొలగించారు. చెస్ట్ డ్రెయిన్ ద్వారా వచ్చే స్రావాలు కూడా క్రమంగా తగ్గుతున్నాయి. వైద్యులు ఆమె ఆరోగ్య పరిస్థితిని ఎప్పటికప్పుడు సమీక్షిస్తున్నారు’’ అని తన తాజా ఎక్స్‌ పోస్టులో లోకేశ్ చెప్పారు.

''కూలీ పనులకు వెళ్లినప్పుడు ఫోన్ వచ్చింది''

ఏపీ ప్రభుత్వ ఆదేశాల మేరకు బాలికను మెరుగైన వైద్యం కోసం దాడి జరిగిన రోజు రాత్రే బెంగళూరులోని మణిపాల్ ఆసుపత్రికి తరలించారు.

బాలికను ఏపీ విద్యాశాఖ మంత్రి నారా లోకేశ్, వైద్యారోగ్య శాఖ మంత్రి సత్యకుమార్ యాదవ్, బీసీ సంక్షేమ శాఖ మంత్రి సవిత తదితరులు ఆసుపత్రికి వెళ్లి పరామర్శించారు. బాలిక ఆరోగ్య పరిస్థితిని మంత్రి లోకేశ్ ఎప్పటికప్పుడు పర్యవేక్షిస్తున్నారని వైద్యాధికారులు చెబుతున్నారు.

బెంగళూరులోని మణిపాల్ ఆసుపత్రిలో చికిత్స పొందుతున్న గోపికను చూసుకుంటూ అక్కడే ఉన్న తల్లి పార్వతమ్మ నవంబరు 12న బీబీసీతో ప్రత్యేకంగా మాట్లాడారు.

అక్టోబరు 31న దాడి జరిగిన సమయంలో తాను కూలీ పనులకు వెళ్లానని చెప్పారు.

''కొట్టాలపల్లి అనే ఊళ్లో ద్రాక్షకాయలు కోయడం కోసం కూలీ పనికి వెళ్లాం. ఉదయం 10.30-11గంటల సమయంలో ఫోన్ వచ్చింది. కానీ నేను భయపడతానని విషయం చెప్పలేదు. గోపిక కళ్లు తిరిగి పడిపోయిందని చెప్పారు తప్ప ఇంతలా దాడి జరిగిందని చెప్పలేదు'' అని పార్వతమ్మ అన్నారు.

''కూలీలు వెళ్లిన వ్యానులో ఎక్కి ఆసుపత్రికి వచ్చా. వచ్చి చూసేసరికి చానామంది జనం ఉన్నారు. ఆ జనాన్ని చూసేసరికే ఏదో అయింది నా బిడ్డకు అనుకున్నా. లోపలికి పోయి చూస్తే ఇలా అయింది'' అన్నారు.

పార్వతమ్మది అయ్యవారిపల్లె. రాప్తాడు నుంచి సుమారు 9 కిలోమీటర్ల దూరంలో ఉంటుంది.

గోపిక ఆరో తరగతి చదువుతున్నప్పటి నుంచే రాప్తాడు జిల్లా పరిషత్ పాఠశాలకు అయ్యవారిపల్లె నుంచి ఆటోలో వెళ్లి వచ్చేదని కుటుంబసభ్యులు చెబుతున్నారు.

ప్రత్యేకాధికారుల నియామకం

దాడి జరిగిన రోజు సాయంత్రమే మెరుగైన చికిత్స కోసం అనంతపురం నుంచి బెంగళూరుకు బాలికను తరలించారు.

అనంతపురం నుంచి బెంగళూరులోని ఓల్డ్ ఎయిర్‌పోర్టు రోడ్డులోని మణిపాల్ ఆసుపత్రి వరకు గ్రీన్ ఛానల్ ఏర్పాటు చేసి బాలికను తరలించినట్టు అనంతపురం జిల్లా ఎన్టీఆర్ వైద్య సేవ జిల్లా కోఆర్డినేటర్ గంగాధర్ రెడ్డి బీబీసీకి చెప్పారు.

బాలిక ఆరోగ్య పరిస్థితిని ఎప్పటికప్పుడు పర్యవేక్షించేందుకు ఏపీ ప్రభుత్వం మణిపాల్ ఆస్పత్రిలో ఇద్దరు అధికారులను నియమించింది.

వారిలో వైద్య శాఖ తరఫున గంగాధర్ రెడ్డి ఉండగా, విద్యా శాఖ తరఫున రాప్తాడు మండల విద్యాశాఖాధికారి కుల్లయప్ప ఉన్నారు.

''ఆ రోజు కలెక్టర్ ఫోన్ చేసి ప్రభుత్వ ఆదేశాల మేరకు పాపకు మెరుగైన వైద్యం అందించేందుకు వేరొక ఆసుపత్రికి తరలించాలని అడిగారు. మంత్రి సత్యకుమార్ దగ్గరుండి తరలింపు ఏర్పాట్లు చేశారు'' అని గంగాధర్ రెడ్డి చెప్పారు.

ఘటన జరిగిన రోజున అనంతపురం పోలీసులు ఏపీ సరిహద్దు వరకు ఎస్కార్ట్ కింద వచ్చి ట్రాఫిక్ అంతరాయం లేకుండా చూడగా.. ఏపీ ప్రభుత్వం వినతి మేరకు కర్ణాటక ప్రభుత్వం కూడా స్పందించి కర్ణాటక సరిహద్దు నుంచి బెంగళూరులోని ఆస్పత్రి వరకు గ్రీన్ ఛానల్ ఏర్పాటు చేసింది.

గ్రీన్ ఛానల్ కారణంగా తక్కువ సమయంలోనే ఆస్పత్రికి చేరుకున్నామని గంగాధర్ రెడ్డి అన్నారు.

''చేతిలో చెయ్యి వేసి మాటిచ్చారు''

ప్రస్తుతం పాప చూడగలుతోందని, చిన్నగా మాట్లాడుతోందని పార్వతమ్మ చెప్పారు. బాలికను అనంతపురం నుంచి బెంగళూరు తరలించినప్పట్నుంచి ఆమె కూడా అక్కడే ఉంటున్నారు.

''ఇంకా కూర్చోలేకపోతోంది. నడవడం అసలే లేదు. కొద్దికొద్దిగా మాత్రమే తినగలుగుతోంది'' అని చెప్పారామె.

బెంగళూరు ఆసుపత్రికి వచ్చిన సమయంలో మంత్రి లోకేశ్ తమకు మాటిచ్చారని పార్వతమ్మ వివరించారు.

''పాప ఇంటి నుంచి స్కూలుకు ఎలా వెళ్లిందో.. అలా హాస్పిటల్ నుంచి ఇంటికి వెళ్లేదాకా చూసుకుంటానని లోకేశ్ సార్ చేతిలో చెయ్యి పెట్టి మాటిచ్చారు. అందుకు తగ్గట్టుగా మంచిగా చికిత్స అందిస్తున్నారు. ఇప్పుడు పాప ఆరోగ్యం కొద్దిగా మేలు అమ్మా.. అని డాక్టర్లు కూడా అన్నారు. ప్రభుత్వం తరఫున సునీతమ్మ, మంత్రులు సత్యకుమార్, లోకేశ్ సార్ పూనుకుని గ్రీన్ ఛానల్ ద్వారా తీసుకురావడం వల్ల ప్రాణం దక్కింది. లేకపోతే ప్రాణాలు పోయేవి'' అని పార్వతమ్మ చెప్పారు.

''ఆ ధైర్యమే బతికిస్తోంది''

బాగా చదువుకుని పదో తరగతి పాస్ కావాలని గోపిక చెబుతుండేదని పార్వతమ్మ అన్నారు. గోపిక ఎంతో మెతకగా ఉంటుందని, స్కూల్లో టీచర్లు కూడా చాలా మంచి పాప అని చెబుతారని ఆమె అన్నారు.

''తొందరగా కోలుకుని యథాప్రకారం స్కూలుకు వెళ్లి టెన్త్ క్లాస్ పరీక్షలు రాసి మార్కులు బాగా తెచ్చుకోవాలని గోపికకు బలంగా ఉంది. ఆ ధైర్యమే తను త్వరగా కోలుకునేలా చేస్తోంది'' అని పార్వతమ్మ అన్నారు.

పదో తరగతి పూర్తయ్యాక కాలేజీలో చేరాలనుకుందని వివరించారు.

''హేమంత్.. గోపికకు వరుసకు అన్న అవుతాడు’

గోపికపై దాడికి పాల్పడింది హేమంత్ అనే వ్యక్తని పోలీసులు చెప్పారు.

'' దాడిచేసిన తరువాత నిందితుడు హేమంత్ ఆత్మకూరు అటవీ ప్రాంతంలో ఉన్నాడనే సమాచారంతో రెండు పోలీసు బృందాలు అక్కడికి వెళ్లాయి. అతను సీఐ వెంకటేశ్వర్లుపై కత్తితో దాడి చేయడంతో పోలీసులు కాల్పులు జరిపారు'' అని అనంతపురం ఎస్పీ జగదీశ్ నవంబరు 1న మీడియాకు చెప్పారు. తర్వాత హేమంత్‌ను ఆసుపత్రికి తరలించగా.. ఇన్ఫెక్షన్ కారణంగా కుడికాలు తొలగించినట్టు డాక్టర్లు ప్రకటించారు.

హేమంత్ తల్లిది నాగలూరు అని, తమకు కొంత చుట్టరికం ఉందని పార్వతమ్మ వివరించారు.

''హేమంత్ నాకు వరుసకు కొడుకు అవుతాడు. గోపికకు అన్న వరుస అవుతాడు. కానీ ఎందుకు ఇలా చేశాడో అర్థం కావడం లేదు. వావీవరస లేకుండా కుక్కలాగా ప్రవర్తించడం చాలా తప్పు కదా.. ఇలా జరుగుతుందని కలలో కూడా అనుకోలేదు'' అని చెప్పారు.

అయితే అతను ఎప్పుడూ తమ ఇంటికి రాలేదన్నారు.

మరోవైపు హేమంత్‌ను సంప్రదించేందుకు బీబీసీ ప్రయత్నించగా.. అతని బంధువులు గానీ, లాయర్ గానీ అందుబాటులోకి రాలేదు.

కాల్పుల ఘటనపై సీబీఐతో దర్యాప్తు చేయించాలని మంగళగిరికి చెందిన న్యాయవాది జి.గోపీకృష్ణ ఏపీ హైకోర్టులో పిటిషన్ దాఖలు చేశారు.

దీనిపై విచారణ జరిపిన ధర్మాసనం.. హేమంత్ నుంచి తొలగించిన కాలును భద్రపరిచేందుకు చర్యలు తీసుకోవాలని అనంతపురం ఆస్పత్రి, పోలీసు అధికారులను నవంబరు 11న ఆదేశించింది.

తదుపరి విచారణ డిసెంబరు 30కు వాయిదా వేసింది.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)