‘బంగ్లాదేశ్ మురికి‌ వాడలను దిల్లీ నగరంగా ప్రచారం చేస్తున్న చైనా వ్లాగర్లు’: భారత్ అసంతృప్తి

బంగ్లాదేశ్ రాజధాని ఢాకాలోని మురికివాడల్లో వీడియోలు చిత్రీకరించి వాటిని భారత రాజధాని న్యూదిల్లీకి చెందినవిగా చూపించిన ఘటన వెలుగులోకి వచ్చింది.

చైనా పౌరుల బృందం ఢాకాలోని వివిధ ప్రాంతాలకు వెళ్లి అక్కడి జీవనశైలిని, ప్రాథమిక సౌకర్యాలను భారత్‌కు చెందినవిగా చెబుతూ చైనా సోషల్ మీడియా ప్లాట్‌ఫామ్‌లలో ప్రత్యక్ష ప్రసారం చేసినట్టు ఆరోపణలున్నాయి.

ఈ ఘటనపై భారత్ తీవ్ర అసంతృప్తిని వ్యక్తం చేసింది. ఇది తప్పుడు కథనాలను ప్రచారం చేసే ప్రయత్నమని భారత విదేశాంగ శాఖ ఆరోపించింది. ఈ వ్యవహారంపై ఇప్పటివరకు చైనా స్పందించలేదు.

''దీనికి సంబంధించి మీడియా కథనాలను చూశాం. ఏ దేశం గురించైనా వక్రీకరించి చిత్రీకరించే ఇలాంటి ప్రయత్నాలు దురదృష్టకరం" అని భారత విదేశాంగ శాఖ ప్రతినిధి రణధీర్ జైస్వాల్ అన్నారు.

''ఢాకాలోని కొన్ని ప్రాంతాలను దిల్లీగా చిత్రీకరించడానికి విదేశీ శక్తులు చేస్తున్న ప్రయత్నం తప్పుడు కథనాలను ప్రోత్సహించడమే. ఇలాంటి పనులు చేస్తున్న వ్యక్తులతో పాటు వారి వెనక ఉన్నవారి విశ్వసనీయతను కూడా ఇది దెబ్బతీస్తుంది. అలాంటివారిపై చర్యలు తీసుకోవాలని సంబంధిత అధికారులకు విజ్ఞప్తి చేస్తున్నాను'' అని ఆయన అన్నారు.

బంగ్లాదేశ్ వార్తాపత్రిక కథనంలో ఏముంది?

చైనా పౌరుల బృందం ఒకటి ఢాకాలోని మురికివాడలను చిత్రీకరించి ఆ వీడియోలను చైనా సోషల్ మీడియా ప్లాట్‌ఫామ్‌లైన డౌయిన్, వీచాట్‌లలో ప్రచారం చేస్తున్నట్టు బంగ్లాదేశ్ వార్తాపత్రిక ‘ప్రథమ్ ఆలో’ పేర్కొంది.

ఆ వీడియోలో ఢాకా ప్రాంతాలను న్యూదిల్లీకి చెందినవిగా చెబుతూ 'భారత్‌లో పేదరికం, అధ్వాన్నమైన మౌలిక సదుపాయాలు' ఉన్నాయని చూపిస్తున్నారని ఆ కథనం పేర్కొంది.

ఢాకాలోని ఉత్తరా ప్రాంతంలోని సెక్టార్-12, టెక్‌పారాలో ఇరుకైన వీధుల్లోకి వెళ్లి చైనా పౌరులు వీడియోలు తీస్తున్నారు. ఈ ప్రాంతాల్లో తక్కువ ఆదాయం ఉన్న కుటుంబాలు నివసిస్తున్నాయి. ఇక్కడ చాలా ఇళ్లు రేకుల షెడ్లు.

ఢాకా ఇళ్లను దిల్లీ ఇళ్లుగా చెప్పినట్టు ఆరోపణలు

150 మందికి పైగా చైనా పౌరులు ఆ ప్రాంతంలోని వీధుల్లో, ఇరుకు సందుల్లో ఈ వీడియోలు తీస్తూ కనిపిస్తున్నారని స్థానికులు చెబుతున్నారు. అయితే ఈ వీడియోలను ఏ ప్లాట్‌ఫామ్‌లలో అప్‌లోడ్ చేస్తున్నారో, వాటిలో వాళ్లేం చెబుతున్నారో స్థానికులకు తెలియదు.

స్థానిక పోలీసులు కూడా వారి కార్యకలాపాలను పర్యవేక్షించడం లేదు. మొదట్లో ఉదయం నుంచి రాత్రి వరకు నిరంతరం లైవ్ స్ట్రీమింగ్ చేసే వారిని చూసి స్థానికులు ఆసక్తి చూపించేవారు. కానీ ఇప్పుడు ఈ కార్యకలాపాలు స్థానికులకు ఇబ్బందిగా మారాయి. వారిలో అసహనాన్ని కూడా పెంచాయి.

మియాన్‌మియాన్ అనే చైనా మహిళ గురించి కూడా ఈ నివేదికలో ప్రస్తావించారు. చైనాలోని సిచువాన్ ప్రావిన్స్‌ తన స్వస్థలమని ఆ మహిళ చెప్పుకున్నారు. నవంబర్ 1న ఆమె ఉత్తరలోని సెక్టార్ 12లో ఒక కాలువ పక్క నుంచి లైవ్ వీడియో తీసి ఆ ప్రాంతాన్ని న్యూదిల్లీగా పరిచయం చేసినట్టు ఆరోపణలున్నాయి. భారత్‌లో ప్రజలు టాయిలెట్లను ఎలా ఉపయోగిస్తారో కూడా మియాన్‌మియాన్ వివరించారు.

అక్కడి ఇళ్లను, ప్రాథమిక సౌకర్యాలను వీడియోలో ఆ మహిళ విమర్శించారు.

"ఇక్కడి ఇళ్లు చాలా మురికిగా ఉన్నాయి. రేకుల ఇళ్లలో కనీసం ఫ్యాన్లు కూడా లేవు. ఈ ప్రాంతం వెనుకబడినది... అపరిశుభ్రంగా ఉంది'' అని ఆ మహిళ చెప్పారు. ఆమె అక్కడి శాంతిభద్రతల పరిస్థితిని కూడా ప్రశ్నించారు.

‘ఆవు మూత్రంతో టీ’

‘ప్రథమ్ ఆలో’ నివేదికలో టెక్‌పారాలో టీ అమ్మేవారిని రికార్డ్ చేస్తున్న వాంగ్ వీ అనే మరో చైనా జాతీయుడి గురించి కూడా ప్రస్తావించారు.

"స్థానికులు తాగే టీ గురించి ఆయన అవమానకరవ్యాఖ్యలు చేశారు. ఆ టీని ఆవు మూత్రంతో తయారు చేస్తున్నారని ఆరోపించారు. మరో టీ స్టాల్ ముందు నిలబడి, అక్కడ తాగే టీని మురికి నదీ జలాలతో తయారు చేశారని ఆరోపించారు. స్థానిక ప్రజల జీవనశైలి చాలా అపరిశుభ్రంగా ఉందని కూడా ఆయన వ్యాఖ్యానించారు" అని ఆ నివేదిక పేర్కొంది.

మరికొందరు చైనా జాతీయులు కూడా ఇలాంటి వీడియోలు చేసినట్టు ఆ కథనంలో ఉంది.

భారతదేశంలో వివాహం చేసుకుని, స్థానిక ప్రజలతో కలిసి ఈ బస్తీల్లోనే నివసిస్తామని వాళ్లు చెబుతున్నారని కథనంలో ఉంది.

ఈ వ్యవహారంపై పోలీసులేమంటున్నారు?

అనుమతి లేకుండా చైనా పౌరులు ఇలా వీడియోలు చిత్రీకరించడంపై స్థానికులు ఆగ్రహం వ్యక్తం చేశారు. వీడియోలు తీసేవాళ్లు చాలాసార్లు తమ ఇళ్లలోకి, వంటగదుల్లోకి, వ్యక్తిగత ప్రదేశాల్లోకి కూడా అనుమతిలేకుండా ప్రవేశించేవారని స్థానికులు ఆరోపిస్తున్నట్టు కథనంలో ఉంది.

స్థానికులు నిలదీసినప్పుడు వ్లాగర్లు క్షమాపణ చెప్పి అక్కడి నుంచి వెళ్లిపోయేవారని, కొద్దిసేపటికే మళ్లీ వచ్చి వీడియోలు తీయడం మొదలుపెట్టేవారని కొందరు స్థానికులు ‘ప్రథమ్ ఆలో’ కు తెలిపారు. దీనివల్ల స్థానికుల్లో అసంతృప్తి, ఆగ్రహం పెరుగుతున్నాయి.

చైనా పౌరులు బస్తీల్లో తిరుగుతూ వీడియోలు తీయడానికి కొందరు స్థానికులు కూడా సహాయం చేస్తున్నారని ‘ప్రథమ్ ఆలో’ కథనంలో వెల్లడైంది. తాను చైనా పౌరులకు గైడ్‌గా పనిచేశానని అందుకు రోజుకు 700 నుంచి 800 టాకాలు చెల్లించేవారని రితు అఖ్తర్ అనే స్థానిక మహిళ చెప్పారు. మరికొందరు బంగ్లాదేశీ మహిళలు కూడా వారికి సహాయం చేశారని ఆమె తెలిపారు.

ఫాంగ్యు అనే వ్యక్తి ఈ ప్రత్యక్ష ప్రసారాలను వ్యాపార ప్రచార కార్యకలాపాలలో భాగంగా అభివర్ణించినట్ట కథనంలో ఉంది.

ఆ ప్రాంతంలో విదేశీయులు వీడియోలు తీస్తున్నట్టు ఉత్తర వెస్ట్ పోలీస్ స్టేషన్ అధికారులు ధృవీకరించారు. అయితే ఈ వీడియోలు వెనుక అసలు ఉద్దేశం ఇంకా స్పష్టంగా తెలియలేదని పోలీసులు తెలిపారు.

‘‘ ఈ వీడియోలను వాళ్లు ఎందుకు తీస్తున్నారో నాకు నిజంగా తెలియదు. ఈ వీడియోలను ఎక్కడ ప్రసారం చేస్తున్నారో కూడా నాకు తెలియదు. అయితే వాళ్లు ఇలాంటి వీడియోలు తీస్తున్న విషయాన్ని నేను ఉన్నతాధికారులకు తెలియజేశాను. ఈ వ్యవహారంపై దర్యాప్తు జరుగుతోంది'' అని ఉత్తర వెస్ట్ పోలీస్ స్టేషన్ ఇన్‌చార్జ్ అధికారి(ఓసీ) మహమ్మద్ ఖాలిద్ మన్సూర్ ‘ప్రథమ్ ఆలో’తో చెప్పారు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)