డేవిడ్ వార్నర్: బాల్ ట్యాంపరింగ్ వివాదంలో ఖవాజా చెప్పింది వంద శాతం నిజం

2018 నాటి కేప్‌టౌన్ బాల్-ట్యాంపరింగ్ వివాదంపై తన మాజీ సహచర ఆటగాడు ఉస్మాన్ ఖవాజా చెప్పిన విషయాలు వంద శాతం నిజమని ఆస్ట్రేలియా మాజీ ఓపెనర్ డేవిడ్ వార్నర్ స్పష్టం చేశారు.

ఈ ఘటనపై క్రికెట్ ఆస్ట్రేలియా చేపట్టిన విచారణ చాలా తొందరపాటుగా, లోపభూయిష్టంగా సాగిందని ఆరోపించారు.

2018లో సౌతాఫ్రికాతో జరిగిన మూడో టెస్టులో బంతి ఆకారాన్ని మార్చడానికి ఆస్ట్రేలియా జట్టు శాండ్‌పేపర్ ఉపయోగించినట్లు తేలింది.

ఈ ఘటనలో డేవిడ్ వార్నర్, కెప్టెన్ స్టీవ్ స్మిత్‌లపై ఏడాది పాటు, బ్యాటర్ కేమరాన్ బాన్‌క్రాఫ్ట్‌పై తొమ్మిది నెలలు నిషేధం విధించారు.

దీని గురించి బౌలర్లకు ఏమీ తెలియదనే వాదనలను ఖండించిన ఖవాజా, శాండ్‌పేపర్ వాడకం విషయం ఆస్ట్రేలియా జట్టు మొత్తానికి తెలుసని గత వారం సంచలన వ్యాఖ్యలు చేశారు.

ఖవాజాకు వార్నర్ పూర్తి మద్దతు

అంతర్జాతీయ క్రికెట్‌కు 2024లో రిటైర్మెంట్ ప్రకటించిన వార్నర్, ఇన్‌స్టాగ్రామ్‌లో ఒక వీడియో విడుదల చేస్తూ ఖవాజాకు మద్దతు ప్రకటించారు.

"ఈ విషయంపై మాట్లాడి ఎనిమిదేళ్లయింది. ఉస్మాన్, నీకు పూర్తి మద్దతిస్తున్నా. నువ్వు చెప్పింది వంద శాతం నిజం. ఇప్పుడు అందరికీ నిజం తెలిసింది" అని ఆ వీడియోలో పేర్కొన్నారు.

క్రికెట్ ఆస్ట్రేలియా నిర్వహించిన విచారణలో సాక్షిగా తనను వివరాలు అడగకపోవడంపై ఖవాజా ఆశ్చర్యం వ్యక్తం చేశారు. దీనిపై కూడా వార్నర్ స్పందించారు.

"ఆ రోజు జరిగిన ప్రతి విషయాన్నీ ఉస్మాన్ నోట్ చేసుకున్నాడు. బాన్‌క్రాఫ్ట్ పక్కనే కూర్చున్న ఖవాజాను అసలు విచారించనే లేదు. విచారణను అంత వేగంగా ముగించేస్తే దాన్ని సమగ్ర విచారణ అని ఎలా అంటారు?" అని వార్నర్ ప్రశ్నించారు.

ఈ వివాదంలో స్మిత్, వార్నర్, బాన్‌క్రాఫ్ట్ మాత్రమే శిక్ష అనుభవించారు.

కానీ బంతి ఆకారం మారిన విషయం జట్టులోని కీలక బౌలర్లు పాట్ కమిన్స్, మిచెల్ స్టార్క్, జోష్ హాజిల్‌వుడ్, నాథన్ లయన్ ఎలా గుర్తించలేదనే అంశంపై ఎప్పుడూ ఎలాంటి వివరణ ఇవ్వలేదు.

ఈ సంగతి తమకు తెలియదని ఈ నలుగురు బౌలర్లు 2021లో ఉమ్మడి ప్రకటన విడుదల చేశారు.

"మైదానంలోకి నిషేధిత వస్తువును తీసుకువచ్చిన సంగతి తమకు తెలియదని" ఆ ప్రకటనలో చెప్పారు.

పాట్ కమిన్స్ 2021 నుంచి ఆస్ట్రేలియా టెస్ట్ కెప్టెన్‌గా ఉన్నారు. వివాదంలో ఉన్న ఆ నలుగురు బౌలర్లు ఇప్పటికీ ఆస్ట్రేలియా టెస్ట్ జట్టులో కీలక ఆటగాళ్లుగా కొనసాగుతున్నారు.

'తప్పుడు ప్రచారంపై మౌనం'

అయితే గత ఎనిమిదేళ్లలో మీడియాలో ఎన్నో తప్పుడు కథనాలు వచ్చాయని, చాలా మంది ఈ విషయంపై మౌనంగా ఉండిపోయారని డేవిడ్ వార్నర్ తన వీడియోలో ఆవేదన వ్యక్తం చేశారు.

112 టెస్టుల్లో 8,786 పరుగులు చేసిన 40 ఏళ్ల వార్నర్ ఉస్మాన్ ఖవాజా వ్యాఖ్యలపై స్పందించడం ఎందుకు ఆలస్యమైందో కూడా వివరించారు.

తన కుమార్తెలకు ఈ ఘటన వెనుక ఉన్న పూర్తిగా నిజం చెప్పడానికే తాను సమయం తీసుకున్నట్లు ఆయన పేర్కొన్నారు.

"ఆనాడు టీవీల్లో కెమెరాల ముందు మేము ఎందుకు అంతలా ఏడ్చామని నా 12 ఏళ్ల కుమార్తె ఐవీ అడిగింది. అది నాకెంతో కష్టమైన సమయం. అయితే ఓ విషయం మాత్రం స్పష్టంగా చెప్పాను 'పిల్లలూ, ఎప్పుడూ నిజమే చెప్పండి, ఎందుకంటే అబద్ధాలు ఎప్పటికైనా బయటపడతాయి' అని వాళ్లకు చెప్పాను" అని వార్నర్ అన్నారు.

"స్మిత్, బాన్‌క్రాఫ్ట్, నా కుటుంబాలకు ఇది ఎంతో కష్టకాలం. కానీ ఈ నిజం బయటకు రావడం చాలా అవసరం, ఖవాజాకు సంపూర్ణ మద్దతు ఉంటుంది" అని వార్నర్ స్పష్టం చేశారు.

క్రికెట్ ఆస్ట్రేలియా స్పందన

ఈ వ్యవహారంపై క్రికెట్ ఆస్ట్రేలియా స్పందించింది.

2018 నాటి కేప్‌టౌన్ ఘటనపై విచారణను మళ్లీ ప్రారంభించే ఉద్దేశం లేదని స్పష్టం చేసింది.

"2018 కేప్‌టౌన్ టెస్ట్ జరిగి ఎనిమిదేళ్లు అవుతున్నా దీనిపై ఇంకా ఎన్నో ఊహాగానాలు వస్తున్నాయి. గత నెలలో దక్షిణాఫ్రికా సిరీస్ సమయంలోనూ మీడియాలో దీనిపై పెద్ద ఎత్తున వార్తలు వచ్చాయి. ఈ సమయంలో కొత్త సమాచారం అందించే అవకాశం ఎప్పుడూ ఉంటుంది. ఇప్పటివరకు అందిన సమాచారాన్ని బట్టి అప్పటి విచారణ కమిటీ ఇచ్చిన తీర్పు పట్ల సంతృప్తిగా ఉన్నాం" అని ఖవాజా ఆరోపణల నేపథ్యంలో బోర్డు విడుదల చేసిన ప్రకటనలో పేర్కొంది.

ఆస్ట్రేలియా జట్టు వచ్చే శుక్రవారం నుంచి ఇంగ్లాండ్‌తో మూడు వన్డేలు, ఐదు టీ20ల సిరీస్ ఆడనుంది.

ఆ తర్వాత డిసెంబర్ 9 నుంచి న్యూజీలాండ్‌తో నాలుగు టెస్టుల సిరీస్ ప్రారంభం కానుంది.

అయితే ఇటీవల దక్షిణాఫ్రికా సిరీస్‌లో కేవలం 21.83 సగటుతో గత 49 ఇన్నింగ్స్‌లుగా ఒక్క సెంచరీ కూడా చేయలేకపోయిన 32 ఏళ్ల సీనియర్ బ్యాటర్ మార్నస్ లబుషేన్‌ను టెస్ట్ జట్టు నుంచి తప్పించారు.

దక్షిణాఫ్రికాలో జరిగిన ఈ టెస్ట్ సిరీస్‌ను ఆస్ట్రేలియా 2-1 తేడాతో కోల్పోయింది.

"ప్రస్తుతానికైతే మొదటి టెస్టుతోపాటు న్యూజీలాండ్ సిరీస్ మొత్తానికి మార్నస్ లబుషేన్‌ను ఎంపిక చేసే ఆలోచన లేదు" అని సెలక్షన్ కమిటీ ఛైర్మన్ జార్జ్ బెయిలీ స్పష్టం చేశారు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)