పాకిస్తాన్‌లో టీవీ యాంకర్ మృతి: ‘భర్త బట్టలు సర్దుతుండగా ఆయన చేతిలో తుపాకీ పేలి చనిపోయింది’ అని కుటుంబ సభ్యులు ఎందుకు చెప్పారు?

పాకిస్తాన్‌లోని పంజాబ్ ప్రావిన్స్‌ రావల్పిండిలో టీవీ యాంకర్ రాబియా అహసన్ మృతి తర్వాత ఆమె భర్తను రెండు రోజుల పోలీస్ కస్టడీకి తీసుకున్నారు. తొలుత రాబియా సోదరుడి ఫిర్యాదు మేరకు హత్య కేసు నమోదు చేశారు. కానీ రాబియా కుటుంబ సభ్యులు ఆమె భర్తపై నమోదైన హత్య కేసును వెనక్కి తీసుకోవాలని నిర్ణయించుకున్నారు.

నవంబర్ 8న రావల్పిండిలోని గుల్షన్‌ఆబాద్ ప్రాంతంలో రాబియా అహసన్ మృతదేహం ఆమె ఇంట్లో లభ్యమైంది. ఆమె మెడ కింది భాగంలో తుపాకీ గాయం ఉన్నట్లు పోలీసులు వెల్లడించారు.

రాబియా సోదరుడి ఫిర్యాదు మేరకు ఆమె భర్తపై హత్య కేసు నమోదు చేశారు. పోలీసులు వెంటనే ఆయన్ను అదుపులోకి తీసుకున్నారు. ఇంట్లోని ఓ గదిలో పిస్టల్‌ను కూడా స్వాధీనం చేసుకున్నారు.

విచారణ సమయంలో రాబియా భర్త పిస్టల్ నుంచి పొరపాటున తూటా పేలిందని పోలీసులకు చెప్పినట్లు పంజాబ్ సమాచార శాఖ మంత్రి అజ్మా బుఖారీ ఒక ప్రకటనలో వెల్లడించారు.

మరోవైపు ఈ కేసులో అరెస్టయిన రాబియా భర్తను పోలీసులు సోమవారం సంబంధిత కోర్టులో హాజరుపరిచారు. ఆయన్ను కస్టడీలో ఉంచాలని కోర్టును కోరారు. దీంతో న్యాయస్థానం రెండు రోజుల పోలీస్ కస్టడీకి అనుమతించింది.

ఇదిలా ఉండగా రాబియా అహసన్ అంత్యక్రియల ప్రార్థనలు (నమాజ్-ఎ-జనాజా) జామియా మసీదు గుల్షన్‌ఆబాద్‌లో నిర్వహించారు.

రాబియా అహసన్ సోదరుడు ఏం చెప్పారు?

రాబియా అహసన్ సోదరుడు ఖుర్రమ్ అహ్మద్ ఈ కేసులో ఫిర్యాదుదారు. అయితే తమ కుటుంబం కేసును వెనక్కి తీసుకోవాలని నిర్ణయించుకున్నట్లు ఆయన బీబీసీకి తెలిపారు.

రాబియా మరణం ప్రమాదవశాత్తూ జరిగిందేనని.. తనతోపాటు తన తల్లి, సోదరి అంగీకరిస్తున్నట్లు చెప్పారు.

ఘటన జరిగిన సమయంలో తన తల్లి, సోదరి అదే ఇంట్లో ఉన్నారని, తాను అక్కడ లేనని ఖుర్రమ్ తెలిపారు. ఇంట్లో పనిచేసే వ్యక్తి కూడా ఆ గదిలోనే ఉన్నట్లు వెల్లడించారు.

"అతను అల్మారాలో నుంచి బట్టలు తీస్తున్నాడు. అక్కడ ఒక పిస్టల్ ఉండటంతో దాన్ని చేతిలో పట్టుకున్నాడు. ఇంతలో అకస్మాత్తుగా తూటా పేలింది. అది రాబియా మెడ దగ్గర తగలడంతో ఆమె అక్కడికక్కడే మరణించిందని నిందితుడు చెప్పాడు" అని ఖుర్రమ్ అహ్మద్ అన్నారు.

ఘటన గురించి తెలిసి ఖుర్రమ్ అక్కడికి చేరుకున్నప్పుడు తన తల్లి, సోదరి చెప్పిన వివరాలను కూడా ఆయన వెల్లడించారు.

"ఘటనకు ముందు భార్యాభర్తలిద్దరూ ఒక గదిలోకి వెళ్లారు. అంతకుముందు వారిద్దరూ నాతో కలిసి ఇంటి ఆవరణలోనే ఉన్నారు. వారి మధ్య ఎలాంటి గొడవ జరిగినట్లు కనిపించలేదు" అని వారు చెప్పినట్లు ఖుర్రమ్ వివరించారు.

నిందితుడు తనకు చాలా బాగా తెలుసని, ఆయన గౌరవప్రదమైన వ్యక్తి అని ఖుర్రమ్ అహ్మద్ అన్నారు.

నిందితుడు ఓవర్సీస్ పాకిస్తానీస్ ఫౌండేషన్‌లో డిప్యూటీ డైరెక్టర్‌గా పనిచేసేవారని తెలిపారు.

ఆదివారం ఘటనాస్థలికి వచ్చిన పోలీసు అధికారులు ఎప్పుడైనా కేసును వెనక్కి తీసుకోవచ్చని తనకు చెప్పినట్లు ఖుర్రమ్ అహ్మద్ వెల్లడించారు.

'తూటా పేలినప్పుడు పిస్టల్ భర్త చేతిలోనే ఉంది'

నవంబర్ 8న రాబియా అహసన్ సోదరుడు ఖుర్రమ్ ఫిర్యాదు మేరకు సదర్ బెరూనీ పోలీస్ స్టేషన్‌లో ఈ ఘటనపై హత్య కేసు నమోదు చేశారు.

రాబియా అహసన్‌ను ఆమె భర్త కాల్చి చంపినట్లు ఫిర్యాదుదారుడికి ఫోన్ ద్వారా సమాచారం అందినట్టు ఎఫ్‌ఐఆర్‌లో పేర్కొన్నారు.

"నేను ఘటనాస్థలికి చేరుకునేసరికి నా సోదరి రక్తపు మడుగులో పడి ఉంది. అప్పటికే ఆమె మరణించింది" అని ఖుర్రమ్ చెప్పారు.

మరోవైపు ఈ ఘటనకు సంబంధించి పోలీసులు జరిపిన ప్రాథమిక విచారణలో కొన్ని భిన్నమైన విషయాలు వెలుగులోకి వచ్చాయి.

రాబియా అహసన్‌కు 14 ఏళ్లక్రితం వివాహమైందని, ఆమెకు ఇద్దరు కుమార్తెలు ఉన్నారని స్థానిక పోలీసులు తెలిపారు.

భార్యాభర్తల మధ్య ఎలాంటి విభేదాలు లేదా కుటుంబ కలహాలు ఉన్నట్లు కుటుంబ సభ్యులు, పిల్లలు, సోదరి, తల్లి ఎవరూ చెప్పలేదని పోలీసు అధికారులు అన్నారు.

వాతావరణంలో మార్పుల కారణంగా అల్మారాలో వేసవి దుస్తుల స్థానంలో శీతాకాలపు దుస్తులు సర్దుతుండగా.. బట్టల మధ్య నుంచి 30 బోర్ పిస్టల్ బయటపడినట్లు ప్రాథమిక విచారణలో తేలిందని పోలీసులు తెలిపారు.

తూటా పేలిన సమయంలో భర్త చేతిలోనే పిస్టల్ ఉన్నట్టు ఆ ఇంట్లో పనిచేసే వ్యక్తి వాంగ్మూలం ఇచ్చారు.

అయితే భార్యాభర్తల మధ్య గొడవలు లేదా విభేదాలు ఉన్నట్లు ఇప్పటివరకు కుటుంబ సభ్యులెవరూ వాంగ్మూలం ఇవ్వలేదని పోలీసులు తెలిపారు. అయినప్పటికీ ఈ ఘటనను హత్య కేసుగానే విచారిస్తామని, దాని వెనుక ఉన్న అన్ని కోణాలను పరిశీలిస్తామని స్పష్టం చేశారు.

రాబియా అహసన్ మెడ ముందు భాగంలో తూటా గాయం ఉన్నట్టు పోస్ట్‌మార్టం నివేదికలో తేలింది.

ఘటనా స్థలంలో లభించిన 30 బోర్ పిస్టల్‌కు లైసెన్స్ లేదని పోలీసులు తెలిపారు. ఈ ఘటనకు సంబంధించిన ఫోరెన్సిక్ ఆధారాలు, నమూనాలను పరీక్షల కోసం ల్యాబ్‌కు పంపించారు. ఫోరెన్సిక్ నివేదిక వచ్చిన తర్వాత తదుపరి చట్టపరమైన చర్యలు, విచారణ చేపడతామని వెల్లడించారు.

ఈ ఘటనకు సంబంధించిన అన్ని కోణాల్లో ఎలాంటి పక్షపాతం లేకుండా దర్యాప్తు చేస్తున్నామని పోలీసులు తెలిపారు. ఫోరెన్సిక్ పరీక్షలు, పోస్టుమార్టం నివేదిక, విచారణలో లభించిన ఆధారాల ప్రకారం తుది నిర్ణయానికి వస్తామని స్పష్టం చేశారు.

"మహిళ మెడ కింది భాగంలో తూటా తగిలింది’’ అని రావల్పిండి సీపీఓ ఘటనా స్థలాన్ని సందర్శించిన అనంతరం మీడియాతో తెలిపారు.

'న్యాయం జరగాలి'

రాబియా అహసన్ ప్రోగ్రామ్ హోస్ట్‌గా పనిచేసేవారు. ఆమె గతంలోనూ తన కార్యక్రమాన్ని హోస్ట్ చేసినట్టు, ఆమెకు ఇద్దరు కుమార్తెలు ఉన్నట్టు చానెల్ 92 ప్రతినిధి సాజిద్ షేక్ చెప్పారు.

రాబియా అహసన్ మరణవార్త విని తాను తీవ్ర దిగ్భ్రాంతికి, బాధకు గురయ్యానని జర్నలిస్ట్ ఫరీహా ఇద్రిస్ సోషల్ మీడియా ప్లాట్‌ఫామ్ ఎక్స్‌లో పేర్కొన్నారు.

రాబియా మంచి యాంకర్, సహోద్యోగి, ఇద్దరు పిల్లల తల్లి అని తెలిపారు. ఆమె తమను చాలా చిన్న వయసులోనే విడిచి వెళ్లిపోయారని ఆవేదన వ్యక్తం చేశారు.

"ఆమె పిల్లలు, కుటుంబ సభ్యులు, ఆత్మీయులకు నా ప్రగాఢ సానుభూతి తెలియజేస్తున్నా. ఈ బాధను తట్టుకునే శక్తిని అల్లా వారి కుటుంబానికి ప్రసాదించాలి. ఆమెకు కచ్చితంగా న్యాయం జరగాలి" అని ఫరీహా ఇద్రిస్ పేర్కొన్నారు.

"మరో రోజు.. మరో మహిళ తన సొంత ఇంట్లోనే హత్యకు గురైంది" అని మరో జర్నలిస్ట్ జెబ్ అల్-నిసా బుర్కీ ఎక్స్‌లో వ్యాఖ్యానించారు.

మాజీ సహోద్యోగి, యాంకర్ రాబియా అహసన్ ఇక మన మధ్య లేరని తెలిసి తీవ్ర విచారం కలిగిందని షకీర్ అబ్బాసీ ఎక్స్‌లో స్పందించారు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)