وہ خاتون کون ہیں جنھیں امریکہ ’چین کی مبینہ جاسوس‘ قرار دیتا ہے؟

مصنوعی ذہانت کی صنعت کی ایک معروف شخصیت پر الزام عائد کیا گیا ہے کہ ان کا ایک مبینہ چینی جاسوس کے ساتھ تعلق تھا، اور یہ الزام اب سرکاری تحقیقات کا سبب بن چکا ہے۔

نیویارک ٹائمز کے مطابق امریکی انٹیلیجنس حکام کا خیال تھا کہ ایلس ہوانگ نامی ایک چینی کاروباری شخصیت، جن کا اینویڈیا کے چیف ایگزیکٹو اور شریک بانی جینسن ہوانگ سے قریبی تعلق تھا، بیجنگ کے لیے جاسوسی کر رہی تھیں۔

جینسن ہوانگ نے اتوار کو اعتراف کیا کہ وہ اپنی اہلیہ کے ساتھ ’وفادار نہیں رہے‘ اور انھوں نے اپنی اہلیہ اور بچوں کو پہنچنے والے نقصان پر معذرت کی۔

امریکی ٹیکنالوجی کمپنی اور دنیا کی سب سے قیمتی کمپنیوں میں سے ایک اینویڈیا نے ان رپورٹوں کے حوالے سے آزادانہ تحقیقات شروع کر دی ہیں۔

کمپنی نے کہا کہ اسے نہیں لگتا کہ امریکہ کی قومی سلامتی کو خطرہ لاحق ہوا ہے اور مزید کہا کہ ہوانگ بدستور کمپنی کی قیادت جاری رکھنے کے لیے پُرعزم ہیں۔

امریکی صدر ڈونلڈ ٹرمپ نے پیر کو کہا کہ ایف بی آئی بھی اس تعلق کی تحقیقات کر رہی ہے۔

بی بی سی کی جانب سے تبصرے کی درخواست پر ایف بی آئی نے مزید کچھ کہنے سے گریز کیا۔

ٹرمپ نے کہا کہ انھوں نے پیر کو ہوانگ سے ان خبروں کے بعد بات کی جن میں کہا گیا تھا کہ امریکہ کا خیال ہے کہ ہوانگ چینی جاسوسی مہم کا ہدف رہے ہیں۔

انھوں نے صحافیوں سے کہا: ’میں نے ان سے پوچھا کیا آپ کو ذرا بھی علم تھا کہ وہ جاسوس تھیں؟ انھوں نے جواب دیا کہ ’مجھے کوئی علم نہیں تھا کہ وہ جاسوس تھیں۔‘ اور سچ کہوں تو میں ان کی بات پر یقین کرتا ہوں۔‘

ایلس ہوانگ کون ہیں؟

نیویارک ٹائمز کے مطابق امریکی حکام کا خیال تھا کہ ایلس ہوانگ کو چین کے اعلیٰ ترین انٹیلیجنس ادارے نے جاسوسی کے لیے بھرتی کیا تھا۔

ان کا موجودہ مقام معلوم نہیں۔

ایلس ہوانگ، جن کا جینسن ہوانگ سے کوئی خاندانی تعلق نہیں، مارچ سے نومبر 2023 تک سنگاپور میں قائم ڈیٹا سینٹر کمپنی میگاسپیڈ کی سینیئر ایگزیکٹو رہیں۔

اس کمپنی پر شبہ تھا کہ اس نے اینویڈیا کی چپس چین منتقل کرنے میں مدد کی تھی، اگرچہ اینویڈیا کا کہنا ہے کہ اس الزام کی تحقیقات ہو چکی ہیں اور یہ بے بنیاد ثابت ہوا ہے۔

تاہم سنگاپور کی حکومت اب بھی میگاسپیڈ کے خلاف پہلے سے موجود الزامات کا جائزہ لے رہی ہے، جن کے مطابق کمپنی امریکی پابندیوں کو نظر انداز کرتے ہوئے اینویڈیا کی جدید چپس چین تک پہنچا رہی تھی۔

بی بی سی نے وضاحت کے لیے میگاسپیڈ سے رابطہ کیا ہے۔

کمپنی نے گذشتہ ماہ نیویارک ٹائمز کو بتایا تھا کہ موجودہ انتظامیہ ان الزامات کو سنجیدگی سے لے رہی ہے اور داخلی تحقیقات کے لیے آزاد قانونی مشیروں کو مقرر کیا گیا ہے۔

رپورٹس کے مطابق نگرانی اور خفیہ تعاقب کے دوران ایلس ہوانگ اور ایک امریکی شہری کے درمیان رابطوں کا پتا چلا، جن کی بعد میں شناخت جینسن ہوانگ کے طور پر ہوئی۔

ابھی تک یہ واضح نہیں کہ ایلس ہوانگ، جو ہوانگ لے کے نام سے بھی جانی جاتی ہیں، نے کون سی معلومات اکٹھی کیں اور بیجنگ کو فراہم کیں، یا کیا انھوں نے ایسا کیا بھی تھا یا نہیں۔

انھوں نے تبصرے کی درخواست کا جواب نہیں دیا۔

جب بی بی سی نے اینویڈیا سے پوچھا کہ آیا کمپنی کو انٹیلیجنس خدشات کا علم تھا، تو کمپنی نے کہا کہ اسے ایسی کوئی اطلاع نہیں تھی۔

اینویڈیا کے ترجمان نے بی بی سی سے کہا: ’ہمیں یقین ہے کہ اگر ہم کسی حقیقی خطرے کا ہدف ہوتے تو امریکی حکومت ہمیں مطلع کرتی۔‘

چین نے جاسوسی کے الزامات مسترد کر دیے ہیں۔

چینی وزارت خارجہ کے ترجمان گوئو جیاکون نے پیر کو صحافیوں سے کہا: ’ہم پہلے بھی اس معاملے پر جواب دے چکے ہیں۔ چینی جاسوسوں سے متعلق دعوے مکمل طور پر بے بنیاد، قیاس آرائیوں پر مبنی اور چین کو بدنام کرنے کی کوشش ہیں۔‘

نیویارک ٹائمز نے اکتوبر کے آخر میں رپورٹ کیا تھا کہ ڈونلڈ ٹرمپ کو گذشتہ سال ایک انٹیلیجنس بریفنگ دی گئی تھی جس میں دعویٰ کیا گیا تھا کہ ایلس ہوانگ چین کے لیے جاسوسی کرتی ہیں۔

اتوار کو جب صحافیوں نے ٹرمپ سے پوچھا کہ کیا انھیں اس معلومات پر کارروائی نہ کرنے کا افسوس ہے تو انھوں نے جواب دیا: ’نہیں، مجھے ایسا نہیں لگتا۔ میرے خیال میں وہ ایک معزز انسان ہیں۔‘

امریکی وزیر خارجہ مارکو روبیو نے بھی ہوانگ کے بارے میں سوالات پر تبصرہ کرنے سے انکار کیا۔

نیویارک ٹائمز کے مطابق روبیو نے گذشتہ بہار ایک ایسے میمو کی تیاری کی نگرانی کی تھی جس میں ٹرمپ انتظامیہ کو اس چینی کاروباری خاتون کے ساتھ ہوانگ کے تعلق کے بارے میں خبردار کیا گیا تھا۔

چین کا عالمی جاسوسی نیٹ ورک کیسے کام کرتا ہے؟

اینویڈیا، امریکہ اور چین کے درمیان مصنوعی ذہانت کی دوڑ کے مرکز میں ہے، اسی لیے اس ارب پتی شخصیت کے تعلقات نے امریکی قانون سازوں میں قومی سلامتی کے خدشات پیدا کیے ہیں۔

ٹرمپ نے کہا: ’جو بھی مصنوعی ذہانت کی دوڑ جیتے گا، وہی فاتح ہو گا۔‘

بنیادی تشویش یہ ہے کہ اگر چین مصنوعی ذہانت میں سبقت حاصل کر لیتا ہے تو اس کی فوجی اور نگرانی کی صلاحیتوں میں نمایاں اضافہ ہو جائے گا۔

امریکہ کی برتری بڑی حد تک اینویڈیا جیسی امریکی کمپنیوں اور تائیوان سیمی کنڈکٹر مینوفیکچرنگ کمپنی (ٹی ایس ایم سی) جیسے اداروں کے تعاون پر منحصر ہے، جو دنیا کی 90 فیصد سے زیادہ جدید ترین چپس تیار کرتی ہے۔

2022 سے امریکہ نے چین کو جدید ترین ٹیکنالوجی تک رسائی سے روکنے کے لیے برآمدی پابندیوں کا ایک سلسلہ نافذ کر رکھا ہے۔

واشنگٹن کا کہنا ہے کہ یہ پابندیاں امریکہ کی مسابقتی برتری اور قومی سلامتی کے تحفظ کے لیے ضروری ہیں۔

اس کا مطلب یہ ہے کہ اینویڈیا جیسی کمپنیاں دنیا کی سب سے منافع بخش منڈیوں میں سے ایک تک رسائی سے بڑی حد تک محروم ہو گئی ہیں۔

جینسن ہوانگ پہلے کہہ چکے ہیں کہ چین کی مارکیٹ میں اینویڈیا کا حصہ تقریباً 95 فیصد سے گر کر تقریباً صفر رہ گیا ہے۔

حالیہ برسوں میں ہوانگ واشنگٹن اور بیجنگ کے درمیان آتے جاتے رہے ہیں اور ایسی راہ تلاش کرنے کی کوشش کرتے رہے ہیں جو امریکی حکومت کو بھی قابل قبول ہو اور اینویڈیا کی چین واپسی بھی ممکن بنا سکے۔

اس عمل کے دوران انھوں نے چین کے بارے میں امریکی پالیسی پر بھی اثر ڈالا ہے۔

اتوار کے انکشافات شاید یہ واضح کرتے ہیں کہ ہوانگ اینویڈیا کے لیے سب سے بڑی کامیابی کیوں حاصل نہ کر سکے: یعنی ٹرمپ انتظامیہ کو اس بات پر آمادہ کرنا کہ کمپنی اپنی جدید ترین چپس کے سوا باقی تمام چپس چین کو فروخت کر سکے۔

جینسن ہوانگ کون ہیں؟

جینسن ہوانگ 1963 میں تائیوان میں پیدا ہوئے اور نو برس کی عمر میں اپنے خاندان کے ساتھ امریکہ کے مغربی ساحل منتقل ہو گئے۔

انھوں نے اوریگن اسٹیٹ یونیورسٹی سے الیکٹریکل انجینیئرنگ میں تعلیم حاصل کی اور بعد میں سٹینفورڈ یونیورسٹی سے اسی شعبے میں ماسٹرز کی ڈگری حاصل کی۔

بعد ازاں وہ امریکی چپ ساز کمپنی اے ایم ڈی میں کام کرنے لگے اور پھر اینویڈیا کے شریک بانی بنے۔

تائیوان میں ’بابا ہوانگ‘ کے نام سے معروف ہوانگ کو کبھی ’ٹیکنالوجی کی دنیا کا ٹیلر سوئفٹ‘ بھی کہا گیا۔ وہ انتھک محنت، کمال پسندی اور اپنے ملازمین کے لیے انتہائی بلند معیار مقرر کرنے کے لیے جانے جاتے ہیں۔

بلومبرگ بلینیئرز انڈیکس کے مطابق ان کی دولت تقریباً 155 ارب ڈالر ہے۔

جینسن ہوانگ کی سوانح عمری دی تھنکنگ مشین کے مصنف سٹیفن وِٹ نے بی بی سی سے کہا: ’جینسن ہوانگ ٹیکنالوجی کے ایسے وژنری ہیں جن کا موازنہ سٹیو جابز سے کیا جا سکتا ہے۔‘

انھوں نے کہا کہ آج جس شکل میں ہم مصنوعی ذہانت کے ہارڈویئر کو جانتے ہیں، اسے تشکیل دینے میں ہوانگ کا بنیادی کردار رہا ہے۔

ہوانگ کے ٹرمپ کے ساتھ قریبی اور معروف تعلقات ہیں۔

وائٹ ہاؤس میں منعقدہ مصنوعی ذہانت کے حالیہ سربراہی اجلاس میں، جہاں 42 بڑی ٹیکنالوجی کمپنیوں کے سربراہ موجود تھے، ٹرمپ ایلون مسک اور ہوانگ کے ساتھ دکھائی دیے۔

ٹرمپ نے صحافیوں سے کہا: ’میں صرف اتنا جانتا ہوں کہ وہ بہت اچھے شخص ہیں، لیکن آپ کبھی نہیں جان سکتے کہ پس پردہ کیا چل رہا ہے۔‘

انھوں نے مزید کہا کہ ہوانگ نے ’ہمارے ملک کے لیے حیرت انگیز خدمات انجام دی ہیں۔‘

اینویڈیا کیا ہے اور اس کی اہمیت کتنی ہے؟

یہ کمپنی 1993 میں جینسن ہوانگ اور دو دیگر الیکٹریکل انجینیئرز، کرس مالاچووسکی اور کرٹس پریم نے قائم کی تھی۔

ابتدا میں کمپنی ایسے چپس بنانے کے لیے معروف تھی جو گرافکس پراسیسنگ، خاص طور پر کمپیوٹر گیمز کے لیے تیار کیے جاتے تھے۔

بعد میں کمپنی نے مصنوعی ذہانت پر توجہ مرکوز کی، جہاں آج اس کا غلبہ ہے۔

ہوانگ نے ایک سے زیادہ مرتبہ اینویڈیا کو دیوالیہ ہونے سے بچایا اور مصنوعی ذہانت پر اس وقت کام شروع کیا جب بہت کم لوگ اس پر یقین رکھتے تھے، یہاں تک کہ انھوں نے عملی طور پر اس شعبے کا بنیادی انفراسٹرکچر قائم کیا۔

سٹیفن وِٹ نے بی بی سی سے کہا: ’آج ہم جب اس صنعت کے بارے میں سوچتے ہیں تو ان عظیم ڈیٹا سینٹرز کا تصور کرتے ہیں، مگر اس وقت ایسا کچھ بھی موجود نہیں تھا۔ ان کے پاس اس چیز کے لیے کوئی گاہک نہیں تھا جو وہ بنا رہے تھے۔ درحقیقت ان کا پہلا گاہک اوپن اے آئی تھا، جب اس کے صرف 30 ملازمین تھے۔ انھوں نے یہ ٹیکنالوجی عملاً انھیں دے دی تھی۔‘

آج مصنوعی ذہانت کی مصنوعات اور بنیادی ڈھانچہ تیار کرنے والی تمام بڑی ٹیکنالوجی کمپنیوں، بشمول ایمیزون، میٹا، گوگل اور مائیکروسافٹ، کو اینویڈیا کی چپس درکار ہیں۔

تقریباً 4.5 ٹریلین ڈالر مالیت کے ساتھ اینویڈیا تاریخ کی سب سے قیمتی کمپنیوں میں سے ایک ہے۔

فی الحال کمپنی کا بورڈ ہوانگ کو ہٹانے میں دلچسپی نہیں رکھتا۔

اتوار کو بورڈ نے بیان میں کہا کہ اسے ’جینسن اور ان کی انتظامی ٹیم پر مکمل اعتماد ہے۔‘

بی بی سی سے بات کرنے والے ذرائع کے مطابق ان کی برطرفی کا امکان کم ہے کیونکہ مالی مفادات بہت زیادہ ہیں۔

63 سالہ ہوانگ کے بعد قیادت سنبھالنے کے لیے کسی جانشین کا اعلان نہیں کیا گیا۔

وہ کئی بار کہہ چکے ہیں کہ وہ آنے والی کئی دہائیوں تک اس عہدے پر رہنا چاہتے ہیں۔

بلومبرگ کے مطابق انھوں نے کمپنی کے گرد ایک غیر رسمی قیادت کا ڈھانچہ تشکیل دیا ہے جو روایتی کارپوریٹ درجہ بندی سے مختلف ہے۔

ان کے بیٹے سپینسر، بیٹی میڈیسن اور داماد نیکو کیپرز اینویڈیا میں اعلیٰ انتظامی عہدوں پر کام کرتے ہیں۔

جینسن ہوانگ کی اہلیہ کون ہیں؟

جینسن ہوانگ نے 1980 کی دہائی کے آغاز میں اوریگن سٹیٹ یونیورسٹی میں الیکٹریکل انجینیئرنگ کی تعلیم کے دوران اپنی مستقبل کی اہلیہ لوری ملز سے ملاقات کی۔

دونوں ایک ہی لیبارٹری گروپ میں تھے۔

1985 میں، یعنی اینویڈیا کے قیام سے تقریباً آٹھ سال پہلے، انھوں نے شادی کی اور ان کے ہاں دو بچے مدیسن اور سپینسر پیدا ہوئے۔

2007 میں اس جوڑے نے ’جین ہسن اور لوری ہوانگ فاؤنڈیشن‘ قائم کی۔

اینویڈیا کے حصص کی قدر میں نمایاں اضافے کے باعث اس فلاحی ادارے کے اثاثوں کی مالیت حالیہ برسوں میں بہت بڑھ گئی ہے اور اندازاً اب اس کی مالیت 9 ارب ڈالر سے زیادہ ہے۔

اس فاؤنڈیشن نے اوریگن سٹیٹ یونیورسٹی اور سٹینفورڈ یونیورسٹی میں انجینیئرنگ پروگراموں کو کروڑوں ڈالر کے عطیات دیے ہیں۔

سٹیفن وِٹ نے بی بی سی سے کہا کہ ہوانگ نے خود کو ایک خاندانی شخص کے طور پر پیش کرنے میں بہت محنت کی ہے۔

انھوں نے کہا: ’یہ ان کے لیے بہت اہم ہے۔‘

انھوں نے مزید کہا: ’وہ اپنی اہلیہ کی تعریف کرتے ہیں اور ہمیشہ ان کے بارے میں بہت احترام سے بات کرتے ہیں۔ ایسی صورتحال کسی بھی خاندان کے لیے ناخوشگوار ہو سکتی ہے، لیکن ایک ایسے شخص کے لیے جو خود کو خاندان پسند انسان کے طور پر پیش کرنے میں اتنی محنت کرتا رہا ہو اور جس کا اپنے بچوں سے بہت قریبی تعلق ہو، یہ معاملہ یقیناً زیادہ مشکل ہو گا۔‘