’آپ یہ اپنے باس سے کیوں نہیں کہتے؟‘: امریکی الیکشن میں شکست کی وجہ جنگ کو قرار دینے پر قالیباف کا وینس سے سوال

لائیو کوریج

1. 4 نومبر 2026’یہ سیاسی تباہی ہے‘: ناراض ریپبلکن رہنماؤں نے شکست کا ذمہ دار صدر ٹرمپ کو ٹھہرا دیا, ڈینیئل بش، واشنگٹن

   ’ذمہ داری ان ہی پر عائد ہوتی ہے۔ کسی اور پر نہیں۔ یہ صدر ٹرمپ کو مکمل اور دوٹوک طور پر مسترد کیے جانے کا اظہار ہے۔’ ریپبلکن لابیسٹ بل ملر نے وسط مدتی انتخابات کے نتائج واضح ہونے کے فوراً بعد مجھ سے گفتگو میں یہ بات کہی۔

   انھوں نے مزید کہا: ’یہ انتہائی درجے کی سیاسی تباہی ہے۔ کسی نے بھی اس پیمانے کے نتائج کی توقع نہیں کی تھی۔‘

   ریپبلکن پارٹی میں منگل کی رات سامنے آنے والے حیران کن انتخابی نتائج پر ابتدائی صدمے نے جلد ہی امریکی صدر کے خلاف غصے کی شکل اختیار کر لی۔

   ٹیکساس، کنساس اور جنوبی کیرولائنا جیسی مضبوط ریپبلکن ریاستوں میں ڈیموکریٹس کی غیر متوقع کامیابیوں کے بعد بعض ریپبلکن رہنماؤں نے اپنی ناراضی کا رخ ٹرمپ کی جانب موڑ دیا۔ ان کا مؤقف تھا کہ اپنی سیاسی میراث پر ضرورت سے زیادہ توجہ اور ووٹروں کے مسائل سے لاتعلقی نے پارٹی سے کانگریس کا کنٹرول چھین لیا۔

   مینیسوٹا سے تعلق رکھنے والے ریپبلکن حکمتِ عملی ساز گریگ پیپن نے کہا: ’یہ ایک کے بعد ایک غلطی تھی۔‘

   انھوں نے مزید کہا ’واضح طور پر ریاست در ریاست لوگوں نے صدر کی پالیسیوں کو پسند نہیں کیا۔‘

   ٹرمپ کے ایک قریبی وائٹ ہاؤس اتحادی نے کہا کہ ایران کے ساتھ جنگ، محصولات اور انتظامیہ کی امیگریشن کے خلاف سخت کارروائی نے ایک ’مکمل طوفانی صورتحال‘ پیدا کر دی، جس کے بعد صدر کے خلاف غصہ ’انتہائی بلند سطح‘ پر پہنچ گیا ہے۔

2. 4 نومبر 2026ڈیموکریٹس کی کامیابی کے بعد ریپبلکن سٹریٹجی ساز کا اعتراف: پارٹی کو ’حقیقت کا سامنا‘ کرنا ہوگا, گریس ایلیزا گڈون، امریکہ

   ریپبلکن پارٹی گذشتہ رات ڈیموکریٹس کی کامیابی کو کس نظر سے دیکھتی ہے؟ میں نے یہ سوال پارٹی کے ایک سٹریٹجسٹ (حکمت عملی ساز) سے کیا۔

   مارک بیڈنار، جو صدارتی انتخاب کے بعد ٹرمپ-وینس ٹیم کے ساتھ کام کر چکے ہیں، نے بی بی سی کو بتایا کہ یہ بات واضح ہے کہ ان کی جماعت ’اس ٹرمپ اتحاد کو متحرک کرنے میں ناکام رہی جس نے 2024 میں تاریخی کامیابی حاصل کی تھی۔‘

   ان کا کہنا ہے کہ کانگریس کا کنٹرول حاصل کرنے کے بعد ڈیموکریٹس اپنی توانائی کا بڑا حصہ صدر ٹرمپ کے خلاف تحقیقات پر صرف کریں گے اور ممکن ہے کہ ان کے مواخذے کی کوشش بھی کریں۔

   تاہم بیڈنار نے مزید کہا ’لیکن ڈیموکریٹس کو اندرونی کشمکش کا بھی سامنا ہوگا اور یہ وقت کے ساتھ مزید بڑھے گی۔‘

   انھوں نے خبردار کیا کہ ’ریپبلکنز کو اس حقیقت کے مطابق خود کو ڈھالنا ہوگا کہ صرف صدر ٹرمپ ہی ووٹروں کو پولنگ سٹیشنوں تک لانے کی ذمہ داری نہیں لے سکتے۔‘

3. 4 نومبر 2026امریکی صدر جے ڈی وینس نے وسط مدتی انتخابات میں ناکامی کی وجہ ایران جنگ کو قرار دے دیا, ڈینیئل بش، واشنگٹن

   جے ڈی وینس کا خیال ہے کہ ایران کے ساتھ جنگ ریپبلکنز کے کانگریس کا کنٹرول کھونے کا سبب بنی۔ نائب صدر نے وسط مدتی انتخابات کے بعد ایک تفصیلی بیان میں کہا: ’ہماری شکست کی وجہ جنگ تھی۔‘ یہ بیان انتخابات کے بارے میں غیر معمولی طور پر کھلا اور صاف گو تجزیہ سمجھا جا رہا ہے۔

   وینس نے تسلیم کیا کہ ایران کے ساتھ جنگ، بڑھتی ہوئی مہنگائی اور دیگر مسائل کے باعث وہ ریپبلکن ووٹرز، جنھوں نے 2024 میں انھیں اور صدر ڈونلڈ ٹرمپ کی حمایت کی تھی، اس سال جماعت سے دور ہو گئے۔

   انھوں نے یہ بھی کہا کہ ووٹرز کو انتظامیہ کی امیگریشن پالیسیوں پر بھی اعتراضات تھے اور وہ بعض اصلاحات کے لیے آمادگی رکھتے ہیں۔

   وینس نے نشاندہی کی کہ گذشتہ شب ٹرمپ نے بھی ایران کے ساتھ جنگ کے حوالے سے عوامی ناراضی کا ذکر کیا تھا۔ تاہم عوامی سطح پر کئی ماہ تک جنگ کی حمایت کرنے کے بعد نائب صدر نے اس معاملے پر ٹرمپ کے مقابلے میں زیادہ دوٹوک مؤقف اختیار کیا۔

   اس بیان کے بعد 2028 کے صدارتی انتخاب کے حوالے سے وینس کے ممکنہ منصوبوں پر قیاس آرائیوں میں اضافہ ہو گیا ہے، کیونکہ مبصرین کا خیال ہے کہ انھوں نے اس موقع کو وائٹ ہاؤس کی دوڑ میں شامل ہونے کے اشارے کے طور پر استعمال کیا ہے۔

   وینس اب تک اس سوال سے گریز کرتے رہے ہیں۔ تاہم، وسط مدتی انتخابات کے اختتام کے بعد ان پر جلد کوئی فیصلہ ظاہر کرنے کے لیے دباؤ بڑھنے کا امکان ہے۔

4. 4 نومبر 2026بریکنگ, ہماری شکست کی وجہ جنگ تھی: جے ڈی وینس

   امریکی نائب صدر جے ڈی وینس نے سوشل میڈیا پلیٹ فارم ایکس پر ایک طویل پوسٹ میں ریپبلکن پارٹی کی وسط مدتی انتخابات میں شکست پر ردِعمل دیتے ہوئے دعویٰ کیا ہے کہ ایران کے ساتھ امریکی جنگ ہی ان کی جماعت کی شکست کی وجہ بنی۔

   انھوں نے کہا: ’ہماری شکست کی وجہ جنگ تھی۔‘

   وہ مزید کہتے ہیں کہ ’سب جانتے ہیں کہ ہم کیوں ہارے۔ اور ہم یہاں سے آگے کیسے بڑھیں گے، اس بارے میں کوئی بھی دیانت دارانہ گفتگو اسی نکتے سے شروع ہونی چاہیے۔‘

5. 4 نومبر 2026’ٹرمپ اب بھی آپ کے صدر ہیں‘: امریکی وسط مدتی انتخابات میں ڈیموکریٹس کی تاریخی کامیابی پر وائٹ ہاؤس کا بیان

   امریکی وسط مدتی انتخابات میں ڈیموکریٹس کی نمایاں کامیابی کے بعد وائٹ ہاؤس کے رد عمل میں کہا گیا ہے کہ ’توجہ رہے، ٹرمپ اب بھی آپ کے صدر ہیں‘

   وائٹ ہاؤس کے سرکاری سوشل میڈیا اکاؤنٹ پر صدر ڈونلڈ ٹرمپ کی ایک تصویر شیئر کی گئی، جس پر یہ پیغام درج ہے کہ ٹرمپ اب بھی آپ کے صدر ہیں۔

   یاد رہے کہ اس سے قبل ٹرمپ نے ڈیموکریٹس کی کامیابیوں کو تسلیم کرتے ہوئے نیویارک ٹائمز کو بتایا تھا کہ ’میں ان نتائج کو قبول کرنے کے لیے مکمل طور پر تیار ہوں۔‘

   انھوں نے اپنے سوشل میڈیا پلیٹ فارم ٹروتھ سوشل پر یہ بھی دعویٰ کیا تھا کہ اگر وہ خود بیلٹ پیپر پر موجود ہوتے تو ’ہم بھاری اکثریت سے جیت جاتے۔‘

   وسط مدتی انتخابات میں ریپبلکنز کی خراب کارکردگی کے بعد صدر ڈونلڈ ٹرمپ نے ڈیموکریٹس کو سراہتے ہوئے کہا ہے کہ ’انھوں نے اچھا کام کیا۔‘

   یاد رہے کہ اس سے قبل وسط مدتی انتخابات میں ریپبلکنز کی خراب کارکردگی کے بعد صدر ڈونلڈ ٹرمپ نے ڈیموکریٹس کو سراہتے ہوئے کہا ہے کہ ’انھوں نے اچھا کام کیا۔‘

   فاکس نیوز سے گفتگو میں ٹرمپ نے کہا تھا کہ انتخابی نتائج پر اثر انداز ہونے والا ماحول موجود تھا اور انھیں ان نتائج پر کسی حد تک حیرت ہوئی ہے۔

6. 4 نومبر 2026کیا ایران نے امریکی انتخابات پر اثر انداز ہونے کے لیے مذاکرات کو طول دیا؟, جیار گول کا تجزیہ

   ایک بار پھر ایران کا معاملہ امریکی سیاست اور انتخابات میں زیرِ بحث ہے۔

   آج سے 47 برس قبل ایرانی طلبہ نے تہران میں امریکی سفارت خانے پر قبضہ کر کے امریکی سفارت کاروں کو یرغمال بنا لیا تھا۔ 444 روز تک جاری رہنے والے اس بحران کو 1980 کے امریکی صدارتی انتخاب کے تناظر میں بھی اہم واقعہ سمجھا جاتا ہے۔

   اب ایران کے ساتھ تنازع، توانائی کی بلند قیمتوں اور مہنگائی جیسے عوامل کو امریکی وسط مدتی انتخابات میں ریپبلکن پارٹی کی کارکردگی پر اثر انداز ہونے والے موضوعات میں شمار کیا جا رہا ہے، جبکہ ڈیموکریٹک پارٹی کانگریس کے دونوں ایوانوں میں اکثریت حاصل کرنے میں کامیاب ہوئی ہے۔

   ایرانی حکومت کے قریب سمجھے جانے والے بعض تجزیہ کاروں نے سرکاری ٹی وی پر اس رائے کا اظہار کیا کہ واشنگٹن کے ساتھ مذاکرات کو طول دینا اور تیل کی عالمی فراہمی پر دباؤ برقرار رکھنا تہران کے مفاد میں تھا، کیونکہ اس سے پیدا ہونے والے معاشی اثرات امریکی سیاست پر اثر ڈال سکتے تھے۔

   تاہم اس دعوے کے حق میں کوئی آزادانہ ثبوت پیش نہیں کیا گیا کہ ایران کی پالیسی کا مقصد براہِ راست امریکی انتخابات پر اثر انداز ہونا تھا۔

   1981 میں ایران نے امریکی سفارت خانے کے یرغمالیوں کو رونلڈ ریگن کے حلف اٹھانے کے فوراً بعد رہا کیا تھا۔

   بعض مبصرین کا خیال ہے کہ تہران اب ایک ایسی کانگریس کو اپنے لیے نسبتاً سازگار سمجھ سکتا ہے جس میں ڈیموکریٹک پارٹی کو اکثریت حاصل ہو۔

   تاہم امریکی صدر، مسلح افواج کے کمانڈر اِن چیف کی حیثیت سے، فوجی کارروائیوں اور خارجہ پالیسی کے معاملات میں اب بھی نمایاں اختیارات رکھتے ہیں، اگرچہ کانگریس ان فیصلوں پر اثر انداز ہونے کے لیے مختلف آئینی اور مالیاتی ذرائع استعمال کر سکتی ہے۔

7. 4 نومبر 2026میں ان نتائج کو قبول کرنے کے لیے مکمل طور پر تیار ہوں: ٹرمپ, کیلا ایپسٹین، بی بی سی نیوز

   گذشتہ رات ٹرمپ نے ڈیموکریٹس کی کامیابیوں کو تسلیم کرتے ہوئے نیویارک ٹائمز کو بتایا تھا کہ ’میں ان نتائج کو قبول کرنے کے لیے مکمل طور پر تیار ہوں۔‘

   انھوں نے اپنے سوشل میڈیا پلیٹ فارم ٹروتھ سوشل پر یہ بھی لکھا کہ اگر وہ خود بیلٹ پیپر پر موجود ہوتے تو ’ہم بھاری اکثریت سے جیت جاتے۔‘

   انتخابی قوانین کے ماہرین ووٹنگ کے حقوق کے حامیوں اور ڈیموکریٹس کو یہ توقع تھی کہ وائٹ ہاؤس ممکنہ طور پر انتخابی نتائج کو چیلنج کر سکتا ہے۔

   ٹرمپ نے سال کے بیشتر حصے میں انتخابی دھاندلی کے بارے میں خبردار کیا، حالانکہ ماہرین کے مطابق ایسے واقعات شاذ و نادر ہی پیش آتے ہیں اور وہ اس سے قبل 2020 کے صدارتی انتخاب میں اپنی شکست کو تسلیم کرنے سے بھی انکار کر چکے ہیں۔

   محکمۂ انصاف نے ریاستی انتخابی عمل میں مداخلت کی غیر معمولی کوششیں کیں اور غیر قانونی غیر ملکی ووٹنگ کو ایک وسیع مسئلہ قرار دیا، حالانکہ شواہد کے مطابق ایسے واقعات بہت کم ہوتے ہیں۔

   تاہم، چونکہ وسط مدتی انتخابات کے نتائج بڑی حد تک ڈیموکریٹس کے حق میں آئے، اس لیے انتظامیہ کی جانب سے اس حوالے سے ہونے والا شور و غوغا نمایاں طور پر خاموش ہو گیا ہے۔

   چند انتخابی حلقوں میں بعض تکنیکی مسائل کے باوجود، اب تک ایسا معلوم ہوتا ہے کہ انتخابات مجموعی طور پر نہایت ہموار انداز میں منعقد ہوئے۔ یہی وجہ ہے کہ سیاسی طور پر ان نتائج کو چیلنج کرنا بہت مشکل ہو گیا ہے۔

8. 4 نومبر 2026انتخابی کامیابیاں ڈیموکریٹس کو مستقبل کا لائحۂ عمل فراہم کر رہی ہیں: شپیرو

   پینسلوانیا کے ڈیموکریٹک گورنر جوش شپیرو، جو منگل کو باآسانی دوبارہ منتخب ہوئے، کا کہنا ہے کہ ان کی جماعت کی ریاست میں حاصل کی گئی کامیابی کو دیگر مقامات پر بھی دہرایا جا سکتا ہے۔

   انھوں نے اپنی ریاست میں ریپبلکن موجودہ عہدے داروں کو شکست دینے والے چار امیدواروں کو ’کام کرنے والے ڈیموکریٹس‘ قرار دیتے ہوئے کہا کہ انھیں ریپبلکنز، آزاد ووٹروں اور ڈیموکریٹس، تینوں کی حمایت حاصل ہوئی۔

   انھوں نے بی بی سی کے امریکی شراکت دار سی بی ایس نیوز سے گفتگو میں کہا ’ہم نے گذشتہ رات، پورے ملک کی سب سے سخت مقابلے والی سوئنگ ریاست میں، یہ ثابت کر دیا کہ ہم نے ایسے امیدوار منتخب کیے ہیں جو ہر جگہ مقابلہ کر سکتے ہیں۔‘

   انھوں نے کہا ’میرا خیال ہے کہ یہ اہم ہے کہ ہم اپنی جماعت کے اندر نظریاتی سطح پر گفتگو کریں تاکہ یہ طے کیا جا سکے کہ مستقبل میں ہماری جماعت کی شکل کیا ہوگی۔‘

   انھوں نے مزید کہا ’یہ ایک صحت مند عمل ہے اور ایک ضروری عمل بھی۔ لیکن یہ کام اس توجہ کے ساتھ ہونا چاہیے کہ ہم لوگوں کے لیے کیا نتائج دے سکتے ہیں اور اس ملک میں حقیقی اور بنیادی تبدیلی اور اصلاحات کو کیسے ممکن بنا سکتے ہیں۔‘

9. 4 نومبر 2026وہ پانچ وجوہات جو ٹرمپ کی ریپبلکن پارٹی کی شکست کا باعث بنیں

   روزمرہ اخراجات میں اضافے کی بڑی وجہ ایران کے خلاف وہ جنگ ہے جو امریکہ اور اسرائیل نے فروری میں شروع کی تھی۔ تب سے امریکی ووٹرز پیٹرول پمپ پر اس کی قیمت ادا کر رہے ہیں۔

   مکمل تحریر پڑھنے کے لیے کلک کیجیے

10. 4 نومبر 2026یہ ’مہنگائی کے مسئلے پر متحد ہونے کا موقع‘ ہے: برطانوی وزیر اعظم کا امریکی انتخابات پر ردعمل

    برطانیہ کے وزیرِ اعظم اینڈی برنہم نے امریکی وسط مدتی انتخابات کے نتائج کے بارے میں سوال کے جواب میں کہا ہے کہ دنیا کے پاس اب ’مہنگائی اور بڑھتے ہوئے اخراجاتِ زندگی کے مسئلے پر متحد ہونے کا موقع‘ موجود ہے۔

    یہ بیان ایسے وقت میں سامنے آیا ہے جب ایک بڑے سروے سے ظاہر ہوا کہ امریکی ووٹرز انتخابات سے قبل معیشت کو سب سے اہم مسئلہ سمجھتے تھے، جبکہ ان انتخابات میں ڈیموکریٹس نے نمایاں کامیابیاں حاصل کیں۔

    اینٹیگوا اور باربوڈا میں دولتِ مشترکہ کے سربراہی اجلاس کے موقع پر صحافیوں سے گفتگو کرتے ہوئے وزیرِ اعظم نے کہا کہ انھوں نے اپنے دورِ حکومت میں اخراجاتِ زندگی کے مسئلے کو ’مرکزی حیثیت‘ دی ہے۔

    ان کا کہنا تھا کہ جب تک مشرقِ وسطیٰ کا تنازع حل نہیں ہوتا، مالی دباؤ کو کم نہیں کیا جا سکتا۔

    برنہم نے ایران کے ساتھ جنگ میں ’کشیدگی میں کمی‘ اور آبنائے ہرمز کو ’ایک بار پھر مکمل طور پر کھولنے‘ کا مطالبہ کیا۔

    انھوں نے کہا کہ ان کے خیال میں امریکی عوام کا پیغام یہ ہے: ’آئیے پوری توجہ کے ساتھ، ایک واضح اور مرکوز انداز میں اخراجاتِ زندگی سے متعلق مسائل پر توجہ دیں۔‘

11. 4 نومبر 2026بی بی سی نیوز اُردو اب موبائل ایپ پر بھی دستیاب، ابھی ڈاؤن لوڈ کیجیے

    بی بی سی اُردونے اپنی نئی ایپ لانچ کر دی ہے، جس کے ذریعے اب صارفین اپنی دلچسپی کی تمام علاقائی و عالمی خبریں، تجزیے اور معلومات براہ راست اپنے موبائل فون یا ٹیبلٹ پر حاصل کر سکیں گے۔

    بی بی سی اُردو کا تمام مواد بی بی سی ورلڈ سروس کی نئی ایپ پر دستیاب ہو گا جسے آپ اپنے موبائل فون یا ٹیبلٹ کی مناسبت سے ایپ سٹور یا گوگل پلے سے ڈاؤن لوڈ کر سکتے ہیں۔

    نئی ایپ کیسے ڈاؤن لوڈ کی جائے؟

    گوگل پلے سٹور سے اینڈروئڈ ڈیوائسزکے لیے بی بی سی ایپ ڈاؤن لوڈ کرنے کے لیے یہاں کلک کریں

    ایپ سٹور سے آئی فون اور آئی پیڈ کے لیے بی بی سی ایپ ڈاؤن لوڈ کرنے کے لیے یہاں کلک کریں

    BBC World Service ایپ ڈاؤن لوڈ کرنے کے بعد آپ کو اپنی پسند کا ایڈیشن یعنی ’BBC News اردو‘ کا انتخاب کرنا ہو گا جہاں آپ کو پاکستان اور دنیا کے مختلف خطوں میں موجود بی بی سی کے صحافیوں کی رپورٹس دستیاب ہوں گی۔

    نوٹ: یہ ایپ برطانیہ اور امریکہ میں دستیاب نہیں اور اس کا انگریزی زبان کا کوئی ایڈیشن بھی نہیں ہے۔

12. 4 نومبر 2026ڈیموکریٹ امیدوار ایمی ایکٹن اوہائیو کی پہلی خاتون گورنر منتخب

    امریکہ میں ایک اور تاریخی پیش رفت دیکھنے میں آئی ہے، جس ایمی ایکٹن اوہائیو کی گورنر منتخب ہونے والی پہلی خاتون بن گئی ہیں۔

    ایمی ایکٹن نے وسط مغربی ریاست کے گورنر کے انتخاب میں سخت مقابلے کے بعد وویک راماسوامی کو شکست دی۔ گذشتہ ماہ یہ انتخاب عالمی توجہ کا مرکز بن گیا تھا، جب راماسوامی کی انتخابی مہم کے ایک اشتہار میں ایکٹن کی والدہ نے انہیں ’جھوٹی‘ قرار دیا تھا۔

    منگل کے روز تاریخ رقم کرنے والی دیگر خواتین میں ڈیب ہالینڈ بھی شامل ہیں، جو نیو میکسیکو کی پہلی مقامی امریکی خاتون گورنر بن گئی ہیں، جبکہ کیشا لانس بوٹمز جارجیا میں منتخب ہونے کے بعد کسی امریکی ریاست کی پہلی سیاہ فام خاتون گورنر بن گئی ہیں۔

13. 4 نومبر 2026ریپبلکن پارٹی کے مضبوط حلقوں میں بھی ڈیموکریٹس کی جیت

    ڈیموکریٹس کی نیلی لہر نے سینیٹ اور ایوانِ نمائندگان دونوں میں ریپبلکنز کے تاریخی طور پر مضبوط سمجھے جانے والے حلقوں میں کامیابی حاصل کی ہے۔

    موجودہ صورتحال کے مطابق اب تک سینیٹ کی سات اور ایوانِ نمائندگان کی 21 نشستوں کا کنٹرول ایک جماعت سے دوسری جماعت کے پاس جا چکا ہے۔

    جنوبی کیرولائنا میں ڈیموکریٹ امیدوار اینی اینڈریوز نے موجودہ ریپبلکن سینیٹر ڈارلین گراہم کو شکست دی، جو آنجہانی سینیٹر لنڈسے گراہم کی بہن ہیں۔

    اس ریاست میں ڈیموکریٹس نے آخری بار 1998 میں سینیٹ کی نشست جیتی تھی اور صرف چند ہفتے پہلے تک یہاں ڈیموکریٹس کی کامیابی کسی کے اندازوں میں بھی شامل نہیں تھی۔

    اوہائیو میں بھی ایک ڈرامائی نتیجہ سامنے آیا، جو ٹرمپ کے دور میں مسلسل ریپبلکنز کا مضبوط گڑھ سمجھا جاتا رہا ہے۔ یہاں اندازہ لگایا گیا کہ ڈیموکریٹس شیروڈ براؤن کی کامیابی کے ذریعے سینیٹ کی ایک نشست جیت لیں گے۔

    مین میں سینیٹ کی نشست بھی ڈیموکریٹس کے حصے میں آ گئی، جہاں ٹرائے جیکسن نے کامیابی حاصل کی۔ اس نشست پر ریپبلکن سینیٹر سوزن کولنز تقریباً 30 برس سے فائز تھیں۔

14. 4 نومبر 2026’نیلا سونامی‘ اور ’زبردست نیلی لہر‘: امریکی اخبارات وسط مدتی انتخابات کو کیسے رپورٹ کر رہے ہیں؟

    نیویارک ٹائمز میں شائع ہونے والے ایک تجزیے میں کہا گیا ہے کہ غصے میں بھرے ووٹرز ’ٹرمپ کے دور کے خاتمے کے آغاز‘ کی راہ ہموار کر رہے ہیں۔

    واشنگٹن پوسٹ نے اپنے پہلے صفحے پر سرخی لگائی ’ووٹروں کا جھکاؤ ڈیموکریٹس کی جانب۔‘ اخبار کے مطابق ’یہ جماعت ٹرمپ کے ایجنڈے کو ناکام بنانے کے عزم کے ساتھ کیپیٹل ہل میں اقتدار سنبھالنے کے لیے تیار ہے۔‘

    نیویارک پوسٹ نے وسط مدتی انتخابات میں ’ڈیموکریٹس کی زبردست کامیابی‘ کے بعد اپنے صفحۂ اول پر ’نیلا سونامی‘ کی سرخی لگائی۔

    لاس اینجلس ٹائمز نے رپورٹ کیا کہ ڈیموکریٹس نے ’حیران کن نیلی لہر‘ کے ذریعے کانگریس کا کنٹرول حاصل کر لیا ہے، تاہم اخبار نے خبردار کیا کہ لاس اینجلس کے میئر کے انتخاب کا مقابلہ اب بھی اتنا سخت ہے کہ اس کے نتیجے کا اعلان نہیں کیا جا سکتا۔

    بوسٹن گلوب نے اپنی مرکزی سرخی میں لکھا ’ٹرمپ کو بھرپور طریقے سے مسترد کرتے ہوئے ڈیموکریٹس کانگریس کا کنٹرول سنبھالنے کے لیے تیار۔‘

15. 4 نومبر 2026چین امریکی انتخابات کے نتائج کو اپنے لیے موقع کے طور پر دیکھے گا, لورا بکر، نامہ نگار برائے چین

    چین امریکی وسط مدتی انتخابات کے نتائج کو اپنے لیے ایک موقع کے طور پر دیکھ رہا ہوگا۔

    بیجنگ اور واشنگٹن کے درمیان تعلقات اس صدی کی ’عظیم طاقتوں‘ کے درمیان مقابلے کی نمائندگی کرتے ہیں اور صدر شی جن پنگ شاید یہ محسوس کریں گے کہ اس وقت ان کا پلڑا بھاری ہے، کیونکہ وہ اس ماہ کے آخر میں چین میں ڈونلڈ ٹرمپ کا استقبال کرنے کی تیاری کر رہے ہیں۔

    ٹرمپ نے امریکی صنعت کاروں کو سستے چینی مصنوعات کے مقابلے میں تحفظ دینے کی کوشش کے تحت چین سے امریکہ درآمد ہونے والی اشیا پر محصولات عائد کیے تھے۔

    تاہم ان کا یہ منصوبہ اس وقت الٹا پڑ گیا جب شی جن پنگ نے جوابی طور پر بھاری محصولات نافذ کر دیے۔ اس کے نتیجے میں بہت سی اشیا امریکی صارفین کے لیے زیادہ مہنگی ہو گئیں، جن میں کھلونے اور ملبوسات جیسی گھریلو اور نسبتاً معمولی آسائشیں بھی شامل تھیں۔

    چین نے امریکی زرعی مصنوعات کی خریداری بھی روک دی، جس سے ٹرمپ کے حامی علاقوں کے کسان متاثر ہوئے۔

    یہ تجارتی جنگ بالآخر ایک عارضی سمجھوتے پر ختم ہوئی، جس کی مدت جنوری کے آخر میں ختم ہونے والی ہے اور چین شاید یہ سمجھتا ہو کہ وسط مدتی انتخابات کے بعد ٹرمپ سیاسی طور پر دباؤ کا شکار ہوں گے اور کسی سمجھوتے کی تلاش میں ہوں گے۔

    شی جن پنگ اسے چین کے لیے زیادہ فائدہ مند معاہدہ حاصل کرنے کے ایک موقع کے طور پر دیکھ سکتے ہیں۔

16. 4 نومبر 2026خواتین بڑی تعداد میں ووٹ ڈالنے نکلیں اور اکثریت نے ڈیموکریٹس کی حمایت کی: سروے

    ووٹروں کے ایک بڑے سروے کے نتیجے میں معلوم ہوتا ہے کہ خواتین نے بڑی تعداد میں ووٹ ڈالے اور ان میں سے اکثریت نے ڈیموکریٹ امیدواروں کو ووٹ دیا۔

    دوسری جانب مرد ووٹرز دو بڑی جماعتوں کے درمیان تقریباً برابر تقسیم رہے۔

17. 4 نومبر 2026خلیجی ممالک کا ڈیموکریٹس کی شکست پر غیرجانبدارانہ رویہ, فرینک گارڈنر، نامہ نگار برائے سکیورٹی

    ’پروجیکٹ ٹرمپ‘ کو درپیش اس انتخابی دھچکے کو خلیجی عرب ریاستوں کے لیے بھی ایک نقصان سمجھا جا سکتا تھا۔

    صدر اور ان کے خاندان کے خلیجی ممالک میں سے کئی کے ساتھ قریبی ذاتی اور کاروباری تعلقات ہیں۔

    دبئی میں ٹرمپ انٹرنیشنل گالف کورس موجود ہے، قطر نے انہیں 40 کروڑ امریکی ڈالر مالیت کا ایک طیارہ تحفے میں دیا تھا، جبکہ متحدہ عرب امارات، قطر اور سعودی عرب نے مشترکہ طور پر ڈونلڈ ٹرمپ کے داماد جیرڈ کشنر کی کمپنی ’افی نٹی کیپیٹل‘ میں اربوں ڈالر کی سرمایہ کاری کی ہے۔

    ٹرمپ نے 2017 میں اپنی پہلی صدارتی مدت کے دوران ریاض کو اپنے پہلے غیر ملکی دورے کے لیے منتخب کیا تھا۔

    سعودی عرب کے ٹرمپ سے قبل ڈیموکریٹ صدر جو بائیڈن کے ساتھ تعلقات خاصے کشیدہ رہے تھے۔ 2022 میں سعودی ولی عہد کے ساتھ ان کی وہ غیر آرام دہ ’فسٹ بمپ‘ ملاقات یاد کیجیے۔

    خلیجی رہنماؤں کو صدر اوباما کے بارے میں بھی شدید تحفظات تھے، خاص طور پر اس وقت جب انھوں نے شام کے صدر بشار الاسد کو زہریلی گیس کے استعمال پر سزا نہیں دی تھی۔

    تاہم رواں سال ایران کے ساتھ جنگ نے ٹرمپ کے بارے میں سوچنے کے انداز کو تبدیل کر دیا ہے۔

    ایک مبصر کے بقول ’صدر ٹرمپ نے خلیج کو آگ لگا دی‘ اور اب بھی یہ خدشہ موجود ہے کہ وہ اس جنگ کو دوبارہ بھڑکا سکتے ہیں، جس کے نتیجے میں ایران جوابی کارروائی کرتے ہوئے ان ممالک کے اہم قومی انفراسٹرکچر کو شدید نقصان پہنچا سکتا ہے۔

18. 4 نومبر 2026ٹرمپ کی اپروول ریٹنگ تاریخ کی کم ترین سطح پر, ڈینیئل وینرائٹ، بی بی سی نیوز

    صدر کے طور پر ڈونلڈ ٹرمپ کی مقبولیت (اپروول ریٹنگ) کی شرح اس انتخاب میں ریکارڈ شدہ کم ترین سطح کی جانب بڑھتی دکھائی دے رہی ہے، جس میں 2020 کا انتخاب بھی شامل ہے جب وہ جو بائیڈن سے ہار گئے تھے۔

    ووٹر پول میں شامل افراد میں سے مجموعی طور پر 38 فیصد نے کہا کہ وہ صدر کے طور پر ان کی کارکردگی سے مطمئن ہیں۔

    ایسوسی ایٹڈ پریس کے اعداد و شمار کے مطابق یہ شرح 2018 میں، جو بطور صدر ان کا پہلا وسط مدتی انتخاب تھا، 44 فیصد اور 2020 میں 47 فیصد تھی۔

    اس کے مقابلے میں جو بائیڈن کی مجموعی اپروول ریٹنگ 2022 کے وسط مدتی انتخابات میں 43 فیصد اور 2024 میں 42 فیصد تھی، جب ٹرمپ دوسری مدت کے لیے دوبارہ منتخب ہوئے تھے۔

    امریکہ میں بی بی سی کے نشریاتی شراکت دار سی بی ایس نیوز کے مطابق ٹرمپ کی اپروول ریٹنگ 2006 میں جارج ڈبلیو بش کی مقبولیت سے بھی کم ہے، جب ان کی جماعت کانگریس کے دونوں ایوانوں کا کنٹرول کھو بیٹھی تھی۔

    سروے میں مزید اعداد و شمار شامل کیے جا رہے ہیں، اس لیے رات گزرنے کے ساتھ یہ اعداد و شمار تبدیل ہو سکتے ہیں۔

19. 4 نومبر 2026ڈیموکریٹس کا کامیاب پر ردعمل: ’امریکہ جیت گیا‘

    یہ ڈیموکریٹس کے لیے کامیابیوں سے بھرپور رات رہی ہے۔

    ایوانِ نمائندگان اور سینیٹ، دونوں ایوانوں میں کامیابی کا مطلب یہ ہے کہ ڈیموکریٹس اب ٹرمپ کی صدارت کے باقی ماندہ دو سال کے دوران کانگریس کا کنٹرول اپنے ہاتھ میں رکھیں گے۔

    ایوانِ نمائندگان میں ڈیموکریٹک اقلیتی رہنما حکیم جیفریز نے ایوانِ زیریں میں پارٹی کی کامیابی کو ’سرخ، سفید اور نیلا لمحہ‘ قرار دیا ’کیونکہ آج رات امریکہ جیت گیا ہے۔‘

    سینیٹ میں اقلیتی رہنما چک شومر نے کہا کہ ’سینیٹ کے سیاسی نقشے میں ایک نسل پر محیط بڑی تبدیلی رونما ہوئی ہے۔‘

    ایکس پر ایک پیغام میں انھوں نے کہا کہ اس وسط مدتی انتخاب میں پارٹی نے ’امریکی عوام کی ترجیحات پر توجہ دی‘ اور وہ اس وعدے کو ’ٹرمپ کے ساتھ یا ٹرمپ کے بغیر‘ پورا کرنے کے لیے تیار ہیں۔

    دوسری جانب ڈیموکریٹک نیشنل کمیٹی کے چیئرمین کین مارٹن نے کہا کہ یہ بات واضح ہے کہ امریکی ووٹر ’اپنا اعتماد ڈیموکریٹس اور محنت کش طبقے کے ایجنڈے پر ظاہر کر رہے ہیں۔‘

    انھوں نے مزید کہا ’آئندہ دو برسوں کے دوران ڈیموکریٹس وہاں موجود ہوں گے جہاں ریپبلکن ناکام رہے ہیں اور اخراجات کم کرنے کے لیے ہر روز کام کریں گے۔ اگلا ہدف: وائٹ ہاؤس۔‘

20. 4 نومبر 2026امریکہ میں وسط مدتی انتخابات: ریپبلکن پارٹی ’مایوس‘ مگر ’لڑائی ابھی ختم نہیں ہوئی‘

    ریپبلکن پارٹی کے رہنماؤں نے تسلیم کیا ہے کہ ڈیموکریٹس کے کانگریس کا کنٹرول سنبھالنے کے بعد ان کی جماعت کو امریکہ بھر میں ’ایک مشکل رات‘ کا سامنا کرنا پڑا ہے۔

    ایوانِ نمائندگان کے سپیکر مائیک جانسن نے کہا کہ وہ نتائج پر ’مایوس‘ ہیں، لیکن ان کے حوصلے پست نہیں ہوں گے۔

    انھوں نے مزید کہا ’ہم جانتے تھے کہ ایوانِ نمائندگان پر کنٹرول برقرار رکھنے اور اپنی اکثریت کو قائم رکھنے کے لیے ہمیں وسط مدتی انتخابات کی ایک صدی سے زیادہ پر محیط تاریخ کے رجحان کے خلاف جانا ہوگا۔‘

    ریپبلکن سینیٹر رون جانسن، جو 2011 سے وسکونسن کی نمائندگی کر رہے ہیں اور اس وسط مدتی انتخاب میں دوبارہ انتخاب کے لیے امیدوار نہیں تھے، نے بی بی سی ریڈیو 4 سے گفتگو میں کہا کہ ایران میں جنگ اور ایندھن کی بڑھتی ہوئی قیمتوں نے ’لوگوں کے ذہنوں پر گہرا اثر ڈالا ہے۔‘

    ٹیکساس میں سینیٹ کی اہم نشست ہارنے والے کین پیکسٹن نے تسلیم کیا کہ ریپبلکنز کو ’آج رات ملک بھر میں ایک مشکل صورتحال کا سامنا کرنا پڑا‘، تاہم ان کا اصرار تھا کہ ’لڑائی ابھی ختم نہیں ہوئی۔‘

    اس سے قبل غیر معمولی طور پر محتاط نظر آنے والے ڈونلڈ ٹرمپ، ہمارے وائٹ ہاؤس کے نامہ نگار کے مطابق، نے اس ناکامی کی ذمہ داری براہِ راست امیدواروں پر عائد کی۔ ان میں سے بعض امیدواروں کا انتخاب خود صدر نے کیا تھا۔

    ایک ریپبلکن معاون نے اس سے پہلے بی بی سی کو بتایا کہ ’یہ میری توقع سے بھی زیادہ برا نتیجہ ہے، یہ ایک تباہی ہے۔‘