آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
ایرانی پارلیمنٹ کے سپیکر محمد باقر قالیباف نے یہ بیان امریکی نائب صدر کے حالیہ بیان کے بعد ردِعمل میں دیا ہے جس میں جے ڈی وینس نے کہا تھا کہ ایران کے ساتھ جنگ امریکی وسط مدتی انتخابات میں ریپبلکنز کی شکست کے اہم عوامل میں سے ایک تھی۔
فلوریڈا، جارجیا، ساؤتھ کیرولائنا، ورمونٹ، ورجینیا اور نیو ہیمپشائر میں پولنگ کا وقت ختم ہو گیا ہے۔ اس سے کچھ دیر قبل کینٹکی اور انڈیانا میں بھی ووٹنگ کا عمل اختتام پذیر ہو چکا تھا۔ اب توجہ ووٹوں کی گنتی اور ابتدائی نتائج پر مرکوز ہے۔
بی بی سی سے گفتگو میں وائٹ ہاؤس کے ایک عہدے دار نے کہا ہے کہ انتخابی نتائج کے حوالے سے وائٹ ہاؤس میں فضا ’محتاط امید‘ کی ہے۔
عہدے دار کے مطابق، ’صدر نے اپنی بھرپور انتخابی مہم چلائی اور جو کچھ ضروری تھا وہ سب کیا۔ ریپبلکن پارٹی آج سے چار ہفتے پہلے کے مقابلے میں بہتر پوزیشن میں ہے۔‘
تاہم عہدے دار نے ایسٹ روم میں مقامی وقت کے مطابق شام سات بجے منعقد ہونے والی انتخابی نتائج کی تقریب میں شریک مہمانوں کی فہرست کے بارے میں سوال کا جواب نہیں دیا۔
دوسری جانب صدر ٹرمپ نے کچھ دیر قبل اپنے سوشل میڈیا پلیٹ فارم ٹروتھ سوشل پر ایک پوسٹ میں کہا کہ وہ انتخابی نتائج ٹی وی پر دیکھنے کا ارادہ رکھتے ہیں۔
وسط مدتی انتخابات کے موقع پر ووٹرز کے سروے کے ابتدائی نتائج کے مطابق تقریباً دو تہائی ووٹرز کا کہنا ہے کہ صدر ٹرمپ کی پالیسیوں نے امریکی معیشت کی صورتحال کو مزید خراب کیا ہے۔
اس کے برعکس 28 فیصد ووٹرز کا خیال ہے کہ ٹرمپ کی پالیسیوں سے معاشی حالات میں بہتری آئی، جبکہ صرف آٹھ فیصد نے کہا کہ صدر کی پالیسیوں کا معیشت پر کوئی خاص اثر نہیں پڑا۔
سروے میں ووٹرز سے یہ بھی پوچھا گیا کہ آیا ان کے ووٹ ڈالنے کی ایک وجہ صدر ٹرمپ کی حمایت یا مخالفت کا اظہار تھا۔ 43 فیصد افراد نے کہا کہ ان کے ووٹ کی ایک وجہ صدر کی مخالفت کا اظہار تھی، جبکہ 41 فیصد کا کہنا تھا کہ ٹرمپ ان کے فیصلے میں کوئی اہم عنصر نہیں تھے۔ صرف 16 فیصد ووٹرز نے کہا کہ اُنھوں نے صدر کی حمایت کے اظہار کے لیے ووٹ ڈالا۔
تاہم یہ اعداد و شمار ابتدائی ہیں اور رات بھر مزید معلومات شامل ہونے کے ساتھ ان میں تبدیلی آ سکتی ہے۔ ابھی یہ تفصیلات بھی سامنے نہیں آئیں کہ ریپبلکن اور ڈیموکریٹ ووٹرز کے درمیان ان آرا کی تقسیم کیا رہی۔
امریکہ میں ووٹوں کی گنتی کے قواعد ہر ریاست میں ایک جیسے نہیں ہیں، اسی لیے انتخابی نتائج آنے کی رفتار بھی مختلف ہو سکتی ہے۔
اس فرق کی چند اہم وجوہات میں ڈاک کے ذریعے ڈالے گئے ووٹوں (میل اِن بیلٹس) کی تعداد اور قبل از وقت ڈالے گئے ووٹوں کی جانچ اور گنتی کے قواعد شامل ہیں۔
زیادہ تر ریاستیں انتخابی اہلکاروں کو پولنگ کے دن سے پہلے بیلٹس کو لفافوں سے نکالنے اور ووٹر کی اہلیت کی تصدیق کرنے کی اجازت دیتی ہیں۔
اس کے علاوہ تقریباً نصف ریاستوں، جن میں فلوریڈا بھی شامل ہے، میں انتخابی حکام ووٹوں کو الیکشن ڈے سے پہلے سکین کر سکتے ہیں، جس کے باعث ان ووٹوں کو پولنگ ختم ہوتے ہی فوری طور پر نتائج میں شامل کرنا ممکن ہوتا ہے۔
تاہم مشی گن اور وسکونسن جیسی بعض ریاستوں میں انتخابی عملے کو پولنگ کے دن سے پہلے ڈاک کے ذریعے موصول ہونے والے بیلٹس کھولنے کی اجازت نہیں ہوتی۔ یہی وجہ ہے کہ وہاں ووٹوں کی گنتی نسبتاً سست ہو سکتی ہے اور ماضی کے انتخابات میں رات گئے نتائج آنے یا اچانک بڑی تعداد میں ووٹ شامل ہونے کے دعوے بھی سامنے آتے رہے ہیں۔
بعض ریاستیں الیکشن ڈے کے بعد موصول ہونے والے میل اِن بیلٹس بھی قبول کرتی ہیں، جس کے باعث حتمی نتائج مرتب ہونے میں مزید وقت لگ سکتا ہے۔
امریکی ووٹروں کے تازہ جائزے سے معلوم ہوتا ہے کہ مہنگائی اور بڑھتی ہوئی قیمتوں نے بڑی تعداد میں لوگوں کی زندگیوں کو متاثر کیا ہے۔
سروے میں شامل تقریباً 79 فیصد ووٹرز نے کہا کہ گذشتہ ایک سال کے دوران مہنگائی نے ان اور ان کے خاندان کے لیے شدید یا معتدل مالی مشکلات پیدا کیں، جبکہ 21 فیصد کا کہنا تھا کہ انھیں اس سے کوئی خاص دشواری پیش نہیں آئی۔
ایندھن اور خوراک کی قیمتوں پر بھی ووٹرز نے شدید تشویش کا اظہار کیا۔ تقریباً 59 فیصد افراد نے پیٹرول اور ڈیزل کی قیمتوں کے بارے میں خود کو ’بہت فکر مند‘ قرار دیا، جبکہ 58 فیصد نے خوراک اور روزمرہ اشیائے ضروریہ کی بڑھتی ہوئی لاگت پر گہری تشویش ظاہر کی۔
سروے کے مطابق 62 فیصد ووٹرز کا خیال ہے کہ معمول سے زیادہ بلند قیمتیں زیادہ تر صدر ٹرمپ کی پالیسیوں کا نتیجہ ہیں، جبکہ 38 فیصد نے کہا کہ اس کی بنیادی وجہ ایسے عوامل ہیں جو ان کے کنٹرول سے باہر ہیں۔
امریکہ بھر میں ووٹرز کے ایک جائزے (ووٹر پول) سے یہ ظاہر ہوا ہے کہ ملک کی موجودہ صورتحال کے بارے میں عوام میں بے چینی اور ناراضی پائی جاتی ہے۔
سروے میں شامل تقریباً 38 فیصد ووٹرز نے کہا کہ وہ ملک کے حالات پر غصے میں ہیں، جبکہ مزید 37 فیصد نے خود کو غیر مطمئن قرار دیا۔ اس کے مقابلے میں صرف 18 فیصد افراد نے موجودہ حالات پر اطمینان کا اظہار کیا، جبکہ سات فیصد نے کہا کہ وہ پُرجوش محسوس کر رہے ہیں۔
یوں مجموعی طور پر واضح اکثریت نے پولنگ ادارے کو بتایا کہ وہ امریکہ کی موجودہ سمت اور حالات سے خوش نہیں ہیں۔
وسط مدتی انتخابات میں ووٹ ڈالنے والے امریکیوں کی بڑی تعداد نے معیشت کو ملک کو درپیش سب سے اہم مسئلہ قرار دیا ہے۔
79 ہزار سے زائد افراد پر مشتمل ایک سروے کے مطابق 39 فیصد ووٹرز نے کہا کہ ان کے نزدیک معیشت سب سے اہم مسئلہ ہے۔
جمہوریت کی صورتحال 32 فیصد کے ساتھ دوسرے نمبر پر رہی، جبکہ امیگریشن کو 14 فیصد ووٹرز نے اپنی اولین ترجیح قرار دیا۔
صحت، خارجہ پالیسی اور جرائم جیسے مسائل بھی ووٹرز کے لیے اہم رہے، تاہم نسبتاً کم افراد نے انھیں اپنی اولین ترجیح کے طور پر منتخب کیا۔
یہ سروے، جسے باضابطہ طور پر ووٹر پول کہا جاتا ہے، انتخابات سے قبل اور ووٹنگ کے دوران امریکی ووٹرز کی رائے جانچنے کے لیے کیا جاتا ہے۔ اس میں قبل از وقت ووٹ ڈالنے والوں اور پولنگ ڈے پر ووٹ دینے والوں دونوں کی آرا شامل ہوتی ہیں۔
تاہم یہ ابتدائی اعداد و شمار ہیں، اس لیے رات بھر مزید معلومات سامنے آنے کے ساتھ ان تناسب میں تبدیلی آ سکتی ہے۔
نیویارک سٹی کی مصروف سڑکوں سے لے کر اوہائیو کے دیہی علاقوں اور کیلیفورنیا کے ساحلی قصبوں تک، امریکہ بھر میں ووٹرز آج اپنے حقِ رائے دہی کا استعمال کرنے کے لیے پولنگ سٹیشنز کا رخ کر رہے ہیں۔ دیکھیے یہ پکچر گیلری۔۔
وسط مدتی انتخابات 2028 میں اپنی مدتِ صدارت کے اختتام سے پہلے ڈونلڈ ٹرمپ کے لیے آخری بڑا انتخابی امتحان ہیں۔
ٹرمپ کا کہنا ہے کہ وہ یہ حقیقت تسلیم کر چکے ہیں کہ وہ تیسری بار صدر کے عہدے کے لیے انتخاب نہیں لڑ سکتے۔ اس لیے انھیں دوبارہ ووٹرز کے فیصلے کا سامنا نہیں کرنا پڑے گا۔
ان انتخابات کے بعد ان کے پاس ملک بھر میں انتخابی مہم چلانے یا ایسے جلسے منعقد کرنے کی کوئی وجہ نہیں رہے گی جہاں وہ اپنے وفادار حامیوں کی بھرپور حمایت اور ستائش حاصل کرتے رہے ہیں۔
وسط مدتی انتخابات کے بعد صدر ٹرمپ جلد ہی اپنے سیاسی اثر و رسوخ میں کمی محسوس کرنا شروع کر سکتے ہیں، چاہے ریپبلکنز کی کارکردگی رائے عامہ کے جائزوں کی پیش گوئیوں سے بہتر ہی کیوں نہ ہو۔
ہر صدر اپنی مدت کے آخری دو برسوں میں کسی نہ کسی حد تک ’لیم ڈک‘ یعنی کمزور سیاسی حیثیت کے حامل رہنما کی صورت اختیار کر لیتا ہے۔ سب جانتے ہیں کہ وہ زیادہ عرصے تک اقتدار میں نہیں رہیں گے، اور توجہ جلد اس سوال پر مرکوز ہو جاتی ہے کہ اگلا صدر کون ہو سکتا ہے۔
یہ منظرنامہ کسی بھی صدر کے لیے مشکل ہو سکتا ہے۔
لیکن صدر ٹرمپ کے لیے یہ صورتِحال شاید غیر معمولی طور پر زیادہ تکلیف دہ ثابت ہو۔
کسی بھی امریکی ریاست میں آج تک کوئی سیاہ فام خاتون گورنر منتخب نہیں ہوئی۔ اگر ڈیموکریٹ امیدوار کیشا لانس بوٹمز آج جارجیا میں کامیاب ہو جاتی ہیں تو وہ تاریخ رقم کر دیں گی۔
اٹلانٹا کی سابق ڈیموکریٹ میئر کیشا لانس بوٹمز کا مقابلہ ریپبلکن امیدوار رِک جیکسن سے ہے، جو ایک ارب پتی کاروباری شخصیت اور صحت کے شعبے سے وابستہ ایگزیکٹو ہیں، اور یہ مقابلہ انتہائی سخت تصور کیا جا رہا ہے۔
جارجیا میں گذشتہ 20 برس سے زیادہ عرصے سے کوئی ڈیموکریٹ گورنر منتخب نہیں ہوا۔ یہ مسلسل تیسرا موقع ہے جب ڈیموکریٹس نے گورنر کے عہدے کے لیے کسی سیاہ فام خاتون کو اپنا امیدوار نامزد کیا ہے۔
اس سے قبل سٹیسی ایبرامز 2018 اور 2022 کے انتخابات میں موجودہ ریپبلکن گورنر برائن کیمپ سے شکست کھا چکی تھیں۔ برائن کیمپ اس سال اپنی آخری مدت مکمل کر رہے ہیں اور اب بھی خاصی مقبولیت رکھتے ہیں۔
بوٹمز کو درپیش چیلنج کی ایک جھلک ان ووٹروں سے ملتی ہے جن سے میری ملاقات ہوئی۔ ان میں سے بعض سینیٹ کے لیے ڈیموکریٹ امیدوار جان اوساف کو ووٹ دینے کا ارادہ رکھتے ہیں لیکن گورنر کے لیے ریپبلکن رِک جیکسن کی حمایت کر رہے ہیں، جبکہ بعض ایسے بھی ہیں جو اوساف کو ووٹ دینا چاہتے ہیں مگر گورنر کے خانے کو خالی چھوڑنے کا ارادہ رکھتے ہیں۔
اٹلانٹا کی میئر کے طور پر اپنے دورِ اقتدار میں بوٹمز کو کورونا لاک ڈاؤن کے دوران امن و امان اور جرائم سے متعلق مسائل پر شدید تنقید کا سامنا کرنا پڑا تھا۔ یہ معاملہ اس قدر متنازع بن گیا تھا کہ اٹلانٹا کے خوشحال علاقے بک ہیڈ کے بعض رہائشیوں نے شہر سے علیحدگی اختیار کرنے کی کوشش بھی کی تھی۔
امریکی سینیٹ کا کنٹرول حاصل کرنے کے لیے ڈیموکریٹس کو کم از کم چھ سخت مقابلوں میں سے تین میں کامیابی حاصل کرنا ہو گی۔
سینیٹ کی مجموعی 100 نشستیں ہیں، جن میں سے کسی ایک جماعت کو اکثریت کے لیے 51 نشستیں درکار ہوتی ہیں۔ آج صرف ایک تہائی نشستوں پر انتخابات ہو رہے ہیں۔
اس وقت سینیٹ میں ڈیموکریٹس کے پاس 45 نشستیں ہیں، جبکہ ریپبلکنز کی 53 نشستیں ہیں۔ دو نشستیں آزاد ارکان کے پاس ہیں۔
آزاد انتخابی تجزیاتی ادارے کک پولیٹیکل رپورٹ کے مطابق سینیٹ کی چھ نشستوں پر مقابلہ اتنا سخت ہے کہ انھیں کسی ایک جماعت کے حق میں پیشگی قرار نہیں دیا جا سکتا۔ یہ ریاستیں الاسکا، کنساس، آئیووا، مین، اوہائیو اور ٹیکساس ہیں۔
مشی گن کو بھی پہلے سخت مقابلے والی ریاست قرار دیا گیا تھا، تاہم بعد میں اس کی درجہ بندی تبدیل کر دی گئی۔
امریکہ کی تمام ریاستوں میں وسط مدتی انتخابات کے لیے ووٹنگ جاری ہے۔ ہوائی میں مقامی وقت کے مطابق آخری پولنگ سٹیشن دوپہر 12 بجے کے قریب کھلے۔ ان انتخابات کو عموماً اقتدار میں موجود جماعت کی کارکردگی پر عوامی رائے سمجھا جاتا ہے۔
ملک بھر میں پولنگ سٹیشن مشرق سے مغرب کی جانب مرحلہ وار کھولے گئے، جس کا آغاز ورمونٹ میں مقامی وقت کے مطابق صبح پانچ بجے ہوا۔
اہم ریاستیں
الاسکا، آئیووا، کنساس، مین، اوہائیو اور ٹیکساس وہ ریاستیں ہیں جن پر خصوصی نظر رکھی جا رہی ہے۔
ان تمام مقابلوں کو نہایت سخت سمجھا جا رہا ہے، یعنی نتیجہ ڈیموکریٹس یا ریپبلکنز میں سے کسی کے بھی حق میں جا سکتا ہے۔
نتائج کب معلوم ہوں گے؟
نتائج امریکی وقت کے مطابق شام چھ بجے کے بعد آنا شروع ہوں گے، تاہم حتمی نتائج کے وقت کا انحصار اس بات پر ہوگا کہ مقابلے کتنے سخت ہیں۔
اس سے تقریباً ایک گھنٹہ پہلے ووٹر سروے سامنے آنے کی توقع ہے، جو یہ سمجھنے کا پہلا بڑا اشارہ فراہم کرے گا کہ ووٹرز کو کن عوامل نے متاثر کیا۔ تاہم یہ برطانیہ کے انتخابات کی طرح نہیں ہوگا، جہاں ایگزٹ پول مجموعی نتیجے کی پیش گوئی کر دیتے ہیں۔
اب تک پیش آنے والے مسائل
نیویارک کی ویسٹ چیسٹر کاؤنٹی میں کچھ تکنیکی مسائل رپورٹ ہوئے، تاہم حکام نے یقین دہانی کرائی ہے کہ تمام ووٹ شمار کیے جائیں گے۔
فلوریڈا میں سیلاب کے باعث بعض پولنگ مراکز کو دوسری جگہ منتقل کرنا پڑا ہے۔
ہمارے ساتھ رہیے، ہم ان انتخابات سے متعلق تازہ ترین اطلاعات آپ تک پہنچاتے رہیں گے۔
امریکہ میں ہر ریاست اپنے انتخابات کی خود ذمہ دار ہوتی ہے اور ووٹوں کی گنتی اور ان پر کارروائی کے اپنے الگ قواعد رکھتی ہے۔
بعض ریاستیں انتخابی دن سے پہلے ہی پیشگی ڈالے گئے ووٹوں کی جانچ اور پروسیسنگ شروع کر دیتی ہیں، جبکہ دیگر ریاستیں پولنگ ختم ہونے کے بعد یہ عمل انجام دیتی ہیں۔
مقامی انتخابی حکام انفرادی ووٹوں کی تصدیق، پروسیسنگ اور گنتی کرتے ہیں۔ اس عمل کو کینوسنگ کہا جاتا ہے۔
زیادہ تر ریاستوں میں انتخابات کے بعد باضابطہ آڈٹ لازمی ہوتا ہے، جس کے تحت بیلٹ پیپرز کی ہاتھ سے گنتی کر کے اسے مشینوں کے ذریعے حاصل ہونے والے نتائج سے ملایا جاتا ہے، اگرچہ اس کے قواعد ملک بھر میں مختلف ہو سکتے ہیں۔
تمام ریاستوں اور مقامی انتظامیہ کے پاس سخت ضوابط موجود ہیں جن کے تحت یہ طے کیا جاتا ہے کہ کینوسنگ کے عمل میں کون شریک ہو سکتا ہے، ووٹ کس ترتیب سے پراسیس کیے جائیں گے اور عمل کے کون سے حصے عوام کے لیے کھلے ہوں گے۔
اگر کسی مقابلے میں امیدواروں کے درمیان فرق بہت کم ہو تو ووٹوں کی گنتی میں تاخیر ہو سکتی ہے، جبکہ دوبارہ گنتی اور قانونی چیلنجز کی صورت بھی پیدا ہو سکتی ہے۔
نتائج
پہلے نتائج امریکی وقت کے مطابق شام چھ بجے کے بعد آنا شروع ہوں گے۔
جیسے جیسے اگلے چند گھنٹوں میں مختلف ریاستوں میں پولنگ ختم ہوتی جائے گی، ابتدائی اشارے سامنے آ سکتے ہیں اور بعض ریاستوں کے نتائج کے بارے میں امریکی میڈیا پیش گوئیاں بھی کرنا شروع کر سکتا ہے۔ تاہم سخت مقابلوں کی صورت میں حتمی اندازے سامنے آنے میں وقت لگ سکتا ہے۔
مجموعی نتائج کب تک سامنے آئیں گے، اس کا انحصار اس بات پر ہوگا کہ مقابلے کتنے سخت ہیں اور کون سی ریاستیں فیصلہ کن ثابت ہوتی ہیں۔
2022 میں بھی وسط مدتی انتخابات کے اگلے روز، یعنی نو نومبر تک، امریکی کانگریس کے کنٹرول کے لیے ریپبلکنز اور ڈیموکریٹس کے درمیان سخت مقابلہ جاری تھا۔
بین الاقوامی خلائی سٹیشن پر موجود رہ کر بھی، آپ اپنی سیاسی آواز (زمین پر موجود لوگوں تک) پہنچا سکتے ہیں۔
انیل مینن، ایک امریکی خلاباز جو اس وقت زمین سے تقریباً 250 میل (400 کلومیٹر) بلندی پر واقع بین الاقوامی خلائی سٹیشن پر کام کر رہے ہیں، کہتے ہیں: ’جی ہاں، آپ خلا سے بھی ووٹ ڈال سکتے ہیں!‘
یہ خلاباز سوشل میڈیا پر لکھتے ہیں کہ اُنھوں نے اور وہاں موجود دو دیگر امریکیوں نے ’ایک الیکٹرانک بیلٹ (ووٹنگ فارم) پُر کیا اور اسے محفوظ طریقے سے انتخابی حکام کو بھیج دیا۔‘
سوشل میڈیا پر جاری ایک ویڈیو میں، وہ ہوا میں تیرتے ہوئے کہتے ہیں: ’خلائی اسٹیشن پر خوش آمدید؛ یہاں آج ہمیں بھی آپ کی طرح۔۔۔جو زمین پر موجود ہیں۔۔ووٹ ڈالنے کا موقع ملا ہے۔‘
پیر کو جو وسط مدتی انتخابات سے پہلے انتخابی مہم کا آخری دن تھا، امریکی صدر ڈونلڈ ٹرمپ نے جرائم کی شرح، دولت اور ادویات کی قیمتوں کے بارے میں مختلف دعوے کیے۔
بی بی سی ویریفائی نے صدر کے ان دعوؤں کا جائزہ لیا۔
واشنگٹن ڈی سی میں جرائم کی شرح 90 فیصد کم ہونے کا دعویٰ
میٹروپولیٹن پولیس ڈیپارٹمنٹ کے اعداد و شمار سے ظاہر ہوتا ہے کہ امریکی دارالحکومت میں مجموعی طور پر رپورٹ ہونے والے جرائم میں کمی آئی ہے، جہاں ٹرمپ نے اگست 2025 میں وفاقی قانون نافذ کرنے والے اداروں اور نیشنل گارڈ کو تعینات کیا تھا، تاہم یہ کمی صدر کے دعوے کے مطابق ہرگز نہیں ہے۔
اس سال (2 نومبر تک) مجموعی رپورٹ شدہ جرائم 2025 کے مقابلے میں 11 فیصد کم ہیں۔ بعض اقسام کے جرائم میں زیادہ کمی دیکھی گئی ہے، مثلاً گاڑیوں سے چوری کے واقعات میں 40 فیصد کمی آئی ہے۔ تاہم بعض دیگر جرائم میں اضافہ بھی ہوا ہے، جن میں پرتشدد جرائم شامل ہیں، جو 12 فیصد بڑھے ہیں۔
ملکی دولت میں 25 ٹریلین ڈالر اضافے کا دعویٰ
یہ واضح نہیں کہ ٹرمپ ’دولت‘ کی کس پیمائش کا حوالہ دے رہے تھے۔
فیڈرل ریزرو کے اعداد و شمار کے مطابق امریکی خالص دولت، یعنی گھریلو شعبے، کاروباری اداروں اور حکومت کی ملکیتی اثاثوں کی مجموعی مالیت، 2024 میں 155 ٹریلین ڈالر سے بڑھ کر جون میں 181 ٹریلین ڈالر ہو گئی۔
ممکن ہے ٹرمپ کا اشارہ بیرونی سرمایہ کاری کی جانب ہو۔
تاہم وائٹ ہاؤس کی اپنی سرمایہ کاری سے متعلق معلومات کے مطابق ٹرمپ کے اقتدار سنبھالنے کے بعد سے سرمایہ کاری کا حجم 11.3 ٹریلین ڈالر ہے، جو ان کے دعوے سے کہیں کم ہے۔
’پہلے ہمارے ہاں دنیا میں ادویات کی قیمتیں سب سے زیادہ تھیں اور اب سب سے کم ہیں‘
تاریخی طور پر امریکہ میں ادویات کی قیمتیں دیگر ترقی یافتہ ممالک کے مقابلے میں زیادہ رہی ہیں اور ٹرمپ انتظامیہ نے بعض ادویات کے اخراجات کم کرنے کے لیے اقدامات کیے ہیں، جن میں ایک ایسی ویب سائٹ کا اجرا بھی شامل ہے جو 800 سے زیادہ نسخہ جاتی ادویات پر رعایت فراہم کرتی ہے۔
سرکاری مہنگائی کے اعداد و شمار کے مطابق ستمبر تک کے 12 ماہ میں نسخہ جاتی ادویات کی قیمتوں میں 4.5 فیصد کمی آئی۔
تاہم دنیا بھر میں ادویات کی قیمتوں کے بارے میں محدود اعداد و شمار دستیاب ہیں، اس لیے ایسا کوئی ثبوت موجود نہیں کہ امریکہ میں اب ادویات کی قیمتیں دنیا میں سب سے کم ہیں۔
امریکی صدر ڈونلڈ ٹرمپ آج سوشل میڈیا پر خاصے متحرک رہے ہیں اور اپنی ویب سائٹ ٹروتھ سوشل پر مختلف امیدواروں کی حمایت میں مسلسل پیغامات پوسٹ کر رہے ہیں۔
وہ اپنے ریفلیکٹنگ پول کی تزئین و آرائش کے منصوبے پر بھی توجہ مرکوز کیے ہوئے ہیں، جو کل واشنگٹن میں ان کی تقریر کا اہم موضوع تھا۔ یہ وسط مدتی انتخابات سے قبل ان کا آخری عوامی خطاب بھی تھا۔
گذشتہ تقریباً ایک گھنٹے کے دوران ٹرمپ نے اس تالاب کے بارے میں دو مرتبہ پوسٹ کیا، جس کی متنازع تزئین و آرائش پہلے ہی بحث کا موضوع بنی ہوئی ہے۔
ایک پوسٹ میں انھوں نے ڈیلی میل کو تنقید کا نشانہ بنایا اور کہا کہ اخبار نے ان کے آخری انتخابی پروگرام کو غلط انداز میں پیش کیا۔ ٹرمپ کے مطابق یہ ایک ’نیوز کانفرنس‘ تھی، نہ کہ ’تقریر۔‘
ایک اور پوسٹ میں انھوں نے کیلیفورنیا سے تعلق رکھنے والے ڈیموکریٹ رکنِ کانگریس ٹیڈ لیو پر الزام عائد کیا کہ وہ یہ ’بدنیتی پر مبنی، غلط اور ہتک آمیز‘ دعویٰ پھیلا رہے ہیں کہ ٹرمپ اس تالاب کا نام اپنے نام پر رکھنا چاہتے ہیں۔
یہ تالاب اور واشنگٹن میں جاری دیگر بڑے تعمیراتی اور تزئین و آرائش کے منصوبے صدر ٹرمپ کے لیے خاص اہمیت رکھتے ہیں اور وہ اکثر ان کا ذکر کرتے رہتے ہیں۔
تاہم کل تالاب پر ان کی غیر معمولی توجہ نے مبصرین کو حیران کیا، جو یہ سوال اٹھا رہے تھے کہ ایسے بیانات سے انتخابی اعتبار سے کیا فائدہ ہو سکتا ہے، خاص طور پر ایسے وقت میں جب جائزوں کے مطابق بہت سے امریکی ووٹرز کی بنیادی توجہ ملکی معیشت پر مرکوز ہے۔
امریکہ میں ووٹ ڈالنے کے اہل تقریباً تین کروڑ 90 لاکھ ہسپانوی نژاد امریکیوں کی ترجیحات ان کے پس منظر، عمر اور رہائش کے مقام کے لحاظ سے خاصی مختلف ہیں۔ تاہم ان میں سے بہت سے خدشات وہی ہیں جو مجموعی امریکی ووٹرز کو درپیش ہیں۔
معیشت، مہنگائی اور بڑھتی ہوئی لاگت ان کے سرفہرست مسائل ہیں، ایک ایسے ملک میں جہاں پیٹرول کی اوسط قیمت چار ڈالر 17 سینٹ (تین پاؤنڈ) فی گیلن تک پہنچ چکی ہے۔
2024 میں ڈونلڈ ٹرمپ نے ہسپانوی ووٹرز کا اعتماد حاصل کیا تھا اور ان کے تقریباً نصف ووٹ حاصل کرنے میں کامیاب رہے تھے۔ یہ کامیابی خاص طور پر لاطینی نژاد مرد ووٹرز اور جنوبی ٹیکساس اور فلوریڈا میں زیادہ نمایاں تھی۔
دو سال بعد ہونے والے جائزوں سے ظاہر ہوتا ہے کہ اس حمایت میں کچھ کمی آئی ہے۔
لاطینی نژاد ووٹرز میں ٹرمپ کی مقبولیت کی شرح کم ہوئی ہے، اور 2024 میں ان کی حمایت کرنے والوں میں سے بڑھتی ہوئی تعداد اب ان کی حکومت سے مایوسی کا اظہار کر رہی ہے۔
پیو ریسرچ سینٹر کے مطابق دو سال قبل ٹرمپ کو ووٹ دینے والے لاطینی ووٹروں میں ان کی مقبولیت 93 فیصد سے کم ہو کر 57 فیصد رہ گئی ہے۔
معاشی مسائل کے علاوہ بہت سے لاطینی نژاد امریکی ان کی سخت گیر امیگریشن پالیسیوں سے بھی ناخوش ہیں۔ اگرچہ سخت سرحدی کنٹرول کے لیے ووٹروں میں عمومی حمایت پائی جاتی ہے، لیکن بہت سے لوگوں کا خیال ہے کہ ملک بدری کی پالیسیوں کے معاملے میں حکومت حد سے آگے نکل گئی ہے۔
دو سال قبل ڈونلڈ ٹرمپ نے ٹیکساس کے شہر لباک میں 70 فیصد ووٹ حاصل کیے تھے۔ یہ امریکہ کے ان علاقوں میں شمار ہوتا ہے جہاں قدامت پسند سیاست سب سے زیادہ مضبوط سمجھی جاتی ہے۔
گذشتہ ہفتے اس گرد آلود میدانی شہر میں انتخابی مہم کے دو جلسے منعقد ہوئے، جہاں صدر ٹرمپ اور سینیٹ کے لیے ڈیموکریٹ امیدوار جیمز ٹالاریکو نے ایک دوسرے سے چند میل کے فاصلے پر مہم چلائی۔
ہزاروں افراد ایئرپورٹ کے اطراف سڑکوں پر کھڑے ہو کر ایئر فورس ون کی آمد دیکھتے رہے، جبکہ مزید لوگ ریپبلکن سینیٹ امیدوار کین پیکسٹن کے جلسے میں شریک ہوئے۔
ٹالاریکو کے حامیوں سے بات چیت میں مجھے امید اور خدشات کا ملا جلا احساس نظر آیا۔
ان کی امید یہ تھی کہ ان کا امیدوار تین دہائیوں سے زائد عرصے میں ٹیکساس بھر میں ہونے والا کوئی انتخاب جیتنے والا پہلا ڈیموکریٹ بن سکتا ہے۔ لیکن خدشہ یہ تھا کہ کہیں یہ ڈیموکریٹس کی امیدوں کے ٹوٹنے کی ایک اور مثال ثابت نہ ہو۔
جن ریپبلکن انتخابی ماہرین سے میری بات ہوئی، وہ درپیش چیلنج سے بخوبی آگاہ تھے۔
شاید ان کی سب سے بڑی تشویش یہ ہے کہ اگر ڈیموکریٹس یہاں کامیابی حاصل کر لیتے ہیں تو 2028 کے صدارتی انتخابات سے قبل ان کی توجہ ٹیکساس پر مزید مرکوز ہو جائے گی، جس سے ریپبلکنز کو ان علاقوں کا دفاع کرنا پڑے گا جو چند سال پہلے تک ان کے لیے محفوظ سمجھے جاتے تھے۔
آئیووا ایک اور ایسی ریاست ہے جہاں ریپبلکنز کا دیرینہ مضبوط گڑھ خطرے میں دکھائی دے رہا ہے۔
ڈونلڈ ٹرمپ مسلسل تین صدارتی انتخابات میں اس ریاست میں باآسانی کامیابی حاصل کر چکے ہیں، جبکہ آئیووا کے ووٹروں نے 2008 کے بعد سے کسی ڈیموکریٹ سینیٹر اور 2007 کے بعد سے کسی ڈیموکریٹ گورنر کو منتخب نہیں کیا۔
لیکن صدر ٹرمپ کے محصولات نے ریاست کے ان کسانوں کے اخراجات میں اضافہ کر دیا ہے جو اپنی زرعی سرگرمیوں کے لیے درآمدی مصنوعات پر انحصار کرتے ہیں۔ ایران کے ساتھ جنگ نے بھی آئیووا کے ان باشندوں کو متاثر کیا ہے جو ڈیزل کی بڑھتی قیمتوں سے براہِ راست متاثر ہو رہے ہیں۔
تو پھر کون انتخاب لڑ رہا ہے؟
گورنر کے لیے مقابلہ
ڈیموکریٹ روب سینڈ، جو ایک سابق ماڈل اور آئیووا کے ریاستی آڈیٹر ہیں، ریپبلکن امیدوار زیک لان کے مقابل ہیں۔ زیک لان آئیووا کے کسان ہیں جنھوں نے ٹرمپ کی حمایت یافتہ امیدوار کو شکست دے کر پارٹی نامزدگی حاصل کی۔
امریکی سینیٹ کے لیے مقابلہ
ڈیموکریٹ جوش ٹوریک، جو سابق پیرا اولمپک باسکٹ بال سٹار اور موجودہ ریاستی نمائندہ ہیں، ایشلے ہنسن کے مقابل انتخاب لڑ رہے ہیں، جو سابق ٹی وی نیوز میزبان ہیں اور 2021 سے امریکی کانگریس کی رکن ہیں۔
ہنسن کو صدر ٹرمپ کی حمایت حاصل تھی، لیکن بعد میں انھوں نے ایران کے خلاف جنگ میں جانے کے ان کے فیصلے پر تنقید کی۔ آئیووا میں سینیٹ کی یہ نشست کانگریس میں طاقت کے توازن کو اکیلے ہی تبدیل کر سکتی ہے۔
الاسکا کے شہر سیوارڈ میں جن ماہی گیروں سے ہماری ملاقات ہوئی، ان کا کہنا ہے کہ سیاسی کھینچا تانی اصل مسائل سے توجہ ہٹا رہی ہے۔
ان کے لیے اصل اہمیت مقامی مسائل کی ہے، جن میں سالمن مچھلیوں کی کم ہوتی تعداد، ڈیزل کی بڑھتی لاگت اور ماہی گیر کمیونٹی کا مستقبل شامل ہیں۔
ایرک کلاک، جو یوکون دریا پر ماہی گیری کرتے ہوئے بڑے ہوئے اور بعد میں پرنس ولیم ساؤنڈ میں تجارتی ماہی گیری سے وابستہ رہے، کے لیے یہ تبدیلیاں نہایت ذاتی نوعیت کی ہیں۔
وہ کہتے ہیں: ’یہ دیکھ کر افسوس ہوتا ہے کہ اب مچھلی پکڑنے کے وہ کیمپ باقی نہیں رہے۔‘ وہ ان دنوں کو یاد کرتے ہیں جب خاندان ہفتوں تک سالمن مچھلیاں پکڑتے تھے تاکہ اپنی ضرورت پوری کر سکیں۔
مالی مشکلات کے باعث انھیں ایک وقت میں روزگار کی تلاش میں اپنی آبائی برادری کورڈووا چھوڑنا پڑی تھی۔
وہ کہتے ہیں: ’ایک سال تو میں نے پوری گرمیوں میں شاید صرف 800 ڈالر (600 پاؤنڈ) کمائے تھے۔‘
ایک اور تلخ تنازع بائی کیچ پر ہے، یعنی وہ مچھلیاں جو دوسری اقسام کو پکڑنے کے لیے ڈالے گئے جالوں میں غیر ارادی طور پر پھنس جاتی ہیں۔
بندرگاہ پر ہماری ملاقات سالمن مچھلی کے ایک ماہی گیر ڈکوٹا رینالڈز سے ہوئی، جو صنعتی پیمانے پر کی جانے والی ماہی گیری پر مزید سخت پابندیاں چاہتے ہیں۔
وہ کہتے ہیں: ’اس کا براہِ راست اثر میری آمدن پر پڑتا ہے۔‘
ان ماہی گیروں اور ان کی برادریوں کے لیے اصل سوال یہ ہے کہ ان کے روزگار اور معاش کو کون تحفظ دے سکتا ہے۔
انتخابات پر ایک اور سوال بھی منڈلا رہا ہے: نتائج کو کس حد تک چیلنج کیا جائے گا؟