’آپ یہ اپنے باس سے کیوں نہیں کہتے؟‘: امریکی الیکشن میں شکست کی وجہ جنگ کو قرار دینے پر قالیباف کا وینس سے سوال

لائیو کوریج

1. 4 نومبر 2026ووٹرز کا عبدل السید کی کامیابی پر ردعمل: ’سر اٹھا کر چل سکتے ہیں کہ ہماری حمایت کے لیے کوئی موجود ہے‘

   مشیگن میں عبدل السیّد سینیٹ کے لیے منتخب ہونے والے پہلے مسلمان مرد بن گئے ہیں۔

   ریاست کے ووٹروں نے بی بی سی کو بتایا کہ وہ ’مستقبل کے بارے میں پُرامید‘ ہیں اور ان کا خیال ہے کہ عبدل السیّد ’واقعی ہمارے لیے آواز اٹھائیں گے اور جدوجہد کریں گے۔‘

   ایک ووٹر کا کہنا ہے کہ وہ ’واشنگٹن میں لوگوں کی نمائندگی کے تصور کا رخ بدل رہے ہیں۔‘

   ایک اور ووٹر نے عبدل السیّد کے انتخاب کو ’امریکہ کے لیے ایک تاریخی سنگِ میل‘ قرار دیا، جبکہ ایک تیسرے ووٹر کے مطابق اس کامیابی سے ’ہمیں بہت فخر محسوس ہوتا ہے۔۔۔ ہم زیادہ اعتماد کے ساتھ سر اٹھا کر چل سکتے ہیں کہ کوئی ہماری حمایت کے لیے موجود ہوگا۔‘

2. 4 نومبر 2026امیدواروں کے ناموں سے متعلق کنفیوژن نے الاسکا کے سخت مقابلے کو مزید پیچیدہ بنا دیا

   الاسکا میں سینیٹ کی ایک انتہائی سخت مقابلے والی نشست کا نتیجہ ابھی آنا باقی ہے۔ وہاں ریپبلکن موجودہ سینیٹر ڈین سلیوان ڈیموکریٹ میری پیلٹولا کے مقابل اس نشست کو برقرار رکھنے کی امید کر رہے ہیں۔

   یہ مقابلہ تنازع کا موضوع بھی رہا ہے۔ اس کی وجہ دو ایسے امیدوار ہیں جن کا نام ڈین سلیوان ہے۔ ان میں سے ایک موجودہ سینیٹر ہیں، جبکہ دوسرے ایک ریٹائرڈ استاد ہیں جو آزاد امیدوار کے طور پر انتخاب لڑ رہے ہیں۔

   ہفتے کے اختتام پر ایک جج نے ٹرمپ انتظامیہ کی جانب سے دائر کی گئی ایک درخواست مسترد کر دی، جس میں مطالبہ کیا گیا تھا کہ اگر ریپبلکن موجودہ سینیٹر انتخاب ہار جائیں تو نتائج کی توثیق میں تاخیر کی جائے۔ درخواست میں مؤقف اختیار کیا گیا تھا کہ بیلٹ پیپر پر ڈین سلیوان نام کے دو امیدواروں کی موجودگی ’ووٹروں میں الجھن‘ پیدا کر سکتی ہے۔

   انتظامیہ کا کہنا ہے کہ وہ جج کے فیصلے کے خلاف اپیل کرے گی۔ دوسری جانب ایف بی آئی ان الزامات کی تحقیقات کر رہی ہے کہ ڈیموکریٹ کارکنوں نے ریٹائرڈ استاد کو ووٹ تقسیم کرنے والے امیدوار کے طور پر انتخاب لڑنے پر آمادہ کیا۔ ڈونلڈ ٹرمپ کی جانب سے عائد کیے گئے الزامات کے بعد پیلٹولا نے اس معاملے میں کسی بھی قسم کے کردار کی تردید کی ہے۔

   الاسکا میں پولنگ جی ایم ٹی کے مطابق 05:00 بجے (مشرقی امریکی وقت کے مطابق رات 12:00 بجے) ختم ہوئی۔ بی بی سی کے امریکی شراکت دار سی بی ایس نیوز کے مطابق، اس وقت ریپبلکن ڈین سلیوان 48.5 فیصد ووٹوں کے ساتھ آگے ہیں، جبکہ میری پیلٹولا کو 47.7 فیصد ووٹ ملے ہیں۔ آزاد امیدوار ڈین سلیوان اب تک 1.7 فیصد ووٹ حاصل کر چکے ہیں۔

3. 4 نومبر 2026امریکیوں نے جنگ کو مسترد کیا، ہم اس پیغام کی توثیق کرتے ہیں: ایران کا ریپبلکنز کی شکست پر تبصرہ

   ایرانی پارلیمنٹ کے سپیکر محمد باقر قالیباف، جو امریکہ اور ایران کے درمیان مذاکرات میں ایک اہم کردار سمجھے جاتے ہیں، نے امریکی وسط مدتی انتخابات کے نتائج پر تبصرہ کیا ہے۔

   انھوں نے ایکس پر لکھا ’ضمیر کی آواز ہو یا مہنگائی کا بوجھ، امریکیوں نے جنگ کو ’نہ‘ کہا ہے اور ہم اس پیغام کی توثیق کرتے ہیں۔‘

   انھوں نے مزید لکھا ’اگر امریکی حکومت بین الاقوامی سرپرستوں اور بلیک میل کرنے والوں کی خدمت کے لیے اپنے عوام کی خواہشات سے غداری کرتی ہے، تو اسے معلوم ہو جائے گا کہ ہماری ’نہ‘ ایک بھیانک خواب کے ساتھ آتی ہے۔‘

   دوسری جانب آج سے قبل فاکس نیوز سے گفتگو میں ٹرمپ نے ایران پر مزید حملوں کی امریکی منصوبہ بندی سے متعلق رپورٹس کے بارے میں پوچھے جانے پر کہا تھا کہ ’ہمیں کوئی بڑا اقدام کرنا ہوگا۔‘

   انھوں نے مزید کہا کہ اس میں ’شدید حملہ‘ بھی شامل ہو سکتا ہے۔

4. 4 نومبر 2026میں نہیں چاہتا کہ دو سال تک ہر چیز کو ویٹو کرتا رہوں: ٹرمپ

   ہمارے وائٹ ہاؤس کے نامہ نگار نے اس بات کا جائزہ لیا ہے کہ آیا ٹرمپ ڈیموکریٹس کے ساتھ مل کر کام کر سکتے ہیں یا ’مسٹر ویٹو‘ بن جائیں گے۔

   صدر نے آج صبح اس حوالے سے کچھ متضاد اشارے دیے ہیں۔

   انھوں نے پولیٹیکو کو بتایا کہ وہ ’ڈیموکریٹس کے ساتھ مل کر کام کریں گے تاکہ یہ یقینی بنایا جا سکے کہ ہمارے ملک کے لیے معاملات بہتر انداز میں آگے بڑھیں۔‘

   کانگریس پر ڈیموکریٹس کا کنٹرول ٹرمپ کے منصوبوں میں رکاوٹ بنے گا، تاہم وہ اپنے صدارتی اختیار، یعنی ’ہر چیز کو ویٹو کرنے‘ کے حق، کا ذکر بھی کر چکے ہیں۔

   آج صبح اسی خبر رساں ادارے سے گفتگو کرتے ہوئے انھوں نے کہا کہ وہ ’یہ نہیں چاہتے کہ اگلے دو سال صرف بیٹھ کر ہر چیز کو ویٹو کرتے رہیں، بلکہ وہ چاہتے ہیں کہ کام بھی ہو۔‘

   انھوں نے یہ بھی کہا کہ وہ پہلے ہی ’ڈیموکریٹ پارٹی کے بعض رہنماؤں‘ سے بات کر چکے ہیں اور ’ڈیموکریٹس میں بھی ان کے بہت سے دوست ہیں۔‘ تاہم انھوں نے یہ نہیں بتایا کہ ان کا اشارہ کن افراد کی جانب ہے۔

5. 4 نومبر 2026کرس پاپاس امریکہ کی تاریخ کے پہلے ہم جنس پرست سینیٹر: وسط مدتی انتخابات کے چار بڑے نتیجے

   ووٹوں کی گنتی اب بھی امریکی کی کئی ریاستوں میں جاری ہے، لیکن یہ رات پہلے ہی تاریخ میں اپنا مقام بنا چکی ہے۔

   چار ریاستوں میں کئی تاریخی سنگِ میل سامنے آئے ہیں:

   • عبدل السیّد مشیگن میں ریپبلکن امیداوار مائیک راجرز کے خلاف متوقع کامیابی کے بعد امریکہ کے پہلے مسلمان سینیٹر بن جائیں گے۔
   • کیشا لانس باٹمز جارجیا میں ریپبلکن رک جیکسن کو شکست دے کر امریکہ میں گورنر منتخب ہونے والی پہلی سیاہ فام خاتون بن جائیں گی۔
   • کرس پاپاس (نیو ہیمپشائر) سینیٹ میں خدمات انجام دینے والے پہلے ہم جنس پرست مرد ہوں گے۔
   • ڈیب ہالینڈ نیو میکسیکو میں کامیابی کے بعد گورنر منتخب ہونے والی پہلی مقامی امریکی (نیٹو امریکن) خاتون بن گئی ہیں۔

6. 4 نومبر 2026ٹرمپ ڈیموکریٹس کے ساتھ کام کریں گے یا ’مسٹر ویٹو‘ بن جائیں گے؟, برنڈ ڈیبسمن جونیئر، بی بی سی نیوز

   امریکی صدر ڈونلڈ ٹرمپ اپنی جماعت کی حیران کن شکست کے بعد غیر متوقع طور پر مفاہمتی انداز میں نظر آ رہے ہیں۔ انھوں نے کہا کہ ڈیموکریٹس نے ’اچھا کام کیا‘ ہے اور وہ ان کے ساتھ مل کر کام کرنے کے لیے تیار ہیں۔

   تاہم آیا وہ واقعی ایسا کریں گے یا نہیں، اس بارے میں خاصی غیر یقینی پائی جاتی ہے۔

   ٹرمپ کے بارے میں یہ امکان کم ہی دکھائی دیتا ہے کہ وہ ڈیموکریٹس کی جانب سے پیش کی جانے والی قانون سازی میں تعاون کریں گے۔ وہ پہلے ہی یہ اشارہ دے چکے ہیں کہ وہ ’مسٹر ویٹو‘ بننے کا ارادہ رکھتے ہیں اور وہ ان کے پاس دستخط کے لیے آنے والے کسی بھی بل کی منظوری نہیں دیں گے۔

   اس کے علاوہ وہ اپنے منصب کے ’وسیع اختیارات‘ استعمال کرتے ہوئے جہاں ممکن ہو کانگریس کو نظر انداز کرنے کا ارادہ رکھتے ہیں اور اس مقصد کے لیے صدارتی احکامات اور سپریم کورٹ کے اس فیصلے پر انحصار کریں گے جس کے تحت انہیں وفاقی اداروں پر وسیع اختیارات حاصل ہیں، چاہے کانگریس پر کسی بھی جماعت کا کنٹرول ہو۔

   بالآخر ٹرمپ کا کہنا ہے کہ وہ اپنے ویٹو اور صدارتی اختیارات استعمال کر کے ڈیموکریٹس کو ایسے مذاکراتی مؤقف اختیار کرنے پر مجبور کرنے کی کوشش کر سکتے ہیں، جو ان کے نزدیک زیادہ قابلِ قبول ہوں۔

   اگرچہ خارجہ پالیسی اور صدارتی احکامات کے حوالے سے ان کے پاس اب بھی وسیع اختیارات موجود ہیں، تاہم ان پر کچھ پابندیاں بھی ہوں گی۔ وہ اب ڈیموکریٹس کی منظوری کے بغیر نئے ٹیکس میں کٹوتیوں یا سماجی تحفظ کے اخراجات میں کمی جیسے اقدامات نہیں کر سکیں گے۔

   اسی طرح وہ انتظامی نگرانی سے بھی نہیں بچ سکیں گے۔ ٹرمپ ڈیموکریٹس کو اپنے خلاف یا اپنی انتظامیہ کے اعلیٰ عہدیداروں کے خلاف نئی تحقیقات شروع کرنے سے نہیں روک سکیں گے اور ڈیموکریٹ جماعت پہلے ہی اشارہ دے چکی ہے کہ وہ ایسا کرنے کا ارادہ رکھتی ہے۔

7. 4 نومبر 2026لاس اینجلس کے میئر کی دوڑ میں سخت مقابلہ، حتمی نتیجہ آنے میں ہفتوں لگ سکتے ہیں, ڈیوڈ ویلیس، بی بی سی نیوز

   امریکہ کے وسط مدتی انتخابات کے ساتھ ساتھ لاس اینجلس کے ووٹرز امریکہ کے دوسرے بڑے شہر کے اگلے میئر کے انتخاب کے لیے بھی ووٹ ڈال رہے ہیں۔

   آدھے سے کچھ زیادہ ووٹوں کی گنتی مکمل ہونے کے بعد میئر کی دوڑ انتہائی سخت مقابلے کی صورت اختیار کر گئی ہے جہاں موجودہ میئر کیرن بیس اور ان کی حریف نتھیا رامن کے درمیان ایک فیصد سے بھی کم فرق موجود ہے۔

   دونوں امیدواروں کا تعلق ڈیموکریٹک پارٹی سے ہے تاہم سٹی کونسل کی رکن نتھیا رامن خود کو ایک ڈیموکریٹک سوشلسٹ قرار دیتی ہیں۔

   اس انتخاب کے نتیجے سے یہ بھی طے ہو گا کہ آیا امریکہ کا دوسرا بڑا شہر نیویارک کی راہ پر چلتا ہے جہاں گزشتہ سال ڈیموکریٹک سوشلسٹ زوہران ممدانی میئر منتخب ہوئے تھے۔

   کیرن بیس کو ابتدا میں نتھیا رامن کی حمایت حاصل تھی، تاہم بعد میں رامن نے خود انتخابی میدان میں اترنے کا فیصلہ کیا۔

   اس کے بعد رامن نے اپنی حریف پر انتظامی ناکامیوں کے الزامات بھی عائد کیے ہیں۔

   کیرن بیس سنہ 2025 میں لاس اینجلس میں لگنے والی شدید جنگلاتی آگ کے دوران ملک سے باہر تھیں تاہم انھیں سٹی کونسل کے اراکین اور کیلیفورنیا کے گورنر گیون نیوسم کی حمایت حاصل ہے۔

   کیلیفورنیا میں بڑی تعداد میں ووٹرپوسٹل بیلٹ یعنی ڈاک کے ذریعے ووٹ ڈالتے ہیں جس کے باعث حتمی نتائج مرتب ہونے میں کئی ہفتے لگ سکتے ہیں۔

8. 4 نومبر 2026امریکہ میں وسط مدتی انتخابات کے لائیو نتائج

   امریکہ بھر میں وسط مدتی انتخابات کے نتائج کی آمد کا سلسلہ جاری ہے جس میں ڈیموکریٹس کو واضح برتری ملتی نظر آ رہی ہے۔

   اگر آپ مکمل نتائج سے باخبر رہنا چاہتے ہیں تو بی بی سی اُردو کے لائیو نتائج کا پیچ دیکھنے کے لیے یہاں کلک کیجیے۔

9. 4 نومبر 2026عبدل السید: امریکہ میں سینیٹ کی تاریخ میں پہلا مسلمان سینیٹر بننے کی راہ پر گامزن

   مشی گن سے ڈیموکریٹ پارٹی کے امیدوار عبدالرحمان السید نے کامیابی کا دعویٰ کرتے ہوئے اپنے حامیوں کا شکریہ ادا کیا اور کہا کہ انھوں نے ایک ایسے امیدوار پر اعتماد کیا جس کی کامیابی کا امکان سب سے کم سمجھا جا رہا تھا۔

10. 4 نومبر 2026بریکنگ, نیبراسکا کی سینیٹ نشست ریپبلکنز کے پاس برقرار رہنے کی پیش گوئی

    امریکی خبر رساں ادارے ایسوسی ایٹڈ پریس کے مطابق نیبراسکا میں سینیٹ کی نشست ریپبلکن امیدوار پیٹ رکیٹس کے پاس برقرار رہنے کا امکان ہے۔

    امریکہ کے وسط مدتی انتخابات میں 87 فیصد ووٹوں کی گنتی کے بعد اب تک کے ابتدائی اندازوں کے مطابق پیٹ رکیٹس نے آزاد امیدوار ڈین اوزبورن کو شکست دی ہے۔

    ان نتائج کو دیکھتے ہوئے یہ نشست ریپبلکن پارٹی کے پاس برقرار رہنے کی پیش گوئی کی جا رہی ہے۔

11. 4 نومبر 2026ریپبلکنز صدمے میں، ٹرمپ بھی خاموش, برنڈ ڈیبسمان جونیئر (وائٹ ہاؤس رپورٹر، واشنگٹن ڈی سی) کا تجزیہ

    انتخابی نتائج کے بعد ریپبلکن پارٹی پریشان ہے۔ جو نتائج سامنے آئے ہیں، انھیں پارٹی کے لیے ایک غیر متوقع اور بڑی شکست کے طور پر دیکھا جا رہا ہے۔

    گذشتہ روز جن ریپبلکن کارکنوں اور عہدے داروں سے میری بات ہوئی، ان میں سے بیشتر کو کچھ نشستوں پر نقصان کا اندازہ تھا، تاہم وہ پُر امید رہتے ہوئے محتاط اندازے لگا رہے تھے کہ شاید پارٹی ایوانِ نمائندگان کا کنٹرول برقرار رکھنے میں کامیاب ہو جائے گی اور چند سخت مقابلوں میں کامیابی حاصل کر لے گی۔

    ریپبلکن عملے کے ایک رکن نے مجھے پیغام بھیجا: ’یہ میری توقع سے کہیں زیادہ برا ثابت ہوا ہے۔ یہ ایک تباہی ہے۔‘

    ایک اور ریپبلکن ذریعے کے مطابق آئندہ چند گھنٹوں اور دنوں میں پارٹی کے اندر اس بات پر ’گہری خود احتسابی‘ ہو گی کہ آخر غلطی کہاں ہوئی۔

    صدر ٹرمپ، جو اس موقع پر حیران کن طور پر خاموش نظر آئے، نے شکست کی ذمہ داری بڑی حد تک امیدواروں پر ڈالی، اگرچہ انھوں نے یہ بھی تسلیم کیا کہ پٹرول کی بلند قیمتوں نے بھی انتخابی نتائج پر اثر ڈالا۔

    تاہم پارٹی کے اندر بعض سینیئر رہنما مبینہ طور پر اس صورتحال کا ذمہ دار اُن عہدے داروں کو قرار دے رہے ہیں جنھوں نے ٹرمپ کو ایران کے خلاف جنگ کا مشورہ دیا تھا۔

    دوسری جانب کچھ ریپبلکن شخصیات کا خیال ہے کہ خود ٹرمپ بھی پارٹی کی مشکلات کے ذمہ دار ہیں۔

    قدامت پسند مبصر بین شاپیرو نے اپنے پوڈکاسٹ میں کہا: ’صدر ٹرمپ نے انتخابات سے پہلے کہا تھا کہ ووٹرز یہ سمجھیں کہ گویا اُن کا نام بھی بیلٹ پیپر پر موجود ہے۔ میرے خیال میں حقیقت میں ایسا ہی ہوا، یعنی صدر خود بھی اس انتخاب کا حصہ بن گئے تھے۔‘

    بدھ کے روز صدر ٹرمپ کی کوئی عوامی تقریب شیڈول پر نہیں ہے، تاہم امکان ہے کہ وہ اپنے سوشل میڈیا پلیٹ فارم ٹروتھ سوشل یا مزید میڈیا انٹرویوز کے ذریعے ردِعمل دیتے رہیں گے۔

12. 4 نومبر 2026امریکی انتخابات اور ایلون مسک کی طنزیہ ٹویٹ: ’لگتا ہے میرے خلائی لیزر نے اس بار کام نہیں کیا‘, للی جمالی، بی بی سی نیوز

    امریکی انتخابات کے نتائج میں ارب پتی کاروباری شخصیت ایلون مسک کا کردار نمایاں طور پر زیرِ بحث ہے۔

    اوپن سیکرٹس کے وفاقی انتخابی ریکارڈز کے تجزیے کے مطابق ایلون مسک نے ریپبلکن امیدواروں اور قدامت پسند مقاصد کی حمایت کے لیے کم از کم 455 ملین ڈالر (337.6 ملین پاؤنڈ) خرچ کیے ہیں۔

    ٹیکساس میں سینیٹ کی دوڑ کے دوران مسک نے ریپبلکن امیدوار کین پیکسٹن کی حمایت میں 200 ملین ڈالر (148 ملین پاؤنڈ) سے زیادہ خرچ کیے۔ تاہم پیکسٹن کو ڈیموکریٹک امیدوار جیمز تالاریکو کے ہاتھوں شکست کا سامنا کرنا پڑا۔

    یاد رہے کہ مسک چند برس قبل اپنی رہائش گاہ اور کاروباری مفادات کا ایک حصہ بھی ٹیکساس منتقل کر چکے ہیں۔

    بدھ کی شام کامیابی کے بعد اپنے حامیوں سے خطاب کرتے ہوئے جیمز تالاریکو نے نام لیے بغیر کہا کہ ’ہم نے ہر ارب پتی بڑے عطیہ دہندہ، ہر کھرب پتی بڑے عطیہ دہندہ، اور اس ریاست و ملک کے ٹوٹے ہوئے سیاسی نظام کے ہر بدعنوان محافظ کو یہ پیغام دے دیا ہے کہ طاقت عوام کی ہے۔‘

    ادھر سوشل میڈیا پلیٹ فارم ایکس پر گھنٹوں کی خاموشی کے بعد ایلون مسک نے طنزیہ انداز میں لکھا کہ ’لگتا ہے میرے انتخابات میں مداخلت کرنے والے خلائی لیزر اس بار کام نہیں آئے۔‘

13. 4 نومبر 2026’ممکنہ طور پر یہ بات درست ہے‘ کہ ٹرمپ نے ریپبلکن امیدواروں کو نقصان پہنچایا: رون جانسن

    ریاست وسکونسن سے 2011 سے سینیٹر منتخب ہونے والے ریپبلکن رہنما رون جانسن نے کہا ہے کہ ان کی جماعت کے لیے انتخابی رات ’کسی بھی طرح اچھی نہیں رہی۔‘

    بی بی سی ریڈیو فور کے ٹوڈے پروگرام سے گفتگو میں انھوں نے کہا کہ ایران کے ساتھ جنگ اور خاص طور پر اس کے نتیجے میں ایندھن کی قیمتوں میں ہونے والا اضافہ اب بھی ووٹروں کے ذہنوں پر گہرا اثر ڈالے ہوئے ہے۔

    جب ان سے پوچھا گیا کہ کیا ریپبلکن پارٹی کے نقصان کی ذمہ داری ڈونلڈ ٹرمپ پر عائد ہوتی ہے تو جانسن نے کہا کہ وسط مدتی انتخابات عموماً برسر اقتدار انتظامیہ کے بارے میں عوامی رائے کا اظہار ہوتے ہیں۔

    تاہم انھوں نے یہ بھی کہا کہ ریپبلکن جماعت کو مرکزی دھارے کے ذرائع ابلاغ کے ’لبرل جھکاؤ‘ کا سامنا ہے۔ ان کے بقول ٹرمپ نے سرحدی کنٹرول اور افراطِ زر جیسے معاملات پر بعض مثبت اقدامات کیے، لیکن ’ممکنہ طور پر یہ بات درست ہے‘ کہ ان انتخابات میں ٹرمپ نے ریپبلکن امیدواروں کی فتح کے امکانات کو نقصان پہنچایا۔

    جانسن نے مزید کہا: ’صدر ٹرمپ نے ووٹروں سے کہا تھا کہ وہ یہ تصور کریں کہ بیلٹ پیپر پر ان کا نام بھی موجود ہے۔ بظاہر ووٹروں نے ان کی بات مان لی، اور نتیجہ ہمارے سامنے ہے۔‘

14. 4 نومبر 2026امریکہ میں سینیٹ میں ڈیموکریٹس کی پیش قدمی, سرین ہبیشیان، بی بی سی نیوز

    امریکہ میں وسط مدتی انتحابات میں سینیٹ کی متعدد اہم نشستوں کے نتائج اور ابتدائی اندازوں سے ظاہر ہوتا ہے کہ ڈیموکریٹک پارٹی نے ریپبلکن جماعت کے مضبوط گڑھ سمجھی جانے والی کئی ریاستوں میں نمایاں کامیابیاں حاصل کی ہیں۔ ان ریاستوں میں ٹیکساس، اوہائیو اور کنساس شامل ہیں۔

    • کنساس میں سینیٹ کی نشسست کے لیے پیش گوئی کی جا رہی ہے کہ ڈیموکریٹک امیدوار ایڈم ہیملٹن سینیٹ کی نشست جیت جائیں گے۔ ایسا ہوا تو یہ ایک قابلِ ذکر پیش رفت کہلائی جائے گی کیونکہ ریاست نے تقریباً 100 برس قبل آخری بار کسی ڈیموکریٹ کو سینیٹ کے لیے منتخب کیا تھا۔
    • آئیوا میں سابق پیرالمپئن اور ڈیموکریٹک امیدوار جاش ٹوریک کے بارے میں اندازہ ہے کہ وہ ریاست کے اگلے امریکی سینیٹر ہوں گے۔ ان کی کامیابی سے ریپبلکن سینیٹر جونی ارنسٹ کی نشست ڈیموکریٹس کے حق میں چلی جائے گی۔
    • مین میں سینیٹ کی نشست ڈیموکریٹ ٹرائے جیکسن کے حصے میں جاتی دکھائی دے رہی ہے۔ اگر یہ نتیجہ برقرار رہتا ہے تو وہ ریپبلکن سینیٹر سوزن کولنز کی جگہ لیں گے، جو تقریباً 30 برس تک اس نشست پر فائز رہی ہیں۔
    • مشی گن میں ڈیموکریٹ عبدل السید کے بارے میں پیش گوئی کی گئی ہے کہ وہ ریپبلکن امیدوار مائیک راجرز کو شکست دے کر سینیٹ کی نشست حاصل کر لیں گے۔
    • اوہائیو میں سینیٹ کی نشست ڈیموکریٹ شیروڈ براؤن کے حق میں پلٹ گئی ہے۔
    • ٹیکساس میں ڈیموکریٹ جیمز تالاریکو نے سینیٹ کی نشست حاصل کر لی ہے۔
    • جنوبی کیرولائنا میں ڈیموکریٹ اینی اینڈریوز نے ریپبلکن امیدوار ڈارلین گراہم کو شکست دی ہے، جو سینیٹر لنڈزی گراہم کی بہن ہیں۔
    • دوسری جانب الاسکا میں سینیٹ کی دوڑ تاحال غیر یقینی ہے اور وہاں مقابلہ ابھی فیصلہ کن مرحلے میں داخل نہیں ہوا۔ اس نشست کے بارے میں حتمی نتیجہ سامنے نہیں آیا۔

15. 4 نومبر 2026امریکی وسط مدتی انتخابات کے نتائج پر پاکستان سٹاک مارکیٹ میں تیزی، انڈیکس 2600 پوائنٹس سے بڑھ گیا, تنویر ملک، صحافی

    پاکستان سٹاک ایکسچینج میں آج بدھ کے روز کاروبار کے دوران نمایاں تیزی دیکھی گئی اور مارکیٹ انڈیکس میں 2643 پوائنٹس سے زائد اضافہ ریکارڈ کیا گیا، جس کے بعد کے ایس ای ہنڈرڈ انڈیکس 17 ہزار 695 پوائنٹس کی سطح تک پہنچ گیا۔

    سٹاک مارکیٹ میں کاروبار کا آغاز مثبت انداز میں ہوا اور دن بھر انڈیکس میں مسلسل اضافہ دیکھنے میں آیا۔ مارکیٹ تجزیہ کاروں کے مطابق جیسے جیسے امریکی وسط مدتی انتخابات کے نتائج آتے گئے، مارکیٹ میں بھی تیزی آتی گئی۔ تجزیہ کاروں کا کہنا ہے کہ امریکی انتخابات میں ڈیموکریٹس کی کامیابی کو سرمایہ کاروں نے مثبت اشارے کے طور پر لیا، جس نے پاکستانی شیئر مارکیٹ میں خریداری کے رجحان کو تقویت دی۔

    ڈارسن سکیورٹیز کے چیف ایگزیکٹو ملک دل آویز نے بی بی سی اردو سے گفتگو کرتے ہوئے کہا کہ مارکیٹ میں مثبت رجحان کی ایک اہم وجہ عالمی سطح پر خام تیل کی قیمتوں میں کمی بھی ہے۔

    ان کے مطابق امریکی انتخابات کے نتائج کے بعد سرمایہ کاروں میں یہ امید پیدا ہوئی ہے کہ مشرقِ وسطیٰ میں کشیدگی میں کمی اور جنگ کے خاتمے کی جانب پیش رفت کے امکانات بڑھ سکتے ہیں۔

    ملک دل آویز کا کہنا تھا کہ انتخابات کے نتائج کے ساتھ ساتھ ایرانی قیادت کی جانب سے نسبتاً لچکدار رویے کے مظاہرہ بھی سامنے آیا ہیں، جس سے عالمی منڈی میں تیل کی قیمتوں پر دباؤ کم ہوا۔

    ان کے مطابق تیل کی قیمتوں میں کمی اور بین الاقوامی سیاسی صورتحال میں ممکنہ بہتری نے سرمایہ کاروں کے اعتماد کو بڑھایا، جس کا مثبت اثر پاکستان سٹاک ایکسچینج پر بھی دیکھنے میں آیا۔

16. 4 نومبر 2026بریکنگ, مشی گن: عبدل السید کی سینیٹ میں کامیابی کی پیش گوئی

    بی بی سی کے امریکی شراکت دار سی بی ایس کے مطابق عبدل السید کے مشی گن سے سینیٹ کی نشست جیتنے کی پیش گوئی کی گئی ہے۔

    اس سے قبل عبدل السید نے اپنے حامیوں سے خطاب میں کامیابی کا دعویٰ کرتے ہوئے کہا تھا: ’آپ نے ایک ایسے امیدوار پر اعتماد کیا جس کی کامیابی کا امکان سب سے کم سمجھا جا رہا تھا۔۔۔ مشی گن، میں آپ کی خدمت کرنے کا منتظر ہوں۔‘

17. 4 نومبر 2026انتخابی نتائج کے امریکہ اور روس تعلقات پر کیا اثرات مرتب ہو سکتے ہیں؟

    کیا وسط مدتی انتخابات کے نتائج کریملن کے لیے بھی اہمیت رکھتے ہیں؟

    روسی صدر ولادیمیر پوتن کے ترجمان دمتری پیسکوف نے پیر کو بی بی سی روسی سروس کے ایڈیٹر سٹیو روزنبرگ سے بات کرتے ہوئے کہا: ’صدر ٹرمپ اپنی مدت کے اختتام تک صدر رہیں گے اور اپنی خارجہ پالیسی پر عمل کرتے رہیں گے۔‘

    اس پیغام کا مفہوم یہ تھا کہ نتائج کچھ بھی ہوں، ماسکو معمول کے مطابق معاملات جاری رہنے کی توقع کر رہا ہے۔

    اگرچہ صدر ٹرمپ روس کی تمام خواہشات پوری نہیں کر سکے، مثلاً یوکرین کے بارے میں روس کی شرائط پر مبنی کسی حتمی امن معاہدے تک پہنچنا، تاہم ان کی خارجہ پالیسی نے کریملن کے لیے کئی مثبت نتائج ضرور پیدا کیے ہیں۔

    حال ہی میں امریکی صدر نے روس مخالف بعض پابندیاں منجمد کیں، روسی ڈیزل خریدنے پر اتفاق کیا، اور یوکرین کے صدر وولودیمیر زیلینسکی پر تنقید کے معاملے میں وہ ولادیمیر پوتن کے مقابلے میں زیادہ سخت مؤقف اختیار کرتے رہے ہیں۔

    تاہم اس ہفتے کے آغاز میں روسی اخبار نیزاویسیمایا گزیٹا نے پیش گوئی کی تھی کہ اگر ریپبلکنز کانگریس کا کنٹرول کھو دیتے ہیں تو ڈونلڈ ٹرمپ کو ’ڈیموکریٹس کی جانب سے شروع کی جانے والی متعدد تحقیقات میں الجھنا پڑے گا‘ اور یہ ’غیر ممکن نہیں تو مشکل ضرور ہوگا کہ وہ ان پالیسیوں پر عمل درآمد کر سکیں جنھیں وہ درست سمجھتے ہیں، خصوصاً روس سے متعلق پالیسیوں پر۔‘

18. 4 نومبر 2026امریکی عوام نے ’واضح پیغام‘ دے دیا ہے: اوباما

    سابق امریکی صدر براک اوباما، جو ڈیموکریٹ پارٹی سے تعلق رکھتے ہیں، نے کہا ہے کہ ان کی جماعت کی بڑی انتخابی کامیابی اس بات کا ثبوت ہے کہ امریکی عوام تبدیلی چاہتے ہیں۔

    سوشل میڈیا پلیٹ فارم ایکس پر ایک پیغام میں اوباما نے لکھا: ’آج رات امریکی عوام نے ایک واضح پیغام دیا ہے۔ وہ ایسی سیاست چاہتے ہیں جو لوگوں کو تقسیم کرنے کے بجائے متحد کرے، اور ایسے رہنما چاہتے ہیں جو ان مسائل کے عملی حل پیش کریں جن کا انھیں سامنا ہے۔‘

    اوباما نے انتخابی مہم کے دوران مشی گن اور جارجیا جیسی اہم ریاستوں میں متعدد ڈیموکریٹ امیدواروں کی حمایت میں مہم چلائی تھی۔

    انھوں نے مزید کہا: ’اب ہماری ذمہ داری ہے کہ ہم آستینیں چڑھائیں، جہاں ہمارے پاس اختیار ہے وہاں تبدیلیاں لائیں، مزید نقصان کو روکیں اور مستقبل کی بنیاد رکھیں۔‘

19. 4 نومبر 2026آئیڈاہو اور مونٹانا کی سینیٹ نشستیں ریپبلکنز کے پاس برقرار رہنے کی پیش گوئی

    بی بی سی کے امریکی شراکت دار سی بی ایس نیوز کے مطابق آئیڈاہو اور مونٹانا میں سینیٹ کے انتخابات میں ریپبلکن امیدواروں کی کامیابی کی پیش گوئی کی گئی ہے۔

    مونٹانا میں کرٹ آلما کے ریپبلکنز کے لیے کامیاب ہونے کا امکان ظاہر کیا گیا ہے، جبکہ آئیڈاہو میں جم رش اپنی سینیٹ نشست برقرار رکھنے کی جانب بڑھ رہے ہیں۔

20. 4 نومبر 2026بریکنگ, عبدل السید نے کامیابی کا دعویٰ کر دیا، مائیک راجرز بھی پُرامید ’رات طویل ہو سکتی ہے‘

    مشی گن میں ڈیموکریٹ سینیٹ امیدوار عبدل السید نے ابھی اپنے حامیوں سے خطاب کرتے ہوئے ایسے مقابلے میں کامیابی کا دعویٰ کر دیا ہے جس کا نتیجہ تاحال باضابطہ طور پر سامنے نہیں آیا۔

    انھوں نے اپنے حامیوں کا شکریہ ادا کرتے ہوئے کہا: ’مشی گن، میں آپ کی خدمت کرنے کا منتظر ہوں۔‘ عبدل السید نے اپنے حریف کی انتخابی مہم پر بھی تنقید کی اور الزام لگایا کہ ان کی مسلم شناخت اور مذہب کو انتخابی مہم کا مرکزی موضوع بنایا گیا۔

    انھوں نے کہا: ’انھوں نے طویل عرصے میں دیکھی جانے والی بدترین انتخابی مہمات میں سے ایک چلائی۔‘ ان کا کہنا تھا کہ ’مجھ پر میرے نام اور میرے مذہب کی وجہ سے حملے کیے گئے۔‘

    دوسری جانب ریپبلکن امیدوار مائیک راجرز نے اپنے حامیوں سے کہا کہ وہ گھروں کو چلے جائیں کیونکہ ’یہ ایک طویل رات ہونے والی ہے۔‘ تاہم انھوں نے اصرار کیا کہ کامیابی کا راستہ اب بھی موجود ہے۔

    یاد رہے کہ عبدل السید اور مائیک راجرز کے درمیان مقابلے کے مکمل نتائج ابھی سامنے نہیں آئے اور باضابطہ طور پر کسی امیدوار کی کامیابی کی پیش گوئی نہیں کی گئی۔