Ibisasu bya misile z'Aba-Houthi byibasiye Aramco Tower mu murwa mukuru wa Arabiya Sawudite

Inyubako ya Aramco Tower, imwe mu nzu ndende ziherereye mu gice cy'ubucuruzi n'imari rwagati mu murwa mukuru wa Arabiya Sawudite, Riyadh, yatewe n'igitero cyagabwe mu kirere.

Mu itangazo ryasohowe n'ibiro ntaramakuru Saba, biyobowe n'umutwe w'Aba-Houthi, uyu mutwe wemeje ko wagabye igitero ku gace k'ubucuruzi ka Riyadh ku wa gatandatu, n'ubwo utigeze uvuga izina rya Aramco Tower.

Minisiteri y'ingufu ya Arabiya Sawudite yatangaje ko iyo nyubako yangiritseho bike gusa kandi ko nta muntu wapfuye cyangwa ngo habe hari uwakomeretse.

Amashusho yagenzuwe na BBC Verify agaragaza ko inyubako yangiritse cyane kurushaho, aho nibura igorofa imwe igaragara nk'iyangijwe bikomeye n'igisasu cya misile cyangwa indege nto itagira umupilote (drone).

Amadirishya yo ku magorofa arenze imwe na yo yasadutse kubera icyo gitero.

Aba-Houthi bavuga kandi ko ikibuga cy'indege cya Riyadh n'ibigega bibikamo peteroli bya Aramco na byo byagabweho ibindi bitero bitandukanye.

Arabiya Sawudite yo yatangaje ko ubwirinzi bwayo bwo mu kirere bwashoboye gufata no kurasa misile nyinshi mbere y'uko zigera ku ntego zazo.

Ibi bitero ni bimwe mu biheruka uyu mutwe witwaje intwaro ukorera muri Yemen uvuga ko wagabye ku bikorwa remezo biri imbere muri Arabiya Sawudite, igihugu cyakomeje kugorwa no kubihagarika mu mezi ashize.

Ibi byabaye nyuma y'umunsi umwe Aba-Houthi bashinje ihuriro ry'ibihugu riyobowe na Arabiya Sawudite kwica nibura abantu 33, harimo abagore n'abana, mu gitero cy'indege cyagabwe muri Yemen.

Amashusho yatambukijwe na televiziyo Al Masirah, icungwa n'Aba-Houthi, yerekanaga abatabazi bakura imirambo munsi y'ibisigazwa by'inyubako nyinshi mu mujyi wa al-Shariyah, uherereye mu burasirazuba bw'umurwa mukuru Sanaa.

Ibiro ntaramakuru Saba byatangaje ko abantu 39 bakomerekeye muri icyo gitero. Arabiya Sawudite ntiyari yagira icyo ikivugaho.

Ihuriro ry'ibihugu riyobowe na Arabiya Sawudite rimaze imyaka isaga icumi rirwana n'Aba-Houthi mu gushyigikira guverinoma ya Yemen, yamaze gutakaza ububasha ku gice kinini cy'igihugu.

N'ubwo intambara yari yaracogoye mu myaka ishize, imirwano yongeye gukara nyuma y'itangira ry'intambara ya Iran.

Agahenge katari kanditse ku mpapuro karasenyutse muri Nyakanga(7), nyuma y'uko Aba-Houthi bashyizeho icyo bise "gukumira ibikorwa byo mu nyanja" bya Arabiya Sawudite, maze bagatangira kugaba ibitero bya misile na drone ku bibuga by'indege, ibikorwa bya peteroli n'amato atwara peteroli mu nyanja itukura.

Aba-Houthi bavuga ko bari kwihorera ku byo bise gukumirwa kw'uturere bagenzura na Arabiya Sawudite, ndetse no ku gitero cyagabwe ku kibuga cy'indege cya Sanaa, Arabiya Sawudite ikavuga ko cyari kigamije gukumira indege yo muri Iran kukigwaho.

Kuva icyo gihe, imirwano ikomeye yongeye kubura hagati y'ingabo z'Aba-Houthi n'izishyigikiye guverinoma ya Yemen ifashwa na Arabiya Sawudite.

Umuryango w'Abibumbye uvuga ko kuva imirwano yongeye kubura, abarenga 1,600 bamaze kwicwa, naho abarenga 300,000 bo bavuye mu byabo.