Dowladda Yemen oo Xuutiyiinta ku eedeysay inay kaalmo ka heleen Iiraan si ay u helaan hub iyo tiknoolajiyad milatari oo casri ah

Tebin toos ah

1. 31 Oktoobar 2026Hoggaamiyaha sare ee Iiran Mojtaba Khamenei oo amar bixiyey ka dib kulan dhacay

   Bogga rasmiga ah ee hoggaamiyaha ruuxiga ah ee Jamhuuriyadda Islaamiga ah, Mojtaba Khamenei, ayaa sheegay in kulan uu la yeeshay taliyeyaasha ciidamada qalabka sida ee Iiraan uu ku amray inay si degdeg ah uga jawaabaan “hanjabaad kasta oo cadowga ka timaadda, iyaga oo aan ku xaddidnayn xuduud juqraafiyeed”.

   Sida lagu sheegay qoraalka lagu daabacay bogga, wuxuu sidoo kale amray in liiska bartilmaameedyada milatari la cusbooneysiiyo, si hantida Maraykanka iyo Israa’iil ee “maaddiga ah iyo tan aan maaddiga ahayn” ay u noqoto mid ay ciidamada Iiraan gaari karaan.

   Waxaa sidoo kale la soo xigtay hoggaamiyaha Jamhuuriyadda Islaamiga ah oo sheegay in haddii weerar cusub oo milatari ama “argagixiso” ah uu dhaco, Iiraan ay iyadu go’aamin doonto waqtiga iyo shuruudaha lagu soo afjarayo dagaalka.

   Waxaa la sheegay in kulanka ay goob joog ka ahaayeen Sarreeye Guud Cali Cabdullaahi, oo ah madaxa guud ee ciidamada qalabka sida; Sarreeye Guud Amiir Xaatami, taliyaha guud ee ciidanka milatariga; iyo Sarreeye Guud Axmed Vahidi, taliyaha guud ee Ilaalada Kacaanka Islaamiga ah.

   Tan iyo markii aabbihii lagu dilay dagaalkii 40-ka maalmood socday, isla markaana uu isaga kala wareegay hoggaanka Jamhuuriyadda Islaamiga ah, Mojtaba Khamenei laguma arag meel fagaare ah, mana jirto wax cod ama muuqaal ah oo laga sii daayay.

   Sheekooyinka kale ee aad sii akhrin karto:

   Maxay tahay saamaynta ay diyaaradaha dagaalka nooca Su-35 ee Itoobiya ku yeelan karaan dheellitirka awoodda milatari ee Geeska Afrika?

   Saddex Muslimiin ah oo lagu xukumay xabsi daa'in lo' ay qaleen darteed

   Yaa ka dambeeya weerarka lagu jabsaday madasha lagu kala iibsado lacagaha cryptocurrency?

2. 31 Oktoobar 2026Masar oo walaac ka muujisay in waji cusub uu yeesho dagaalka Iran iyo Maraykanka

   Wasiirka Arrimaha Dibadda ee Masar, Badr Abdel Ati, ayaa Sabtidii muujiyay walaac ku aaddan iska horimaadka u dhexeeya Iiraan iyo Mareykanka.

   Wuxuu sheegay inuu "aad uga walaacsan yahay" in mowjad cusub oo sii xumaynaysa dagaalka u dhexeeya Mareykanka iyo Iiraan ay noqon karto mid aad uga sii ba'an, isla markaana yeelan karta cawaaqib xumo weyn.

   Hadalkan ayuu ka jeediyay shir madaxeedka amniga ee "Wadahadalka Manama" oo ka dhacaya dalka Baxreyn.

   Sidoo kale, Mohammad Akraminia oo ah afhayeenka ciidamada Iiraan ayaa ka hadlay suurtagalnimada in Mareykanku uu mar kale weerar ku qaado Iiraan, wuxuuna yiri: "Haddii weerarkani dhaco, juqraafiyadda dagaalku way ballaaran doontaa."

3. 31 Oktoobar 2026Iiraan oo ku hanjabtay in haddii dagaal lagu qaado ay baaxadda juqraafiyeed ee dagaalku ballaaran doonto

   Isaga oo ka hadlayay suurtagalnimada weerar kale oo Maraykanku ku qaado Iiraan, afhayeenka milatariga Iiraan, Maxamed Akraminia, ayaa sheegay in haddii weerarkaasi dhaco, baaxadda juqraafiyeed ee dagaalku ay ballaaran doonto.

   Qoraal uu ku baahiyay barta bulshada ee X ayuu ku yiri:

   “Marka la eego taariikhda madow ee madaxweynaha Maraykanka ee ku aaddan khiyaanada diblomaasiyadda, Ciidanka Jamhuuriyadda Islaamiga ah ee Iiraan, oo aan cadowga ku kalsoonayn isla markaana aan dan ka gelin tallaabooyinkiisa, waxay si joogto ah u kordhinayaan diyaargarowgooda dagaal.”

   Wuxuu intaas sii raaciyay:“Haddii madaxweynaha Maraykanku uu mar kale tallaabo kale oo halis ah ka qaado gobolka, dabka dagaalku shaki la’aan wuxuu ku fidi doonaa dhul ka ballaaran kan hadda, dhammaadka dagaalkana go’aankiisu gacantiisa kuma jiri doono.”

   Hadalladan ayaa imanaya xilli warbaahinta Axios, oo soo xiganaysa ilo diblomaasiyadeed, ay sheegtay in wada-hadallada dhexdhexaadiyeyaasha Qatar ee ku saabsan sidii heshiis looga gaari lahaa dib u bilaabista wada-hadallada tooska ah ee Maraykanka iyo Iiraan ay ka sii socon doonaan magaalada Doha.

   Sheekooyinka kale ee aad sii akhrin karto:

   Maxay tahay saamaynta ay diyaaradaha dagaalka nooca Su-35 ee Itoobiya ku yeelan karaan dheellitirka awoodda milatari ee Geeska Afrika?

   Saddex Muslimiin ah oo lagu xukumay xabsi daa'in lo' ay qaleen darteed

   Yaa ka dambeeya weerarka lagu jabsaday madasha lagu kala iibsado lacagaha cryptocurrency?

4. 31 Oktoobar 2026Wafdi ka socdo Maraykanka oo ku biiray wadahadalada Qadar

   Iyadoo ay weheliyaan warbixinno ku saabsan wadahadallo sii socda oo u dhexeeya wakiillada Iiraan iyo dhexdhexaadiyeyaasha Qadar ee Doha si loo gaaro heshiis ku saabsan dib u bilaabista wadahadallada tooska ah ee Mareykanka, waxaa la sheegay in wafdi Mareykan ah ay sidoo kale ku biiri doonaan wadahadalladan.

   Wargeyska Qadar Al-Arabi Al-Jadeed, oo soo xiganaya ilo ku dhow dhexdhexaadiyeyaasha, ayaa soo sheegay horumarka wadahadallada u dhexeeya Tehran iyo Washington waxayna soo sheegeen in wafdi Mareykan ah ay sidoo kale imaan doonaan Doha si ay "wadahadallo toos ah" ula yeeshaan Iiraan.

   Warkan ayaa yimid ka dib 12 saacadood oo wadahadallo ah oo u dhexeeya dhexdhexaadiyeyaasha Qadar iyo mas'uuliyiinta Iiraan iyo warbixinta shabakadda Axios ee ah in wadahadalladu ay ka socdaan Doha.

   Sida laga soo xigtay Axios, dhexdhexaadiyeyaasha Qadar waxay si joogto ah ula xiriireen Aqalka Cad intii lagu jiray shirkii 12-ka saacadood socday Jimcihii.

   Wariye Barak Ravid oo ka tirsan Axios ayaa soo sheegay, isagoo soo xiganaya ilo diblomaasiyadeed, in kooxda wadaxaajoodka Iiraan ay la safrayaan dhexdhexaadiyeyaasha Qadar duulimaadkooda dib ugu laabashada Doha.

5. 31 Oktoobar 2026Xukuumadda Somaliland oo war ka soo saartay falkii ka dhacay Boorama

   Wasiirka warfaaafinta ee Jamhuuriyadda Iskeed madaxbannaanida ugu dhawaaqday ee Somaliland Barkhad Jamaac Batuun oo warbaahinta dowladda la hadlay ayaa ka hadlay falalkii ka dhacay magaalada Boorama ee lagu beegsaday dadka Itoobiyaanka ah ee ku nool magaaladaaas.

   Wasiir Batuun ayaa sheegay inay si adag u ‘Cambaaraynayaan falka foosha xun ee dad wax maragarato ah oo sumcad dilaya sharafta,xasilloonida, nabadgelyada, horumarka iyo wada noolaashaha bulshada Somaliland iyo dadka ajaanibka ay ka sameeyeen magaalada Boorama ee gobolka Awdal“ ayuu yiri Wasir Barkhad.

   Wasiirku wuxuu intaa raaciyey " falkaasi wuxuu xad-gudub ku yahay xaquuqda aadanaha, raali xukuumad ahaan kama nihin in sharciga cid kastaba faraha ku qaadato, qofka ajaanibka ah soo gelitaanka iyo ka bixintaanka dalka, nabad gelyadiisa, ilaalinta karaamadiisa, dhowrida xuquuqihiisa intaba waxaa masuul ka ah xukuumadda" ayuu yiri.

   Isagoo sii hadlayey wasiirku wuxuu sheegay in Somaliland ay astaan u tahay nabadgelyada Geeska taas oo uu sheegay in ay ku soo dhiiradeen dad badan oo ajaanin ah.

   "Falkaas ka dhacay ee ajaanibka lagu beegsanayo xukuumad ahaan waxaan u arkaynaa fal abaabulan oo lagu dhaawacayo sumcada, sharafta, xasiloonida iyo nabadgelyada Somaliland, sinaba xukuumadu uguma dulqaadanayso in qof ajaanib ah oo dalkan jooga qofina saari karaynin, qofina aanu gacan ula tagi karaynin, hantidiisa taban karaynin, xaqiisa ku xad-gudbi karaynin. "ayuu intaas raaciyey wasiirku.

   Batuun, wuxuu intaas sii raaciyey in tallaabo sharciga waafaqsan ay laamaha ammaanku qaadi doonaan, baarisna la gelindoono.

6. 31 Oktoobar 2026Dowladda Yemen oo Xuutiyiinta ku eedeysay inay kaalmo ka heleen Iiraan si ay u helaan hub iyo tiknoolajiyad milatari oo casri ah

   Dowladda Yemen ayaa Golaha Ammaanka ee Qaramada Midoobay ugu baaqday inuu cambaareeyo weerarrada soo noqnoqday ee kooxda Xuutiyiinta ee Ansarullah ay ku qaadday Garoonka Diyaaradaha Caalamiga ah ee Cadan, isla markaana uu qaado tallaabooyin wax ku ool ah oo lagu ilaalinayo dadka rayidka ah iyo xarumaha rayidka. Dowladda ayaa sidoo kale ku baaqday in la xaqiijiyo dhaqan-gelinta cunaqabateynta hubka.

   Dalabkan waxaa soo jeediyay safiirka Yemen u fadhiya Qaramada Midoobay, Cabdullaahi Al-Saadi, isaga oo warqad u diray madaxweynaha Golaha Ammaanka.

   Sida uu sheegay Al-Saadi, dagaalyahannada Xuutiyiinta ayaa 28-kii Oktoobar gantaallo riddada dheer ku bartilmaameedsaday Garoonka Diyaaradaha Caalamiga ah ee Cadan. Waxa uu sheegay in tani ay ahayd markii lixaad ee garoonka la weeraro bishan.

   Weerarrada ayaa halis geliyay nolosha rakaabka iyo shaqaalaha garoonka, sidoo kalena sababay in dhowr duulimaad loo weeciyo garoomo kale.

   Dowladda Yemen ayaa sheegtay in bartilmaameedsiga garoon diyaaradeed oo rayid ah uu yahay “dambi dagaal iyo khatar toos ah oo ku wajahan nolosha rakaabka, shaqaalaha diyaaradaha iyo shaqaalaha garoonka.”

   Dowladdu waxay sheegtay in beesha caalamku ay tahay inay ka gudubto oo keliya muujinta walaaca iyo cambaareynta, una gudubto tallaabooyin wax ku ool ah oo lagu xaqiijinayo amniga garoomada diyaaradaha rayidka ah, isla markaana lagula xisaabtamayo dadka mas’uulka ka ah weerarrada.

   Waxay arrintan ku sababaysay weerarrada soo noqnoqday ee lagu beegsanayo xarumaha rayidka.

   Sheekooyinka kale ee aad sii akhrin karto:

   Saddex Muslimiin ah oo lagu xukumay xabsi daa'in lo' ay qaleen darteed

   Yaa ka dambeeya weerarka lagu jabsaday madasha lagu kala iibsado lacagaha cryptocurrency?

7. 31 Oktoobar 2026Maraykanka oo oggolaaday qorshe ay muddo sugayeen dal ay saaxiib yihiin

   Maraykanka ayaa oggolaaday in Ukraine laga iibiyo 500 oo gantaal oo ah nooca Patriot, kuwaas oo si weyn loogu baahan yahay difaaca dalkaas, xilli ay sii kordhayaan weerarrada cirka ee Ruushka.

   Hase yeeshee, Madaxweynaha Ukraine, Volodymyr Zelensky, ayaa ka digay in ay qaadan karto “dhowr sano” ka hor inta aan gantaalladaasi la soo gaarsiin dalkiisa.

   Wasaaradda arrimaha dibadda ee Maraykanka ayaa sheegtay in gantaalladan casriga ah ee difaaca cirka, nooca PAC-3, ay ku kacayaan 2.1 bilyan oo doollar, isla markaana kharashkooda ay si buuxda u bixin doonaan xulafada Ukraine ee Yurub iyo Canada.

   Bayaan ay soo saartay Wasaaradda Arrimaha Dibadda ee Maraykanka maalintii Jimcaha ayaa lagu sheegay in “iibkan la soo jeediyay uu taageeri doono siyaasadda arrimaha dibadda iyo ujeeddooyinka amniga qaranka ee Maraykanka, isaga oo kor u qaadaya amniga dal ay saaxiib yihiin, kaas oo door muhiim ah ka qaata xasilloonida siyaasadeed iyo dhaqaale ee Yurub.”

   Habeenkii Jimcaha, Zelensky ayaa mar kale ku celiyay baaqiisa ahaa in Maraykanku uu dedejiyo keenista gantaallada Patriot, kuwaas oo ah hubka keliya ee si wax ku ool ah u soo ridi kara gantaallada riddada dheer ee Ruushka ee waxyeellada ba'an geysta.

   Tallaabadan ugu dambeysay ayaa timid kaddib markii uu muran dhexmaray Zelensky iyo Donald Trump horaantii bishan, xilli Maraykanku uu fududeeyay cunaqabateyntii saarneyd Ruushka, taas oo qayb ka ahayd heshiis lagu xaqiijinayay in Maraykanku helo shidaalka naaftada ee Ruushka.

   Madaxweynaha Maraykanka ayaa sheegay in la joogo waqtigii Ukraine ay yeelan lahayd hoggaamiye cusub, si heshiis loo gaaro oo lagu soo afjaro dagaalka kala dhexeeya Ruushka.

   Moscow ayaa duullaan ballaaran ku qaaday Ukraine bishii Febraayo 2022, kaddib markii ay hore ula wareegtay gobolka Crimea iyo qaybo ka mid ah gobolka Donbas ee bariga Ukraine.

   Xiisadda ayaa yara degtay kaddib markii Zelensky uu 20-kii Oktoobar wada-hadallo magaalada Oslo kula yeeshay ergayada Maraykanka.

   Sheekooyinka kale ee aad sii akhrin karto:

   Saddex Muslimiin ah oo lagu xukumay xabsi daa'in lo' ay qaleen darteed

   Yaa ka dambeeya weerarka lagu jabsaday madasha lagu kala iibsado lacagaha cryptocurrency?

8. 31 Oktoobar 2026War cusub oo ay hadda shaaciyeen Isbahaysiga milatari ee Sacuudigu hoggaamiyo

   Afhayeen u hadlay isbahaysiga milatari ee uu Sacuudigu hoggaamiyo ayaa ku dhawaaqay in diyaarad aan duuliye lahayn (drone) lagu qabtay laguna burburiyay hawada magaalada Riyadh, caasimadda dalkaas.

   Afhayeenka isbahaysiga, Turki Al-Maliki, ayaa bartiisa X ku qoray in nidaamka difaaca cirka uu qabtay oo burburiyay “diyaarad aan duuliye lahayn oo cadow ah” oo ku sugneyd hawada gobolka Riyadh.

   Waxa uu intaas ku daray in haraadiga diyaaradda ay ku soo dhaceen aaggaas kaddib markii la burburiyay, balse aanay wax khasaare ah geysan.

   Dhowr saacadood ka hor, Turki Al-Maliki ayaa ku dhawaaqay in laba diyaaradood oo kale oo aan duuliye lahayn lagu soo riday gobollada bariga iyo koonfurta Sacuudiga.

9. 31 Oktoobar 2026Xog cusub oo ku saabsan khasaaraha Iiraan gaarsiisay saldhigyada Maraykanka ee Bariga Dhexe

   Wargeyska The Wall Street Journal ayaa qoray in, sida ku cad qiyaasaha wasaaradda difaaca Maraykanka, weerarrada gantaallada iyo diyaaradaha aan duuliyaha lahayn ee Iiraan ay ku qaadday saldhigyada milatari ee Maraykanka ee Bariga Dhexe ay sababeen khasaare gaaraya ugu yaraan shan bilyan oo doollar, isla markaana tiradaasi ay gaari karto 15 bilyan oo doollar.

   Sida uu wargeysku sheegay, saldhigyada Maraykanka ee ku yaalla Kuweyt iyo Baxrayn ayaa ka mid ahaa goobihii uu burburka xooggan soo gaaray marxaladihii hore ee dagaalka.

   The Wall Street Journal ayaa sidoo kale sheegay in weerarrada Iiraan ay waxyeello gaarsiiyeen 274 goobood oo milatari oo Maraykanku ku leeyahay toddoba dal oo kala duwan. Kharashka dib-u-dhiska goobaha burburay oo keliya ayaa la filayaa inuu ka bato afar bilyan oo doollar.

   Wargeysku waxa uu intaas ku daray in Pentagon-ku uu bixiyay xog kooban oo ku saabsan baaxadda khasaaraha ka dhashay weerarrada lagu qaaday saldhigyada Maraykanka, isla markaana sawirrada dayax-gacmeedyada laga yaabo inaanay muujin dhammaan burburka dhacay.

   Qiyaastii ugu dambeysay ee kharashka dagaalka Maraykanka uu kula jiro Iiraan ayaa kor u dhaafaysa 47 bilyan oo doollar, hase yeeshee tiradaasi kuma jiraan khasaaraha soo gaaray saldhigyada milatari.

10. 31 Oktoobar 2026Putin oo soo saaray digniin adag kana digay dagaal

    Madaxweynaha Ruushka, Vladimir Putin, ayaa sheegay in Moscow ay taageersan tahay tallaabo kasta oo lagu soo celinayo xiriirka dalalka Yurub, balse haddii uu dagaal dhexmaro Ruushka iyo Yurub aanay jiri doonin cid guulaysata.

    Putin oo suxufiyiinta la hadlay, kaddib markii uu martigeliyay shir madaxeed ay ka qayb galeen hoggaamiyeyaal Afrikaan ah, ayaa sheegay in Ruushku diyaar u yahay dagaal suurtagal ah oo uu la galo Yurub, balse aanu doonayn in iska horimaadkaasi dhaco.

    “Waxaan taageersan nahay tallaabo kasta oo lagu soo celinayo xiriir buuxa oo macno leh oo aan la yeelanno dalalka Yurub,” ayuu yiri.

    Putin ayaa intaas ku daray: “Waan diyaar sanahay, balse ma doonayno dagaal aan la galno Yurub. Haddii cid doonayso dagaal, waa inay isu diyaarisaa. Hase yeeshee, ilaa hadda ma aysan gaarin hadafkoodii ahaa inay Ruushka kaga adkaadaan dhinaca istaraatiijiyadda. Haddii xaaladdu meel fog gaarto, cid guulaysan doonta ma jiri doonto, waana inaan arrintaas la illoobin.”

    Madaxweynaha Ruushka ayaa sidoo kale ka hadlay wada-hadallo dhanka taleefanka ah oo toddobaadkan uu la yeeshay Madaxweynaha Finland, Alexander Stubb, iyo Ra'iisul Wasaaraha Norway, Jonas Gahr Støre.

    Waxa uu sheegay in labada hoggaamiye ay qaateen go'aan sax ah markii ay xiriir la sameeyeen Moscow, inkasta oo ay dhaleeceyn kala kulmeen qaar ka mid ah dalalka Yurub.

    Putin ayaa intaas ku daray in Ruushku aanu doonayn wax caqabad ah oo ku yimaadda isu-socodka maraakiibta ee Badda Baltic-ga.

11. 30 Oktoobar 2026Sidee Kiribto looga dhigaa lacag caadi ah?

    Dadka taageera lacagaha digital-ka ah waxay sheegaan in aysan jirin hay’ad maaliyadeed oo dhexe oo maamusha xorriyadeeda dhaqaale.

    Iyadoo hadda ay socdaan dadaalka lagu baadigoobayo lacagaha kiribto ee laga xaday Binance, baarayaashu waxay si gaar ah ula socon doonaan xaalad kasta oo lacagahaas loogu beddelayo lacagaha caadiga ah. Marka lacagaha kiribto ay gasho nidaamka maaliyadeed ee dunida waxay taasi fursad muhiim ah siineysaa hay’adaha baarista sameeya in ay qaadaan tallaabo.

    Habka lacagta kiribto loogu beddelo lacag caadi ah waxaa loo yaqaan Off-ramping. Habka ka soo horjeeda ee lacagta caadiga looga dhigayo kiribtana waxaa loo yaqaan On-ramping.

    Adeegyada maaliyadeed, sidaVisa iyo Mastercard, ama suuqyada lagu kala iibsado lacagaha kiribto sida Coinbaseiyo Binance ayaa Sameeya kala iibsiga lacagtan.

    Adeegyada kiribto loogu badalayo lacag caadi ah iyo kuwa lacagta caadiga looga dhigayo kiribto waa muhiim marka la fiiriyo dhowr sababood. Mid ka mid ah sababaha ugu waaweyn ayaa ah in ay dadka cusub u fududeeyaan in ay isticmaalaan lacagaha kiribto, halkii ay lacagahaasi ku ekaan lahaayeen koox kooban.

    Sidoo kale sii akhri wararkan

    Iraan oo carruurta iskuullada ku tababaraysa isticmaalka hubka, ka dibna lambar siinaysa mid kasta

    Waa kuma Jeneraalkan seddexda jeer ka badbaaday dhimashada ee mar ka mid ahaa askartii Soomaaliya loo diray

    Wadaad Islaami ah oo muran badan dhaliyay oo lagu toogtay Nigeria

    Ruushku ma wuxuu soo saaray hub cusub oo beddelaya Dayaaradaha is qarxiya ee Shahed

12. 30 Oktoobar 2026Dagaalka Bariga Dhexe ayaa kordhiyay faa’idada ay heleen shirkadaha tamarta

    Shirkadda weyn ee tamarta ee laga leeyahay Britain, BP, ayaa ku dhawaaqday in faa’idadeeda ay afar jibbaarantay afartii bilood ee u dambeeyay sanadkan. Shirkadda ayaa sheegtay in faa’idadan la helay kaddib dagaalkii Bariga Dhexe ee carqaladeeyay sahayda kaas oo sidoo kale sababay in qimaha uu si weyn kor ugu kaco.

    Sida lagu sheegay war-saxaafadeed ay shirkaddu soo saartay, faa’idada shirkadda kaddib markii la bixiyay canshuuraha ayaa gaartay 4.7 bilyan oo dollar intii u dhexeysay bilihii Luulyo iyo Sebtembar. Halka isla muddadaas sanadkii hore ee 2025-kii ay ahayd ku dhowaad 1.16 bilyan oo dollar.

    Shirkadda Mareykanka ee ExxonMobil, oo ka shaqeysa shidaalka iyo gaaska, ayaa iyaduna ku dhawaaqday in faa’idadeeda afartii bilood ee u dambeyay sanadkan ay laba jibbaarantay taas oo ka timid kororka qiimaha shidaalka iyo dakhliga kale ee laga helay iibka waxyaabaha laga soo saaro batroolka, kaddib dagaalkii Mareykanka iyo Iran.

    Faa’idada shirkadda ayaa gaartay 15.4 bilyan oo dollar, halka isla muddadaas sanadkii hore ay ahayd 7.5 bilyan oo dollar.

    Sida lagu sheegay warbixinta, celceliska qiimaha shidaalka rubucii saddexaad ee sanadkan ayaa gaaray ku dhowaad 85 dollar halkii foosto, taas oo ku dhowaad saddex meelood meel ka sarreysay celceliskii qiimaha shidaalka ee isla muddadaas sanadkii hore ee 2025.

    Sidoo kale sii akhri wararkan

    Maxaan ka ognahay falalka lagu beegsanayo Oromada ee ka dhacay Boorama?

    Turkiga iyo Qadar miyaa ku lu leh doorashada Israa'iil?

    Sida baraha bulshadu ay u noqdeen shidaal sii ololinaya dagaalka ka socda Mooyaale

13. 30 Oktoobar 2026Imaamka salaadda Jimcaha Tehran ayaa ku baaqay in dalku yeesho hub nukliyeer ah

    Mohammad Javad Haj Ali Akbari oo ah imaamka ku-meelgaarka ah ee salaadda Jimcaha magaalada Tehran ayaa ku baaqay in dib-u-eegis lagu sameeyo siyaasadda nukliyeerka Jamhuuriyadda Islaamiga ah ee Iran, isla markaana loo dhaqaaqo sidii dalkaasi u yeelan lahaa hub nukliyeer ah, isaga oo qiil uga dhigay in arrintani ay hadda noqotay “baahi qaran”.

    Khudbaddii salaadda Jimcaha ee uu ka jeediyay Jaamacadda Tehran, ayuu ku sheegay in sida ay muujinayaan ra'yi-ururinno dhowaan la sameeyay, “70 boqolkiiba dadku waxay taageersan yihiin in wax laga beddelo siyaasadda nukliyeerka dalka”. Hase yeeshee, ma uusan sheegin halka laga soo xigtay ra'yi-ururintaas.

    Haj Ali Akbari ayaa khubarada ka codsaday in ay soo diyaariyaan soo-jeedimahooda, iyaga oo la kaashanaya hay'adaha ay arrintani khuseyso, kaddibna u gudbiyaan Mojtaba Khamenei si uu go'aanka kama dambaysta ah uga gaaro.

    Waxa uu sidoo kale sheegay in dirista dhexdhexaadiyeyaasha iyo waraaqaha uu Mareykanku soo dirayo aysan yareyn doonin khatarta ah in dagaalku dib u qarxo.

    Waxa uu carrabka ku adkeeyay in la fuliyo toddobada shuruudood ee Iran u dejisay dhimista xiisadda iyo dib u furista marin-biyoodka istaraatiijiga ah ee Hormuz.

    Sidoo kale sii akhri wararkan

    Ruushku ma noqon karaa dhexdhexaadiye ay ku kalsoon yihiin Eritrea iyo Itoobiya, muxuuse u dhex galayaa labadan dal

    Waxyaabaha ka dambeeya colaadda ka taagan Mooyaale

    Sida baraha bulshadu ay u noqdeen shidaal sii ololinaya dagaalka ka socda Mooyaale

14. 30 Oktoobar 2026Mareykanka ayaa xatooyo ku soo eedeeyay labo qof oo Kenya u dhalatay

    Wasaaradda Caddaaladda Mareykanka ayaa sheegtay in ay ogaatay shabakad weyn oo xatooyo ku sameysay gargaarka ardayda la siiyo. Shabakadda oo lala xiriirinayo muwaadiniin Kenyan ah ayaa la sheegay in ay lunsatay malaayiin doolar oo loogu talagalay in lagu caawiyo ardayda Mareykanka.

    Ku xigeenka Xeer Ilaaliyaha Guud ee Mareykanka, Colin McDonald, ayaa sheegay in Waaxda la dagaallanta wax-isdaba-mareynta oo kaashaneysa hay'adaha kale ee dowladda ay booqasho ku tageen Kenya bishii Sebtembar ee sanadkan, waxayna qabteen in ka badan $750,000 oo laga helay akoon Kiribto ah oo uu leeyahay muwaadin Kenyan ah oo la sheegay in uu xiriir la leeyahay shabakadda.

    “Tani waa markii ugu horeysay taariikhda in hanti qaali ah oo noocaan ah lagu qabto meel ka baxsan Mareykanka oo ay qabteen Unugga la dagaallama xatooyada" ayuu yiri Colin McDonald.

    McDonald wuxuu sheegay in laba qof oo Kenyan ah oo ku kala nool gobollada Nebraska iyo New Jersey ay ka mid yihiin shanta qof ee la tuhunsan yahay kuwaas oo wajahaya dacwado ku saabsan shabakadda khiyaanada sameysay.

    Labada qof ayaa la sheegay in ay ku lug lahaayeen abuurista akoonno been abuur ah oo lagu codsado gargaarka ardayga iyagoo adeegsanaya macluumaadka aqoonsiga ee laga xaday muwaadiniinta Mareykanka.

    Wasaaraddu waxay sheegtay in khiyaanada lagu ogaaday baaritaan qaran kaas oo lagu helay shabakad la sheegay in ay ku lug lahayd khiyaanada iyadoo adeegsaneysa laga soo bilaabo 2021-dii nidaamka gargaarka maaliyadeed ee ardayda ee dowladda.

    Sida laga soo xigtay Wasaaradda Caddaaladda, tuhmanayaashu waxay xadeen macluumaadka aqoonsiga muwaadiniinta Mareykanka, waxayna u isticmaaleen in ay furaan akoonno been abuur ah iyagoo ka diiwaangelinaya arday aan jirin ee kulliyado iyo machadyada tacliinta sare.

    Sidoo kale sii akhri wararkan

    Iraan oo carruurta iskuullada ku tababaraysa isticmaalka hubka, ka dibna lambar siinaysa mid kasta

    Waa kuma Jeneraalkan seddexda jeer ka badbaaday dhimashada ee mar ka mid ahaa askartii Soomaaliya loo diray

    Wadaad Islaami ah oo muran badan dhaliyay oo lagu toogtay Nigeria

    Ruushku ma wuxuu soo saaray hub cusub oo beddelaya Dayaaradaha is qarxiya ee Shahed

15. 30 Oktoobar 2026Xatooyada lacagaha kirbto ayaa il dhaqaale oo weyn u ah dowladda Kuuriyada Waqooyi

    Shaqsiyaad dhowr ah oo si hoose ula socda lacagaha digitalka iyo falanqeeyayaal ayaa farta ku fiqaya kooxo xiriir la leh Pyongyang , kuwaas oo lagu tuhunsan yahay in ay ka dambeeyeen weerarka wax lagu jabsaday.

    Waxaa xusid mudan in dambiyada internetka ee ay taageerto dowladda Kuuriyada Waqooyi ay sannadihii u dambeeyay si weyn diiradda u saarayeen xatooyo aad u weyn oo lagu sameeyo lacagaha Kiribto.

    Dowladda Kuuriyada Waqooyi ayaa marar badan lagu eedeeyay in lacagaha kiribto ee la xaday u isticmaasho sidii ay ugu noqon laheyd il dhaqaale oo ay ku maalgeliso barnaamijyadeeda hubka.

    Sannadkii 2025-kii, waxaa la rumaysan yahay in jabsadayaasha internetka ee Kuuriyada Waqooyi ay xadeen ugu yaraan 2.02 bilyan oo dollar oo lacagaha kiribto ah, sida ay sheegeen khubaradu. Xatooyada lacagaha kiribto waxay u badan tahay in ay ka mid tahay ilaha ugu weyn ee dhaqaale ee ay dowladdu daqli ka hesho.

    Sidaas darteed, haddii khasaaraha la xaqiijiyo, tani waxay noqon doontaa dhacdo aan hore loo arag marka la eego baaxadda weyn ee xatooyada la diiwaangeliyey.

    Dhacdadan ayaa sidoo kale cadaadis dheeraad ah saari doonta shirkadaha iyo guud ahaan kuwa ka shaqeeya kiribto, si ay u xoojiyaan difaacooda amni, ugana hortagaan weerarrada laga soo qaado internetka.

    Sidoo kale sii akhri wararkan

    Ruushku ma noqon karaa dhexdhexaadiye ay ku kalsoon yihiin Eritrea iyo Itoobiya, muxuuse u dhex galayaa labadan dal

    Waxyaabaha ka dambeeya colaadda ka taagan Mooyaale

    Sida baraha bulshadu ay u noqdeen shidaal sii ololinaya dagaalka ka socda Mooyaale

16. 30 Oktoobar 2026Kuwa internetka jabsada ayaa lacagaha ay xadaan kun jeer sii kala dira

    Welwelka ugu weyn ee ay hadda qabaan dadka isticmaala shirkadda Binance iyo guud ahaan shirkadaha kale ee lacagaha kiribto ayaa ah in Binance ay dhab ahaantii awood u yeelan doonto iyo in kale in ay bixiso lacagta badan ee la xaday.

    Xatooyadan ayaa degdeg u dhacday balse dadaallada lagu soo ceshanayo lacagaha la xaday waxay socon karaan muddo aad u dheer.

    Joe Hancock, oo ah madaxa khatarta amniga internetka iyo baaritaannada adag ee shirkadda qareennada ee Mishcon de Reya, ayaa sheegay in habka lacagaha laysu dabamariyo uu muddo qaato”.

    Khabiir ku takhasusay amniga internetka ayaa sheegay in Binance ay durba ku guulaysatay in ay joojiso ku dhowaad kala bar lacagtii la xaday si aan mar kale loo wareejin. Hase yeeshee, wuxuu sheegay in ay adag tahay in lacag kale la helo.

    Shirkadda ayaa hore u sheegtay in ay ku guulaysatay in ay xannibto hanti qiimaheedu gaarayo ku dhowaad 3 bilyan oo dollar.

    Jake Moore, oo ah la-taliyaha guud ee amniga internetka ee shirkadda ESET, ayaa BBC-da u sheegay in kooxaha internedka jabsada ay isku dayi doonaan in ay abuuraan marin-habaabin, isla markaana lacagihii ay xadeen ugu beddelaan noocyo kale oo lacagaha kiribto, iyagoo adeegsanaya hab loo yaqaan “Washing” (dhaqidda lacagaha).

    Khabiirka wuxuu kaloo sheegay in tuugada ay lacagta kumanyaal jeer kala wareejin doonaan iyagoo adeegsanaya farsamooyin kala duwan, si ay u qariyaan halka lacagtu ka timid, una adkeeyaan ama uga dhigaan wax aan suurtagal ahayn in la raadraaco.

    Sidoo kale sii akhri wararkan

    Ruushku ma noqon karaa dhexdhexaadiye ay ku kalsoon yihiin Eritrea iyo Itoobiya, muxuuse u dhex galayaa labadan dal

    Waxyaabaha ka dambeeya colaadda ka taagan Mooyaale

    Sida baraha bulshadu ay u noqdeen shidaal sii ololinaya dagaalka ka socda Mooyaale

17. 30 Oktoobar 2026Sidee loo ilaalin kaaa lacagta digitaalka ee aad maalgashatay?

    Shirkadda Binance ayaa u sheegtay maalgashatada in ay dabooli doonto dhammaan khasaaraha ka dhashay weerarka internetka, waxayna u xaqiijisay ganacsatada in lacagahoodu ammaan yihiin.

    Laakiin, sidee ayaad lacagtaada u ilaalin kartaa? Haddii aad tahay qof si gaar ah u maalgashta lacagaha dijitaalka, adigoon isticmaalin suuq si weyn loo aamini karo.

    Hay'adda maamulka Adeegyada Maaliyadeed ee UK ayaa nidaamisa shirkadaha bixiya adeegyada maaliyadeed. Hase yeeshee, hay'addu waxay ka digaysaa in “inta badan hawlaha la xiriira lacagaha kiribto aysan ku jirin nidaam sharciyeed oo lagu maamulo.”

    Waxay intaas ku dartay in qiimaha lacagaha kiribto ay inta badan si weyn isu beddellaan, isla markaana ay u nugul yihiin isbeddello degdeg ah oo suuqa ka dhaca iyo weerarrada internetka. Waxay bixisay digniin cad oo ah haddii “aad go'aansato in aad maalgashato lacagaha kiribto, waa in aad diyaar u noqotaa in aad lumiso dhammaan lacagtaada.”

    Hay’adu waxay soo jeedisay in aad meelo kala duwan maalgashato halkii aad hal meel waxaaga oo dhan isugu geyn laheyd.

    Maalgashatada ayaa lagula taliyay in ay sidoo kale feejignaadaan si ay u ogaadaan khiyaanooyinka internetka, sida farriimaha qoraalka ah ee aan la codsan. Waa in ay hubiyaan in cinwaannada bogagga internetka (URLs) ay yihiin kuwo sax ah oo la isku halayn karo, isla markaana aysan ku kadsoomin qorshayaasha dadka loogu ballanqaado in ay si degdeg ah taajir ku noqonayaan.

    Sidoo kale sii akhri wararkan

    Ruushku ma noqon karaa dhexdhexaadiye ay ku kalsoon yihiin Eritrea iyo Itoobiya, muxuuse u dhex galayaa labadan dal

    Waxyaabaha ka dambeeya colaadda ka taagan Mooyaale

    Sida baraha bulshadu ay u noqdeen shidaal sii ololinaya dagaalka ka socda Mooyaale

18. 30 Oktoobar 2026Suuqa lacagaha digitalka ayaa qarka u saaran in la jabsado

    Shirkadda lacagaha dijitaalka ee lagu magacaabo Binance ayaa sheegtay in $6.3 bilyan oo doolar ay saameysay waxa noqon kara jabsigii ugu weynaa taariikhda ee soo mara shirkadan weyn.

    Binance waxay sheegtay in kala bar hantidaas la joojiyay balse in badan waxay ku jirtaa gacmaha kuwa internetka wax ka jabsada, waxayna intaas ku dartay in dhammaan wixii khasaaaha “la xalin doono”.

    Sida ay Binance sheegtay, baaritaanno hore ayaa muujinaya in Labtop uu injineer lahaa laga soo weeraray sidaasina ay kuwa wax jabsada ula baxeen hanti aan loo fasaxin.

    Binance si toos ah ugama jawaabin su'aalaha BBC ee ku saabsan xiriirka suurtagalka ah ee dhacdadan la leedahay Kuuriyada Waqooyi, laakiin waxay sheegeen, "Waxaan si dhow ula shaqeyneynaa ciidamada ammaanka si loo xaqiijiyo in la aqoonsado dambiilayaashan oo aan horkeenno caddaaladda."

    Ilaa iyo hadda qiimaha kiribto hoos uma dhicin maadama hanti badan la xayiray sidoo kalena ay socdaan baaritaano.

    Shirkadaha kale ee lacagta digitalka ayaa xayiraado sameyay si loo yareeyo khatarta haddii ay tahay jabsi ballaaran.

    Binance waxay sheegtay in ay qaadan karto ilaa 45 saacadood ka hor inta aysan qaadin xayiraadda wax walba saaran.

    Laba bilood ka hor, koox ka kooban 100 shirkadood oo tiknoolajiyadeed ayaa saxiixay warqad furan oo dunida uga digaysa in ay isu diyaariso xilli cusub oo ku saabsan difaaca dhanka internetka.

    Sidoo kale sii akhri wararkan

    Iraan oo carruurta iskuullada ku tababaraysa isticmaalka hubka, ka dibna lambar siinaysa mid kasta

    Waa kuma Jeneraalkan seddexda jeer ka badbaaday dhimashada ee mar ka mid ahaa askartii Soomaaliya loo diray

    Wadaad Islaami ah oo muran badan dhaliyay oo lagu toogtay Nigeria

    Ruushku ma wuxuu soo saaray hub cusub oo beddelaya Dayaaradaha is qarxiya ee Shahed

19. 30 Oktoobar 2026IRNA ayaa xaqiijisay wafdi Qatar ka socdo oo soo gaaray Tehran

    Waakaaladda wararka Jamhuuriyadda Islaamiga Iran ee IRNA ayaa xaqiiisay in wafdiga ka socday Qatar ay soo gaareen caasimadda Tehran saakay oo jimco aheyd iyagoo wadahadallo la leh mas’uuliyiinta Iran.

    Sida laga soo xigtay IRNA, wafdiga ayaa waxaa hoggaaminaya lataliyaha sare ee raysalwasaaraha iyo wasirka arrimaha dibadda Qatar. Waxaa la qorsheynayaa in ay ka hadlaan xiriirka labada dhinac iyo horumarka gobolka.

    Wakaaladda wararka ee Reuters ayaa hore u sheegtay, iyadoo soo xiganeysa mas’uul xog-ogaal ah, in dhexdhexaadiyeyaal reer Qatar ah ay u safrayaan Tehran iyagoo kaashanaya Washington, taas oo qayb ka ah dadaallada lagu doonayo in heshiis lagu kala dhex dhigo Iran iyo Mareykanka.

    IRNA warbixinteeda kuma xusin doorka ay wafdigan ku yeelan karaan wadahadallo suurtagal ah oo dhex mara Iran iyo Mareykanka.

    Sidoo kale sii akhri wararkan

    Iraan oo carruurta iskuullada ku tababaraysa isticmaalka hubka, ka dibna lambar siinaysa mid kasta

    Waa kuma Jeneraalkan seddexda jeer ka badbaaday dhimashada ee mar ka mid ahaa askartii Soomaaliya loo diray

    Wadaad Islaami ah oo muran badan dhaliyay oo lagu toogtay Nigeria

    Ruushku ma wuxuu soo saaray hub cusub oo beddelaya Dayaaradaha is qarxiya ee Shahed

20. 30 Oktoobar 2026Reuters: Booqashada maanta ay dhexdhexaadiyeyaasha Qatar ku tagayaan Tehran

    Wakaaladda wararka ee Reuters ayaa soo xigatay mas’uul sheegaya in dhexdhexaadiyeyaasha Qatar ay Jimcaha mar kale u safri doonaan magaalada Tehran, si ay qayb uga noqdaan dadaallada lagu doonayo in heshiis laga dhex gaaro Mareykanka iyo Iran.

    Mas’uulka oo xog-ogaal u ah wadaxaajoodyada ayaa Reuters u sheegay in wadahadallada uu isku dubbaridayo Mareykanka.

    Wuxuu sheegay in wafdi ka socda Qatar uu booqashadii uu Axaddii, 25-kii October, ku tagay Tehran u gudbiyay Iran qabyo-qoraal qorshe nabadeed.

    Hase yeeshee, mas’uul sare oo Iiraani ah ayaa soo jeedintaas ku tilmaamay mid aan la aqbali karin, isagoo sheegay in Tehran ay ku adkeysan doonto mowqifkeeda ku aaddan barnaamijkeeda nukliyeerka.

    Washington ayaa dooneysa in arrimaha nukliyeerka lagu daro ajandaha wadaxaajoodyada laga bilaabo bilowgooda.

    Dhanka kale, Tehran waxay ku adkeysanaysaa in marka hore Mareykanku uu joojiyo go’doominta dekedaha Iran, isla markaana uu qaado cunaqabateynta saaran dhoofinta shidaalka dalkaas.

    Wasiirka Arrimaha Dibadda Iran, Abbas Araqchi, ayaa Arbacadii sheegay in Tehran ay xiriir dhow la leedahay dhexdhexaadiyeyaasha, si loo raadiyo qaab lagu dhaqan gelin karo qorshaha toddobada maalmood ah ee ay Iran soo jeedisay, kaas oo lagu soo afjarayo dagaalka.

    Madaxweynaha Mareykanka, Donald Trump, ayaa shalay ka jawaabay warar ay warbaahinta Mareykanku ka qortay wada-hadallo dhexmaray madaxweyne ku-xigeenkiisa JD Vance iyo Iran. Wuxuu sheegay in wada-hadalladaasi ay ku saabsanaayeen sidii loo gaarsiin lahaa Iran qalab caafimaad.

    Hase yeeshee, warbaahinta Mareykanka ayaa xiriirisay wada-hadalladaas dadaallada dib loogu bilaabayo wadahadallada nabadda.

    Sidoo kale sii akhri wararkan

    Iraan oo carruurta iskuullada ku tababaraysa isticmaalka hubka, ka dibna lambar siinaysa mid kasta

    Waa kuma Jeneraalkan seddexda jeer ka badbaaday dhimashada ee mar ka mid ahaa askartii Soomaaliya loo diray

    Wadaad Islaami ah oo muran badan dhaliyay oo lagu toogtay Nigeria

    Ruushku ma wuxuu soo saaray hub cusub oo beddelaya Dayaaradaha is qarxiya ee Shahed