உணவுகள் மூலம் சருமம் முதுமையடையாமல் தடுக்க முடியுமா? கடைபிடிக்க வேண்டிய 6 பழக்கங்கள்

வயதாவதற்கான அறிகுறிகளைத் தடுக்க வேண்டும் என்பதில் நாம் அதிக கவனம் செலுத்தும் சமூகமாக இருக்கிறோம். பிரிட்டனில் போடாக்ஸ் சந்தை 2031ஆம் ஆண்டுக்குள் கிட்டத்தட்ட 295 மில்லியன் பவுண்டுகளை எட்டும் எனக் கணிக்கப்பட்டுள்ளது.

மேலும், யூகவ் (YouGov) சமீபத்தில் வெளியிட்ட வயதாவதைத் தடுப்பது தொடர்பான அறிக்கையின்படி, நம்மில் 28 சதவிகிதம் பேர் இளமையாகத் தோற்றமளிப்பதற்காக சருமப் பராமரிப்புப் பொருட்கள் மற்றும் ஊட்டச்சத்து மாத்திரைகளுக்கு மாதந்தோறும் 25 பவுண்டுகளுக்கும் அதிகமாகச் செலவிடுகின்றனர்.

ஆனால், சருமப் பராமரிப்புக் கிரீம் அல்லது சீரம் பயன்படுத்துவதற்கு இணையாக, உணவுப் பழக்கத்தை மாற்றுவதன் மூலமும் பலன் கிடைக்குமா?

நமது சருமம் முதிர்ச்சியடைவதற்குக் காரணம் என்ன?

வயதாகும்போது சருமம் முன்பிருந்ததைவிட குறைவான பொலிவுடனும், மிருதுவாகவும், உறுதித்தன்மை குறைந்தும் தோன்றுவது இயல்பானது.

இதற்கு ஒரு காரணம், 20 வயதுகளின் நடுப்பகுதியிலிருந்து சருமத்துக்கு கட்டமைப்பையும் வலிமையையும் வழங்கும் புரதமான கொலாஜன், உடலால் மீண்டும் உற்பத்தி செய்யப்படும் வேகத்தைவிட அதிக வேகத்தில் சிதையத் தொடங்குவதுதான். இதனால், நமது சருமத்தின் தடிமனும் வலிமையும் ஆண்டுக்கு சுமார் 1.5 சதவிகிதம் என்ற விகிதத்தில் குறைகின்றன.

ஆனால், பிற காரணிகளும் சருமத்தில் தாக்கத்தை ஏற்படுத்துகின்றன என்கிறார், தோல் மருத்துவரும் ஊட்டச்சத்து நிபுணருமான திவி மருதப்பு. மரபியல் காரணிகள், சூரிய ஒளியால் ஏற்படும் பாதிப்பு, காற்று மாசுபாடு ஆகியவற்றுடன் நாம் உண்ணும் உணவும் சருமத்தின் நிலையைத் தீர்மானிப்பதில் பங்கு வகிக்கிறது.

உணவுமுறை நமது சருமத்தை எவ்வாறு பாதிக்கிறது?

நாம் உண்ணும் உணவே நம்மை உருவாக்குகிறது என்று சொல்வார்கள். சில நேரங்களில், அதன் தாக்கம் நமது முகத்திலேயே வெளிப்படும்.

உதாரணமாக, அதிகப்படியான சுத்திகரிக்கப்பட்ட சர்க்கரையை உட்கொள்வது, 'சர்க்கரையால் ஏற்படும் சருமத் தளர்வு' என்று அழைக்கப்படும் பாதிப்பை ஏற்படுத்தக்கூடும் என்கிறார் மருத்துவர் மருதப்பு.

இது 'கிளைகேஷன்' என்றும் அழைக்கப்படுகிறது. பிரக்டோஸ் மற்றும் குளுக்கோஸ் போன்ற சர்க்கரைகள், கொலாஜன் போன்ற புரதங்களுடன் வினைபுரிந்து, செல்களின் செயல்பாட்டில் பாதிப்பை ஏற்படுத்தும் நிகழ்வே கிளைகேஷன் ஆகும்.

"இது சருமத்தில் உள்ள கொலாஜனை மிகவும் இறுக்கமானதாக மாற்றுகிறது. அப்படி நிகழும்போது, சருமம் முன்பிருந்த நிலைக்குத் திரும்பும் தன்மையை இழக்கிறது" என்று அவர் விளக்குகிறார்.

இதன் விளைவு? சுருக்கங்கள்.

அதேவேளையில், அதிக அளவில் பதப்படுத்தப்பட்ட சிவப்பு இறைச்சி மற்றும் வறுத்த உணவுகளை உட்கொள்வது, சருமப் பொலிவின்மை, ரோசாசியா எனப்படும் சருமப் பாதிப்பு, முகப்பரு மற்றும் மஞ்சள் நிறம் கலந்த சருமத் தோற்றம் போன்ற பிற பிரச்னைகளுக்குக் காரணமாக இருக்கலாம் என்கிறார் மருத்துவர் மருதப்பு.

"அதிக அளவில் பதப்படுத்தப்பட்ட உணவுகள் பொதுவாக குடல் ஆரோக்கியத்துக்கு நல்லதல்ல. குடலின் செயல்பாடு சீர்குலையும்போது, அது சருமத்தில் அழற்சி அதிகரிப்பதற்குப் பங்களிக்கலாம். இது சருமம் வயதடையும் செயல்முறையை விரைவுபடுத்தும். இதற்கு 'இன்ஃபிளமேஜிங்' (அழற்சியுடன் கூடிய முதுமை) என்று பெயர்."

வேலை முடிந்து வழக்கமாக அருந்தும் பியர் அல்லது வார இறுதியில் குடிக்கும் ஒயின் ஆகியவையும் உங்கள் முகத்தில் தாக்கத்தை வெளிப்படுத்தக்கூடும்.

தொழில்துறை நிதியுதவியுடன் மேற்கொள்ளப்பட்ட ஓர் ஆய்வு, வாரத்துக்கு எட்டு யூனிட்டுகளுக்கும் அதிகமாக மது அருந்துபவர்களின் முகத்தில் சுருக்கங்கள் அதிகரிப்பதைக் கண்டறிந்தது.

இதற்கான காரணம் தெளிவாகத் தெரியவில்லை. ஆனால், மது உடலால் சர்க்கரையாக மாற்றப்படுவதன் காரணமாக இது நிகழக்கூடும் என மருத்துவர் மருதப்பு தெரிவிக்கிறார். மேலும், மது அருந்துவதால் நீரிழப்பு, ஆக்சிஜனேற்ற அழுத்தம், அழற்சி மற்றும் தூக்கத்தில் ஏற்படும் பாதிப்புகளும் இதற்குக் காரணமாக இருக்கலாம்.

துரதிர்ஷ்டவசமாக, மது அருந்திய பிறகு அதிக அளவில் தண்ணீர் குடிப்பது, மது போதைக்குப் பிந்தைய தலைவலி மற்றும் உடல் அசௌகரியத்தைக் குறைக்க உதவுவதைப் போல, சருமத்துக்கு அவ்வளவு பயனுள்ளதாக இருக்காது.

உடலில் போதுமான நீர்ச்சத்து இருப்பது பல்வேறு காரணங்களுக்காக முக்கியமானது. ஆனால், தண்ணீர் மற்றும் பிற திரவங்கள் நமது சருமத்தில் ஏற்படுத்தும் தாக்கம் குறித்து பல சமூக ஊடகப் பிரபலங்கள் கூறுவதைப் போலத் தெளிவான ஆதாரங்கள் இல்லை.

அதிக அளவில் தண்ணீர் குடிப்பது சருமத்தின் நீர்ச்சத்தை அதிகரிக்க உதவக்கூடும் என்று சில ஆய்வுகள் தெரிவிக்கின்றன. ஆனால், பல லிட்டர் தண்ணீரைக் குடிப்பது மட்டும் இளமையான சருமத்தைப் பெறுவதற்கான எளிய வழி என்பதற்கு மிகக் குறைவான ஆதாரங்களே உள்ளன.

"தினமும் இரண்டு லிட்டர் தண்ணீர் குடிப்பது உங்களை நன்றாக உணரச் செய்யலாம் (சிறுநீரகங்களுக்கும் உதவும்). ஆனால், சூப்பர் மாடல்கள் கூறுவதைப் போல, அதனால் நீங்கள் அற்புதமாகத் தோற்றமளிப்பீர்கள் என்பது உண்மையல்ல" என்கிறார் மருத்துவர் மருதப்பு.

அப்படியானால், எது உண்மையில் பலனளிக்கும்?

அளவோடு அருந்தும்போது, காபி வயதாவதைத் தடுக்கும் நன்மைகளைக் கொண்டிருக்கலாம் என்பதை அறிந்தால் நீங்கள் ஆச்சரியப்படலாம்.

அதில் ஆன்டிஆக்ஸிடன்ட்கள் நிறைந்துள்ளன. இவை செல்களில் ஏற்படும் ஆக்சிஜனேற்ற அழுத்தத்தைக் குறைப்பதுடன், தீங்கு விளைவிக்கும் கட்டற்ற மூலக்கூறுகளையும் செயலிழக்கச் செய்வதாகக் கண்டறியப்பட்டுள்ளது.

"இவை பெரும்பாலும் சுற்றுச்சூழலில் உள்ள நச்சுப் பொருட்கள், காற்று மாசுபாடு மற்றும் புற ஊதாக் கதிர்வீச்சு ஆகியவைதான். இவை கொலாஜனைச் சேதப்படுத்துகின்றன" என்று மருத்துவர் மருதப்பு விளக்குகிறார்.

உணவில் ஆன்டிஆக்ஸிடன்ட்களின் அளவை அதிகரிக்க, கருமையான நிறமுடைய பெர்ரி வகைப் பழங்களை (உதாரணமாக, புளூபெர்ரி) சாப்பிடவும், கிரீன் டீ குடிக்கவும், இரானிய உணவுகளில் பெரும்பாலும் பயன்படுத்தப்படும் சுமாக் என்ற மசாலாவைச் சமையலில் சேர்த்துக்கொள்ளவும் அவர் பரிந்துரைக்கிறார்.

கொலாஜனை நேரடியாக உண்பதைப் பொறுத்தவரை, அதன் நன்மைகள் குறித்து நிபுணர்களிடையே நீண்டகாலமாக விவாதம் இருந்து வருகிறது. ஆனால், அண்மையில் 113 ஆய்வுகளை உள்ளடக்கிய ஓர் அறிவியல் ஆய்வு, கொலாஜன் மாத்திரைகள் மற்றும் பொடிகளைத் தொடர்ந்து பயன்படுத்தினால் சருமத்துக்குச் சில நன்மைகள் கிடைக்கும் எனத் தெரிவித்துள்ளது.

"அவை உங்களைப் பத்து ஆண்டுகள் இளமையாகக் காட்டிவிடாது. ஆனால், சருமத்தின் நீர்ச்சத்தை மேம்படுத்துவதுடன், மெல்லிய சுருக்கங்களின் தோற்றத்தையும் குறைக்கின்றன. இதற்கான ஆதாரங்கள் அதிகரித்து வருகின்றன" என்கிறார் மருத்துவர் மருதப்பு.

நமது சருமத்தின் வயதைக் குறைக்க முடியுமா?

துரதிர்ஷ்டவசமாக, கேக் சாப்பிடுவதை நிறுத்திவிட்டு கேரட் சாப்பிடத் தொடங்குவதால் மட்டும், புருவங்களுக்கு இடையே காணப்படும் இரண்டு செங்குத்துக் கோடுகளும், கண்களின் ஓரங்களில் காகத்தின் பாதம் போன்ற வடிவில் காணப்படும் சுருக்கங்களும் மறைந்துவிடப் போவதில்லை.

சுருக்கங்கள் ஏற்படுவதற்கு முக்கியக் காரணம் கொலாஜன் இழப்புதான் என்கிறார் மருத்துவர் மருதப்பு. இது வயதாவதன் இயல்பான ஒரு பகுதியாகும்.

ஆனால், உணவுப் பழக்கத்தை மாற்றுவதன் மூலம் சருமத்தின் நிலையை மேம்படுத்த முடியாது என்று இதற்குப் பொருளல்ல.

"உங்கள் சருமம் ஒவ்வொரு 30 முதல் 40 நாட்களுக்கும் தன்னைப் புதுப்பித்துக்கொள்கிறது. எனவே, உணவுப் பழக்கத்தை மேம்படுத்துவதன் மூலம் உங்கள் சருமத்துக்கு எப்போதும் நன்மை செய்யலாம். இரண்டு வாரங்களிலேயே அதன் பலனை மிக விரைவாகக் காணவும் வாய்ப்புள்ளது" என்கிறார் மருத்துவர் மருதப்பு.

இதற்காக க்ளோ (GLOW) என்ற ஆங்கிலச் சுருக்கச் சொல்லின் அடிப்படையிலான உணவுப் பழக்கத்தைப் பின்பற்ற அவர் பரிந்துரைக்கிறார்.

- கீரை வகைகள் (Greens): கேல் மற்றும் கீரை போன்றவற்றில் பொட்டாசியம் மற்றும் மெக்னீசியம் அதிகம் உள்ளன. இவை சருமத்தின் நெகிழ்வுத்தன்மையுடன் தொடர்புடையவை என்று ஓர் ஆய்வு தெரிவித்துள்ளது.

- குறைந்த கொழுப்புள்ள புரத உணவுகள் (Lean protein): இவை கொலாஜன் உற்பத்திக்கு உதவக்கூடும்.

- எண்ணெய்கள் (Oils): கொழுப்பு நிறைந்த மீன்களில் காணப்படும் ஒமேகா-3 போன்றவை சருமத்தின் பாதுகாப்பு அடுக்கைப் பராமரிக்கவும், "உடலின் உட்புறத்திலிருந்து சருமத்தை ஈரப்பதத்துடன் வைத்திருக்கவும்" உதவும்.

- முழுத் தானியங்கள் (Wholegrains): இவை குடலில் உள்ள நுண்ணுயிரிகளுக்கு ஊட்டமளிக்கின்றன. "குடலில் நல்ல பாக்டீரியாக்கள் சமநிலையில் இருப்பது அழற்சியைக் குறைக்க உதவும்" என்கிறார் மருத்துவர் மருதப்பு.

இறுதியில், இவை அனைத்தையும் ஒட்டுமொத்தமாக அணுகுவதுதான் முக்கியம்.

"சருமம் வயதடையும் செயல்முறையை விரைவுபடுத்தக்கூடிய பல உணவுகள் இருப்பதால், உங்கள் ஊட்டச்சத்து முக்கியமானது. ஆனால், இது ஒட்டுமொத்தப் பிரச்னையில் ஒரு பகுதி மட்டுமே; முழுமையான தீர்வு அல்ல. முதலில், சூரிய ஒளியிலிருந்து சருமத்தைப் பாதுகாப்பது போன்ற அடிப்படையான விஷயங்களைச் சரியாகச் செய்ய வேண்டும்" என்கிறார் அவர்.

சருமம் ஆரோக்கியமாக முதுமையடைய உதவக்கூடிய ஆறு பழக்கங்கள்

- இது, பிபிசிக்காக கலெக்டிவ் நியூஸ்ரூம் வெளியீடு